ပြည်ပကုန်သွယ်မှုသတင်းများ

    ဗီယက်နမ်နိုင်ငံ၏ ယခုနှစ်ဆန်တင်ပို့မှုသည် နိုဝင်ဘာ ၁၅ ရက်နေ့တွင် ဆန်တန်ချိန် ၈ ဒသမ ၀၅ သန်း အထိ ရောက်ရှိခဲ့ပြီး တန်ဖိုးအားဖြင့် အမေရိကန်ဒေါ်လာ ၅ ဒသမ ၀၅ ဘီလီယံ ရှိလာခဲ့ကြောင်း ဗီယက်နမ်အကောက်ခွန်ဦးစီးဌာနက ဖော်ပြပါသည်။

   အစိုးရ ကိန်းဂဏန်းအချက်အလက်များအရ နိုဝင်ဘာလ၏ ပထမလဝက်ကာလတွင်ပင် ဆန်တန်ချိန် ၂၉၃၄၈၄ တန် တင်ပို့နိုင်ခဲ့သည်။ ၂၀၂၄ ခုနှစ် ပထမ ၁၀ လတာအတွင်း ဆန် တန်ချိန် ၇ ဒသမ ၈ သန်း၊ တန်ဖိုးအားဖြင့်  အမေရိကန်ဒေါ်လာ ၄ ဒသမ ၈၆ ဘီလီယံ တင်ပို့ခဲ့ပြီး ယခင်နှစ်၏ အလားတူကာလနှင့် နှိုင်းယှဉ်ပါက ပမာဏအားဖြင့် ၁၀ ဒသမ ၂ ရာခိုင်နှုန်း တိုးမြင့် လာကာ တန်ဖိုးအားဖြင့် ၂၃ ဒသမ ၄ ရာခိုင်နှုန်း မြင့်တက်ခဲ့ကြောင်း စိုက်ပျိုးရေးနှင့် ကျေးလက်ဒေသဖွံ့ဖြိုးတိုးတက်ရေး ဝန်ကြီးဌာန၏ အဆိုအရ သိရပါသည်။

     ဝယ်လိုအားခိုင်မာမှုနှင့်အတူ ဖိလစ်ပိုင်နိုင်ငံသည် ဗီယက်နမ်၏ အကြီးဆုံးဆန်ဈေးကွက် အဖြစ် ဆက်လက်ရပ်တည်နေပြီး ပို့ကုန်စုစုပေါင်း၏ ၄၅ ရာခိုင်နှုန်းကျော်ရှိကြောင်းနှင့် အောက်တို ဘာလကုန်အထိ ဗီယက်နမ်ထံမှ ဆန်တန်ချိန် ၂ ဒသမ ၉၁ သန်း တင်သွင်းခဲ့ကြောင်း သိရပါသည်။ အခြားအဓိကကျသော စျေးကွက်များအဖြစ် အင်ဒိုနီးရှားနှင့် မလေးရှားတို့ ပါဝင်ပြီး ဗီယက်နမ်၏ ထိပ်တန်း ဆန်တင်ပို့သည့် ၁၅ နိုင်ငံအနက် မလေးရှားနိုင်ငံသည် ယခင်ကာလနှင့် နှိုင်းယှဉ်ပါက ပို့ကုန်တန်ဖိုး ၂ ဒသမ ၃ ဆ တိုးလာကာ အမြင့်မားဆုံး တိုးတက်မှုကို ပြသခဲ့ကြောင်း သိရပါသည်။

    ဖိလစ်ပိုင်နိုင်ငံအနေဖြင့် ပြည်တွင်းစားသုံးမှု တိုးမြင့်လာမှုနှင့် သဘာဝဘေးအန္တရာယ်များကြောင့် ယခုနှစ် လက်ကျန်ကာလများ၌ ဆန်တင်သွင်းမှု ဆက်လက် မြင့်တက်လာနိုင်ကြောင်း ဖိလစ်ပိုင်ရှိ ဗီယက်နမ် ကုန်သွယ်ရေးရုံးက ခန့်မှန်းထားသည်။ ယခုနှစ်အတွင်း ဖိလစ်ပိုင်နိုင်ငံ၏ တင်သွင်းသည့် ဆန်စုစုပေါင်းပမာဏသည် တန်ချိန် ၄ သန်း ကျော်ရှိမည်ဟု ခန့်မှန်းရပါသည်။

