မကွေးတိုင်းဒေသကြီး၊ ပခုက္ကူခရိုင်တွင် ဆီထွက်သီးနှံမျိုးစုံ အဓိကထား စိုက်ပျိုးလျက်ရှိပြီး ပခုက္ကူမြို့ ပဲမျိုးစုံနှင့် ဆီထွက်သီးနှံမျိုးစုံရောင်းဝယ်ရေး ဈေးကွက်သို့ ဆီထွက်သီးနှံ မြေပဲများ နေ့စဉ် အရောင်းအဝယ်ဖြစ်လျက်ပါရှိသည်။ ပခုက္ကူခရိုင်အတွင်းရှိ ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူ မြို့နယ်တို့တွင် ဆီထွက်သီးနှံမြေပဲကို အဓိကစိုက်ပျိုးလျက်ရှိသည်။ ယခုအချိန်တွင် မြေပဲ (အသစ်) များ ပခုက္ကူဈေးကွက်သို့ လှိုင်လှိုင်ဝင်ရောက် အရောင်းအဝယ်ဖြစ်လျက်ရှိရာ ခရိုင်အတွင်း၌ မြေပဲ သီးနှံ(အသစ်)ထွက်ပေါ်ခြင်း မရှိသေးသော်လည်း အခြားမြို့နယ်များဖြစ်သည့် စစ်ကိုင်းတိုင်းဒေသ ကြီး၊ မန္တလေးတိုင်းဒေသကြီး၊ ညောင်ဦးမြို့နယ်နှင့် ကျောက်ပန်းတောင်းမြို့နယ်အတွင်းရှိ ကျေးရွာ များမှ ထွက်ရှိသော(မိုး)ပင်ပြန့်မြေပဲအတောင့်အဆံများ လှိုင်လှိုင်ဝင်ရောက်လျက်ရှိပြီး မြို့ပေါ်ရှိ လုပ်ငန်းရှင်များမှလည်း မြေပဲဆီသန့်ထုတ်လုပ်ရန် ကုန်ကြမ်းမြေပဲတောင့်များကိုစတင် သိုလှောင် ထားရှိကြောင်း၊ ပြည်တွင်းဖြစ် မြေပဲဆီသန့် စားသုံးမှုမြင့်မားလျက်ရှိ၍ ဈေးကွက်သို့ ဝင်ရောက် လာသော မြေပဲအတောင့်နှင့်အဆံများကို မြို့ပေါ်ရှိ လှောင်လက်သမားများ၊ ဆီစက်လုပ်ငန်းရှင်များ အဝယ်လိုက်ခြင်းအပြင် ပြည်ပတရုတ်နိုင်ငံမှလည်း အဝယ်လိုက်ပြီး မြေပဲတောင့်နှင့်အဆံမှာ အရည် အသွေးနှင့် ဝယ်လိုအားပေါ် မူတည်၍ ဈေးအနိမ့်၊ အမြင့်ဖြင့် အရောင်းအဝယ်ဖြစ်လျက်ရှိကြောင်း သိရှိရသည်။

    ပခုက္ကူပွဲရုံဈေးကွက်တွင် ဖြစ်ပေါ်နေသောမြေပဲဈေးနှုန်းများမှာ ၂၀၂၅ခုနှစ်၊ စက်တင်ဘာလ (တတိယပတ်)တွင် မြေပဲအတောင့်(အခြောက်) တစ်ပိဿာလျှင် ကျပ်(၄၅၀၀ - ၄၀၀၀ - ၂၅၀၀)၊ မြေပဲတောင့် (အစို)တစ်ပိဿာလျှင် ကျပ်(၃၅၀၀-၃၀၀၀)၊ မြေပဲလုံးဆံနီ တစ်ပိဿာလျှင် ကျပ် (၈၂၀၀-၈၁၀၀)၊ မြေပဲလုံးဆံဖြူ တစ်ပိဿာ လျှင် ကျပ်(၈၀၀၀-၇၈၀၀)၊ ဆီဆံ တစ်ပိဿာလျှင် ကျပ် (၇၆၀၀-၇၅၀၀)၊ ဆုံမြေပဲ ဖတ်(အခွေ) တစ်ပိဿာလျှင် ကျပ်(၄၂၀၀-၄၁၅၀)၊ စက်ပဲဖတ် တစ်ပိဿာ လျှင် ကျပ်(၅၆၀၀-၅၈၀၀)ဈေးဖြင့် အရောင်းအဝယ်ဖြစ်ခဲ့ပြီး ယခင်စက်တင်ဘာလ (ပထမပတ်)နှင့် ဈေးနှုန်းနှိုင်းယှဉ်ပါက မြေပဲဆံတစ်ပိဿာလျှင် ကျပ်(၄၀၀)၊ မြေပဲဖတ်တစ်ပိဿာလျှင် ကျပ်(၁၀၀၀) ခန့် ဈေးအနည်းငယ်ပြန်လည်မြင့်တက် အရောင်းအဝယ်ဖြစ်ကြောင်း၊ ဒေသတွင်း ဈေးကွက်၌ မြေပဲဆီတစ်ပိဿာလျှင် ကျပ်(၁၆၅၀၀-၁၇၀၀၀)ဈေးအသီးသီးဖြင့် အရောင်းအဝယ်ဖြစ် ကြောင်း၊ မြေပဲဈေးကွက်အနေဖြင့် မြို့ပေါ်ရှိ ဆီစက်လုပ်ငန်းရှင်များမှ ဝယ်ယူမှုများခြင်းအပြင် မန္တလေး ဈေးကွက်သို့ တင်ပို့လျက်ရှိကြောင်း၊ ပြည်တွင်း မြေပဲဆီစားသုံးမှု မြင့်မားလျက်ရှိ၍ ဆီစက် လုပ်ငန်းရှင်များမှ  ဝယ်လိုအား ကောင်းခြင်းကြောင့် ပခုက္ကူမြေပဲဈေးကွက် အရောင်းအဝယ်သွက်ကြောင်း သိရှိရသည်။

DOCA(မကွေး)

   ပြည်တွင်းစားသုံးမှုနှင့်ပြည်ပသို့တင်ပို့သည့်ပဲတီစိမ်းမှာအရောင်းသွက်သည့် ပဲအမျိုးအစား ဖြစ်ပြီး၊ မန္တလေးတိုင်းဒေသကြီးအတွင်း၂၀၂၄-၂၀၂၅ ခုနှစ် ပဲတီစိမ်းစိုက်ပျိုးမှု (၂၇၀၉၅၈)ဧက၊ ရိတ်သိမ်း(၂၅၃၄၄၁)ဧက၊ အထွက်နှုန်း(၁၁.၆၄)တင်းနှင့် အထွက် (၂၉၄၉၀၁၇) တင်း ဖြစ်ကြောင်း သိရပါသည်။ မန္တလေးပွဲစား၊ကုန်သည်၊ စက်ပိုင်များမဟာကထိန်တော်အသင်းတွင်၂၀၂၅ခုနှစ် စက် တင်ဘာလတတိယပတ်အတွင်း ဖြစ်ပေါ်လျက်ရှိသောစျေးမှာ၃တင်းဝင်တစ်အိတ်လျှင် ပဲတီစိမ်း (ညာ)၂၈၀၀၀၀ကျပ်နှင့် ၃၁၅၀၀၀ကျပ်၊ပဲတီစိမ်း(ပဲခွဲ)၂၅၀၀၀၀ကျပ်နှင့် ၂၆၅၀၀၀ကျပ်၊ တစ်ပိဿာ စျေးမှာ ပဲတီစိမ်း(ညာ)၄၉၇၈ကျပ်နှင့် ၅၆၀၀ကျပ်၊ပဲတီစိမ်း(ပဲခွဲ) ၄၄၄၄ကျပ်နှင့်၄၇၁၁ကျပ် တို့ဖြစ် ကြောင်းသိရှိရပါသည်။ ယခင်နှစ်ကာလတူတစ်ပိဿာစျေးမှာ ပဲတီစိမ်း(အညာ)၃၀၂၂ ကျပ်နှင့် ၄၃၅၆ ကျပ်၊ ပဲတီစိမ်း(ပဲခွဲ)၂၃၁၁ကျပ်နှင့်၂၄၈၉ကျပ်တို့ဖြစ်ပေါ်ခဲ့ပြီး၊ကာလတူစျေးနှိုင်းယှဉ်ပါက ပဲတီစိမ်း(ညာ)မှာ တစ်ပိဿာလျှင် ၁၂၄၄ ကျပ်စျေး ပိုမိုရရှိကြောင်း သိရပါသည်။

DOCA(မန္တလေး)

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးအတွင်း၌ ရောင်းချနေသော မာလကာသီး များကို ပခုက္ကူမြို့ပေါ်ရှိ မာလကာသီးခြံများနှင့် မန္တလေးတိုင်းဒေသကြီး၊ ကျောက်ပန်းတောင်း၊  ပုပ္ပါး ဒေသတို့မှ စိုက်ပျိုးတောင်သူများမှ လာရောက်ရောင်းချကြကြောင်း သိရသည်။

