သတင်းနှင့် လှုပ်ရှားမှုများ

            စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်းနှင့်အဖွဲ့သည် (၁၉.၁.၂၀၂၃)နှင့် (၂၀.၁.၂၀၂၃)ရက်နေ့ နံနက်(၁၀:၀၀)အချိန်တွင် မကွေးမြို့ပေါ်၌ ဈေးကွက်အတွင်း အများပြည်သူ သုံးစွဲလျက်ရှိသည့် အိမ်သုံးဆိုလာပြားများ ရောင်းချရာတွင် သင့်တင့်မျှတသော ‌စျေးနှုန်းဖြစ်စေရေးနှင့် အများပြည်သူထိခိုက် နစ်နာမှုမရှိစေရေးအတွက် ရောင်းချလျက်ရှိသည့် ဆိုလာနှင့် ဆက်စပ်ပစ္စည်းများ (Solar panel, Solar Invertor, Solar Battery) အရောင်းဆိုင်(၆)အား ကွင်းဆင်း၍ ဈေးနှုန်းများနှင့် ရောင်းချမှုအခြေအနေများအား လေ့လာခဲ့ပါသည်။ ထို့အတူ မြို့နယ်တာဝန်ခံများမှလည်း(၁၉.၁.၂၀၂၃)နှင့်(၂၀.၁.၂၀၂၃) ရက်နေ့များတွင် ချောက် မြို့နယ်တွင်(၂)ဆိုင်၊ ရေနံချောင်းမြို့နယ်တွင်(၁)ဆိုင်၊ တောင်တွင်းကြီးမြို့တွင်(၂)ဆိုင်၊ မြို့သစ်မြို့ တွင်(၁)ဆိုင်၊ နတ်မောက်မြို့ တွင်(၁)ဆိုင် စုစုပေါင်း (၇)ဆိုင်အား ကွင်းဆင်းလေ့လာခဲ့ကြောင်း သိရှိရပါသည်။

          မကွေး/ချောက် ခရိုင်အတွင်း၌ ဆိုလာနှင့်ဆက်စပ်ပစ္စည်းထုတ်လုပ်သည့် ကုမ္ပဏီများမရှိဘဲ၊ အိန္ဒိယနှင့်တရုတ်နိုင်ငံမှ တင်သွင်းသော ဆိုလာနှင့် ဆက်စပ်ပစ္စည်းများသာ ဆိုင်တင်ရောင်းချကြောင်း၊ ဆိုလာပြားများအား ဌာနဆိုင်ရာများမှ လျှပ်စစ်မြစ်ရေတင်နှင့် စိုက်ပျိုးရေးသုံးလုပ်ငန်းများတွင်သာ မြင်းကောင်ရေများသော ပစ္စည်းများအသုံးပြုခြင်း၊ တစ်ချို့စီးပွားရေးလုပ်ငန်းရှင် အနည်းစုမှသာ (Air Con) တစ်ကောင်ခွဲအထိ သုံးစွဲနိုင်သည့် ဆိုလာပြားများ အသုံးပြုကြ၍ ဝယ်မည့်သူ သေချာမှသာ မှာယူပေးကြောင်း သိရှိရပြီး စျေးကွက်အတွင်းဖြစ်ပေါ်နေသော စျေးနှုန်း များမှာ အိန္ဒိယနိုင်ငံထုတ် TATA (60W) ဆိုလာပြားတစ်ချပ်လျှင် ဝယ်စျေးကျပ်(၆၅၀၀၀)အား ကျပ်( ၆၈၀၀၀)ဖြင့် ရောင်းချ၍ အမြတ်(၃၀၀၀)ကျပ်ခန့်ရရှိကြောင်း ၊ 81 (150W) ဆိုလာတစ်ချပ်လျှင် ဝယ်စျေး(၂၇၅၀၀၀)ကျပ်အား (၂၇၈၀၀၀)ကျပ်ဖြင့် ရောင်းချ၍ အမြတ်(၃၀၀၀)ကျပ်ခန့် ရရှိကြောင်း၊ တရုတ်နိုင်ငံထုတ် Solar အားသွင်းမီးသီးများအား ဝယ်ရင်းစျေးအပေါ် အမြတ်ကျပ်(၇၀၀-၈၀၀-၁၀၀၀-၁၅၀၀)ခန့်သာ ပစ္စည်းအမျိုးအစားပေါ်မူတည်၍  အမြတ်အနည်းငယ်တင်၍သာ ‌ရောင်းချကြောင်း လုပ်ငန်းရှင်များထံမှ သိရှိရပြီး မကွေး/ချောက်ခရိုင်အတွင်း၌ ကျေးလက်ဒေသ၏ (၆၀) ရာခိုင်နှုန်းခန့် လျှပ်စစ်မီးရရှိနေပြီဖြစ်၍ Solar ပြားများကို တစ်ဆိုင်လျှင်  တစ်လပျမ်းမျှ (၃)ချပ် ခန့်သာရောင်းချရကြောင်းနှင့် ယခုအချိန်တွင် တရုတ်နိုင်ငံထုတ် Solar အားသွင်းမီးသီးများသာ အရောင်းအဝယ်ဖြစ်နေကြောင်း သိရှိရပါသည်။

