ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ အထက်မင်းလှမြို့၊ ဇေယျာသီရိဈေးအတွင်းရှိ သစ်သီးဆိုင်များနှင့် မြို့ပေါ် ရပ်ကွက်များရှိ သစ်သီးဆိုင်များတွင် ကီလိုမာလကာသီးများကို ကျောက်ပန်းတောင်း၊ ပုပ္ပါးဒေသများမှ မှာယူရောင်းချသည့်အပြင် မင်းလှမြို့ ပတ်ဝန်းကျင်ရှိကျေးရွာများတွင် စိုက်ခင်းအဖြစ်သီးသန့် စိုက်ပျိုး ကြသလို မြို့ပေါ်ရပ်ကွက်များရှိ အိမ်ခြံမြေများတွင်လည်း တစ်နိုင်တစ်ပိုင် စိုက်ပျိုးရောင်းချကြကြောင်း သိရသည်။

 ၂၀၂၅ခုနှစ်၊ ဩဂုတ်လ(ပထမပတ်)တွင် ကီလိုမာလကာသီး(အလုံးအကြီး၊ အသေး)အလိုက် ကျပ်(၅၀၀-၆၀၀)ဖြင့် အရောင်းအဝယ်ဖြစ်လျက်ရှိပြီး ယခင်ကီလိုမာလကာသီး စတင်ထွက်ပေါ်စအချိန် ဇွန်လ(ပထမပတ်)တွင် ကျပ်(၇၀၀-၉၀၀)ဖြင့် အရောင်းအဝယ်ဖြစ်ခဲ့၍ ဈေးနှုန်းနှိုင်းယှဉ်ပါက ယခုတစ် ပတ်တွင် (၁)လုံးလျှင် ကျပ်(၂၀၀-၃၀၀)ဈေးနှုန်းကျဆင်းပြီး အရောင်းအဝယ်ဖြစ်ခဲ့ကြောင်း သိရသည်။ မင်းလှမြို့၌ ဇွန်လမှစတင်၍ ကျောက်ပန်းတောင်း၊ ပုပ္ပါးဒေသဘက်မှဝင်ရောက်လာသည့် ကီလို မာလကာသီးများသာ အရောင်းအဝယ်ဖြစ်ခဲ့သော်လည်း ဇူလိုင်လ(စတုတ္ထပတ်)တွင် မြို့နယ်အတွင်း ကျေးရွာများမှ  စိုက်ပျိုးထွက်ရှိသည့် ကီလိုမာလကာသီးများ ဈေးကွက်အတွင်း ဝင်ရောက်မူ များလာ သည့်အတွက် ဈေးနှုန်းမှာကျဆင်းရခြင်းဖြစ်ကြောင်း၊ ယခုအချိန်သည် ကျောင်းဖွင့်ရာသီဖြစ်သည့် အတွက် ကျောင်းမုန့်ဈေးတန်းဆိုင်များတွင်လည်း ကီလိုမာလကာသီးများ အရောင်းသွက်လျက်ရှိ ကြောင်း သိရှိရသည်။

DOCA(မကွေး)

          ဧရာဝတီတိုင်းဒေသကြီး၊ မြန်အောင်ခရိုင်၊ အင်္ဂပူမြို့နယ်ကုန်ဈေးနှုန်းတည်ငြိမ်ကျဆင်းရေးကော်မတီ၏ ကြီးကြပ်မှုဖြင့်(၂၈.၇.၂၀၂၅)ရက်နေ့ နံနက်(၀၆:၃၀) နာရီအချိန်မှစတင်၍ အခြေခံစားသောက်ကုန် ဆန်၊ ဆီနှင့် ကြက်ဥများအား ဈေးနှုန်းသက်သာစွာဖြင့် ပြည်သူများဝယ်ယူအသုံးပြုနိုင်ရေး ရောင်းချပေးလျက်ရှိပါသည်။ ဆန်နှင့် စားအုန်းဆီများရောင်းချပေးရာတွင် မြို့နယ်စီမံအုပ်ချုပ်ရေးအဖွဲ့ ဥက္ကဌ၊ မြို့နယ်စည်ပင်သာယာရေးအဖွဲ့၊ စားသုံးသူရေးရာဦးစီးဌာန မြို့နယ်တာဝန်ခံ ဦးဘိုဘိုနှင့် မြို့နယ် စားအုန်းဆီလက္ကားကိုယ်စားလှယ်များမှ ပူးပေါင်းဆောင်ရွက်ခဲ့ကြောင်း သိရသည်။