            ၂၀၂၅ခုနှစ်၊ စက်တင်ဘာ(ဒုတိယပတ်)တွင် ရောင်းချနေသော မာလကာသီး ဈေးနှုန်းများမှာ တစ်ပိဿာလျှင် အမြင့်ဈေး ကျပ်(၄၀၀၀)၊ အလတ်ဈေး ကျပ်(၃၀၀၀)၊ အနိမ့်ဈေး ကျပ်(၂၀၀၀) ဈေးနှုန်းဖြင့် ရောင်းချခဲ့ပြီး စက်တင်ဘာ(တတိယပတ်)တွင် မာလကာသီး တစ်ပိဿာလျှင် အမြင့်ဈေး ကျပ်(၄၅၀၀)၊ အလတ်ဈေး ကျပ်(၃၅၀၀)၊ အနိမ့်ဈေး ကျပ်(၂၅၀၀)ဈေးနှုန်းဖြင့်  အသီး၏ အရည်အသွေးအပေါ် မူတည်၍ ရောင်းချရကြောင်း၊ ယခင်တစ်ပတ်နှင့်ယခုတစ်ပတ် ဈေးနှုန်းနှိုင်းယှဉ် ပါက ကျပ်(၅၀၀)ခန့်ဈေးနှုန်းမြင့်တက်ပြီး စားသုံးမှုပိုမိုများပြားလာခြင်းနှင့် လမ်းပန်းဆက်သွယ်ရေး အခက်အခဲများကြောင့် ဈေးနှုန်းမြင့်တက်လာခြင်းဖြစ်ကြောင်း မာလကာသီး ရောင်းချသူထံမှ သိရှိရ ပါသည်။

DOCA(မကွေး)

       မကွေးတိုင်းဒေသကြီး၊ မကွေးခရိုင်၊ မကွေးမြို့နယ်ဝန်းကျင်ရှိ ဆားတိုင်ကန်ကျေးရွာ၊ ပုတီး    ကုန်းကျေးရွာနှင့် ကမ်းရင်ကျေးရွာများမှ တောင်သူများသည် ဟင်းသီးဟင်းရွက်သီးနှံစားပင်မျိုးစုံ ကို တစ်ပိုင်တစ်နိုင် စိုက်ပျိုးရောင်းချလျက်ရှိသည်။ ယခုနှစ်တွင် စားသုံးသူများပြား၍ ဈေးကွက် အခိုင်အမာရှိသော အသီးရောအရွက်ပါရောင်းချနိုင်သော စားဖိုဆောင်သုံးကာလတိုသီးနှံဖြစ်သည့် ဘူးသီး၊ ဘူးရွက်များမှာ ဈေးကောင်းရ၍ တောင်သူများပိုမိုတိုးချဲ့ စိုက်ပျိုးလျက်ရှိကြောင်း သိရသည်။

