ကျွန်မတို့အသက်ရှင်နေထိုင်ရာကမ္ဘာကြီးတွင် လူသားတိုင်း နေ့စဉ်အသက်ရှင်ရပ်တည်နိုင်ရေး အတွက် အစားအသောက်များ၊ အဝတ်အစားများ၊ ကျန်းမာရေးအသုံးအဆောင်ပစ္စည်းများ၊ အိမ်အသုံးအဆောင်ပစ္စည်းများကို မဖြစ်မနေဝယ်ယူသုံးစွဲမှုပြုကြရသည်။ မနက်မိုးလင်းသည်မှစမျက်နှာသစ်ခြင်း၊ သွားတိုက်ခြင်းစတဲ့ အခြေခံအကျဆုံးနေ့စဉ်အသုံးပြုရန် လိုအပ်သော ဆပ်ပြာ၊ သွားတိုက်တံ၊ သွားတိုက်ဆေး၊ အစာအာဟာရအတွက် အစားအစာ၊ ဝတ်စားဆင်ယင်မှုအတွက် အဝတ်အထည်စသည် အခြေခံအသုံးအဆောင်များကို ကျွန်မတို့အားလုံး ဝယ်ယူအသုံးပြုရသလို့ လုပ်ငန်းခွင်သို့ သွားရောက်ရန်အတွက် Bus/Taxiအငှားယာဉ်များ စသည်တို့ကို အသုံးပြုခြင်း စသည့် ဝန်ဆောင်မှုကိုအသုံးပြုရပါသည်။ ကျွန်မတို့အားလုံးသည် တစ်နည်းနည်းဖြင့် စားသုံးသူများပင်ဖြစ်ပေသည်။ လူသားတိုင်းတွင် လူ့အခွင့်အရေးရှိသကဲ့သို့ စားသုံးသူတိုင်းတွင်လည်း စားသုံးသူ အခွင့်အရေးရှိပါသည်။ သို့သော်လူသားတိုင်းသည် စားသုံးသူများမဟုတ်ချေ။ မည်ကဲ့သို့သော သူကို စားသုံးသူဟု ခေါ်ဆိုနိုင်သနည်း။
ယနေ့ခေတ်တွင် Social Media ထွန်းကားလာသည့်နှင့်အမျှ အီလက်ထရောနစ်ကူးသန်း ရောင်းဝယ်မှု(e-commerce)များလည်း တရှိန်ထိုးတိုးတက်လာခဲ့ပြီး အွန်လိုင်းမှရောင်းချသည့် ကုန်ပစ္စည်းများ ရွေးချယ်ဝယ်ယူမှုများလည်း တစ်နေ့တစ်ခြား တိုးပွားလာခဲ့သည်ကို စာဖတ်သူတို့ သတိပြုမိကြလိမ့်မည်ဖြစ်ပါသည်။ ယခုလိုတိုးတက်လာသ်နှင့်အမျှ အွန်လိုင်းမှရောင်းချသူများ အနေဖြင့်မှန်မှန်ကန်ကန် ရောင်းချမှုများရှိသလို ရည်ရွယ်ချက်ရှိရှိ လိမ်လည်ရောင်းချမှုများလည်း ရှိပေသည်။ ဝယ်ယူသုံးစွဲသူများအနေဖြင့်လည်း ကုန်ပစ္စည်းများကို မျက်မြင်ရွေးချယ်ဝယ်ယူရခြင်း မဟုတ်သည့်အတွက် မိမိတို့မျှော်လင့်ထားသော အရည်အသွေးပြည့်ဝသည့် ကုန်ပစ္စည်းများမရရှိခြင်း၊ မှာယူသည့်အရောင်၊ အရွယ်အစား၊ အလေးချိန်၊ မှန်မှန်ကန်ကန်မရရှိခြင်း စသည့် ပြသနာများ ကြုံတွေ့နေရပေသည်။ အဆိုပါပြသနာများဖြစ်ပွားရခြင်းမှာ ကုန်သည်များမှ မိမိရောင်းချသည့် ကုန်စည်နှင့်ပတ်သက်၍ သတင်းအချက်အလက်ပြည့်စုံစွာ ဖော်ပြမထားခြင်းနှင့် ရည်ရွယ်ချက်ရှိစွာ ဖော်ပြခြင်းမရှိဘဲ ထိန်ချန်ထားခြင်းတို့ကြောင့် ဝယ်ယူသုံးစွဲသူများအနေဖြင့် နစ်နာမှုများဖြစ်ပေါ် ရခြင်းဖြစ်ပါသည်။ ၂၀၂၀ခုနှစ် ကိုဗစ်-၁၉ရောဂါဖြစ်ပွားသည့်ကာလ နောက်ပိုင်းတွင် အွန်လိုင်းမှ စားသောက်ကုန်ရောင်းချမှုများ ပိုမိုတွင်ကျယ်လာသည်နှင့်အမျှ စားသောက်ကုန်များဝယ်ယူ စားသုံးမှုများနှင့်ပတ်သက်၍ စားသုံးသူများမှ စိတ်ကျေနပ်မှုမရှိသည့် အကြောင်းအရာများကို Facebook စာမျက်နှာများပေါ်တွင် ရေးသားနေကြသည်ကို အတွေ့များလာပေသည်။ ဥပမာ- အစားအစာထဲတွင် စားသုံးရန်မသင့်သော အရာဝတ္ထုများ(စတီးစ၊ ဆံပင်ကဲ့သို့ အရာများ) ပါဝင်ခြင်း၊ ပုံတွင်ဖော်ပြကြော်ငြာထားသည့် နမူနာများအတိုင်း မရရှိခြင်း၊ အရွယ်အစား၊ အလေးချိန်မှန်ကန်မှု မရှိခြင်း၊ ဖြစ်သင့်ဖြစ်ထိုက်သည်ထက် ဈေးပိုနေခြင်း၊ စားသုံးသူထံရောက်ရှိချိန်တွင် ပျက်ဆီးနေခြင်းစသည့် စားသုံးသူကို စိတ်ကျေနပ်မှု မပေးနိုင်သည့် ပြသနာများကို တွေ့မြင်နေရပေသည်။ ဒါ့အပြင် အဝတ်အထည်များ၊ လူသုံးကုန်ပစ္စည်များအား ဝယ်ယူရာတွင်လည်း အလားတူပြသနာများအပြင် ကုန်ပစ္စည်းများ ပေးပို့ခြင်းမရှိဘဲ ငွေကြေးဆုံးရှုံးမှုများလည်း ကြုံတွေ့နေကြရပေသည်။ အဆိုပါ ပြသနာများကြောင့် စားသုံးသူအပေါ် အခြေခံလိုအပ်ချက်များနှင့် ကိုက်ညီအောင် ပေးစွမ်းနိုင်မှု မရှိသည့်အပြင် စားသုံးသူအခွင့်အရေးများ ဆုံးရှုံးနေကြရသည်။ စားသုံးသူအနေဖြင့်လည်း စိတ်ကျေနပ်မှု မရသည်ဖြစ်၍ ၎င်းတို့၏နစ်နာ ဆုံးရှုံးမှုကို ကုစားခွင့်ရရှိရေးအတွက် အရေးဆို တိုင်ကြားခွင့်ရှိပေသည်။
စားသုံးသူများ၏ နစ်နာဆုံးရှုံးမှုများကို ကာကွယ်ပေးရန်အတွက် ၁၉၆၂ခုနှစ် မတ်လ ၁၅ရက်နေ့တွင် အမေရိကန်နိုင်ငံသမ္မတ President John F. Kennedyက စားသုံးသူအခွင့်အရေးကိုစတင်ကြေငြာခဲ့သည်။ ထိုစဉ်က စားသုံးသူအခွင့်အရေး (၄)ချက်သာ ချမှတ်ခဲ့သော်လည်း ကမ္ဘာနိုင်ငံ များတွင် စားသုံးသူနစ်နာမှုကို ကာကွယ်ပေးရန် ကုလသမဂ္ဂမှ စားသုံးသူအခွင့်အရေး(၈)ချက်ကို ချမှတ်ခဲ့ပြီး ၁၉၈၃ခုနှစ်မှစ၍ နှစ်စဉ်မတ်လ ၁၅ ရက်နေ့ကို ကမ္ဘာ့စားသုံးသူအခွင့်အရေးများနေ့ အဖြစ်သတ်မှတ်ကာ စာသုံးသူအခွင့်အရေးနှင့်ကာကွယ်ရေးဆိုင်ရာ အသိပညာတိုးပွားစေရန် ရည်ရွယ်ပြီး ဆောင်ပုဒ်များ၊ အသိပညာပေးဟောပြောပွဲများ ကျင်းပလေ့ရှိပါသည်။
အလားတူကျွန်မတို့နိုင်ငံတွင်လည်း စားသုံးသူများ၏အခွင့်အရေးအပြည့်အဝ အကာအကွယ်ပေးရန် ရည်ရွယ်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဦးဆောင်၍ ၂၀၁၄ ခုနှစ် မတ်လ ၁၉ ရက်နေ့တွင် စားသုံးသူကာကွယ်ပေးရေးဥပဒေကို ပထမအကြိမ် ထုတ်ပြန်ခဲ့ ပါသည်။ ထို့နောက် ၂၀၁၆ ခုနှစ် ဧပြီလမှစ၍ စားသုံးသူအခွင့်အရေးနှင့်အကျိုးစီးပွား ကာကွယ်ရေးလုပ်ငန်း များကို အလေးထားဆောင်ရွက်ရန် ရည်ရွယ်၍ စာသုံးသူရေးရာဦးစီးဌာကိုဖွဲ့စည်းခဲ့ပြီး ထိုနှစ်မှစ၍ နှစ်စဉ် မတ်လ ၁၅ ရက်နေ့၌ ကမ္ဘာ့စားသုံးသူအခွင့်အရေးများနေ့အထိမ်းအမှတ်အဖြစ် မီဒီယာကမ်ပိန်း များ၊ လက်ကမ်းစာစောင်ဖြန့်ဝေခြင်း၊ အသိပေးပိုစတာစိုက်ထူခြင်း၊ ဟောပြော ဆွေးနွေးပွဲအခမ်းအနား များကို ကျင်းပပြုလုပ်လျက်ရှိပါသည်။
၂၀၁၉ ခုနှစ် မတ်လ ၁၅ ရက်နေ့ ကမ္ဘ့စားသုံးသူအခွင့်အရေးများနေ့ (World Consumer Rights Day)တွင် စားသုံးသူအခွင့်အရေးနှင့်အကျိုးစီးပွားကာကွယ်ရေးအတွက် ပိုမိုထိရောက်သည့် စားသုံးသူကာကွယ်ရေးဥပဒေကို ပြင်ဆင်ထုတ်ပြန် ခဲ့ပါသည်။ ဤဥပဒေတွင် စားသုံးသူဆိုသည်မှာ ကုန်စည် (သို့မဟုတ်) ဝန်ဆောင်မှုများကို ကုန်သွယ်ရောင်းဝယ်မှုပြုရန် သို့မဟုတ် အသက်မွေး ဝမ်းကျောင်းပြုရန် မဟုတ်ဘဲ ကိုယ်တိုင်သုံးစွဲမှု အတွက်သော်လည်းကောင်း၊ အခြားသူအတွက် သော်လည်းကောင်း ရည်ရွယ်၍ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်း ပြုလုပ်သူများ သို့မဟုတ် ပေးကမ်းထောက်ပံ့ခြင်း ခံရသူများကို ဆိုလိုပါသည်ဟု အတိအလင်း ဖော်ပြထားပါသည်။
