ပြည်ပကုန်သွယ်မှုသတင်းများ

      အီသီယိုးပီးယားနိုင်ငံအနေဖြင့် ပဲမျိုးစုံနှင့် ဆီထွက်သီးနှံများအား တင်ပို့မှုလုပ်ကိုင်သည့် ကမ္ဘာ့ထိပ်တန်းနိုင်ငံတစ်ခု ဖြစ်လာစေရေးအတွက် ပြုပြင်ပြောင်းလဲမှုများစွာနှင့်အတူ စုပေါင်း အားထုတ် ကြိုးပမ်းလျက်ရှိသည်ဟု အဒစ်အဘာဘာမြို့တွင် ၂၀၂၄ ခုနှစ် နိုဝင်ဘာလ ၁၉ ရက် နေ့၌ ကျင်းပသော ၁၃ ကြိမ်မြောက် နိုင်ငံတကာ ပဲမျိုးစုံနှင့် ဆီထွက်သီးနှံများ ညီလာခံဆွေးနွေးပွဲ၏ ဖွင့်ပွဲအခမ်းအနားတွင် ကုန်သွယ်ရေးနှင့် ဒေသတွင်းပူးပေါင်းဆောင်ရွက်မှုဝန်ကြီး Kasahun Gofe က ပြောကြားခဲ့သည်။

     အဆိုပါသီးနှံများသည် အီသီယိုးပီးယားနိုင်ငံ၏ ပို့ကုန်ဝင်ငွေရရှိမှုနှင့် သန်းပေါင်းများစွာသော တောင်သူများ၏ လူနေမှုဘဝကို မြှင့်တင်ရန်အတွက် အရေးပါကြောင်း၊ အခြေခံအဆောက်အအုံ ဖွံ့ဖြိုးတိုးတက်ရေး လုပ်ဆောင်ခြင်း၊ ထုတ်ကုန်အရည်အသွေးတိုးတက်စေခြင်းနှင့် ကုန်စည် မျိုးစုံခွဲခြား၍ အလေးပေးဆောင်ရွက်မှုတို့နှင့်အတူ အီသီယိုးပီးယားနိုင်ငံအနေဖြင့် ကမ္ဘာ့ပဲမျိုးစုံနှင့် ဆီထွက်သီးနှံဈေးကွက်တွင် အဓိကကျသည့်အခန်းမှ ပါဝင်လျက် ၎င်းသီးနှံများကဏ္ဍ၏ စဉ်ဆက်မပြတ်တိုးတက်မှုကို သေချာခိုင်မာစေအောင် လုပ်ကိုင်လျက်ရှိကြောင်း၊ အစိုးရသည် နိုင်ငံခြား ရင်းနှီးမြှုပ်နှံသူများအတွက် ဈေးကွက်များဖွင့်လှစ်ပေးခြင်း၊ ဈေးကွက်ကမောင်းနှင်သည့် ငွေလဲလှယ်မှုနှုန်းထားစနစ်ကို ကျင့်သုံးခြင်း၊ တန်ဖိုးမြင့်ထုတ်ကုန်များ ထုတ်လုပ်ရန်နှင့် အလုပ်အကိုင်များ ဖန်တီးရန်အတွက် စိုက်ပျိုးရေးအခြေခံ ပြုပြင်ထုတ်လုပ်မှုများကို ဦးစားပေးလုပ်ဆောင်ခြင်း တို့အပါအဝင် အဓိကကျသော ပြုပြင်ပြောင်းလဲမှုများကို ဆောင်ရွက်ခဲ့ကြောင်းဖြင့် ဝန်ကြီး Kasahun က ပြောဆိုခဲ့သည်။

