ပြည်တွင်းကုန်သွယ်မှုသတင်း

     ကျောက်ဆည်ခရိုင် ၊ ကျောက်ဆည်မြို့နယ်အတွင်းရှိ လယ်ယာလုပ်ငန်းလုပ်ကိုင်သော တောင်သူဦးကြီးများသည် အဓိကစိုက်ပျိုးသီးနှံများဖြစ်သော စပါး၊ ပဲ၊ ပြောင်း၊ နှမ်း၊ ဝါ၊ ငရုတ်၊ ကြက်သွန် စသည့်သီးနှံများကို ရာသီအလိုက်စိုက်ပျိုးကြသလို သစ်သီးဝလံများဖြစ်သော ငှက်ပျော၊ သင်္ဘော၊ ဖရဲ၊ သခွား၊ သံပုရာ၊ ဘူး၊ ဖရုံ၊ ပဲသီးတောင့်ရှည်နှင့် ကြက်ဟင်းခါးသီးစသည်ဖြင့် သီးနှံ များအားလည်း စိုက်ပျိုးကြပါသည်။ တချို့အိမ်ရှင်များသည် ထိုသစ်သီးဝလံများကို အလွယ်တကူ ရရှိနိုင်စေရန် မိမိတို့၏ ခြံဝန်းအတွင်းစိုက်ပျိုးထားရှိပြီး ယခုအခါ ခြံစိုက်တောင်သူများအနေဖြင့် သစ်သီးဝလံများကို စီးပွားဖြစ်စိုက်ပျိုးလာရာ ထိုသစ်သီးဝလံများထဲမှ ကြက်ဟင်းခါးသီးကိုလည်း စိုက်ပျိုးလာကြပါသည်။ ကြက်ဟင်းခါး ပင်သည် ရာသီမရွေးစိုက်ပျိုးနိုင်ကြောင်း စိုက်ပျိုးမည်ဆိုပါက မျိုးစေ့ကိုအိတ်ဖြင့် ပျိုးထောင်၍ ပျိုးထောင်သည့်နေ့မှရက်(၂၀)ရက်ကြာ ပျိုးပင်ကိုမြေချစိုက်ပျိုးနိုင်သည်။ ကြက်ဟင်းခါးအပင် သည်(၃)လခန့်အကြာတွင် အသီးများခူးဆွတ်နိုင်ပြီး တစ်ပတ်လျှင် တစ်ကြိမ် ခူးဆွတ်နိုင်၍ (၅)လခန့်အထိ ခူးဆွတ်နိုင်ကြောင်းသိရှိရပါသည်။ ကြက်ဟင်းခါးသီး (၁)ဧက အထွက်နှုန်းမှာ တစ်ပတ်လျှင် ပိဿာ(၁၅၀)ခန့်အထိ ထွက်ရှိကြောင်းသိရှိရပါသည်။ ကြက်ဟင်းခါး သီး(၁)ဧက ကုန်ကျစရိတ်အနေဖြင့် (၇၀၀၀၀၀-၇၅၀၀၀၀) ကျပ်အထိ ရှိကြောင်း၊ ဈေးနှုန်းအနေဖြင့် (၁)ပိဿာလျှင် လက်ကားစျေး(၂၀၀၀/-)ကျပ်ဖြင့် ပွဲစားများထံရောင်းရကြောင်း ၊ လက်လီ အသုံးပြု သူများအနေဖြင့် (၂၅၀၀/-)ကျပ်ဖြင့် ဝယ်ယူစားသောက်ရကြောင်းသိရှိရပါသည် ။ ကြက်ဟင်းခါး စိုက် တောင်သူများအနေဖြင့် (၁)ဧက အကျိုးအမြတ်အနေဖြင့် (၁၆၅၀၀၀၀/-) ကျပ်ခန့် မြတ်ပြီး အကျိုးအမြတ်များရရှိသည့်အတွက် စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