    မကြာသေးမီ အောက်တိုဘာလအတွင်း အင်ဒိုနီးရှား၏ ဆန်တန်ချိန် ၅၀၀၀၀၀ အတွက် တင်ဒါခေါ်ယူမှုတွင် ဗီယက်နမ်ကုမ္ပဏီများသည် ဆန်တန်ချိန် ၈၃၅၀၀ ကို တင်သွင်းခွင့် ရယူနိုင်ခဲ့ သည်။ အိန္ဒိယဆန်များ ဈေးကွက်ဝင်ရောက်လာသော်လည်း အင်ဒိုနီးရှားဝယ်လက်များသည်  သာလွန်ကောင်းမွန်သော အရည်အသွေးရှိသည့် ဗီယက်နမ်ဆန်များကို ပိုမိုဈေးပေးဝယ်ယူရန် ဆန္ဒရှိနေခဲ့ကြကြောင်း သိရှိရပါသည်။

Source: Vietnam Plus, 25 Nov 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ကမ္ဘောဒီးယားနိုင်ငံ၏ တိုးတက်ဖွံ့ဖြိုးလျက်ရှိသော ဆန်စပါးကဏ္ဍတွင် ရင်းနှီးမြှုပ်နှံရန်နှင့် ဆန်ပိုမိုတင်သွင်းရန်အတွက် တီမောလက်စ် သံအမတ်ကြီး Ermenegildo Kupa Lopes အား နိုဝင်ဘာ ၁၉ ရက်နေ့တွင် ဖနွမ်းပင်မြို့၌ လက်ခံတွေ့ဆုံရာတွင် ကမ္ဘောဒီးယား အထက်လွှတ်တော် ဥက္ကဋ္ဌ ဟွန်ဆန်က အဆိုပြုကမ်းလှမ်းခဲ့သည်။

     ကမ္ဘောဒီးယားနိုင်ငံသည် အရေးပါသော ဆန်တင်ပို့သည့်နိုင်ငံတစ်ခုအနေဖြင့် အလားအလာရှိသည်ကို မစ္စတာဟွန်ဆန်က အလေးပေးပြောကြားခဲ့ပြီး နိုင်ငံတွင်း၌ ဆန်ကြိတ်ခွဲခြင်းနှင့် ပြုပြင်ထုတ်လုပ်ခြင်းဆိုင်ရာ လုပ်ငန်းများတွင် ရင်းနှီးမြှုပ်နှံနိုင်မည့် အခွင့်အလမ်းများအား ရှာဖွေ ရန် တီမောလက်စ်နိုင်ငံအား တိုက်တွန်းခဲ့ကြောင်း သိရှိရသည်။

     ၂၀၂၄ ခုနှစ်အတွင်း လက်ရှိကာလအထိ ကမ္ဘောဒီးယားထံမှ ဆန်တန်ချိန် ၄၀၀၀ ခန့်ကို တင်သွင်းထားပြီးဖြစ်သည့် တီမောလက်စ်နိုင်ငံဈေးကွက်သို့ ကမ္ဘောဒီးယားဆန်များ ပိုမိုဝင်ရောက် နိုင်စေရန် ဆန္ဒရှိကြောင်း၊ ကမ္ဘောဒီးယားနိုင်ငံရှိ ဆန်စပါးထုတ်လုပ်မှုနယ်ပယ်တွင် ရင်းနှီးမြှုပ်နှံ လျက် ထွက်ရှိလာသည့်ဆန်များအား တီမောလက်စ်၏ စားနပ်ရိက္ခာဖူလုံမှု အားကောင်းလာစေရန် တင်သွင်းခြင်းအပြင် အခြားနိုင်ငံခြားဈေးကွက်များသို့ တင်ပို့ရန်အတွက် တီမောလက်စ်မှ ရင်းနှီးမြှုပ်နှံသူများအား တိုက်တွန်းလိုကြောင်း လွှတ်တော်ဥက္ကဋ္ဌ ဟွန်ဆန်က ပြောကြားခဲ့သည်။