DOCA(မကွေး)

        ရခိုင်ပြည်နယ် စားသုံးသူရေးရာဦးစီးဌာန၊ မောင်တောခရိုင် ဘူးသီးတောင်မြို့နယ်တာဝန်ခံ ဦးကျော်လှိုင် (ဦးစီးမှူး)နှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍     (၂၄-၁-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ဘူးသီးတောင်မြို့ မြို့မဈေးကြီးအတွင်း ဈေးဆိုင်များတွင် ရောင်းချနေသော စားသောက်ကုန်ပစ္စည်းများအား စားသုံးသူပြည်သူများ ဘေးအန္တရာယ်ကင်းရှင်းစွာဖြင့် ဝယ်ယူစားသုံးနိုင်ရေး ကုန်ပစ္စည်းများပေါ်၌ သတင်းအချက်အလက်များ ပြည့်စုံမှန်ကန်စွာဖော်ပြထားသော ကုန်ပစ္စည်းများကိုသာ ရွေးချယ်ဝယ်ယူသုံးစွဲနိုင်ရေး ရည်ရွယ်၍ ဈေးကွက်စစ်ဆေးဆောင်ရွက်ခဲ့ပါသည်။

       ထိုသို့ ကွင်းဆင်းစစ်ဆေးဆောင်ရွက်ရာတွင် စားသုံးသူရေးရာဦးစီးဌာနမှ မြို့နယ်တာဝန်ခံ ဦးကျော်လှိုင် (ဦးစီးမှူး)မှ ဈေးဆိုင်ပိုင်ရှင်များအား ရောင်းချနေသော ကုန်စည်များသည် ဝယ်ယူ စားသုံးသူ မိဘပြည်သူများအား ဘေးဥပါဒ်မဖြစ်စေရေးအတွက် မိမိတို့နိုင်ငံမှ သက်ဆိုင်ရာဌာနများ၏ ထောက်ခံချက်ပါရှိမှု၊ ကုန်အညွှန်းအမှတ်အသားများကို မြန်မာဘာသာဖြင့်ဖြစ်စေ (သို့) မြန်မာဘာသာနှင့် အခြားဘာသာတွဲလျက်ဖော်ပြထားသော ကုန်စည်များကို ဦးစားပေးရောင်းချရန် လိုအပ်ပါကြောင်း၊ စားသုံးသူရေးရာဦးစီးဌာန၏ ၂၀၁၉ စားသုံးသူကာကွယ်ရေးဥပဒေအရ မည်သည့် စီးပွားရေးလုပ်ငန်းရှင်မဆို ကုန်ပစ္စည်းများတွင် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြရန်လိုအပ်ပြီး မြန်မာဘာသာ (သို့) မြန်မာဘာသာနှင့် အခြားဘာသာတွဲလျက်ဖော်ပြရမည်ဖြစ်သည့်အတွက် ရောင်းချသည့် ဈေးဆိုင်လုပ်ငန်းရှင်များအနေဖြင့်လည်း စားသုံးသူကာကွယ်ရေးဥပဒေ ပြဌာန်းချက်များအား လိုက်နာဆောင်ရွက်ရန် လိုအပ်ပါကြောင်း အသိပညာပေးပြောကြားပြီး ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)

