ပြည်ပကုန်သွယ်မှုသတင်းများ

              ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ နိုင်ငံခြားရေး ၀န်ကြီး Rath Saravuth သည် ကမ္ဘောဒီးယားနိုင်ငံဆိုင်ရာ တောင်အာဖရိက သံအမတ် Darkey Ephriam Africa နှင့် တွေ့ဆုံပြီး နှစ်နိုင်ငံကြား ကုန်သွယ်မှုနှင့်စီးပွားရေးဆက်ဆံရေး ပိုမိုမြှင့်တင် နိုင်ရေး နည်းလမ်းများကို ဆွေးနွေးခဲ့ကြသည်။ Saravuth က သံအမတ်ကြီး အား နှစ်နိုင်ငံကြား ကုန်သွယ်မှု ပူးပေါင်းဆောင်ရွက်မှုတွင် တိုးတက်မှုကို အလေးပေးပြောကြားခဲ့ပြီး နှစ်နိုင်ငံ ကူးလူးဖလှယ်မှုကို တိုးချဲ့ဆောင်ရွက်နိုင်မည့် အခွင့်အလမ်းများကို အလေးပေးပြောကြားခဲ့သည်။ သံအမတ်ကြီး Darkey Ephriam Africa က ပန်းသီး၊ အုန်းသီး၊ သစ်တော်သီးနှင့် ဘလူးဘယ်ရီ သီးများ အပါအဝင် တောင်အာဖရိကနိုင်ငံသို့ အလားအလာရှိသော လယ်ယာထွက်ကုန်များ တင်ပို့ရောင်းချနိုင်ရေးနှင့် နှစ်နိုင်ငံအကြား အလားအလာရှိသော ကုန်စည်ဖလှယ်ရေး တိုးမြှင့်ရေး ဆိုင်ရာ နားလည်မှုစာချွန်လွှာကို လက်မှတ်ရေးထိုးကြရန် အဆိုပြုခဲ့သည်။ တုံ့ပြန်သည့်အနေဖြင့် နိုင်ငံခြားရေးဝန်ကြီးက အဆိုပါအဆိုပြုချက်များကို ကြိုဆိုခဲ့ပြီး အထူးသဖြင့် တောင်အာဖရိက ဘက်မှ ဝယ်လိုအားရှိသော ဆန်ထွက်ကုန်များနှင့် စပ်လျဉ်းသည့် ပုဂ္ဂလိက ကဏ္ဍနှင့် စီးပွားရေး တွေ့ဆုံပွဲများနှင့် ကုန်သွယ်မှုပြပွဲများကြား ညှိနှိုင်းဆောင်ရွက်နိုင်ရန် အလားအလာများကို နှစ်ဖက်စလုံးက စူးစမ်းသင့်သည်ဟု အကြံပြုခဲ့သည်။ နိဂုံးချုပ်အနေဖြင့် ကမ္ဘောဒီးယား၏ ဒေသတွင်းနှင့် နှစ်နိုင်ငံလွတ်လပ်သော ကုန်သွယ်မှုသဘောတူညီချက်များမှ ကုန်သွယ်မှု အကျိုးကျေးဇူးများ ရရှိနိုင်စေရန် တောင်အာဖရိက ရင်းနှီးမြှုပ်နှံသူများနှင့် စီးပွားရေး လုပ်ငန်းရှင်များအတွက် ကမ္ဘောဒီးယား၏ ရင်းနှီးမြှုပ်နှံမှုနှင့် စီးပွားရေး အလားအလာများကို မြှင့်တင်ရာတွင် ကူညီပေးရန် သံအမတ်ကြီး Darkey Ephriam Africa အား တောင်းဆိုခဲ့သည်။

DOCA (ရန်ကုန်)