     အီသီယိုးပီးယား၏ အသစ်ပြောင်းလဲဖော်ဆောင်ခဲ့သော စိုက်ပျိုး‌ရေးဆိုင်ရာ မူဝါဒများသည် ကုန်ထုတ်လုပ်မှု မြှင့်တင်ရန်၊ တန်ဖိုးကွင်းဆက်များ တိုးတက်ကောင်းမွန်စေရန်နှင့် လယ်သမားများနှင့် ထုတ်လုပ်သူများအတွက် ဈေးကွက်ဝင်ရောက်မှုကို ချဲ့ထွင်နိုင်ရန် ရည်ရွယ်ခြင်းဖြစ်သည်။ အစိုးရသည် ပြည်ပသို့ ကုန်စည်များတင်ပို့မှုနှင့်စပ်လျဉ်း၍ ဖြေလျှော့မှုများ လုပ်ဆောင်ခဲ့ရာတွင် နိုင်ငံခြားကုမ္ပဏီများအနေဖြင့် အီသီယိုးပီးယား လယ်သမားများနှင့် ပြုပြင်ထုတ်လုပ်သူများထံမှ စိုက်ပျိုးရေးထုတ်ကုန်များကို တိုက်ရိုက်ဝယ်ယူရန် ခွင့်ပြုခဲ့ခြင်းမှာ မှတ်သားဖွယ်ရာ လုပ်ဆောင်ချက်ပင်ဖြစ်သည်။

     ယခုကဲ့သို့ အစိုးရ၏ မူဝါဒပြောင်းလဲမှုသည် အီသီယိုးပီးယားနိုင်ငံ၌ ရင်းနှီးမြှုပ်နှံမှုနှင့် ကုန်သွယ်မှုလုပ်ငန်းများကို လုပ်ကိုင်ရန် စိတ်ဝင်စားမှုရှိသော နိုင်ငံခြားစီးပွားရေးလုပ်ငန်းရှင် အသိုင်းအဝန်းအတွက် သတင်းကောင်းပင်ဖြစ်ကြောင်း၊ အီသီယိုးပီးယားနိုင်ငံ အနေဖြင့် စီးပွားရေးဆိုင်ရာ ဖြေလျှော့မှုများအား အစပြုလုပ်ဆောင်ချက်အဖြစ် နိုင်ငံခြားငွေလဲလှယ်မှု စီမံခန့်ခွဲခြင်းကို ပိုမိုကောင်းမွန်စေရန် မေခရိုစီးပွားရေး ပြုပြင်ပြောင်းလဲမှုများ ဆောင်ရွက်ထားနှင့်ပြီးဖြစ်ကြောင်း၊ ကမ္ဘာ့ဈေးကွက်သို့ တင်ပို့နိုင်မည့်အလားအလာရှိသော ဖော်ထုတ်သုံးစွဲခြင်းမပြုရသေးသည့် အရင်းအမြစ်များကို နိုင်ငံ၌ ပိုင်ဆိုင်ထားကြောင်း၊ သို့ဖြစ်၍ ပို့ကုန်မျိုးစုံအပေါ် အလေးပေးမှုနှင့်အတူ အထူးပြုဆောင်ရွက်မှုကို လုပ်ကိုင်လျက်ရှိကြောင်း၊ ပို့ကုန်များ၏ အရည်အသွေးနှင့်အရေအတွက်တို့အရ ယှဉ်ပြိုင်နိုင်စွမ်း တိုးတက်ကောင်းမွန်စေရေးအတွက် ကုန်သွယ်မှုမူဝါဒများ၊ ပို့ကုန်မြှင့်တင်ရေး မဟာဗျူဟာများ၊ အီးကောမာ့စ် မဟာဗျူဟာများကို ထူထောင်ထားရှိပြီးဖြစ်ကြောင်း၊ ယခုကျင်းပသော ၁၃ ကြိမ်မြောက် နိုင်ငံတကာ ပဲမျိုးစုံနှင့် ဆီထွက်သီးနှံများ ညီလာခံဆွေးနွေးပွဲမှ နိုင်ငံ တကာ မိတ်ဖွဲ့လုပ်ကိုင်မှုများ၊ ကုန်သွယ်ရောင်းဝယ်ရန် သဘောတူညီမှုများကို ဆောင်ကြဉ်းပေးမည်ဟု မျှော်လင့်ကြောင်းဖြင့် ဝန်ကြီး Kasahun က ပြောကြားခဲ့သည်။

Source: www.fanabc.com, 19 Nov 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

