သတင်းနှင့် လှုပ်ရှားမှုများ

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်အနေဖြင့် ထုတ်ကုန်များလုံခြုံစိတ်ချရမှုရှိစေရေးနှင့် ကုန်အညွှန်းအမှတ်အသားများ ပြည့်စုံစွာ ထည့်သွင်းဖော်ပြရေး အတွက် ဈေးကွက်ရောက်ပြီးကုန်စည်များသာမက ဈေးကွက်မရောက်မီကုန်စည်များကို ဈေးကွက် စောင့်ကြည့်စစ်ဆေးခြင်းများ လစဉ်ဆောင်ရွက်လျက်ရှိရာ ရွှေဘိုခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့် ရွှေဘိုမြို့နယ်တာဝန်ခံတို့သည် (၁၆.၁၀.၂၀၂၃)ရက်နေ့၊ နေ့လယ်(၁၄:၀၀)နာရီအချိန်တွင် ရွှေဘိုမြို့နယ်၊ ပဂိုးကုန်းကျေးရွာရှိ စက်သုံးဆီဆိုင်အား ဈေးကွက်စောင့်ကြည့်စစ်ဆေးခဲ့ပါသည်။

         ထိုသို့တွေ့ဆုံဆွေးနွေးရာတွင် ခရိုင်ဦးစီးမှူးက စက်သုံးဆီများဝယ်ယူမှု၊ သယ်ယူမှု၊ သိုလှောင် ထားရှိမှု၊ ပြန်လည်ဖြန့်ဖြူးရောင်းချမှု၊ ဈေးနှုန်း၊ ဈေးကွက်အခြေအနေများနှင့် လက်ကျန်အခြေအနေများ ကိုမေးမြန်းဆွေးနွေးခဲ့ပြီး စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ စားသုံးသူနစ်နာဆုံးရှုံးမှုများရှိပါက တိုင်ကြားနိုင်သည့်အကြောင်းများ၊ စားသုံးသူများသာမက စီးပွားရေးလုပ်ငန်းရှင်များအနေဖြင့် ဌာနမှဆောင်ရွက်နေသောလုပ်ငန်းများကို သိရှိလိုပါက ရုံးဖွင့်ရက် ရုံးချိန်အတွင်း Consumer Call Centre No 1535သို့ ဆက်သွယ်မေးမြန်းနိုင်သည့်အကြောင်းများ အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

          စစ်ကိုင်းစက်မှုဇုန်၌ စားသောက်ကုန်ထုတ်လုပ်သည့် စက်ရုံ(၉)ရုံရှိသည့်အနက် ကလေးများကြိုက်နှစ်သက်သည့် အာလူးချောင်း လေဖောင်းမုန့် ထုတ်လုပ်သော Oriental Family  စက်ရုံသို့ ကွင်းဆင်းလေ့လာခဲ့ပါသည်။

          Oriental Family  မုန့်လုပ်ငန်းစက်ရုံကို  ၂၀၂၂ခုနှစ် နိုဝင်ဘာလက စတင်လုပ်ကိုင်ခဲ့ကြောင်း သိရပါသည်။ ကုန်ကြမ်းများအဖြစ် ဆန်၊  ဂျုံ၊ ပြောင်း တို့ကိုအသုံးပြုကာ ဆန်ကို ရွှေဘိုမြို့မှ ဝယ်ယူပြီး၊ ဂျုံနှင့် ပြောင်းကို ရန်ကုန်မြို့နှင့် မန္တလေးမြို့တို့မှ ဝယ်ယူသည်။ ထုတ်လုပ်သည့် ခေတ်မီစက်ကရိယာများကို    တရုတ်နိုင်ငံက ဝယ်ယူတပ်ဆင် အသုံးပြုပြီး၊  တစ်လလျှင် ကုန်ချော မုန့် ၄၈၀၀ ကီလိုဂရမ် ထုတ်လုပ်နိုင်ကြောင်း သိရပါသည်။