        Toyota Tsusho ကော်ပိုရေးရှင်းသည် ၂၀၂၆ ခုနှစ်၊ အစောပိုင်းတွင် မော်တော်ယာဉ် အပိုပစ္စည်းများ၊ ဆက်စပ်ပစ္စည်းများနှင့် ကျွမ်းကျင်မှုဖွံ့ဖြိုးတိုးတက်ရေးတို့ကို အထူးအာရုံစိုက် ကာ ၎င်း၏သင်တန်းကျောင်းကို ဖွင့်လှစ်သွားမည်ဖြစ်ကြောင်း ကုမ္ပဏီ၏ ထိပ်တန်းအရာရှိ တစ်ဦးက ပြောကြားခဲ့သည်။ ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီး Cham Nimul သည် Toyota Tsusho ကော်ပိုရေးရှင်း၏ အကြီးတန်းအမှုဆောင်အရာရှိများနှင့် အတူ ၄-၉-၂၀၂၅ ရက်နေ့က ဂျပန်နိုင်ငံ၊ Osaka မြို့၌ ကုမ္ပဏီ၏ဌာနခွဲအမှုဆောင်အရာရှိချုပ် Harada Shigeru ဦးဆောင်သည့် အမှုဆောင်အရာရှိချုပ်နှင့် တွေ့ဆုံဆွေးနွေးခဲ့ကြသည်။ အဆိုပါ တွေ့ဆုံပွဲသို့ ဂျပန်နိုင်ငံဆိုင်ရာ ကမ္ဘောဒီးယားသံအမတ်ကြီး Tuy Ry နှင့်အတူ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ အကြီးတန်း အရာရှိကြီးများ တက်ရောက်ခဲ့ကြသည်။ ကုမ္ပဏီသည် ကမ္ဘောဒီးယားနိုင်ငံရှိ မော်တော်ကားကဏ္ဍ ကျွမ်းကျင်မှုဖွံ့ဖြိုးတိုးတက်ရေးတွင် အရေးပါသောအချက်ဖြစ်ကြောင်း Shigeru မှ ပြောကြားခဲ့ပြီး Toyota သည် ၎င်း၏ သင်တန်းကျောင်းကို ၂၀၂၆ ခုနှစ်အစောပိုင်းတွင် စတင်ဖွင့်လှစ်တော့မည်ဖြစ်ကြောင်း ဆက်လက် ပြောကြားခဲ့သည်။ ကုမ္ပဏီ၏ သတင်းရင်းမြစ်များအရ အဆိုပါသင်တန်းကျောင်းသည် အလုပ်သမားနှင့် အသက်မွေးဝမ်းကျောင်းလေ့ကျင့်ရေးဝန်ကြီးဌာန၏ ပံ့ပိုးကူညီမှုဖြင့် လုပ်ဆောင် သွားမည်ဖြစ်ကြောင်း သိရသည်။ Shigeru သည် နိုင်ငံအတွင်း ကုမ္ပဏီ၏ ရင်းနှီးမြှုပ်နှံမှုနှင့် စီးပွားရေးလုပ်ငန်းများကို ဆက်လက်ပံ့ပိုးကူညီဆောင်ရွက်ပေးမှုအတွက် ဝန်ကြီး Cham Nimul နှင့် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနအား ကျေးဇူး တင်ရှိကြောင်း ပြောကြားခဲ့သည်။ Nimul သည် ကမ္ဘောဒီးယားပြည်သူများအတွက် အလုပ်အကိုင် များစွာဖန်တီးပေးခဲ့ပြီး နည်းပညာလွှဲပြောင်းမှု လွယ်ကူစေသည့် ၎င်း၏မော်တော်ကားတပ်ဆင်စက်ရုံကို တည်ထောင်ခြင်းဖြင့် ကမ္ဘောဒီးယားကို ရင်းနှီးမြုပ်နှံမည့်နေရာအဖြစ် ရွေးချယ်သည့် အတွက် Toyota အား ကျေးဇူးတင်ရှိကြောင်း ပြောကြားခဲ့သည်။

DOCA (ရန်ကုန်)