               ၂၀၂၄ ခုနှစ်၏ ပထမဆယ်လတွင် ဗီယက်နမ်သည်အမေရိကန်ဒေါ်လာ ၆.၄ ဘီလီယံ တန်ဖိုး UK သို့တင်ပို့ခဲ့ပြီး၂၀၂၃ ခုနှစ်တူညီသည့်ကာလထက် ၂၂ ရာခိုင်နှုန်းမြင့်တက်ခဲ့ကြောင်း ဗီယက်နမ်နိုင်ငံအကောက်ခွန်အထွေထွေဦးစီးဌာန၏ တင်ပြချက်အရသိရပါသည်။ အောက်တိုဘာလတစ်လတည်းတွင် ဗီယက်နမ်သည် အမေရိကန်ဒေါ်လာ၆၈၇.၂ သန်းတန်ဖိုး UK သို့တင်ပို့ခဲ့ပြီး စက်တင်ဘာလကထက် ၁၃ ရာခိုင်နှုန်းမြင့်တက်ခဲ့ကြောင်းသိရပါသည်။ ထိုဆယ်လတာကာလ ကြီးထွားမှုသည်စက်ပစ္စည်းများ၊ စက်တပ်ဆင်ပစ္စည်းများ၊ အပိုပစ္စည်းများ၊ ကွန်ပြူတာများ၊ အီလတ်ထရောနစ်ပစ္စည်းများ၊ ဖိနပ်နှင့်အဝတ်အထည်များအစရှိသည့် အချို့သောအဓိကပို့ကုန်များမှ ကြီးမားသောဝင်ငွေရရှိမှု၏ မောင်းနှင်အားကြောင့်ဖြစ်ကြောင်း သိရပါသည်။ ထိပ်ဆုံးက ဦးဆောင်နေသည့် ပို့ကုန်အမျိုးအစားဖြစ်သည့် စက်ပစ္စည်း၊ စက်တပ်ဆင်ပစ္စည်းနှင့်အပိုပစ္စည်းများတင်ပို့မှုမှ အမေရိကန်ဒေါ်လာ ၁.၁၄ ဘီလီယံရရှိခဲ့ပြီး ၂၀၂၃ တူညီသည့်ကာလထက် ၃၉.၇ ရာခိုင်နှုန်းမြင့်တက်ခဲ့ကာ စုစုပေါင်းတင်ပို့မှု၏ ၁၇.၉ ရာခိုင်နှုန်းရှိကြောင်းသိရပါသည်။ ဒုတိယ အမျိုးအစားမှာမိုဘိုင်းဖုန်းနှင့်အစိတ်အပိုင်းများဖြစ်ပြီး တင်ပို့မှုဝင်ငွေအမေရိကန်ဒေါ်လာ ၁.၀၃ ဘီလီယံရရှိခဲ့ကာ ၂၀၂၃ တူညီသည့်ကာလထက် ၁၂.၉ ရာခိုင်နှုန်းမြင့်တက်ခဲ့ကာ စုစုပေါင်းတင်ပို့မှု၏ ၁၆.၃ ရာခိုင်နှုန်းရှိကြောင်းသိရပါသည်။ အချို့သောအခြားအမျိုးအစားများမှာလည်း တင်ပို့မှုတွင်သိသာစွာမြင့်တက်ခဲ့ကြောင်းသိရပါသည်။ ကွန်ပြူတာ၊ အီလတ်ထရောနစ်နှင့် အစိတ်အပိုင်းများ(၃၀ရာခိုင်နှုန်းမြင့်တက်)၊ လက်ကိုင်အိတ်၊ ခရီးဆောင်အိတ်နှင့် ထီး( ၁၈ ရာခိုင်နှုန်း မြင့်တက်)၊ ပင်လယ်စာ(၁၀ရာခိုင်နှုန်းနီးပါးမြင့်တက်)၊ သတ္ထု(၃၀.၂ရာခိုင်နှုန်းမြင့်တက်)၊ သစ်နှင့် သစ်ထုတ်ကုန်(၁၅.၅ရာခိုင်နှုန်းမြင့်တက်)၊ စတီးလ်ထုတ်ကုန်(၃၄ရာခိုင်နှုန်းမြင့်တက်) တို့ဖြစ်ကြောင်းသိရပါသည်။ ၂၀၂၁ တွင်စတင်သက်‌ရောက်သည့် ဗီယက်နမ်- UK လွတ်လပ်သော ကုန်သွယ်ရေးသဘောတူညီချက်ကလည်း တင်ပို့မှုကြီးထွားမှုတွင် အဓိကမောင်းနှင့်ပေးခဲ့ကြောင်းသိရပါသည်။ စာချုပ်အကောင်အထည်ပေါ်သည့်အချိန်မှစ၍ ယခုအချိန်အထိ ဗီယက်နမ်သည် ကုန်သွယ်ရေးပိုငွေပြခဲ့ကြောင်းသိရပါသည်။ ၂၀၂၁ ခုနှစ်တွင် အပြန်အလှန်ကုန်သွယ်ရေးတန်ဖိုးမှာ အမေရိကန်ဒေါ်လာ၆.၆ ဘီလီယံရှိခဲ့ပြီး ဗီယက်နမ်ကအမေရိကန်ဒေါ်လာ၄.၈ ဘီလီယံကုန်သွယ်ရေးပိုငွေပြခဲ့ကြောင်းသိရပါသည်။ ၂၀၂၂ခုနှစ်တွင် ကမ္ဘာလုံးဆိုင်ရာစိတ်ခေါ်မှုများနှင့် စီးပွားရေးအခက်အခဲများကြောင့် နှစ်နိုင်ငံကုန်သွယ်မှုကျဆင်းခဲ့သော်လည်း ဗီယက်နမ် က UK သို့တင်ပို့မှုမှာ၁.၉ ရာခိုင်နှုန်းဆက်လက်ကြီးထွားခဲ့ကြောင်းသိရပါသည်။ ၂၀၂၃ ခုနှစ်တွင် ဗီယက်နမ်၏များစွာသောစျေးကွက်များသို့တင်ပို့မှုမှာ ကျဆင်းခဲ့သော်လည်း UK သို့တင်ပို့မှုမှာ ၁၁ ရာခိုင်နှုန်း ဆက်လက်ကြီးထွားခဲ့ကြောင်းသိရပါသည်။ ယခုနှစ်တွင် နှစ်နိုင်ငံအပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၈.၆ မှ ၈.၇ ဘီလီယံရောက်ရှိရန်ခန့်မှန်းရကြောင်း သိရှိရပါသည်။