     ကမ္ဘောဒီးယားအစိုးရအနေဖြင့် မြေဆီလွှာအခြေအနေ အကဲဖြတ်ရန်နှင့် စိုက်ပျိုးရန် သင့်လျော်မည့်သီးနှံများကို ရှာဖွေဖော်ထုတ်ရန် ကျွမ်းကျင်သူများစေလွှတ်ခြင်းဖြင့် စိုက်ပျိုးရေးကဏ္ဍ၌ တီမောလက်စ်နှင့် ရေရှည်လက်တွဲလုပ်ဆောင်ရန် စိတ်အားထက်သန်လျက်ရှိကြောင်း၊ အဆိုပါ အစပျိုးလုပ်ဆောင်မှုသည် စျေးကွက်သစ်များသို့ ဆန်တင်ပို့မှုများချဲ့ထွင်ရန်နှင့် ဒေသတွင်း ထိပ်တန်းဆန်ထုတ်လုပ်သူအဖြစ် ရပ်တည်မှုကို ခိုင်မာစေရန် ရည်ရွယ်ချမှတ်ထားသည့် ကမ္ဘောဒီးယား၏ ကျယ်ပြန့်သော မဟာဗျူဟာနှင့် ကိုက်ညီမှုရှိကြောင်း သိရှိရသည်။

    ကမ္ဘောဒီးယား ဆန်စပါးအသင်းချုပ် (CRF) အနေဖြင့်လည်း တီမောလက်စ်နိုင်ငံအား ဆန်တင်ပို့မှုအတွက် အလားအလာရှိသော ဈေးကွက်တစ်ခုအဖြစ် သတ်မှတ်ထားကြောင်း၊ CRF သည် တီမောလက်စ်နိုင်ငံနှင့် အလားအလာရှိသော ဆန်တင်ပို့မှု သဘောတူညီချက်ရေးထိုးနိုင်ရေးအတွက် အဖွဲ့အစည်း အများအပြားနှင့် လက်တွဲဆောင်ရွက်နေကြောင်းဖြင့် ၎င်းအသင်းချုပ်၏ အထွေထွေအတွင်းရေးမှူး Lun Yeng က Khmer Times သို့ ပြောကြားခဲ့သည်။

    ကမ္ဘောဒီးယားသည် ၂၀၂၄ ခုနှစ် ပထမ (၉) လအတွင်း အမေရိကန်ဒေါ်လာ ၃၃၅.၄ သန်း တန်ဖိုးရှိသော ဆန်တန်ချိန် ၄၄၅၉၁၃ တင်ပို့ခဲ့ကြောင်း CRF ၏ အစီရင်ခံစာတွင် ဖော်ပြထားသည်။ ဆန်မွှေး၊ ဆန်ဖြူ၊ ပေါင်းဆန်နှင့် အော်ဂဲနစ်ဆန်များ အပါအဝင် ဆန်မျိုးစုံကို တင်ပို့လျက်ရှိပြီး ယခုနှစ် စက်တင်ဘာလကုန်အထိ ကမ္ဘောဒီးယားနိုင်ငံမှ ကြိတ်ခွဲဆန်စုစုပေါင်း၏ ၂၀ ရာခိုင်နှုန်းခန့်ကို အာဆီယံ (၇) နိုင်ငံသို့ တင်ပို့ခဲ့ကြောင်း သိရှိရသည်။

Source: Khmer Times, 21 November, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   အိန္ဒိယနိုင်ငံတွင် ၂၀၂၄-၂၅ သီးနှံရာသီနှစ်အတွင်း စိုက်ပျိုးထားရှိမှုမှ ထွက်ရှိသည့် ပဲစင်းငုံအသစ်များသည် ပမာဏအားဖြင့် နည်းပါးနေသေးသော်လည်း မဟာရဋ္ဌ၊ ကာနာတကာနှင့် တဲလန် ဂါနာ ပြည်နယ်များ၌ စတင်ဈေးကွက်ဝင်ရောက်လာပြီဖြစ်ပြီး စိုက်ပျိုးရာနယ်မြေဒေသ အသီးသီးတွင် ရင့်မှည့်မှုအခြေအနေ ကွဲပြားခြားနားချက်အရ ရှေ့လာမည့် ရက်သတ္တပတ် ၂ ပတ်ခန့်မှသာ အင်အားအပြည့်အဝဖြင့် ရိတ်သိမ်းထွက်ရှိမည်ဖြစ်ကြောင်း Hindu Business Line သတင်းဌာနက ဖော်ပြပါသည်။