             Ample Agro Product Co., Ltd. မှ ကမ္ဘောဒီးယားနိုင်ငံသို့ ပြုပြင်ပြီး သီဟိုဠ်စေ့ ၁၄ တန် အား အီတလီနိုင်ငံသို့ ၄-၉-၂၀၂၅ ရက်နေ့က တရားဝင်တင်ပို့ခဲ့ပြီး ကုန်ထုတ်စွမ်းအား မြှင့်တင်ရန်၊ တန်ဖိုးမြှင့်လုပ်ငန်းစဉ်နှင့် ပို့ကုန်ယှဉ်ပြိုင်နိုင်စွမ်းမြှင့်တင်ရန် ကြိုးပမ်းမှုတွင် ကမ္ဘောဒီးယားနိုင်ငံ၏ ကြိုးပမ်းမှုသမိုင်းမှတ်တိုင်တစ်ခု အဖြစ် မှတ်တမ်းတင်ခဲ့သည်။ အီတလီ နိုင်ငံသို့ သီဟိုဠ်စေ့တင်ပို့ရောင်းချမှု ဖွင့်ပွဲအခမ်းအနားသို့ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန (MoC) လက်ထောက်အတွင်းဝန် Chhor Sunhong နှင့် ကမ္ဘောဒီးယားနိုင်ငံဆိုင်ရာ EU သံအမတ်ကြီး Igor Driesmans၊  ကမ္ဘောဒီးယားနိုင်ငံဆိုင်ရာ ဗြိတိန်သံအမတ် Dominic Williams၊  ကမ္ဘောဒီးယားသီဟိုဠ်စေ့အဖွဲ့ချုပ် (CCF) ၏ ဥက္ကဋ္ဌနှင့် ဘုတ်ဒါရိုက်တာ An Dara၊  Ample Agro Products Co., Ltd. ၏ CEO ဖြစ်သူ Sambath Kalyan နှင့် အခြားသက်ဆိုင်သူများ တက်ရောက်ခဲ့ကြသည်။ အခမ်းအနားတွင် Sunhong က သီဟိုဠ်စေ့ သည် အဓိကကျသော စိုက်ပျိုးရေး စက်မှုသီးနှံဖြစ်ပြီး ကမ္ဘေဒီးယားနိုင်ငံအစိုးရမှ ဦးစားပေး ကုန်စည်များထဲမှ တစ်ခုဖြစ်ကြောင်း ပြောကြားခဲ့သည်။ ကမ္ဘောဒီးယားသည် ကုန်ထုတ်စွမ်းအား တိုးမြင့်ရေး၊ စီမံဆောင်ရွက်နိုင်မှု ချဲ့ထွင်ရန်နှင့် သီဟိုဠ်စေ့ကဏ္ဍမှ အမြတ်အစွန်းပိုမိုရရှိစေမည့် ပို့ကုန်ယှဉ်ပြိုင်နိုင်စွမ်းကို အားကောင်းစေရန် လုပ်ဆောင်နေကြောင်း ၎င်းက အလေးပေး ပြောကြားခဲ့သည်။ ဝန်ကြီးဌာနသည် ထောက်ပံ့ရေးကွင်းဆက် ရေရှည်တည်တံ့ခိုင်မြဲစေရန်၊ ပြည်တွင်းဈေးကွက်နှင့် တင်သွင်းသူများကြား ချိတ်ဆက်မှုအားကောင်းစေရန်၊ ရိတ်သိမ်းရာသီ အတွင်း ထုတ်ကုန်များပိတ်ဆို့မှုကိုလျှော့ချရန် လယ်သမားများအားစျေးကွက်ရှာဖွေရာတွင် အထောက်အကူဖြစ်စေရန်နှင့် နိုင်ငံတော်နှင့် နိုင်ငံတကာဈေးကွက်များသို့ တင်ပို့ရောင်းချ နိုင်စေရန် ပံ့ပိုးကူညီမှုများ ပြုလုပ်ရန် ဝန်ကြီးဌာနက ဆက်လက်လေ့လာလျက် ရှိကြောင်း Sunhong  က ဆက်လက်ပြောကြားခဲ့သည်။ Ample Agro Products Co., Ltd. ၏ CEO ဖြစ်သူ Sambath Kalyan က ကုမ္ပဏီ၏ ပထမဆုံး သီဟိုဠ်စေ့သည် အီတလီသို့ တင်ပို့မှု စုစုပေါင်း ၁၄ တန်ရှိပြီး အောက်တိုဘာလတွင် မလေးရှားနှင့် စင်ကာပူသို့ ထပ်မံတင်ပို့ရန် စီစဉ်ထားကြောင်း နှင့် UK သို့ နိုဝင်ဘာလတွင် ပို့ကုန်များတင်ပို့ခြင်းပြုလုပ်ရန် စီစဉ်ထားကြောင်း ပြောကြားခဲ့သည်။ ဒေသထွက်ကုန်များ ပိုမိုမြှင့်တင်ခြင်းဖြင့် ကမ္ဘောဒီးယား စိုက်ပျိုးရေးနှင့် တောင်သူလယ်သမားများ၏ ထုတ်ကုန်များကို တန်ဖိုးမြှင့်ပေးခြင်းဖြင့် နိုင်ငံတော်၏ စီးပွားရေးဖွံ့ဖြိုးတိုးတက်မှုကို အထောက်အကူဖြစ်စေမည်ဟု Kalya က ဆက်လက်ပြောကြားခဲ့ သည်။ ကမ္ဘောဒီးယား သီဟိုဠ်စေ့အဖွဲ့ချုပ် (CCF) ၏ ဥက္ကဋ္ဌ An Dara ၏ အဆိုအရ ၂၀၂၅ ခုနှစ် ဇွန်လအထိ ကမ္ဘောဒီးယားနိုင်ငံသည် ဗီယက်နမ်သို့ သီဟိုဠ်စေ့အကြမ်း တန်ချိန် ၉၁၀,၀၀၀ ကျော် တင်ပို့ခဲ့ပြီး ပြည်တွင်းတွင် ပြုပြင်ခြင်းနှင့် အခြားနိုင်ငံများသို့တင်ပို့ခြင်းတို့မှ အမေရိကန်ဒေါ်လာ ၁ ဘီလီယံကျော် ရရှိခဲ့ကြောင်း သိရသည်။