VietnamPlus

DOCA(ရန်ကုန်)

                 အင်ဒိုနီးရှားနိုင်ငံနှင့် ဘရာဇီးနိုင်ငံတို့သည်အမေရိကန်ဒေါ်လာ ၂.၆၅ ဘီလီယံတန်ကြေးရှိသည့် ပူးပေါင်းဆောင်ရွက်မှုသဘောတူညီချက် ၅ ခုအတွက်နားလည်မှုသဝဏ်လွှာကို G20 ညီလာခံ၌သီးခြားကျင်းပသည့် အင်ဒိုနီးရှား-ဘရာဇီးစီးပွားရေးဖိုရမ်တွင်နိုဝင်ဘာ ၁၇ ရက်နေ့က လက်မှတ်ရေးထိုးခဲ့ကြောင်းသိရပါသည်။ အင်ဒိုနီးရှားနိုင်ငံကုန်သည်နှင့်စက်မှုလုပ်ငန်းရှင်များ အသင်း၏အကြံပေးဘုတ်အဖွဲ့ ဥက္ကဌဖြစ်သူ Hashim S.Djojohadikusumo က ထိုသဘောတူညီချက်များသည် ကဏ္ဍအားလုံးကိုလွှမ်းခြုံထားကြောင်းနှင့် နှစ်နိုင်ငံကြားစီးပွားရေးဆက်နွယ်မှုတိုးတက်ရန်နှင့် စီးပွားရေးကြီးထွားမှုကိုမောင်းနှင်ပေးမည့် ကြီးမားသောရင်းနှီးမြှုပ်နှံမှုများတွင် သိသာစွာပါဝင်မည်ဟုပြောကြားခဲ့ပါသည်။ အင်ဒိုနီးရှားစီးပွားရေးလုပ်ငန်းရှင်တစ်ဦးဖြစ်သူ Anindya Bakrie က ထိုပူးပေါင်းဆောင်ရွက်မှု သဘောတူညီချက်များသည် နှစ်နိုင်ငံကြားပူးပေါင်းဆောင်ရွက်ရေးတွင် စာမျက်နှာသစ်တစ်ခုဖြစ်ခဲ့ကြောင်း အထူးသဖြင့် ပြန်လည်ဖွံ့ဖြိုးမြဲစွမ်းအင်၊ စိုက်ပျိုးမွေးမြူရေးနှင့် နည်းပညာကဏ္ဍတို့တွင်ဖြစ်ကြောင်း ပြောကြားခဲ့ပါသည်။ အင်ဒိုနီးရှား-ဘရာဇီးစီးပွားရေးဖိုရမ်ကို နှစ်နိုင်ငံကြားတည်ငြိမ်သောဖွံဖြိုးတိုးတက်မှုနှင့် စီးပွားရေးကြီးထွားမှုအတွက် အာမခံချက်များဖလှယ်ရန်နှင့် ကုန်သွယ်ရေး၊ ရင်းနှီးမြှုပ်နှံမှု၊ စွမ်းအင်နှင့် တည်ငြိမ်သောဖွံ့ဖြိုးတိုးတက်မှုတို့နှင့်ဆက်နွယ်သော ပူးပေါင်းဆောင်ရွက်မှုအခွင့်အလမ်းသစ်များရှာဖွေရန် အဓိကထားကျင်းပခဲ့ခြင်းဖြစ်ကြောင်းသိရပါသည်။ တစ်ချိန်တည်းမှာပင် ဘရာဇီးနိုင်ငံအမျိုးသားစက်မှုလုပ်ငန်း