   အိန္ဒိယပဲမျိုးစုံနှင့်ကောက်ပဲသီးနှံအသင်း (IPGA) ၏ နောက်ဆုံးထုတ်ပြန်သော ဈေးကွက် အစီရင်ခံစာအရ ပဲစင်းငုံအသစ်များ၏ဈေးနှုန်းသည် မဟာရဋ္ဌပြည်နယ် Dudhani နှင့် Solapur ဈေးကွက်များတွင် ၁ ကွင်တယ် (၁၀၀ ကီလီုဂရမ်) လျှင် ရူပီးငွေ ၉၃၀၀ မှ ၁၀၆၀၀ အတွင်း၌ လည်း ကောင်း၊ ကာနာတကာပြည်နယ်ရှိ Kalaburagi ဒေသ၌ ရူပီး ၁၀၉၅၀ ဝန်းကျင်နှင့် Raichur ဒေသ တွင် ရူပီး ၁၀၃၆၅ မှ ၁၀၅၅၁ အတွင်း၌လည်းကောင်း၊ တဲလန်ဂါနာပြည်နယ် Narayanpeth ဒေသ တွင် ရူပီး ၁၀၉၀၀ မှ ၁၁၂၅၁ အတွင်းနှင့် Tandur ဒေသ၌ ရူပီး ၁၀၀၃၅ မှ ၁၀၄၃၁ အတွင်း နှုန်းထားများဖြင့်လည်းကောင်း အသီးသီးရောင်းဝယ်ဖောက်ကားလျက်ရှိကြောင်း သိရသည်။

    ပဲစင်းငုံအဟောင်း ၁ ကွင်တယ်၏ ဈေးနှုန်းများမှာမူ ကာနာတကာပြည်နယ်ရှိ Bidar ဒေသ၌ ရူပီး ၈၅၁၉ မှ ၈၈၃၆ အတွင်းနှင့် Kalaburagi ဒေသတွင် ရူပီး ၁၀၀၀၀ မှ ၁၀၈၆၂ အတွင်း ရှိနေ ချိန်၌ မဟာရဋ္ဌပြည်နယ် Akola နှင့် Amaravati ကုန်အဝယ်ဒိုင်များတွင် ရူပီး ၉၅၀၀ မှ ၁၀၄၀၀ အတွင်း ဈေးနှုန်းဖြင့် အရောင်းအဝယ်ပြုလုပ်လျက်ရှိသည်။ Chennai ဆိပ်ကမ်းမြို့တွင်မူ ပြည်ပမှ တင်သွင်းသော သံပရိုသီးအရောင် ပဲစင်းငုံများ၏ ဈေးနှုန်းသည် ၁ ကွင်တယ်လျှင် ရူပီးငွေ ၉၅၀၀ မှ ၉၅၅၀ အတွင်းရှိသည်။ ၂၀၂၄-၂၅ သီးနှံရာသီမှ ထွက်ရှိသော ပဲစင်းငုံများကို အခြေခံရည်ညွှန်းဈေးနှုန်း သတ်မှတ်ချက် ၁ ကွင်တယ်လျှင် ၇၅၅၀ ရူပီးဖြင့် အနိမ့်ဆုံးဈေးနှုန်းထားရှိဝယ်ယူမည်ဟု အိန္ဒိယအစိုးရက ကြေညာချက်ထုတ်ပြန်ထားသည်။