DOCA (ရန်ကုန်)

            ၂၀၂၅ ခုနှစ် ပထမ ၈ လတွင် ကမ္ဘောဒီးယားနိုင်ငံသည် စုစုပေါင်း ရင်းနှီးမြှုပ်နှံမှု ကန်ဒေါ်လာ ၇.၂ ဘီလီယံ တန်ဖိုးရှိသော စီမံကိန်းပေါင်း ၄၉၁ ခုကို အတည်ပြုခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၇၁ ရာခိုင်နှုန်း တိုးလာခဲ့ကြောင်း ကမ္ဘောဒီးယားဖွံ့ဖြိုး တိုးတက်ရေးကောင်စီ (CDC) မှ ၄-၉-၂၀၂၅ ရက်နေ့က အစီရင်ခံစာထုတ်ပြန်ခဲ့သည်။ အစီရင် ခံစာအရ ကမ္ဘောဒီးယား ရင်းနှီးမြှုပ်နှံမှုဘုတ်အဖွဲ့ (CIB) သည် ၂၀၂၅ ခုနှစ် ဇန်နဝါရီလမှ ဩဂုတ်လအထိ စီမံကိန်းပေါင်း ၄၉၁ ခုကို မှတ်ပုံတင်ခဲ့ပြီး စုစုပေါင်း ရင်းနှီးမြှုပ်နှံမှု ပမာဏ ကန်ဒေါ်လာ ၂.၅ ဘီလီယံ တိုးလာပြီး ၂၀၂၄ ခုနှစ်မှ ၅၀ ရာခိုင်နှုန်း တိုးလာခဲ့သည်။ ဩဂုတ်လ တစ်လ တည်းတွင် CIB မှ ခန့်မှန်းခြေ ကန်ဒေါ်လာ ၆၀၈ သန်းတန်ဖိုးရှိ ရင်းနှီးမြှုပ်နှံမှု စီမံကိန်း ၅၁ ခုကို အတည်ပြုပေးခဲ့ပြီး အဆိုပါပရောဂျက်များသည် အလုပ်အကိုင်သစ် ၂၇,၀၀၀ ခန့် ဖန်တီးပေးနိုင်မည်ဟု မျှော်မှန်းထားသည်။

