အမေရိကန် ဒေါ်လာ ၂၅၀၀ တန်ဖိုးရှိသည့်သန္တာကျောက်များအား အမေရိကန်နိုင်ငံသို့ တင်ပို့ခဲ့သည့်အင်ဒိုနီးရှား

          အင်ဒိုနီးရှားကုန်သွယ်ရေးဝန်ကြီး Budi Santoso သည် ဩဂုတ် ၂၈ ရက်တွင် အမေရိကန် ဒေါ်လာ ၂၅၀၀ တန်ဖိုးရှိသည့်သန္တာကျောက်များအား အမေရိကန်နိုင်ငံသို့ တင်ပို့မှုကို ဖွင့်လှစ်ပေးခဲ့ကြောင်းသိရပါသည်။ အဆိုပါသန္တာကျောက်များကို အရှေ့ဂျာဗားပြည်နယ်၊ Banyuwangi ခရိုင်၊ Ketapang မြို့အခြေစိုက် ပြည်တွင်းရေထွက်ပစ္စည်းမွေးမြူရေးကုမ္ပဏီ PT Sri Kandi Aquarium က မွေးမြူထုတ်လုပ်ထားခြင်းဖြစ်ကြောင်း သိရပါသည်။ ဝန်ကြီး Santoso က အစိုးရအနေဖြင့် ပြည်တွင်းထုတ်ကုန်များကို နိုင်ငံတကာဈေးကွက်သို့ ပိုမိုဝင်ရောက်နိုင်ရေး ဆက်လက်မြှင့်တင် ဆောင်ရွက်သွားမည်ဖြစ်သကဲ့သို့ ပြည်တွင်းစီးပွားရေးလုပ်ငန်းများအတွက် ဈေးကွက်ရှာဖွေရေးနှင့် လေ့ကျင့်သင်ကြားရေးဆိုင်ရာ အထောက်အပံ့များကိုလည်း အပြည့်အဝ ပေးအပ်သွားမည် ဖြစ်ကြောင်း ပြောကြားခဲ့ပါသည်။ လက်ရှိတွင် အင်ဒိုနီးရှားကုန်သွယ်ရေးဝန်ကြီး ဌာနသည် နိုင်ငံပေါင်း ၃၃ နိုင်ငံ၌ ကုန်သွယ်ရေးကိုယ်စားလှယ်ရုံးများနှင့် အင်ဒိုနီးရှားကုန်သွယ်မှု မြှင့်တင်ရေးစင်တာ (ITPC) များ ဖွင့်လှစ်ထားကြောင်း သိရပါသည်။ ယင်းရုံးများ၏ အဓိက တာဝန်မှာ အလားအလာရှိသည့် ဝယ်ယူသူများနှင့် ချိတ်ဆက်ပေးခြင်း၊ အင်ဒိုနီးရှားထုတ်ကုန် များကို ကမ္ဘာ့ဈေးကွက်၌မြှင့်တင်ပေးခြင်းတို့ဖြစ်ပြီး Banyuwangi ဒေသရှိ အသေးစား၊ အငယ်စားနှင့် အလတ်စားလုပ်ငန်းများ (MSMEs) မှ ထုတ်လုပ်သည့် ကုန်ပစ္စည်းများလည်း ပါဝင်ကြောင်း ဝန်ကြီးက ပြောကြားခဲ့ပါသည်။ ရေထွက်ပစ္စည်းမွေးမြူရေးကုမ္ပဏီပိုင်ရှင် I Ketut Sukandi က အမေရိကန်နိုင်ငံသို့တင်ပို့သည့်ကုန်ပစ္စည်းတွင် မွေးမြူထားသည့်  အလှမွေး သန္တာကျောက် အလုံးရေ ၂၀၀ ခန့် ပါဝင်ကြောင်း ပြောကြားခဲ့ပါသည်။ ကုမ္ပဏီအနေဖြင့် ဥရောပ နိုင်ငံအချို့သို့လည်း တစ်လလျှင် ပျမ်းမျှ ခြောက်ကြိမ်မှ ခုနစ်ကြိမ်အထိ တင်ပို့လျက်ရှိပြီး အော်ဒါမှာယူမှုပမာဏအပေါ်မူတည်၍ တစ်ကြိမ်တင်ပို့မှုတန်ဖိုးမှာ အမေရိကန်ဒေါ်လာ ၂၅၀၀ ခန့် ရှိကြောင်း ၎င်းကဆိုပါသည်။ ကုမ္ပဏီကို ၂၀၁၁ ခုနှစ်တွင် စတင်တည်ထောင်ခဲ့ပြီးနောက်  သန္တာ ကျောက်မျိုးစိတ် ၂၉ မျိုးကို အောင်မြင်စွာ မွေးမြူထုတ်လုပ်ကာ နိုင်ငံတကာဈေးကွက်သို့ တင်ပို့ နိုင်ခဲ့ကြောင်း သိရပါသည်။ ကမ္ဘာ့ဈေးကွက်တွင် ဝယ်လိုအားအထူးမြင့်မားသည့် သန္တာမျိုးစိတ်များ အနက် Euphyllia သန္တာသည် တစ်မျိုးအပါအဝင်ဖြစ်ကြောင်း Sukandi က ပြောကြားခဲ့ပါသည်။
            လက်ရှိတွင် ကုမ္ပဏီ၏ ပို့ကုန်ဈေးကွက်သည် နိုင်ငံပေါင်း ၂၀ အထိ ရှိလာပြီး ဂျာမနီ၊ ဗြိတိန်၊ ပြင်သစ်၊ ပိုလန်၊ အမေရိကန်၊ ကနေဒါနှင့် မက္ကဆီကိုနိုင်ငံတို့လည်း ပါဝင်ကြောင်း ၎င်းက ဆက်လက်ပြောကြားခဲ့ပါသည်။ သန္တာကျောက်များတင်ပို့မှုမပြုမီ ဝန်ကြီး Santoso နှင့် Banyuwangi ခရိုင် ဒုတိယအကြီးအကဲ Mujiono တို့သည် သန္တာကျောက်မွေးမြူရေးစက်ရုံသို့ သွားရောက်စစ်ဆေးခဲ့ကြကြောင်း သိရပါသည်။ ၎င်းတို့သည် သန္တာကျောက်များကို တစ်နေရာမှ တစ်နေရာသို့ ပြောင်းရွှေ့မွေးမြူသည့်လုပ်ငန်းစဉ်မှစ၍ ပို့ကုန်အတွက် နောက်ဆုံးထုပ်ပိုးပြင်ဆင်သည့်အဆင့်အထိလုပ်ငန်းဆောင်ရွက်မှုများကို ကိုယ်တိုင်လေ့လာစစ်ဆေးခဲ့ကြောင်း သိရပါသည်။

 DOCA (ရန်ကုန်)