         ထိုသို့ရောင်းချရာတွင် ပြည်သူများအား သက်သာသောဈေးနှုန်းဖြင့် ဝယ်ယူစားသောက်နိုင်ရန် စားအုန်းဆီ (၅၀ ကျပ်သား)ဘူးခွံအပါ တစ်ဗူးလျှင် ၃၅၀၀/- ကျပ်နှုန်းဖြင့် ပိဿာချိန် (၁၀၀)နှင့် ဆင်းသု ခ ဆန်တစ်ပြည်လျှင် ၂၀၀၀/- ကျပ်တစ်ဦးလျှင် (၂)ပြည်နှုန်းဖြင့် ဆန်(၇)အိတ်၊ ကြက်ဥတစ်လုံးလျှင် (၃၅၀)ကျပ်ဖြင့် အလုံးရေ (၆၀၀)လုံးအား ရောင်းချပေးခဲ့ကြောင်း သိရှိရပါသည်။ ထိုသို့ရောင်းချခြင်းကို ဌာနဆိုင်ရာများမှ ပူးပေါင်း၍ ပြည်သူများ ဈေးနှုန်းသက်သာစွာဝယ်ယူနိုင်ရေး ဆောင်ရွက်ပေးခြင်းဖြစ်ကြောင်း သတင်းရရှိပါသည်။

DOCA (ဧရာဝတီ)

                      မြင်းခြံမြို့နယ်သည် ဥယျာဉ်ခြံ မြေလုပ်ငန်းများကိုလည်း လုပ်ကိုင်လျက်ရှိရာ ငှက်ပျော စိုက်ပျိုးခြင်း လုပ်ငန်းကိုလည်းလုပ်ကိုင်ကြောင်းသိရှိရသည်။ ဒေသတွင်းကျေးရွာများဖြစ်သော ပတ္တာရွာ၊  သင်္ဘောတင်ရွာ၊ ပိုက်တဲကုန်းနှင့် အနိမ့်ကျေးရွာများသည် ငှက်ပျောပင်များကို မိမိတို့ ခြံဝန်းများ၌ တစ်နိုင်တစ်ပိုင် စိုက်ပျိုးထားကြကြောင်းနှင့် စီးပွားဖြစ်လည်းစိုက်ပျိုး ကြကြောင်းသိရှိရ သည်။ ငှက်ပျောပင်များကို မိုးဦးမကျမီ မေလဆန်းပိုင်းတွင် စိုက်ပျိုးထားရှိကြောင်း၊ စိုက်ဧကအနေ ဖြင့် (၁၁၅)ဧကခန့်စိုက်ပျိုးထားကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရ သည်။ ငှက်ပျောစိုက်ပျိုးရာတွင် လှံစို့သားတက်အပင်မြင့်မျိုးကို စိုက်ပျိုးထားကြောင်း၊ရခိုင်ငှက်ပျော မျိုးနှင့် ဖီးကြမ်းငှက်ပျောမျိုးကိုစိုက်ပျိုးထားကြောင်း၊ ငှက်ပျောပင်ကို(၇)ပေပတ်လည်အထိပင်ကြား တန်းကြား အကွာအဝေးထား စိုက်ပျိုးရကြောင်း၊ အထွက်နှုန်းကောင်းစေရန် တစ်ဧကငှက်ပျောပင် (၁၃၀၀)ခန့်စိုက်ပျိုးထားကြောင်း စိုက်ပျိုးပြီး (၅-၆)လအကြာတွင် ငှက်ပျောဖူးများမထွက်မီအချိန်၌ အပင်ခြေတွင် ဓာတ်မြေဩဇာကို ထည့်သွင်းကျွေးရမည်ဖြစ်ကြောင်း၊ ပန်းပွင့်ပြီးနောက် သားတက် တစ်ခုသာထားရှိပြီး မိခင်အပင်မှ မလိုအပ်သော သားတက်အားလုံးကို ဖယ်ရှားရန်လိုအပ်ကြောင်း၊ ငှက်ပျောကြီးထွားရန် ငှက်ပျောဖူး(အဖိုဖူး)အားဖြတ်ပေးရကြောင်း၊ မိုးရာသီတွင် ရေစိမ့်ဆင်းမှု ကောင်းရန်နှင့် အပင်ခြေရေမဝပ်စေရန် အပင်ခြေကိုမြေဖို့ပေးပါက အပင်ဖြစ်ထွန်းကြောင်း၊ စိုက်ပျိုးချိန်မှ(၈)လအကြာတွင် ငှက်ပျောသီးများရင့်မှည့်၍ စတင်ခုတ်ယူပြီး ဈေးကွက်သို့တင်ပို့ ရောင်းချကြောင်း၊  တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၁၉)သိန်းကျပ်ခန့်ကုန်ကျကြောင်း၊ အထွက်နှုန်းအနေဖြင့်(၉၀၀) အခိုင်ထွက်ရှိကြောင်း၊ ငှက်ပျောဖီးကြမ်း တစ်ဖီးလျှင် (၃၀၀၀-၄၀၀၀)ကျပ်ခန့်၊ ရခိုင်ငှက်ပျောဖီး တစ်ဖီးလျှင် (၂၀၀၀) ကျပ်ပေါက်ဈေးများရှိကြောင်း၊ ငှက်ပျောအဖီး အရည်အသွေးပေါ်မူ တည်၍ဈေးနှုန်းကွာခြားကြောင်း၊ ထွက်ရှိသော ငှက်ပျောသီးများကို ဒေသတွင်းစားသုံးရန်နှင့် သာရေးနာရေးပွဲများတွင်လည်း အသုံး ပြုသောကြောင့်ရောင်းချရကြောင်း၊ ဈေးကွက်တင်ပို့မှုအနေဖြင့် တောင်သာမြို့ သို့တင်ပို့ရောင်းချ ကြောင်း၊ တစ်ဧကအကျိုးအမြတ်အနေဖြင့် (၃၄)သိန်းကျပ်ဝန်းကျင်ခန့်   ရရှိကြောင်း ငှက်ပျောစိုက် တောင်သူတစ်ဦး၏ ပြောပြချက်အရသိရှိရသည်။