    ကျောက်ဆည်ခရိုင် မြစ်သားမြို့နယ်အတွင်းရှိ ကူမဲမြို့မဈေးအတွင်းသို့ ပြည်ဘက်မှထွက် သော ပဲစောင်းလျှားသီးများ လှိုင်လှိုင်ဝင်ရောက်လျက်ရှိပါသည်။ အသီးအတိုင်း သီးသန့် စားသုံး ရသော ပဲစောင်းလျှားသီးများကို ခရိုင်အတွင်းစိုက်ပျိုးမှုမရှိသော်လည်း ပဲမြစ်စားသုံးရန် စိုက်ပျိုးသော အပင်မှ ပဲမြစ်ညွန့်နှင့် ပဲစောင်းလျှားသီးများ ထွက်ပေါ်ကြောင်း၊ ရာသီချိန်မှသာ စိုက်ပျိုး သောကြောင့် လက်ရှိအချိန်တွင် ထွက်ပေါ်ခြင်းမရှိပေ၊ ပြည်မှ ဝင်ရောက်သော ပဲစောင်းလျှားသီး တစ်ပိဿာလျှင် (၂၀၀၀/-)ကျပ်ဖြင့် ရောင်းချပေးကြောင်း၊ လက်လီအနေဖြင့် (၂၅)ကျပ်သားလျှင် (၁၀၀၀/-)ကျပ်ဖြင့် ရောင်းဝယ်လျက်ရှိကြောင်း၊ ပဲစောင်းလျှားသီးကို အတို့အမြှုပ်အဖြစ် စားသုံးကြသလို၊ ချဉ်ရည်ဟင်း နှင့် အသီးကိုရေနွေးဖျော၍ လက်သုပ် သုပ်စားကြကြောင်း၊ ပဲစောင်းလျှားသီး စားသုံးခြင်းဖြင့် အရွယ်တင်နုပျိုစေကြောင်း၊ ဗီတာမင်စီ ကြွယ်ဝ၍ ကင်ဆာရောဂါကိုလည်း ကာကွယ်ပေးနိုင် ကြောင်းနှင့် အရိုးတွေကိုလည်းသန်မာစေနိုင်ကြောင်း လေ့လာသိရှိရပါသည်။ တန်ဖိုးနည်းပြီး အာဟာရဓာတ်နှင့် ကျန်းမာရေးအကျိုးကျေးဇူးများစွာ ပါရှိသော ပဲစောင်းလျှားသီးကို နေ့စဉ်စားသုံးသင့် ပါကြောင်း ရေးသားတင်ပြအပ်ပါသည်။

DOCA(မန္တလေး)