ဒါ့အပြင် စားသုံးသူအခွင့်အရေး(၈)ချက်၊ စားသုံးသူများလိုက်နာရမည့်အချက်များ၊ လုပ်ငန်းရှင်များ လိုက်နာရမည့်အချက်များကိုလည်း ထည့်သွင်းဖော်ပြထားပြီးဖြစ်သည့်အတွက် လုပ်ငန်းရှင်များပါ လေ့လာသင့်သည့် ဥပဒေတစ်ရပ်ပင်ဖြစ်ပေသည်။ ၎င်းအခွင့် အရေး(၈) ချက်မှာ (၁) စားသုံးသူများအနေဖြင့် ကုန်စည်နှင့်ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များ အပေါ်တွင် စိတ်ကျေနပ်မှု ရရှိစေခြင်း၊(၂) ကုန်စည် သို့မဟုတ် ဝန်ဆောင်မှုကို ဘေးအန္တရာယ် ကင်းရှင်းစွာ အသုံးပြုခွင့်ရှိခြင်း၊(၃) ကုန်စည် သို့မဟုတ် ဝန်ဆောင်မှုကို ရွေးချယ်ဝယ်ယူရာတွင် လိုအပ်သော သတင်းအချက်အလက်များ ပြည့်စုံစွာသိရှိခွင့်နှင့်ပြေစာ သို့မဟုတ် အထောက်အထား ရယူခွင့်ရှိခြင်း၊(၄)ဈေးကွက်အတွင်းရှိ ကုန်စည် သို့မဟုတ် ဝန်ဆောင်မှုများနှင့်စပ်လျဉ်း၍ စားသုံးသူ စိတ်ကြိုက် ရွေးချယ်ဝယ်ယူခွင့်ရှိခြင်း၊ (၅) စားသုံးသူနစ်နာဆုံးရှုံးမှုများနှင့် စပ်လျဉ်းသည့်ကိစ္စရပ် များတွင် ရှင်းလင်း တင်ပြခွင့်နှင့်တိုင်ကြားခွင့်ရရှိစေခြင်း၊(၆) ကုန်စည်သို့မဟုတ်ဝန်ဆောင်မှုကို ဝယ်ယူအသုံးပြုခြင်း ကြောင့် ဖြစ်ပေါ်လာသည့်နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်း၊(၇) ကုန်စည် သို့မဟုတ် ဝန်ဆောင်မှုနှင့်စပ်လျဉ်းသည့် အသိပညာဗဟုသုတများ၊ အခွင့်အရေးများနှင့် လိုအပ်သော အချက်အလက်များကို သိရှိလေ့လာနိုင်ခွင့်ရှိခြင်းနှင့်(၈)ပစ္စုပ္ပန်တွင်သာမက အနာဂတ် မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင် နေထိုင်နိုင်ခွင့် ရရှိစေခြင်းတို့ပဲဖြစ်ပါသည်။ သို့ဖြစ်၍ ကုန်စည်(သို့)ဝန်ဆောင်မှုကို မိမိကိုတိုင် အသုံးပြုသည့် စားသုံးသူများအနေဖြင့် အထက်ဖော်ပြပါ စားသုံးသူအခွင့်အရေး(၈)အနက် တစ်စုံတစ်ခု ချိုးဖောက်ခြင်း ခံရပါက နီးစပ်ရာစားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်ပါသည်။