     ပြည်နယ်များစွာ၌ အစိုးရ ထောက်ပံ့ပို့ဆောင်ရေးကော်ပိုရေးရှင်း၏ ဝယ်လိုအားကြောင့် ဒေစီ ပဲစင်းငုံ အမျိုးအစားအပေါ် ဝယ်လိုအားမြင့်မားလျက်ရှိကြောင်း၊ ပဲခွဲစက်များ၏ လက်ဝယ် တွင် ကုန်လက်ကျန်ပမာဏ အလုံအလောက်မရှိပဲ အသစ်ထွက်ပေါ်လာမည့် သီးနှံဖြင့်သာ လုပ်ငန်း လည်ပတ်လုပ်ကိုင်ရန် စောင့်ဆိုင်းလျက်ရှိနေကြကြောင်း၊ ခြုံငုံသုံးသပ်ရပါက ယခုနှစ်၌ ပဲစင်းငုံ အထွက်ကောင်းမွန်ဖွယ်ရှိကြောင်း၊ သင့်လျော်မှန်ကန်သည့် အစိုဓာတ်ပါဝင်မှုနှုန်းဖြင့် သီးနှံများ ဈေးကွက်ဝင်ရောက်ချိန်တွင် ပဲခွဲစက်လုပ်ငန်းရှင်များက ဝယ်ယူကြလိမ့်မည်ဖြစ်ကြောင်း၊ ဈေးနှုန်း များသည် ဈေးကွက်ဝင်ရောက်လာမည့် သီးနှံပမာဏအပေါ် မူတည်လျက်ရှိသော်လည်း ပဲခွဲစက်များ၏ ဝယ်ယူမှုအခြေအနေက ဈေးနှုန်းကို အဆုံးအဖြတ်ပြုမည်ဖြစ်ကြောင်းဖြင့် Igrain India ကုမ္ပဏီမှ လုပ်ငန်းရှင် Rahul Chauhan က ပြောဆိုခဲ့သည်။

    ကာနာတကာပြည်နယ် ပဲစင်းငုံစိုက်ပျိုးထုတ်လုပ်သူများအသင်းမှ ဥက္ကဋ္ဌ Basavaraj Ingin ကလည်း ပြည်နယ်အတွင်း အဓိကစိုက်ပျိုးထုတ်လုပ်သည့် Kalaburagi ခရိုင်၌ နေရာဒေသများစွာတွင် ပဲစင်းငုံစိုက်ခင်းများသည် ရင့်မှည့်သည့်အဆင့်သို့ ရောက်ရှိနေပြီဖြစ်ကြောင်း၊ ဒေသအချို့၌ သီးနှံရိတ်သိမ်းမှု စတင်လုပ်ဆောင်လျက်ရှိပြီး လာမည့်ရက်သတ္တနှစ်ပတ်အတွင်း အပြည့်အဝ ရိတ်သိမ်းခူးဆွတ်နိုင်မည်ဟု ခန့်မှန်းရကြောင်း ပြောကြားခဲ့သည်။

      ဈေးနှုန်းများမြင့်မားခြင်း၏ ဆွဲဆောင်မှုအရ တောင်သူများက တိုးချဲ့စိုက်ပျိုးခဲ့ကြသဖြင့်  ယခုနှစ် မိုးသီးနှံရာသီ၌ ပဲစင်းငုံစိုက်ပျိုးမှုဧရိယာမှာ ဟက်တာပေါင်း ၄၆.၅၀ သိန်း ရှိပြီး ယခင်နှစ် စိုက်ပျိုးမှု ဟက်တာ ၄၀.၇၄ သိန်းအပေါ် ၁၄ ရာခိုင်နှုန်း တိုးတက်ခဲ့သည်။ အိန္ဒိယအစိုးရ၏ ပထမအကြိမ် ကနဦးခန့်မှန်းချက်အရ ယခုနှစ် ပဲစင်းငုံထွက်ရှိနိုင်မှုသည် တန်ချိန် ၃၅.၀၂ သိန်းဖြင့် ယခင်နှစ် ထုတ်လုပ်မှု တန်ချိန် ၃၄.၁၇ သိန်းထက် အနည်းငယ်ပိုမိုနိုင်ကြောင်း သိရှိရသည်။

Source: The Hindu Business Line, 26 Nov 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