   မန္တလေးတိုင်းဒေသကြီး ၊ တံတားဦးခရိုင် ၊ တံတားဦးမြို့နယ်အနေဖြင့် မြေပဲ(မိုး)များ အောင်မြင်ဖြစ်ထွန်းလျှက်ရှိကြောင်းသိရှိရပြီး မိုးမြေပဲများကို မတ်လတွင် စတင်စိုက်ပျိုးကျကြောင်း၊ ယခု နှစ်တွင် မိုးရွာသွန်းမှုကောင်းသောကြောင့် ယခုအချိန်တွင် အပင်များကောင်းမွန်စွာ အောင်မြင် ဖြစ်ထွန်းနေပြီး ဩဂုတ်လနောက်ဆုံးအပတ်တွင် စတင်ရိတ်သိမ်းနိုင်မည်ဖြစ်ကြောင်း ၊ တောင်သူ တစ်ဦး၏ပြောပြချက်များအရသိရှိရပါသည်။ မြေပဲစိုက်ပျိုးမှုအနေဖြင့် (၁)ဧကလျှင် ကုန်ကျစရိတ် အနေဖြင့်မျိုး၊ သွင်းအားစု၊ လုပ်သားခအပါအဝင် စုစုပေါင်း(၆၀၀၀၀၀)ကျပ်ဝန်းကျင်ခန့်ကုန်ကျ ကြောင်း၊ယခင်နှစ်(၁)ဧက အထွက်နှုန်းအနေဖြင့် တင်း(၃၀-၄၀)ခန့်ထွက်ရှိခဲ့ကြောင်း၊မြေပဲဈေးနှုန်း အနေဖြင့် ယခင်နှစ်တွင် မြေပဲတောင့်(၁)တင်းလျှင်(၄၅၀၀၀/-)ကျပ် ၊ မြေပဲဆံ တစ်ပိဿာလျှင် (၁၂၀၀၀/-)ကျပ် ၊ မြေပဲဆီ(၁)ပိဿာလျှင်(၁၈၀၀၀/-)ကျပ်ဈေးနှုန်းများဖြင့်ရောင်းဝယ်ခဲ့ပြီး အကျိုး အမြတ်အနေဖြင့် (၇၅၀၀၀၀/-)ကျပ်ခန့် မြတ်ခဲ့ကြောင်း ၊ ယခုလက်ရှိမြေပဲပေါက်ဈေးအနေဖြင့် မြေပဲတောင့်(၁)တင်းလျှင် (၃၈၀၀၀-၄၀၀၀၀)ကျပ် ၊ မြေပဲဆံ (၁)ပိဿာလျှင် (၁၀၀၀၀/-)ကျပ် ၊ မြေပဲဆီ(၁)ပိဿာလျှင် (၁၉၀၀၀/-)ကျပ် ဈေးနှုန်းများဖြင့် ရောင်းဝယ်လျက်ရှိကြောင်း၊ မြေပဲပေါ် ချိန်တွင် တောင်သူများမှနီးစပ်ရာ ပွဲရုံများသို့သွားရောက်ရောင်းချကြကြောင်း၊  ပွဲရုံများမှတဆင့် မန္တလေး၊ ရန်ကုန်မြို့များသို့ တင်ပို့ရောင်းချကြကြောင်း သိရှိရပါသည်။

DOCA(မန္တလေး)

   ကျောက်ဆည်ခရိုင်အတွင်းရှိ စားဖိုဆောင်သီးနှံများဖြစ်သည့် ဂျင်းများဒေသတွင်း ထွက်ရှိမှုမရှိသည့်အတွက် ရှမ်းပြည်နယ်အောင်ပန်းမှ အများဆုံးဝင်ရောက်လျက်ရှိပါသည်။ ဂျင်းတက်ဈေးနှုန်းအနေဖြင့် ဂျင်းတက်တစ်ပိဿာလျှင်(၃၀၀၀-၃၂၀၀)ကျပ်ဖြင့်ရောင်းချလျက် ရှိကြောင်း၊ ဂျင်းကိုဟင်းလျာများတွင် အနံအရသာတိုးစေဖို့ အသုံးပြုကြကြောင်း၊ အသားများ တွင်အညှီနိုင်စေရန်အတွက် အသုံးပြုကြပါသည်။ ဂျင်းပြုတ်ရည်ကို သောက်သုံးခြင်းဖြင့် တုတ်ကွေးနဲ့ လည်ချောင်းနာ ချောင်းဆိုးခြင်းကို ကာကွယ်ပေးနိုင်တဲ့အတွက်ကြောင့် ကျန်းမာ ရေးကောင်းစေဖို့အတွက် သောက်သုံးသင့်ကြောင်း ရေးသားတင်ပြအပ်ပါသည်။

DOCA(မန္တလေး)

    မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံ စိုက်ပျိုးအောင်မြင်ဖြစ်ထွန်း လျက်ရှိပြီး ဆည်ရေသောက် ဒေသတစ်ခုဖြစ်သောကြောင့် သီးနှံမျိုးစုံ စိုက်ပျိုးလျက်ရှိရာ တစ်နှစ်ပတ်လုံး စိုက်ပျိုး၍ရသော ဝယ်လိုအားရှိသော ချဉ်ပေါင်သီးနှံကိုလည်း စိုက်ပျိုးလျက် ရှိရာ စိုက်ပျိုးသောမျိုးများမှာ ချဉ်ပေါင်လက်ချား၊ ချဉ်ပေါင်ခါးနှင့် ဘီးလပ်ချဉ် ပေါင်မျိုးများကို စိုက်ပျိုးကြပါသည်။ အများဆုံးစိုက်ပျိုးသောမျိုးမှာ ဘီးလပ်ချဉ်ပေါင် မျိုးဖြစ်ပြီး အသီးသီး ချိန်တွင်လည်း ချဉ်ပေါင်ဖူးကိုပါ ရောင်းချရသောကြောင့် ဝင်ငွေနှစ်မျိုး ရရှိကြောင်း ဝါဆိုလ နှင့် သီတင်းကျွတ်လများတွင် အများဆုံးစိုက်ပျိုးကြကြောင်း၊ စိုက်ပျိုးစနစ်အနေဖြင့် ထယ်ထိုး၊ ထယ်မွှေကာ မြေတွင် တစ်တန်းနှင့်တစ်တန်း (၂)ပေခွာပြီး (၄)လက်မခြား၍ အစေ့ချ စိုက်ပျိုး ကြကြောင်း၊ တစ်ဧက စိုက်ပျိုးမှုမျိုးအနေဖြင့် ချဉ်ပေါင်စေ့(၁)ပြည် ကုန်ကျကြောင်း၊ မျိုးစေ့ (၁)ပြည်လျှင်(၅၀၀၀/-)ကျပ် ပေးရကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း ကုန်ကျ စရိတ်(၃၀၀၀၀၀/-)ကျပ်ခန့် ကုန်ကျကြောင်း၊  စိုက်ပျိုးပြီး (၁)လခွဲသားတွင် အရွက်၊ ကိုင်းနှင့် အပင်များခူးညှပ်၍ ရောင်းချနိုင်ပြီဖြစ်ကြောင်း၊ ချဉ်ပေါင်တစ်ဧကအနေဖြင့် အရွက်ပိဿာ (၁၀၀၀)ပိဿာ ထွက်ရှိပြီး၊ အနေတော် အပင်ပေါက် ကလေးများကိုနုတ်၍ အစီး လေးများဖြင့် ရောင်းချပါက တစ်ဧက အစီးပေါင်း(၁၀၀၀၀)စီးခန့် ထွက်ရှိကြောင်း၊ ချဉ်ပေါင် တစ်စီးလျှင်(၁၀၀/-)ကျပ်ဖြင့် လက်ကားရောင်းချပေးကြောင်း၊ ချဉ်ပေါင်ရွက်တစ်ပိဿာလျှင် လက်ကားဈေး(၁၀၀၀/-) ကျပ်ဖြင့် ရောင်းချပေးကြောင်း၊ ဈေးကွက်အနေဖြင့် ကုန်စိမ်းပွဲရုံများနှင့် ကုန်စိမ်းပွဲစားများမှ အခင်းထဲအရောက် လာရောက် ဝယ်ယူသူများရှိသလို ကုန်စိမ်းပွဲရုံများသို့လည်း တိုက်ရိုက်တင်ပို့ ရောင်းချပေးလျက်ရှိကြောင်း၊ တစ်ဧကအကျိုးအမြတ်အနေဖြင့် စိုက်ပျိုးစရိတ်နုတ်ပြီး (၇၀၀၀၀၀/-)ကျပ် ခန့်မြတ်ကြောင်း၊ ချဉ်ပေါင်သီးနှံကို တောင်သူများမှ မိသားစုဝင်ငွေတိုးပြီး စီးပွားဖြစ်သောကြောင့် တိုးချဲ့စိုက်ပျိုး လျက်ရှိကြောင်း တောင်သူတစ်ဦး ပြောကြားချက်အရ သိရှိရပါသည်။ 

DOCA(မန္တလေး)