သို့သော်စားသုံးသူများသည် ၎င်းတို့၏နစ်နာဆုံးရှုံးမှုများကို သက်ဆိုင်ရာဌာနသို့ အရေးဆို တိုင်ကြားရမည့်အစား လူမှုကွန်ယက်တွင်သာ ရေးသားနေကြသည်ကို စာဖက်သူတို့ တွေ့မြင်ကြရ ပေသည်။ အကြောင်းမှာမူ ကျွန်မတို့နိုင်ငံတွင် စားသုံးသူနစ်နာမှုများအတွက် အရေးဆိုတိုင်ကြား နိုင်သည်ဆိုသည့် ၎င်းအခွင့်အရေးကိုသိရှိမှုအားနည်းခြင်း၊ သိရှိသော်လည်း တိုင်းကြားရမည့် နည်းလမ်းကို အသေအချာမသိရှိခြင်းနှင့် ရုံးပြင်ကနားသို့သွားရမည်ကို စိုးထိတ်နေခြင်း တို့ကြောင့်ပင် ဖြစ်ပေသည်။ စားသုံးသူအခွင့်အရေးများကို ပြည်သူများသိရှိစေရန်အတွက် စားသုံးသူရေးရာ ဦးစီးဌာနမှ အသိပညာပေးခြင်းလုပ်ငန်းများကို စဉ်ဆက်မပြတ်ဆောင်ရွက်လျက်ရှိပါသည်။
စားသုံးသူအခွင့်အရေးများကို အများပြည်သူများသိရှိနိုင်စေရန် ရည်ရွယ်၍ စားသုံးသူရေးရာ ဦးစီးဌာနမှ ရပ်ကွက်၊ ဈေးများ၊အရောင်းစင်တာများ၊ အခြေခံပညာကျောင်းများ၊ အဆင့်မြင့်ပညာနှင့် အသက်မွေးဝမ်းကျောင်းများ(တက္ကသိုလ်များ၊ကောလိပ်များ)၊ စက်ရုံ၊ အလုပ်ရုံများ၊ လုပ်ငန်းအဖွဲ့အစည်း များနှင့်ကုမ္ပဏီများ၊ ဘဏ်များ၊ ဌာနဆိုင်ရာအဖွဲ့အစည်းများနှင့်လူမှုရေးအသင်းအဖွဲ့များ၊ ကျေးလက် နှင့်မြို့ပြဒေသရှိ လူစုဝေးရာနေရာများတွင် အသိပညာပေးဟောပြောခြင်း၊ လက်ကမ်းစာစောင်များ မျှဝေခြင်း လုပ်ငန်းများဆောင်ရွက်လျက်ရှိပြီး လူမှုကွန်ယက်စာမျက်နှာ Facebook Page များမှတဆင့် Talk Show များပြုလုပ်၍ အသိပညာမျှဝေပေးလျက်ရှိပါသည်။ ဒါ့အပြင် လုပ်ငန်းရှင်များနှင့် တွေ့ဆုံ၍လည်း စားသုံးသူများရွေးချယ်ဝယ်ယူသုံးစွဲခွင့် ရရှိစေရန်အတွက် မိမိတို့ကုန်ပစ္စည်းနှင့် သက်ဆိုင်သည့်သတင်းအချက်အလက်များကို တိကျမှန်ကန်စွာဖြင့် ရှင်းလင်းအောင် ဖော်ပြပေးရန်နှင့်သတင်းအချက်အလက် မှန်ကန်မှုမရှိခြင်း၊ ထိန်ချန်ထားခြင်းမျိုးပြုလုပ်ပါက စားသုံးသူခွင့်အရေး ချိုးဖောက်ခြင်းမြောက်သည်ဖြစ်ရာ စားသုံးသူကာကွယ်ရေးဥပဒေအရ အပြစ်ပေးအရေးခြင်းများ ပြုလုပ်နိုင်းကြောင်းကို သိရှိနိုင်ရန် အသိပညာပေးခြင်းများဆောင်ရွက်လျက်ရှိပါသည်။ အလားတူ ဈေးကွက်အတွင်းရှိ ကုန်စည်များကိုလည်း