DOCA (ရန်ကုန်)

    တစ်စက္ကန့်ကို ၁ ကီလိုမီတာအမြန်နှုန်းနဲ့ အားသွင်းနိုင်စေမယ့် Changan ရဲ့ Nevo A06 တရုတ် နိုင်ငံမှ မော်တော်ကားထုတ်လုပ်ရေးကုမ္ပဏီ တစ်ခုဖြစ်တဲ့ Changan က ‌သူတို့ရဲ့နောက်ဆုံးပေါ် ဆီဒင်ကားတစ်မျိုးဖြစ်တဲ့ Nevo A06 ကို တရားဝင်ထုတ်ဖော်မိတ်ဆက်လိုက်ပါပြီ။ သူက ဘက်ထရီ-လျှပ်စစ်စွမ်းအင်သုံးယာဉ် (BEV)နဲ့ ခရီးဝေးသွားလျှပ်စစ်စွမ်းအင်သုံးယာဉ် (EREV)ဆိုပြီး အမျိုး အစားနှစ်မျိုးနဲ့ ထွက်ရှိလာတာပါ။ ဘယ်လိုအမျိုးအစားမဆိုဖြစ်စေ သူတို့သုံးထားတဲ့ အခြေခံနည်း ပညာက အဆင့်မြင့် 6C ဘက်ထရီ ဖြစ်ပြီး အဲဒီနည်းပညာကြောင့် ကားကိုအားသွင်းရာမှာ အလွန်လျင်မြန်လှတဲ့နှုန်းနဲ့ အားသွင်း နိုင်မှာဖြစ်ပါတယ်။ နှုန်းကတော့ တစ်စက္ကန့်ကို ၁ ကီလိုမီတာ နှုန်းနဲ့ပါ။ ဒါဟာ ဆီဒင်ကားတွေထဲမှာ အားသွင်းအမြန်ဆုံးနှုန်း ဖြစ်ပါတယ်။ ဝယ်ယူသူတွေအနေနဲ့ BEV အမျိုးအစားထဲမှာ ဘက်ထရီပါဝင်မှု ပမာဏသုံးမျိုးထဲကမှ ရွေးချယ်နိုင်မှာ ဖြစ်ပါတယ်။ စွမ်းရည်အမြင့်ဆုံးရွေးချယ်မှုကတော့ မိုင်ပေါင်း ၃၉၁ မိုင်အထိသွားနိုင်စေမှာဖြစ်ပါတယ်။ EREV အမျိုးအစားယာဉ်မှာ လျှပ်စစ်စွမ်းအင်ကို အသုံးပြုထားတဲ့အပြင် မြင်းကောင်ရေ ၉၇ ကောင်အား ရှိတဲ့ အင်ဂျင်တစ်လုံးကိုပါ တပ်ဆင်ပေးထားပါတယ်။ သူက  လျှပ်စစ်စွမ်းအင်သီးသန့်နဲ့တင် ၁၁၂ မိုင်သွားနိုင်မှာပါ။

Source: ကိုထက်                                                           

Doca(ပြည်ထောင်စုနယ်မြေ)