DOCA (မန္တလေး)      

     မြန်မာနိုင်ငံအလယ်ပိုင်း၏ ဧရာဝတီမြစ်ရိုးတစ်လျှောက်မှာရှိသော ရွာများသည် မိုးတွင်း ကာလ ဝါဆို၊ဝါခေါင်လများမှာ တစ်နယ်လုံး ရေလွှမ်းမိုးသည့် အခြေအနေသည် နှစ်စဉ်အမြဲ ကြုံတွေ့ နေရသည့် အခြေအနေဖြစ်သည့်အားလျော်စွာ  တနည်းအားဖြင့် ဒေသအခေါ် ရေကြီးသည် ဟူ၍ လည်း ခေါ်ဝေါ်ကြသည်။ ထိုကဲ့သို့ ရေကြီးသည့်အချိန်တွင် လှေများဖြင့်သာ သွားလာနေရပြီး တောင်သူလုပ်ငန်းများ ရပ်နားထားရသဖြင့် ဝင်ငွေရပ်တန့်နေရသည့်အချိန်အခါ ဖြစ်သည်။ ရှေးလူကြီးများ၏ အမြော်အမြင်ရှိမှုအရ ရေကြီးချိန်တွင် ဟင်းလျာအဖြစ် စားသုံးနိုင်ရန် အတွက် သရက်သီးများ ထွက်ပေါ်ချိန် တန်ခူး၊ ကဆုန်၊ နယုန်လများကတည်းက သရက်သီးစိမ်း အချို့ကို ဓားဖြင့် ပါးပါးလှီးဖြတ်ကာ နေပူလှန်း အခြောက်ခံ၍ လုံခြုံစွာထုတ်ပိုးသိမ်းဆည်းထားတတ်ကြလေ သည်။ ရေကြီးချိန်တွင် ၎င်းသရက်သီးခြောက်များကို အသား၊ငါးများဖြင့် ရောချက်ခြင်းဖြင့် လည်းကောင်း၊ ငရုတ်သီးစပ်စပ်ထည့်ကာ ငပိချက် ချက်စားခြင်းဖြင့်လည်းကောင်း၊ ကြိုက်နှစ်သက် သလို ချက်ပြုတ်စားသောက်လေ့ရှိကြသည်။

            သရက်သီးခြောက်များကို မြင်းခြံမြို့နယ်အတွင်းရှိ ကျေးရွာများမှ မြင်းခြံမြို့ပေါ်ရှိဈေးများ သို့ လာရောက်ရောင်းချလေ့ရှိကြပြီး ဈေးနှုန်းအနေနဲ့ ၂၅ကျပ်သားလျှင် ၂၀၀၀ ကျပ်နှုန်း၊ တစ်ပိဿာ လျှင် ၇၅၀၀-၈၀၀၀ ကျပ်နှုန်းဖြင့် အရောင်းအဝယ်ဖြစ်နေကြောင်း၊ ကျေးလက်ပြည်သူများအတွက် အပို ဝင်ငွေရရှိနေကြောင်း တင်ပြလိုက်ပါတယ်။