ကွန်ဖက်ဒရေးရှင်း၏ဥက္ကဌဖြစ်သူ Ricardo Alban က ထိုပူးပေါင်းဆောင်ရွက်မှုသည် နှစ်နိုင်ငံကြားပူးပေါင်းဆောင်ရွက်မှု ခေတ်သစ်တစ်ခုအတွက်အခြေခံအုတ်မြစ်တစ်ခုဖြစ်ကြောင်းနှင့် ထိုပူးပေါင်းဆောင်ရွက်မှုအရ ၎င်းတို့သည် စီးပွားရေးလုပ်ငန်းများအတွက် အကျိုးအမြတ်ရရှိစေနိုင်ရုံသာမက ကာဗွန်ထုတ်လွှင့်မှုလျှော့ချခြင်းနှင့် အလုပ်အကိုင်အခွင့်အလမ်းများ ဖန်တီးပေးနိုင်ခြင်းအစရှိသည့် ကြီးမားသော ရည်မှန်းချက်များအတွက်ပါ လမ်းကြောင်းဖွင့်လှစ်နိုင်ခဲ့ပြီဖြစ်ကြောင်း ပြောကြားခဲ့ပါသည်။ ထို့ပြင် Alban က စိုက်ပျိုးမွေးမြူရေးစီးပွားရေးလုပ်ငန်း၊ ဘိုင်အိုလောင်စာနှင့် သတ္တုတူးဖော်ခြင်းအစရှိသည့် အဓိကလုပ်ငန်းနယ်ပယ်များတွင် တစ်နိုင်ငံ၏စီးပွားရေးအားကောင်းမှုနှင့် ကျွမ်းကျင်မှုကို တစ်နိုင်ငံကအားယူခြင်းအားဖြင့် ၎င်းတို့သည် အနာဂတ်မျိုးဆက်သစ်များအတွက် တည်ငြိမ်မှုရှိသောစီးပွားရေးကြီးထွားမှုကို မောင်းနှင်ပေးနိုင်မည်ဟု ပြောကြားခဲ့ပါသည်။ နှစ်နိုင်ငံကြားစီးပွားရေးပူးပေါင်းဆောင်ရွက်မှုသည် လွန်ခဲ့သည့်နှစ်အနည်းငယ်ကျော်မှစ၍ ဆက်လက်မြင့်တက်လာခဲ့ကြောင်းသိရပါသည်။ ၂၀၂၂ ခုနှစ်တွင် အင်ဒိုနီးရှားနိုင်ငံသည် အမေရိကန် ဒေါ်လာ ၁.၉၁ ဘီလီယံတန်ဖိုးရှိသောကုန်ပစ္စည်းများကို ဘရာဇီးနိုင်ငံ သို့တင်ပို့ခဲ့ပြီး အဓိကပို့ကုန်များမှာ စားအုန်းဆီ၊ အုန်းဆီနှင့်ရာဘာတို့ဖြစ်ကြောင်း သိရပါသည်။ ဘရာဇီးနိုင်ငံက အင်ဒိုနီးရှားနိုင်ငံသို့ ၂၀၂၄ ခုနှစ်တွင်အမေရိကန်ဒေါ်လာ ၃၅၉ သန်း တန်ဖိုးရှိသော ကုန်ပစ္စည်းများတင်ပို့ခဲ့ပြီး ဘရာဇီးနိုင်ငံကကုန်သွယ်ရေးပိုငွေအမေရိကန်ဒေါ်လာ ၁၆၉ သန်း ရရှိခဲ့ကြောင်း သိရှိရပါသည်။