               အင်ဒိုနီးရှားနိုင်ငံသမ္မတ Prabowo Subianto က နိုင်ငံ၏အဓိကကဏ္ဍများတွင် ဖွံ့ဖြိုး တိုးတက်ရေးအတွက်အမေရိကန်ဒေါ်လာ ၈.၅ ဘီလီယံတန်ကြေးရှိသော ရင်းနှီးမြှုပ်နှံမှုအာမခံချက်များကို ဗြိတိန်ကုမ္ပဏီများထံမှနိုဝင်ဘာ ၂၁ ရက်နေ့ကကျင်းပခဲ့သော CEO Roundtable Forum တွင် ရရှိခဲ့ကြောင်းသိရပါသည်။ သမ္မတသည် ဗြိတိန်လုပ်ငန်းများထံမှရရှိခဲ့သော ထိုရင်းနှီးမြှုပ်နှံမှုအာမခံချက်များသည် ဗြိတိန်လုပ်ငန်းများက အင်ဒိုနီးရှား၏စီးပွားရေးကို ယုံကြည်မှုရှိနေသည်ကိုပြသနေကြောင်းနှင့် အင်ဒိုနီးရှားအစိုးရ၏ သန့်စင်စွမ်းအင်နှင့် ထိ‌ရောက်သောအုပ်ချုပ်မှုအမူအကျင့်သို့ သွားရောက်နေသည့်အချက်ကလည်း ယခုကဲ့သို့ရရှိခြင်းတွင် ပါဝင်နေသည်ဟုပြောကြားခဲ့ပါသည်။ ထိုဖိုရမ်တက်ရောက်ခဲ့သည့် အင်ဒိုနီးရှားနိုင်ငံ ဘဏ္ဍာရေးဝန်ကြီးဖြစ်သူ Sri Mulyani Indrawati ကလည်းဗြိတိန်CEO များပါဝင်မှုသည် စွမ်းအင်၊ အခြေခံအဆောက်အအုံ၊ ပညာရေးနှင့် ကျန်းမာရေးပါဝင်သည့် အင်ဒိုနီးရှား၏အဓိကကဏ္ဍများတွင် ရင်းနှီးမြှုပ်နှံမှုအခွင့်အလမ်းများ၌ ၎င်းတို့၏အားကောင်း‌သောစိတ်ဝင်စားမှုကို ဖော်ပြနေကြောင်းပြောကြားခဲ့ပါသည်။ အင်ဒိုနီးရှားနိုင်ငံရင်းနှီးမြှုပ်နှံမှုဝန်ကြီးဖြစ်သူ Rosan Roeslani က အင်ဒိုနီးရှား၏နိုင်ငံရေးနှင့် စီးပွားရေးတည်ငြိမ်မှုကလည်း နိုင်ငံအပေါ် ရင်းနှီးမြှုပ်နှံသူများ၏ ယုံကြည်မှုတိုးတက်လာခြင်းတွင် ကဏ္ဍတစ်ခု၌ပါဝင်နေကြောင်းနှင့်  အစိုးရသည် ထိုကုမ္ပဏီများနှင့် နောက်ဆက်တွဲအစည်းအဝေးများ ဆက်လက်ပြုလုပ်သွားရန်စီစဉ်သွားမည်ဟု ပြောကြားခဲ့ပါသည်။

Antara News

DOCA(ရန်ကုန်)