          ဘူးပင်သည် မြေအမျိုးမျိုးတွင်ရာသီမရွေးစိုက်ပျိုး၍ရကြောင်း၊ စိုက်ပျိုးရာတွင် မြေကိုဘောင် ဖော်၍ အတန်းလိုက်စိုက်ပျိုးကြပြီး တစ်ပင်နှင့်တစ်ပင်(၁)ပေအကွာ၊ တစ်တန်းနှင့်တစ်တန်း(၂)ပေ ခန့်အကွာ စိုက်ပျိုးရကြောင်း၊ သို့မှသာလေဝင်လေထွက်ကောင်း၍ နေရောင်ခြည်ကောင်းစွာရရှိကာ အပင်ဖြစ်ထွန်းကြောင်း၊ အပင်သက်တမ်း(၃)လခန့်အကြာတွင် အသီးစတင်သီးကြောင်း၊ ကဆုန်၊ နယုန်လများတွင် စတင်စိုက်ပျိုးကြပြီး အပင်သက်တမ်း (၅)လ၊ (၆)လကြာအထိ အသီးသီးကြောင်း၊ ဘူးရွက်များမှာ အပင်သက်တမ်း(၁)လခွဲခန့်ကြာလျှင် ခူးဆွတ်ရောင်းချနိုင်ကြောင်း၊ (၁)ဧကလျှင် အပင်ရေ (၆၀၀)ခန့်စိုက်ပျိုးကြကြောင်း၊ နှစ်ရက်တစ်ခါခူးဆွတ်ကြပြီး တစ်ခါခူးဆွတ်လျှင် ဘူးသီး (၈၀)လုံးခန့်နှင့် ဘူးညွန့်(၄၀၀)ခန့်ရရှိကြောင်း၊ ဘူးသီးမှာရင့်လွန်းပါက ချက်ပြုတ်စားသောက်ရာ တွင် မကောင်းသကဲ့သို့ နုလွန်းပါကလည်း အခါးဓာတ်ရှိသဖြင့် မနုမရင့်အနေတော် အနေအထားတွင် ခူးဆွတ်ရောင်းချကြကြောင်း စိုက်ပျိုးတောင်သူ တစ်ဦးထံမှ သိရသည်။ မကွေးမြို့နယ်ဝန်းကျင်ရှိ ကျေးရွာများမှထွက်ရှိသော ဘူးသီး၊ ဘူးရွက်များကို မကွေးမြို့ပေါ်ရှိဈေးများဖြစ်သော မြို့မဈေး၊ ကန်သာဈေး၊ ရန်ပယ်ဈေး၊ ရန်ကင်းဈေးနှင့် အခွန်လွတ်ဈေးများသို့ တင်ပို့ရောင်းချကြပြီး ပေါ်ဦး ပေါ်ဖျားအချိန် ဝါဆိုလပြည့်ကျော်တွင်မူ ဘူးညွန့်(၁)ညွန့်လျှင် ကျပ်(၇၀)ခန့်၊ ဘူးသီး တစ်လုံးလျှင် ကျပ်(၂၅၀၀)ခန့်အထိ ဈေးကောင်းရရှိကာ နောက်ပိုင်းဘူးသီး၊ ဘူးရွက်လှိုင်လှိုင် ပေါ်ချိန် သီတင်း ကျွတ်လဆန်းပိုင်းတွင် ဘူးညွန့်(၁)ညွန့်လျှင် ကျပ်(၄၀)ခန့်၊ ဘူးသီးတစ်လုံးလျှင် ကျပ်(၁၅၀၀)ခန့် အထိ ရရှိကြောင်းသိရှိရသည်။ ဘူးပင် စိုက်ပျိုးခြင်းဖြင့် စိုက်ပျိုးတောင်သူများအဖို့ ပုံမှန်ဝင်ငွေရရှိကာ စားသုံးသူဈေးကွက်၌လည်း အရောင်းသွက်လျက်ရှိသောကြောင့် မကွေးမြို့နယ် ဝန်းကျင်ကျေးရွာ များရှိ ဘူးစိုက်ပျိုးသူ တောင်သူများအနေဖြင့် ဝင်ငွေအဆင်ပြေလျက်ရှိကြောင်း သိရှိရပါသည်။

DOCA(မကွေး)

              ပြောင်းသီးနှံမှာမွေးမြူရေး အစားစပ်လုပ်ငန်း တွင်သုံးစွဲမှု များပြားခြင်း၊ ပြည်ပတင်ပို့ ခြင်း တို့ကြောင့်အရောင်းသွက်လျက်ရှိကြောင်း သိရပါသည်။  မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ ထုတ်ပြောင်းစိုက်ပျိုးမှု  ၃၆၆၂၂  ဧက၊  ရိတ်သိမ်းမှု ၁၃၃၃၁ ဧက၊ အထွက် နှုန်း  ၄၉.၅၅  တင်း၊ အထွက်တင်းစုစုပေါင်း   ၆၆၀၅၉၁  တင်းဖြစ်ကြောင်းသိရပါသည်။  မန္တလေး ပွဲစား၊ကုန်သည်စက်ပိုင်များမဟာကထိန်တော်အသင်းတွင် ၂၀၂၅ ခုနှစ် စက်တင်ဘာလတတိယ ပတ်အတွင်း ဖြစ်ပေါ်သည့်အစေ့ထုတ်ပြောင်းစျေးမှာပြောင်းဖူးစေ့(ရှမ်း)နှင့်ပြောင်းဖူးစေ့ (စီပီ) ၇၉၀၀၀ကျပ်နှင့်၈၀၀၀၀ ကျပ်၊တစ်ပိဿာစျေးအနေဖြင့် ပြောင်းဖူးစေ့(ရှမ်း) နှင့်(စီပီ) ၁၄၆၃ကျပ် နှင့်၁၄၈၁ကျပ်စျေးတို့ဖြစ် ကြောင်း သိရှိရပါသည်။ယခင်နှစ်ကာလတူတစ်ပိဿာစျေးမှာပြောင်းဖူး စေ့ (ဗမာ)  ၁၅၁၉ကျပ်၊ ပြောင်းဖူးစေ့(ရှမ်း)နှင့်(စီပီ) ၁၅၅၆ ကျပ်နှင့် ၁၅၇၄ ကျပ်တို့ ဖြစ်ကြောင်း သိရှိရပါ သည်။ ယခုနှစ်စျေးနှင့်ယခင်နှစ်ကာလတူ စျေးနှိုင်းယှဉ်ပါက အစေ့ထုတ်ပြောင်းစျေးမှာ အနည်းငယ်ကျဆင်းသွားကြောင်း သိရှိရပါသည်။

DOCA(မန္တလေး)