Antara News

DOCA(ရန်ကုန်)        

              ကမ္ဘောဒီးယားနိုင်ငံနှင့် မလေးရှားနိုင်ငံတို့အကြားကုန်သွယ်မှုပမာဏသည် ၂၀၂၄ ခုနှစ်၊ ဇန်နဝါရီလမှ အောက်တိုဘာလအတွင်း အမေရိကန်ဒေါ်လာ ၇၁၅ သန်းအထိရှိခဲ့ပြီး ၂၀၂၃ ခုနှစ်အလားတူကာလနှင့်နှိုင်းယှဉ်ပါက ၃၅.၃ ရာခိုင်နှုန်းမြင့်တက်လာခဲ့ကြောင်း မကြာသေးမီကထုတ်ပြန်ခဲ့သည့် အကောက်ခွန်နှင့် စည်းကြပ်မှုဦးစီးဌာန (GDCE) ၏အချက်အလက်များအရသိရသည်။ ကမ္ဘောဒီးယားမှ မလေးရှားနိုင်ငံသို့တင်ပို့မှုသည်  တစ်နှစ်ထက်တစ်နှစ် ၃၅.၇ ရာခိုင်နှုန်းမြင့်တက်ခဲ့ပြီး တင်သွင်းမှုမှာ ၃၅.၃ ရာခိုင်နှုန်းအထိတိုးမြင့်လာခဲ့သည်။ ၂၀၂၄ ခုနှစ်တွင် ကမ္ဘောဒီးယားနှင့် မလေးရှားတို့အကြား ကုန်သွယ်မှုသိသိသာသာတိုးတက်လာမှုသည် နှစ်နိုင်ငံကုန်သည်များအကြား အောင်မြင်သောပူးပေါင်းဆောင်ရွက်မှုဖြစ်ပြီး ကုန်စည်နှင့် ဝန်ဆောင်မှုများ အပြန်အလှန်ဖလှယ်မှုကို အားကောင်းလာစေသည်ဟု မလေးရှားစီးပွားရေး ကုန်သည်ကြီးများအသင်း (MBCC) ၏ ဥက္ကဋ္ဌ Tan Khee Meng ကပြောကြားခဲ့သည်။ ကမ္ဘောဒီးယားသို့ မလေးရှာတင်ပို့မှုတွင် ကမ္ဘောဒီးယား၏အခြေခံအဆောက်အအုံဖွံ့ဖြိုးတိုးတက်ရေးနှင့် စွမ်းအင်လိုအပ်ချက်အတွက်  အရေးပါသောအစိတ်အပိုင်းများဖြစ်သည့် ရေနံထွက်ပစ္စည်းနှင့် ဆောက်လုပ်ရေးသုံးပစ္စည်းများဖြစ်သည်။ အပြန်အလှန်အားဖြင့် မလေးရှားသို့ ကမ္ဘောဒီးယား၏တင်ပို့မှုတွင် မလေးရှား၏ဈေးကွက်လိုအပ်ချက်များကို ဖြည့်ဆည်းပေးနိုင်သည့် စိုက်ပျိုးရေးထွက်ကုန်များနှင့် အထည်ချုပ်ထုတ်ကုန်တို့ဖြစ်သည်။ အဆိုပါဖလှယ်မှုများသည် နှစ်နိုင်ငံအကြားစီးပွားရေးဖွံဖြိုးတိုးတက်မှုကို အထောက်အကူဖြစ်စေရုံသာမက ယဉ်ကျေးမှုနှင့် ချိတ်ဆက်မှုများကိုပါ အားကောင်းစေသည်ဟု Tan Khee Meng ကဆက်လက်ပြောကြားခဲ့သည်။