ဘေးကင်းလုံခြုံသည့်ကုန်စည်များသာ ရောင်းဝယ် ဖောက်ကားနိုင်ရန်အတွက် ဈေးကွက်ကွင်းဆင်းစစ်ဆေးခြင်းနှင့် အပြစ်ပေးအရေးယူခြင်းများလည်းဆောင်ရွက်လျက်ရှိသည့်အပြင် စားသုံးသူများ၏နစ်နာဆုံးရှုံးမှုများအတွက် တိုင်ကြားမှုများကို အချိန်နှင့်တစ်ပြေးညီ လက်ခံဖြေရှင်းဆောင်ရွက်ပေးလျက်ရှိပါသည်။
စားသုံးသူနစ်နာမှုများအတွက် အရေးဆိုတိုင်ကြားရန်အခွင့်အရေးရှိသည်မှန်သော်လည်း စားသုံးသူများအနေဖြင့်လည်း မိမိတို့လိုက်နာရမည့်အချက်များကိုလည်း တိကျစွာလိုက်နာဖို့ လိုအပ်လှပေသည်။ ကုန်ပစ္စည်းဝယ်ယူခြင်းတိုင်းအတွက် မိမိသည် စားသုံးသူဟုမဆိုနိုင်ပါ။ အကြောင်းမှာ အထက်တွင်ဖော်ပြခဲ့သည့်အတိုင်း မိမိဝယ်ယူရသည့်ရည်ရွယ်ချက်အပေါ်မူတည်၍ စားသုံးသူဖြစ်သည် မဖြစ်သည်ကို ဆုံးဖြတ်ရပေမည်။ မိမိအနေဖြင့် ကုန်ပစ္စည်းအား တစ်ဆင့် ပြန်လည်ရောင်းချရန်ဝယ်ယူခြင်းအတွက်နစ်နာဆုံးရှုံးမှုများကိုမူ စားသုံးသူနစ်နာမှုဟုမဆိုနိုင်ပါ။ မိမိကိုယ်တိုင် သုံးစွဲရန်၊ ပေးကမ်းထောက်ပံ့ရန်နှင့် အသက်မွေးဝမ်းကြောင်းပြုရန် ဝယ်ယူခြင်း များမှ နစ်နာမှုများသာလျှင် စားသုံးသူအခွင့်အရေးအရ အရေးယူတိုင်ကြားနိုင်ပေသည်။
လုပ်ငန်းရှင်များအနေဖြင့်လည်း စားသုံးသူကာကွယ်ရေးဥပဒေပါ လုပ်ငန်းရှင်များ လိုက်နာရမည့် အချက်များကို တိကျမှန်ကန်စွာလိုက်နာရန် လိုအပ်သလို စားသုံးသူမှလည်း ဥပဒေပါ စားသုံးသူလိုက်နာရမည့်အချက်များကိုလည်း တိကျစွာလိုက်နာရပေမည်။ လုပ်ငန်းရှင်များ အနေဖြင့် စားသုံးသူကာကွယ်ရေးဥပဒေပါ အခန်း(၁၈)တွင် ဖော်ပြထားသည့် ကုန်အညွှန်းအမှတ်သား ဆိုင်ရာဖော်ပြရမည့်အချက်များကို အတိအကျဖော်ပြပေးရန်နှင့် စားသုံးသူများမှလည်း ကုန်အညွှန်း အမှတ်အသားတွင် ဖော်ပြထားသောအချက်များကို သေချာစစ်ဆေး၍ ဝယ်ယူသုံးစွဲရန်လည်း အထူးလိုအပ်လှပေသည်။