    မွန်ပြည်နယ်၊ ကျိုက်ထိုမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံးရှိ လူထုအခြေပြုဗဟိုဌာနခန်းမတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ကျိုက်ထိုခရိုင် စားသုံးသူရေးရာဦးစီးဌာနတို့ ပူးပေါင်းပြီး ၂၀၂၃ ခုနှစ်၊ ဇန်နဝါရီ (၂၀) ရက်နေ့ မွန်းလွဲ(၂)နာရီအချိန်က စားသုံးသူကာကွယ်ရေးဥပဒေနှင့် ကုန်ညွှန်းအမှတ်အသားအကြောင်း သိကောင်းစရာ Talk Show ဆွေးနွေးပွဲ ကျင်းပပြုလုပ်ခဲ့ပါသည်။ဆွေးနွေးပွဲတွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ  ဦးစီးအရာရှိ ဒေါ်သန်းသန်းမော်က အသိပညာပေး Talk Show အစီအစဉ် ပြုလုပ်ရသည့်ရည်ရွယ်ချက်ကို ရှင်းလင်းပြောကြားခဲ့ပြီး စားသုံးသူရေးရာဦးစီးဌာန၊ ကျိုက်ထိုခရိုင်ဦးစီးမှူးက စားသုံးသူရေးရာဦးစီးဌာန၏ အသစ်ထပ်မံပြောင်းလဲလိုက်သည့် ဆောင်ပုဒ်၊ မျှော်မှန်းချက်၊ ရည်မှန်းချက်နှင့် လုပ်ကိုင်ဆောင်ရွက်နေမှုအခြေအနေ၊ ကွင်းဆင်းစစ်ဆေးရာတွင် အဓိကထားစစ်ဆေးသည့် ထုတ်ကုန်များအကြောင်း၊ စီမံခန့်ခွဲရေးနည်းလမ်းအရ အရေးယူခြင်းအခြေအနေ၊ ပြစ်မှုပြစ်ဒဏ်များအကြောင်းနှင့် ကုန်အညွှန်းအမှတ်အသားဖော်ပြခြင်းတို့နှင့်ပတ်သက်၍ သိကောင်းစရာများ စသည်တို့ကို အကျယ်တဝင့် ရှင်းလင်းဆွေးနွေးခဲ့ပါသည်။

DOCA(မွန်)

      ၂၀၂၃ ခုနှစ် ဇန်နဝါရီလ ၂၀ရက်နေ့တွင် စားသုံးသူရေးရာဦးစီးဌာန၊ ကျိုက်ထိုမြို့နယ်တာဝန်ခံနှင့် ဝန်ထမ်းများသည် ကျိုက်ထိုမြို့ရှိ ဆေးဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

    ထို့သို့ ဈေးကွက်စောင့်ကြည့်စစ်ဆေးရာတွင် ကျိုက်ထိုမြို့ပေါ်ရှိ ဆေးဆိုင်(၈)ဆိုင်အား ဈေးကွက်စောင့်ကြည့်စစ်ဆေးခဲ့ပြီး အဆိုပါ ဆေးဆိုင်များတွင် မှတ်ပုံတင်ထားခြင်းမရှိသော တရားမဝင်ဆေးဝါးများအား ရောင်းချခြင်းရှိ/မရှိ စစ်ဆေးခဲ့ရာ တရားမဝင်ဆေးများ ရောင်းချခြင်းမရှိကြောင်းတွေ့ရှိရပါသည်။

     ထို့နောက် ဆေးဆိုင်ပိုင်ရှင်များအား မှတ်ပုံတင်ထားခြင်းမရှိသော ဆေးဝါးများကို ရောင်းချခြင်းမပြုရန်၊ သက်တမ်းလွန်သောဆေးဝါးများကို ရောင်းချခြင်းမပြုရန်နှင့် သက်ဆိုင်ရာဌာနများ၏ ထောက်ခံချက်မပါရှိသောဆေးဝါးများကို ရောင်းချခြင်းမပြုရန် အသိပညာပေးဆွေးနွေးခဲ့ပါသည်။

DOCA(မွန်)

      စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံနှင့် ဝန်ထမ်းများသည် ၂၃-၁-၂၀၂၃ ရက်နေ့တွင် ဘီးလင်းမြို့၊ ရပ်ကွက်များရှိ အခြေခံလူသုံးကုန်၊ စားသောက်ကုန်များ ရောင်းချလျက်ရှိသော စတိုးဆိုင်များအား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

     ထိုသို့ ဆောင်ရွက်ရာတွင် COFFEE SHOP (very good) ကော်ဖီကဲ့သို့ အန္တရာယ်ဖြစ်စေသည့် စားသောက်ကုန်များ တရားမဝင် ရောင်းဝယ်ဖောက်ကားမှုရှိ/မရှိစစ်ဆေးခဲ့ရာ အဆိုပါကော်ဖီများ ရောင်းချမှုမရှိကြောင်းသိရှိရပါသည်။ ထို့နောက် စားသုံးသူကာကွယ်ရေးဥပဒေ အခန်း (၁၈) ပါ ကုန်အညွှန်းအမှတ်အသားနှင့်စပ်လျဉ်းသည့် သိကောင်းစရာများကို ဆိုင်ရှင်များအား ရှင်းလင်းဆွေးနွေးခဲ့ကြောင်းသိရှိရပါသည်။

DOCA(မွန်)