          အာလူးချောင်းလေဖောင်းမုန့်ပြုလုပ်ပုံအဆင့်ဆင့်မှာ ကုန်ကြမ်းများဖြစ်သည့် အာလူး၊ ဆန်၊ ဂျုံ၊ ပြောင်းတို့ကို အမှုန့်ကြိတ်စက်တွင် အမှုန့်ကြိတ်ပြီး သတ်မှတ်ထားသော အချိုးအစားအတိုင်း  ရောစပ်၍ မွှေစက်(Mixer)  အတွင်းသို့ထည့်၍ မွှေရပါသည်။ မွှေစက်မှတစ်ဆင့် အလိုအလျောက် စက်များဖြင့် မုန့်ပုံစံဖော်သည့်စက်သို့  မုန့်မှုန့်များကို ပို့ဆောင်ကာ လိုအပ်သောပုံစံအတိုင်း ပုံစံခွက်(Mold)တပ်ဆင်၍ ပုံစံတကျထုတ်လုပ်ပါသည်။ ပုံဖော်ပြီးသော မုန့်များကို အပူပေးစက် (Oven)သို့ ပို့၍ အပူပေးရသည်။  အပူပေးပြီးပါက သတ်မှတ်ထားသော နှုန်းထားအတိုင်း ချိန်တွယ်၍ ဆီဖြန်းခြင်းနှင့် အရသာမှုန့်နှံ့စပ်အောင်ဖြူးခြင်းလုပ်ငန်းကို ပြုလုပ်ပါသည်။ မုန့်အရသာစံနှုန်း ကိုက်ညီပါက ထုပ်ပိုး(Packing)သည့်စက်သို့ပို့ဆောင်ကာ စက်သည်သတ်မှတ်ဂရမ်အတိုင်း ထုပ်ပိုး ပြီသည့် မုန့်ထုပ်ကလေးများကို ထုတ်လုပ်ပေးပါသည်။ မုန့်ထုပ်ကလေးများကို ၁၀ထုပ် သို့မဟုတ် ၂၀ထုပ်ပါ အထုပ်များထပ်မံထုတ်ပြီး ဈေးကွက်များသို့ ဖြန့်ဖြူးရောင်းချကြောင်း သိရပါသည်။

အာလူးချောင်းကလေးများကို  ခရမ်းချဉ်သီးအရသာ(အချိုနှင့်အစပ်)နှင့် ချိစ် အရသာ အဖြစ် သုံးမျိုးထုတ်လုပ်ပါသည်။ စက်ရုံဈေးမှာ တစ်ထုပ်လျှင် ကျပ် ကိုးဆယ်နှင့် တစ်ရာခုနှစ်ဆယ့်ငါးကျပ် နှုန်းများဖြင့် ဖောက်သည်များထံ လက်ကားဈေးနှုန်းဖြင့် ရောင်းချသည့် လေဖောင်းမုန့်ထုပ်များအား တစ်ထုပ်လျှင် ကျပ်တစ်ရာနှင့် ကျပ်နှစ်ရာတန်ဖိုးများဖြင့် ကလေးများက ဈေးနှုန်းချိုသာစွာ ဝယ်ယူ စားသုံးကြကြောင်း သိရပါသည်။ မုန့်ထုပ်လေးများကို အထုပ်၁၀ သို့မဟုတ် အထုပ်၂၀ပါ တစ်ဆွဲထုပ်များကို  ၁၂ဆွဲပါ အထုပ်ကြီးများအဖြစ်ထုပ်ပြီး မုံရွာ၊ ကောလင်း၊ ပခုက္ကူ၊ မန္တလေး၊ တောင်ကြီး၊ ရန်ကုန်၊ တနင်္သာရီ စသည့် မြို့ကြီးများသို့ တင်ပို့ရောင်းချလျက်ရှိကြောင်းသိရပါသည်။

          စက်ရုံ၌  အမျိုးသား ၁၃ဦး၊ အမျိုးသမီး ၁၇ဦးအား အလုပ်အကိုင်အခွင့်အလမ်းများ ပေးထား ပြီး၊ နေ့စားလုပ်သားများကိုလည်း  အခါအားစွာ ခေါ်ယူလုပ်ကိုင်ကြောင်း၊ လစာလုပ်သား တစ်ဦး တစ်လအနိမ့်ဆုံးလစာ ကျပ် တစ်သိန်းငါးသောင်းမှ ကျပ် သုံးသိန်းငါးသောင်းထိရရှိကြောင်း သိရပါ သည်။

          အာလူးချောင်းလေဖောင်းမုန့်ထုပ်ကလေးများပေါ်တွင် ကုန်အညွှန်းအမှတ်အသားများဖော် ပြထားရာ၌ စားသုံးသူကာကွယ်ရေးဥပဒေ အခန်း(၁၈)တွင် ပြဌာန်းထားသည့် ကုန်စည်အမျိုးအစား အလိုက် သတ်မှတ်ချက်များနှင့်အညီ သိသာထင်ရှားစွာဖော်ပြရမည့်အချက်များကိုလည်း ပြည့်စုံစွာ ဖော်ပြထားကြောင်း တွေ့ရှိရပါသည်။ ကလေးများကြိုက်နှစ်သက်သည့် ဈေးနှုန်းချိုသာစွာ စားသုံး သည့် လေဖောင်းမုန့်များကို  ခေတ်မီနည်းစနစ်များဖြင့် သန့်ရှင်းသပ်ရပ်စွာ ထုပ်ပိုးမှုပုံစံလှလှလေး ဖြင့် ထုတ်လုပ်သည့် လုပ်ငန်းရှင်များ များစွာပေါ်ပေါက်သင့်ပါကြောင်း ရေးသားတင်ပြလိုက်ရပါ သည်။