ဒါ့အပြင် လုပ်ငန်းရှင်အနေဖြင့် မိမိထုတ်လုပ်သည့်ထုတ်ကုန်အလိုက် သီးခြားအရည်အသွေး ဆိုင်ရာ စံသတ်မှတ်ချက်များကိုလည်း အလေးထားလိုက်နာရန် လိုအပ်ပါသည်။ သို့မှသာ မိမိကုန်ပစ္စည်း၏ အရည်အသွေးအပေါ် အာမခံချက်ပေးနိုင်ပြီး ဝယ်ယူသုံးစွဲသူကိုလည်း အန္တရာယ် ကင်းစွာ သုံးစွဲနိုင်စေမှာမမှာဖြစ်ပါသည်။ စားသုံးသူများအနေဖြင့်လည်း ကုန်ပစ္စည်းများကို မျက်မြင်ကိုယ်တိုင် ရွေးချယ်ဝယ်ယူပါက ကုန်အညွှန်းအမှတ်အသားတွင် ဖော်ပြထားသော အချက်များကို သေချာစွာဖတ်ရှု၍ ဝယ်ယူရန်နှင့် အွန်လိုင်းမှ ဝယ်ယူပါက ၎င်းတို့ဖော်ပြထားသော လိပ်စာ၊ စားသုံးသူအများစု လက်ခံယုံကြည်ပြီး ဝယ်ယူအားပေးလျက်ရှိသော လုပ်ငန်ဟုတ်မဟုတ်၊ Facebook pageတွင် Blue Markအမှတ်အသားရှိ/မရှိ၊ စားသုံးသူများ၏ Feedback/Review သုံးသပ်ချက်များကို လေ့လာကြည့်ရှု ပြီးမှသာ ဝယ်ယူသင့်ပါသည်။ သို့မှသာ မိမိတို့ ဝယ်ယူ သည့် ပစ္စည်းနှင့်ပတ်သက်၍ နစ်နာမှုများ ရှိပါက အရေးဆိုတိုင်ကြား နိုင်မှာဖြစ်ပါသည်။ ၂၀၁၉ခုနှစ်မှစ၍ စားသုံးသူများ၏ နစ်နာဆုံးရှုံမှုများ အတွက် စားသုံးသူရေးရာဦးစီးဌာနသို့ လာရောက်တိုင် ကြား မှုများ ကို လေ့လာကြည့်ရာတွင် ပညာရေး ဝန်ဆောင်မှုများ၊ ဆက်သွယ်ရေးဝန်ဆောင်မှုများ၊ လူသုံးကုန် ပစ္စည်းများဖြစ်သည့် အဝတ်အထည်၊ မော်တော်ဆိုင်ကယ်ဝယ်ယူခြင်း၊ ငွေကြေးဝန်ဆောင်မှုများနှင့် ပတ်သက်သည့်ကိစ္စရပ်များဖြစ်ပြီး ဆက်သွယ်ရေးဝန်ဆောင်မှု(အင်တာနက်)မှုများသည် အများဆုံး ပင်ဖြစ်ပေသည်။ သို့ပါ၍ စားသုံးသူများ အနေဖြင့် မိမိတို့ရရှိထားသည့် အခွင့်အရေးများနှင့်စပ်လျဉ်း၍ နစ်နာဆုံးရှုံးမှုများ ရှိလာပါက နီးစပ်ရာတိုင်းဒေသကြီး၊ ပြည်နယ်၊ ခရိုင်စားသုံးသူ ရေးရာ ဦးစီး ဌာန သို့လည်းကောင်း၊ ဌာန၏ Websiteဖြစ်သော www.doca.gov.mm မှလည်းကောင်း၊ Call Center ဖုန်းနံပါတ်ဖြစ်သော ၁၅၃၅ သို့လည်းကောင်း ဆက်သွယ်၍ တိုင်းကြားနိုင်ကြောင်း စားသုံးသူရေးရာဦးစီးဌာနအနေဖြင့် စားသုံးသူ နစ်နာဆုံးရှုံးမှုများနှင့် ပတ်သက်၍တိုင်ကြားမှုများကို ကူညီဖြေရှင်းဆောင်ရွက်ပေးရန် အသင့်ရှိ နေကြောင်းကို စားသုံးသူပြည်သူများ သိရှိနိုင်စေရန် ရည်ရွယ်၍ ရေးသားတင်ပြလိုက်ရပါသည်။
DOCA(မန္တလေး)