          ၂၀၂၄ ခုနှစ်တွင် ဗီယက်နမ်၏အင်တာနက်စီးပွားရေးသည် အမေရိကန်ဒေါ်လာ ၃၆ ဘီလီယံ ရောက်ရှိနိုင်ပြီး ၂၀၂၃ ခုနှစ်ကထက် ၁၆ ရာခိုင်နှုန်းမြင့်တက်လာနိုင်သောကြောင့် နိုင်ငံ၏ e- commerce နှင့် ဒစ်ဂျစ်တယ်စီးပွားရေးသည် လူမှုစီးပွားဖွံ့ဖြိုးတိုးတက်ရေးတွင် အဓိကနေရာ၌ ဆက်လက်ရှိနေကြောင်း နိုဝင်ဘာလ ၂၁ ရက်နေ့က ဟနွိုင်းမြို့တွင် ကျင်းပပြုလုပ်ခဲ့သည့် ၂၀၂၄ တွင် စက်မှုနှင့်ကုန်သွယ်ရေး ဒစ်ဂျစ်တယ်အသွင်ကူးပြောင်းရေးဖိုရမ်တွင် ပြောကြားခဲ့ကြောင်းသိရပါသည်။ ဖိုရမ်တွင် ဗီယက်နမ်နိုင်ငံစက်မှုနှင့်ကုန်သွယ်ရေး ဒုတိယဝန်ကြီးဖြစ်သူ Truong Thanh Hoai က နိုင်ငံတကာအဖွဲ့အစည်းအများစုသည် ၂၀၂၄ ခုနှစ်တွင် ကမ္ဘာလုံးဆိုင်ရာ စီးပွားရေးကြီးထွားနှုန်းကို ၃.၂ ရာခိုင်နှုန်းခန့်မှန်းထားကြောင်းပြောကြားခဲ့ပါသည်။  e-Conomy Southeast Asia ၏နိုဝင်ဘာ ၅ ရက်နေ့က ၉ ကြိမ်မြောက်ထုတ်ဝေချက်အရလက်လီ e-commerce သည် ဗီယက်နမ်ဒစ်ဂျစ်တယ်စီးပွားရေး၏ အဓိကထောက်တိုင်အဖြစ်ဆက်လက်တည်ရှိနေပြီး နိုင်ငံ၏ GDP တွင်အမေရိကန်ဒေါ်လာ ၂၂ ဘီလီယံခန့်ပါဝင် နေကာ ယခင်နှစ်ထက် ၁၈ ရာခိုင်နှုန်း မြင့်တက်လာကြောင်းသိရပါသည်။ ဗီယက်နမ်၏ မြင့်မားသောကြီးထွားနှုန်းသည် ၎င်းတို့၏ကုန်ထုတ်လုပ်မှု၊ ပြုပြင်ထုတ်လုပ်မှုနှင့် တင်ပို့မှု၏ မောင်းနှင်အားကြောင့် ဆက်လက် တည်ငြိမ်နေကြောင်းသိရပါသည်။ ၂၀၂၄ ခုနှစ်နှင့် ၂၀၂၃ ခုနှစ်တို့တွင် ထိုကဲ့သို့ကြီးထွားမှုနှင့် အတူဗီယက်နမ်၏ e-commerce နှင့်ဒစ်ဂျစ်တယ်စီးပွားရေး သည် အားကောင်းစွာဖွံ့ဖြိုး တိုးတက်လာမှုကိုပြသနေပြီး စီးပွားရေးဖွံ့ဖြိုးတိုးတက်လာမှု၏ အဓိကမောင်းနှင်အားထဲမှတစ်ခု ဖြစ်လာ‌ကြောင်းသိရပါသည်။ တာဝန်ရှိသူတစ်ဦးက ဝန်ကြီးဌာနသည် ဒစ်ဂျစ်တယ်စီးပွားရေးနှင့် အသိုက်အဝန်းဖွံ့ဖြိုးတိုးတက်ရေးအတွက် နိုင်ငံတော်မဟာဗျူဟာနှင့်အတူ စက်မှုနှင့် ကုန်သွယ်ရေးကဏ္ဍ၏ ဒစ်ဂျစ်တယ်အသွင်ကူးပြောင်းမှုမြှင့်တင်ရန် များစွာသောမဟာဗျူဟာများ ထုတ်ပြန်လျှက်ရှိကြောင်းသိရပါသည်။ ဝန်ကြီးဌာန သည် အစိုးရအေဂျင်စီများ၊ ပြည်တွင်းစက်မှု နှင့်ကုန်သွယ်ရေးဦးစီးဌာန၊ အသင်းများ၊ အဖွဲ့အစည်းများနှင့် စီးပွားရေးလုပ်ငန်းများအကြား ဒစ်ဂျစ်တယ်အသွင်ကူးပြောင်းရေး လုပ်ငန်းစဉ်၊ စက်မှုနှင့်ကုန်သွယ်‌ရေးကဏ္ဍကြား e-commerce နှင့်ဒစ်ဂျစ်တယ်စီးပွားရေး ထိထိရောက်ရောက်မြှင့်တင်ရန် မူဝါဒများနှင့်ဖြေရှင်းချက်များ ကမ်းလှမ်းရာတွင် ချိတ်ဆက်ပေးသူအဖြစ် ၎င်းတို့၏ကဏ္ဍကို အားကောင်းစေရန်ရည်ရွယ်ကြောင်းသိရပါသည်။ ဒစ်ဂျစ်တယ်စီးပွားရေးနှင့် ဒစ်ဂျစ်တယ်အသိုက်အဝန်းဦးစီဌာန၏ ညွှန်ကြားရေးမှူးဖြစ်သူ  Tran Minh Tuan က ကမ္ဘာ့လူဦးရေ၏ ၁.၂၃ ရာခိုင်နှုန်းရှိသည့်  လူဦးရေသန်း၁၀၀နှင့်အတူ ဗီယက်နမ်နိုင်ငံ၏e-commerce ဖွံ့ဖြိုးတိုးတက်မှုအလားအလာသည် ဆက်လက်ကြီးမားလျှက်ရှိကြောင်း သိရပါသည်။

VietnamPlus

DOCA(ရန်ကုန်)