DOCA(စစ်ကိုင်း)

   ရခိုင်ပြည်နယ်၊ ဆီကုန်သည်နှင့် ဆီလုပ်ငန်းရှင်များအသင်းမှ ဦးဆောင်ကြီးမှူးကျင်းပပြုလုပ်သော စစ်တွေခရိုင် ဆီကုန်သည်နှင့် ဆီလုပ်ငန်းရှင်များအသင်း ဖွဲ့စည်းခြင်းဆိုင်ရာ အစည်း အဝေးအခမ်းအနားကို ရခိုင်ပြည်နယ်၊ စစ်တွေမြို့ SS Food Centre ၌ (၁၇-၁၀-၂၀၂၃) ရက်နေ့၊ နေ့လယ် (၁:၃၀) အချိန်တွင် ကျင်းပပြုလုပ်ခဲ့ရာ အဆိုပါအခမ်းအနားသို့ စားသုံးသူရေးရာဦးစီးဌာန၊ ရခိုင်ပြည်နယ်၊ ပြည်နယ်ဦးစီးမှူး၊ စစ်တွေခရိုင်ဦးစီးမှူးတို့ တက်ရောက်ပြီး၊ ရှေးဦးစွာ စစ်တွေခရိုင် ဦးစီးမှူး ဦးမောင်လှဝင်း (ဦးစီးအရာရှိ)က ဌာနကိုယ်စား အဖွင့်အမှာစကားပြောကြားရာတွင် စားသုံးသူရေးရာဦးစီးဌာနအနေဖြင့် မြန်မာနိုင်ငံစားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီ၌ ဥက္ကဌအဖြစ် ဆောင်ရွက်နေရခြင်းကြောင့် ရခိုင်ပြည်နယ်အတွင်း ရည်ညွှန်းဈေးနှုန်းဖြင့် ရောင်းချနေသော စားအုန်းဆီများအား ပြန်လည်ဖြန့်ဖြူးရောင်းချခြင်း လုပ်ငန်းများ၌ စီးပွားရေးလုပ်ငန်းရှင်၊     စားအုန်းဆီ ကိုယ်စားလှယ်များသို့ စားသုံးသူရေးရာဦးစီးဌာန၊  စားအုန်းဆီ အပတ်စဉ်သတ်မှတ်ရည်ညွှန်းဈေးနှုန်းစရိတ် အပါအဝင် ၂% အမြတ်နှုန်းဖြင့် စားသုံးသူများသို့ လက်ဝယ်ရောက်ရှိစေရေး ပူးပေါင်းမိတ်ဖက်ဌာနများနှင့် ပေါင်းစပ်ကာ ကြီးကြပ်မှုများ ပြုလုပ်နေကြောင်းနှင့် စားသုံးသူများသို့ အပြည့်အဝအမှန်တကယ်ရောက်ရှိစေလိုကြောင်းနှင့် စစ်တွေမြို့မှ ကျေးရွာများသို့ လက်ကားစနစ်ဖြင့် ၎င်းဆီကိုယ်စားလှယ်များသို့တဆင့် ရောင်းချကာ ၎င်းတို့ ကျေးရွာကိုယ်စားလှယ်များမှတစ်ဆင့် ကျေးရွာစားသုံးသူများသို့ သတ်မှတ်ဈေးနှုန်းဖြင့် ရောက်ရှိစေရေး ချပြဆွေးနွေးခဲ့ပြီးနောက်၊ ရခိုင်ပြည်နယ် စက်မှုလက်မှုလုပ်ငန်းရှင်များအသင်းဥက္ကဌ ဦးတင်အောင်ဦး မှလည်း မိမိတို့အသင်းအနေဖြင့် စစ်တွေခရိုင် ဆီကုန်သည်နှင့် ဆီလုပ်ငန်းရှင်များအသင်းအား လိုအပ်သည်များကို ပူးပေါင်းကူညီ ပေးမည်ပြောကြားပြီး၊ ရခိုင်ပြည်နယ်၊ ဆီကုန်သည် နှင့် ဆီလုပ်ငန်းရှင်များအသင်း ဥက္ကဌ ဦးစောမြင့်သန်းမှ အသင်းအနေဖြင့် တိုးတက်ခိုင်မာစေရေး ရိုးသားကြိုးစားရန်နှင့် အလုပ်လုပ်ကိုင်ချင်စိတ်ဓာတ်များရှိစေရေး၊ တစ်ဦးကိုတစ်ဦး ယုံကြည်မှု အပြည့်အဝရှိစေရန်လိုအပ်ပြီး၊ အသင်း တိုးတက်ရာတိုးတက်ကြောင်းအတွက် မိမိအနေဖြင့် အထူးကြိုးစားမည်ဖြစ်ကြောင်း၊ အစိုးရမှ ထုတ်ပေးသော စားအုန်းဆီများအားလည်း ယခင်ကထက် ရခိုင်ပြည်နယ်အတွက် ခွဲတမ်းများပိုမို ရရှိလာစေရေး အထူးကြိုးစားဆောင်ရွက်မည်ဖြစ်ကြောင်း၊ အသင်းသားများအနေဖြင့် ပူးပေါင်းပြီး လက်တွဲသွားကြပါစို့ ပြောကြားပြီး၊ စစ်တွေခရိုင် ဆီကုန်သည်နှင့် ဆီလုပ်ငန်းရှင်အသင်းအား အလုပ်အမှုဆောင်ကော်မတီ (၁၁) ဦး ပါဝင်သောအဖွဲ့ဖြင့်ဖွဲ့စည်း ဆောင်ရွက်ခဲ့ပြီး၊ အခမ်းအနားသို့ အသင်းသား (၉၀) ဦး အနက် (၇၀) ဦး တက်ရောက်ပြီး ၊အရပ်ဖက် အဖွဲ့အစည်းများမှ ဖိတ်ကြားထားသော ဧည့်သည်တော် (၆) ဦး တက်ရောက်ခဲ့ကြောင်း သတင်း ရရှိပါသည်။