Source: Khmer Times

DOCA(ရန်ကုန်)

             ဘရူနိုင်းနိုင်ငံမှ ကုမ္ပဏီတစ်ခုဖြစ်သည့် Khazanah သည် ကမ္ဘောဒီးယားတွင် ရင်းနှီးမြှုပ်နှံမှုအခွင့်အရေးများအား ရှာဖွေလျက်ရှိသည်။ ကုမ္ပဏီ၏ CEO ဖြစ်သူ Dato Khairul Hamed မှာလည်း ကမ္ဘောဒီးယားနိုင်ငံသို့ အလည်အပတ်ရောက်ရှိလျက်ရှိသည်။ ဘရူးနိုင်းတော်ဝင်တပ်ဖွဲ့၏ တပ်မှူးဟောင်း Dato Khairul Hamed သည် နိုဝင်ဘာ ၁၉ ရက်နေ့ကရောက်ရှိခဲ့ပြီး ကမ္ဘောဒီးယားဝန်ကြီးချုပ် Hun Manet အား ဂါရဝပြုခဲ့သည်။ ဖနွမ်းပင်မြို့ ရှိ ငြိမ်းချမ်းရေးနန်းတော်တွင် ကျင်းပသည့်တွေ့ဆုံပွဲတွင် Dato Khairul က ဝန်ကြီးချုပ် Hun Manet အား ယခုအကြိမ်လာရောက်လည်ပတ်ပြီး ကျန်းမာရေးအရင်းအမြစ်၊ လမ်းပန်းဆက်သွယ်ရေး အထူးသဖြင့်ရထားလမ်း၊ လေဆိပ်အပါအဝင် ဘဏ်လုပ်ငန်းစသည့် ကဏ္ဍများစွာတွင် ရင်းနှီးမြှုပ်နှံမှုအခွင့်အလမ်းသစ်များ ရှာဖွေရန်ရည်ရွယ်ထားကြောင်း ပြောကြားခဲ့သည်။ တုံ့ပြန်သည့်အနေဖြင့် ကမ္ဘောဒီးယားဝန်ကြီးချုပ်မှ ကမ္ဘောဒီးယားတွင် ရင်းနှီးမြှုပ်နှံမှုအခွင့်အလမ်းများရှာဖွေရန် ကုမ္ပဏီ၏ စိတ်ဝင်စားမှုကို ကြိုဆိုခဲ့သည်။ ကမ္ဘောဒီးယားတွင် ရင်းနှီးမြှုပ်နှံသူများအောင်မြင်စေရန်နှင့် ကမ္ဘောဒီးယား၏ ဈေးကွက်ကို ဒေသတွင်းနှင့် ကမ္ဘာလုံးဆိုင်ရာ ချိတ်ဆက်နိုင်ရန် တော်ဝင်အစိုးရ၏ မူဝါဒများ၊ ယန္တရားများနှင့် လိုအပ်သည့်အစီအမံများကို မီးမောင်းထိုးပြသခဲ့သည်။ ဝန်ကြီးဌာနများ၊ ကမ္ဘောဒီးယားအစိုးရအဖွဲ့အစည်းများနှင့် ဆက်လက်ဆွေးနွေးရန် ကုမ္ပဏီ၏ CEO အား တိုက်တွန်းခဲ့ကြောင်းသိရှိရပါသည်။

Source : khmertimes

DOCA(ရန်ကုန်)