   DOCA (မန္တလေး

    လက်ပံပင်တွေဟာ မြန်မာနိုင်ငံအလယ်ပိုင်း၊ အညာဒေသရဲ့ မြို့နယ်အများအပြားမှာ ရွာတိုင်းလိုလို ပေါက်ရောက်လျက်ရှိကြပါတယ်။ တပေါင်း၊တန်ခူး၊ကဆုန်လတွေမှာ ဖူးကြ၊ပွင့်ကြ လေ့ရှိပြီး ခွေးရူးရောဂါဖြစ်ပွားမှုနှုန်းမြင့်မားတဲ့ရာသီမှာ ဖူးပွင့်ကြတဲ့အတွက် “လက်ပံပွင့်ချိန် ခွေးရူးချိန်” “လက်ပံလဲဖူး ခွေးလဲရူး” “လက်ပံလဲပွင့် ခွေးလဲလွင့်”လို့တောင် အဆိုအမျိုးမျိုးရှိကြ ပါတယ်။  အညာဒေသရဲ့ နွေဦးမှာ လေရူးတစ်ချက်ဝှေ့လိုက်တိုင်း ဝဲကာဝဲကာ ကြွေကျလာတဲ့ လက်ပံပွင့်နီနီလေးတွေကို မြင်ရတာဟာ အညာနွေရဲ့အလှကို လှစ်ဟပြနေဘိသကဲ့သို့ အညာ သရုပ်ကို ပီပြင်ပေါ်လွင်စေလှပါတယ်။ ပွင့်ချပ်လေးတွေက အနီရောင်ရဲရဲလေးနဲ့သော်လည်းကောင်း၊ လိမ္မော်ရောင်လေးတွေနဲ့သော်လည်းကောင်း ရှိနိုင်ပါတယ်။ အပွင့်ရဲ့အညှာ အညိုရောင်မာမာလေး မှာ ပွင့်ဆံလေးတွေနဲ့ ဝတ်ဆံတိုင်လေးတွေကလည်း လက်ပံပင်အောက် ရောက်တဲ့လူတိုင်း မကောက်ဘဲမနေနိုင်လောက်အောင် ချစ်စရာအသွင်သဏ္ဍာန်နဲ့ ဆွဲဆောင်နေပြန်ပါတယ်။ လက်ပံ ပွင့်ချိန်တွေမှာဆိုရင် လူကြီးလူငယ်အရွယ်စုံတို့ဟာ လက်ပံပင်အောက်ကို သွားပြီး လက်ပံပွင့် ကောက်ရတာဟာလဲ ကျေးလက်ရဲ့ပျော်ရွှင်ကြည်နူးဖွယ် ဓလေ့တစ်ခုအဖြစ် ယနေ့အချိန်ထိ တည်ရှိ နေဆဲပဲဖြစ်ပါတယ်။

    လက်ပံပွင့်ကို ရခိုင်သုပ်လေး သုပ်စားလည်း ကောင်းသလို ဆီချက်လေး မြေပဲလေးနိုင်နိုင်နဲ့ မြန်မာသုပ်လေး သုပ်စားတာကလည်း အတော်လေး စားကောင်းတာပါ။ လက်ပံပွင့်ရဲ့ ပွင့်ဖတ် တွေကိုခြွေပြီး အခြောက်လှန်းထားတဲ့ လက်ပံပွင့်ခြောက်ကို အညာဒေသရဲ့ ထူးထူးခြားခြား အခေါ် တစ်ခုကတော့ လက်ပံ‌ခေါင်းလို့ ခေါ်ကြတာပါပဲ။ အဲဒီလက်ပံခေါင်းကို နောက်ထပ်စားလို့ရတဲ့ နည်းကတော့ ချဉ်ရည်ချက်စားတာ၊ ပြုတ်ပြီး ငပိရည်လေးနဲ့ အတို့အမြှုပ်အဖြစ်တို့စားတာတို့ စားသောက်လို့ရပါသေးတယ်။ ဒီလိုအသုံးပြုစားသောက်လို့ရတဲ့ အညာဒေသရဲ့ ရိုးရာအစားအစာ တစ်ခုဖြစ်တဲ့ လက်ပံခေါင်းကိုတော့ မြင်းခြံမြို့နယ်အတွင်းရှိ ကျေးရွာများမှ မြင်းခြံမြို့ရှိဈေးများသို့ လာရောက်ရောင်းချလေ့ရှိကြပြီး ဈေးနှုန်းအနေနဲ့ ၂၅ကျပ်သားလျှင် ၁၀၀၀ ကျပ်နှုန်း၊ တစ်ပိဿာ လျှင် ၄၀၀၀ ကျပ်နှုန်းဖြင့် အရောင်းအဝယ်ဖြစ်နေကြောင်းနှင့် ကျေးလက်ပြည်သူများအတွက် အပို ဝင်ငွေရရှိနေကြောင်း တင်ပြလိုက်ပါတယ်။

DOCA (မန္တလေး)