DOCA(ရခိုင်)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန ခရိုင်ဦးစီးမှူးရုံးနှင့် မြို့နယ်တာဝန်ခံတို့သည် ၂၀၂၃ခုနှစ်၊ အောက်တိုဘာလ ၁၇ ရက်နေ့တွင် ပုသိမ်မြို့နယ် အမှတ်(၂)ရပ်ကွက်အတွင်းရှိ အိမ်ထောင်စု ၅၅၀ အတွက် အခြေခံစားသောက်ကုန်များဖြစ်သည့် စားအုန်းဆီတစ်ပိဿာ ၄၇၀၀ ကျပ်ဈေးဖြင့်  ၅၅၀ ပိဿာ ၊ ဆန်တစ်ပြည် ၂၅၀၀ ကျပ်ဈေးဖြင့် ဆန် ၁၀ အိတ်၊ ကြက်ဥ (၄)လုံးလျှင် ၁၀၀၀ ကျပ်ဈေးဖြင့် အလုံးရေ ၁၀၀၀ နှင့် ဆားတစ်ပိဿာတစ်ထုပ်လျှင် ၃၀၀ ကျပ်ဖြင့် ဆား ၅၀ ပိဿာတို့ကို ဈေးကားဖြင့်ရောင်းချရာတွင် မွေးမြူရေးနှင့်ကုသရေးဦးစီးဌာန၊ ဆားလုပ်ငန်းဦးစီးဌာနတို့နှင့်အတူ ပူးပေါင်းဆောင်ရွက်ခဲ့ကြောင်း သတင်းရရှိပါသည်၊၊

DOCA(ဧရာဝတီ)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန မြောင်းမြခရိုင် လပွတ္တာမြို့နယ် တာဝန်ခံ ဦးမြင့်ဌေးသည်  မြို့နယ်စည်ပင်သာယာရေးအဖွဲ့နှင့်ပူးပေါင်း၍  ၁၂.၁၀.၂၀၂၃ နေ့ နံနက်(၁၀:၀၀)က လပွတ္တာမြို့နယ်၊ အမှတ်(၂)ရပ်ကွက်ရှိ ကုန်မျိုးစုံဆိုင်များတွင် ရောင်းချနေသော ကုန်ပစ္စည်းများတွင် ကုန်အညွှန်းအမှတ်အသားဖော်ပြချက် ပြည့်စုံမှုရှိ/ မရှိ ကွင်းဆင်းစစ်ဆေးခဲ့ပါသည်။

    ထိုသို့ ကွင်းဆင်းစစ်ဆေးဆောင်ရွက်ရာတွင် လပွတ္တာမြို့နယ်တာဝန်ခံမှ ကုန်မျိုးစုံရောင်းချနေသော ဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ပါ ပြဌာန်းချက်များအနက် စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များကို သိရှိလိုက်နာရန်ဖြစ်ကြောင်း၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ (၄၁)၊ ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ  မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့်ဥပဒေညွှန်ကြားချက် များနှင့်အညီ လိုက်နာဆောင်ရွက်ကြရန်ဖြစ်ကြောင်းနှင့် စျေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံစွာဖော်ပြထားမှု ရှိ/မရှိအား ဌာနမှစျေးကွက်စောင့်ကြည့်စစ်ဆေးမှုအား စဉ်ဆက်မပြတ် ဆောင်ရွက်သွားမည်ဖြစ်ကြောင်း အသိပေးဆောင်ရွက်ခဲ့ပါသည်။

DOCA(ဧရာဝတီ)