HighLight News

     စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူး ဦးသန်းဦးဦးဆောင်၍ ကရင်ပြည်နယ်အတွင်း စားသုံးဆီဖူလုံစေရေးနှင့် ဆီနှင့်ဆီထွက်သီးနှံပိုလျှံထုတ်လုပ်နိုင်စေရေးအတွက် ဘားအံမြို့၊ အမှတ် (၄) ရပ်ကွက်ရှိ “စိန်မိသားစု” မြေပဲဆီနှင့်နှမ်းဆီထုတ်လုပ်ရေးဆီစက်သို့ (၈-၅-၂၀၂၃) ရက်နေ့၊ ညနေ (၁၆:၀၀) နာရီအချိန်တွင် ကုန်ကြမ်းရရှိမှုအခြေအနေများ၊  ကုန်ကြမ်းနှင့်ထုပ်ပိုးပစ္စည်းများဝယ်ယူစုဆောင်းမှုအခြေအနေများကို သွားရောက်အားပေးကွင်းဆင်းကြည့်ရှုစစ်ဆေးမှုများပြုလုပ်ခဲ့ပါသည်။

  ထိုသို့စစ်ဆေးမှုပြုလုပ်ရာတွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးက ကရင်ပြည်နယ်အတွင်း ဆီနှင့်ဆီထွက်သီးနှံများစားသုံးပိုလျှံမှုအခြေအနေ၊ ကရင်ပြည်နယ်စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းဖွဲ့စည်းထားရှိမှုအခြေအနေ၊ ဆီထွက်သီးနှံများစိုက်ပျိုးဖြစ်ထွန်းထွက်ရှိမှုအခြေအနေကိုလည်းကောင်း၊ ကရင်ပြည်နယ်ကုန်သည်များနှင့်စက်မှုလက်မှုလုပ်ငန်းရှင်များအသင်း အတွင်းရေးမှူး ဦးစိုးသူနှင့် ပြည်နယ်စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းဥက္ကဋ္ဌ ဦးဖြိုးဇော်ထွန်းက ကရင်ပြည်နယ်စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်း အသင်းဖွဲ့စည်းမျဉ်းရေးဆွဲဆောင်ရွက်မှုအခြေအနေနှင့် ကရင်ပြည်နယ်အတွင်းရှိ ဆီစက်များ၏ ဆီကြိတ်ခွဲထုတ်လုပ်နိုင်မှုအခြေအနေများကိုလည်းကောင်း၊ အသီးသီးရှင်းလင်းတင်ပြခဲ့ကြပြီး စိန်မိသားစုဆီစက်ပိုင်ရှင် ဦးဝေလင်းအောင်က  ဆီထုတ်လုပ်မှုလုပ်ငန်းစဉ်များနှင့် ဈေးနှုန်းဈေးကွက်အခြေအနေ၊ ကုန်ကြမ်းဝယ်ယူစုဆောင်းရရှိမှုနှင့် ဈေးကွက်အလားအလာတို့ကို ရှင်းလင်းတင်ပြခဲ့ပါသည်။

      ကရင်ပြည်နယ်ဦးစီးမှူးက ကရင်ပြည်နယ်အတွင်း စားသုံးဆီဖူလုံစေရေးနှင့် ပိုလျှံထုတ်လုပ်နိုင်စေရေးအတွက် ဆီနှင့်ဆီထွက်သီးနှံများကို တိုးချဲ့စိုက်ပျိုးထုတ်လုပ်ရန်နှင့်  Supply Chain တစ်ခုလုံးတွင်ပါဝင်သည့် စိုက်ပျိုးတောင်သူ၊ ကုန်သည်နှင့်စက်ပိုင်ရှင်များ၏ လိုအပ်သည့်အရင်း အနှီး၊ နည်းပညာအထောက်အကူများကို သက်ဆိုင်ရာဌာနများနှင့် ချိတ်ဆက်ဆောင်ရွက်ပေးမည့်အခြေအနေနှင့် နိုင်ငံတော်ကပံ့ပိုးဆောင်ရွက်နေမှုအခြေအနေများကို ရှင်လင်းဆွေးနွေးခဲ့ကြောင်း သတင်းရရှိခဲ့ပါသည်။

DOCA(ကယား)

   စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ်တာဝန်ခံ၊ ဒေါ်သန္တာစိုးသည် ဖြူးမြို့နယ်၊ စီမံအုပ်ချုပ်ရေးအဖွဲ့ဥက္ကဋ္ဌ၊ ဦးစောမင်းသူဦးဆောင်၍  အထွေထွေအုပ်ချုပ်ရေးဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူရေးရာဦးစီးဌာနတို့မှ တာဝန်ရှိသူများ၊ ရပ်ကွက်အုပ်ချုပ်ရေးမှူးများပါဝင်သောအဖွဲ့သည် (၂-၅-၂၀၂၃) ရက်နေ့၊ နံနက်ပိုင်းက ဖြူးမြို့၊ ဘူတာမြောက်ရပ်ကွက်ရှိ “ရွှေပြည်စိုး”မုန့်မျိုးစုံလုပ်ငန်းသို့ရောက်ရှိပြီး လုပ်ငန်းဆောင်ရွက်ချက်များကို လေ့လာကြည့်ရှုခဲ့ပါသည်။

     မြို့နယ်စီမံအုပ်ချုပ်ရေးအဖွဲ့ဥက္ကဋ္ဌက နိုင်ငံတော်က အသေးစား၊ အငယ်စားနှင့် အလတ်စားစီးပွားရေးလုပ်ငန်းများဖွံ့ဖြိုးတိုးတက်စေရေးအတွက် အားပေးဆောင်ရွက်လျက်ရှိရာ မိမိတို့မြို့နယ်အတွင်းရှိ MSME လုပ်ငန်းရှင်များ လုပ်ငန်းဆောင်ရွက်ရာတွင် မည်သည့်အခက်အခဲများရှိသည်ကိုသိလို၍ လာရောက်လေ့လာကြည့်ရှုခြင်းဖြစ်ကြောင်းပြောကြားပြီး သိရှိလိုသည်များကို‌မေးမြန်းရာ လုပ်ငန်းရှင် ဦးထင်ကျော်ဝင်းက ထုတ်လုပ်မှုအခြေအနေများကို လိုက်လံရှင်းလင်းပြသပါသည်။

      လုပ်ငန်းရှင်နှင့်တွေ့ဆုံရာတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်သန္တာစိုးက စားသုံးသူကာကွယ်ရေးဥပဒေ ၂၀၁၉၊ ပုဒ်မ ၄၁တွင် ကုန်စည်များ၌ ကုန်အညွှန်းအမှတ်အသားများဖော်ပြရန်ပြဋ္ဌာန်းချက်များ၊ ပုဒ်မ ၄၃တွင် ကုန်အညွှန်းအမှတ်အသားဖော်ပြရာ၌ မြန်မာဘာသာဖြင့် မဖြစ်မနေဖော်ပြရမည့်အချက်များ၊ လုပ်ငန်းရှင်များက မြန်မာဘာသာဖြင့် ကုန်အညွှန်းအမှတ်အသားများဖော်ပြရာတွင် အဆင်ပြေလွယ်ကူစွာဆောင်ရွက်နိုင်ရန်အတွက် မြန်မာနိုင်ငံစားသုံးသူကာကွယ်ရေးကော်မရှင်က ညွှန်ကြားချက်အမှတ် ၂/၂၀၁၉ပါ ထုတ်ပြန်ထားခြင်းများကို ရှင်းလင်းပြောကြားခဲ့ကြောင်း သိရှိရပါသည်။

DOCA(ပဲခူး)

     စားသုံးသူရေးရာဦးစီးဌာန၊ မြစ်ကြီးနားခရိုင်းဦးစီးမှူးရုံးမှ ဦးဘောမ်ဇုန်း(ရုံးအုပ်)သည် (၉-၅-၂၀၂၃) ရက်နေ့၊ နေ့လယ် (၁၄း၀၀) နာရီအချိန်တွင် မြစ်ကြီးနားမြို့၊ လယ်ကုန်းရပ်ကွက်ရှိ "အငယ်လေး"ကုန်စုံဆိုင်မှ စားသောက်ကုန်များဖြန့်ဖြူးရောင်းချနေသော စီးပွားရေးလုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

     ထိုသို့ဆွေးနွေးရာတွင် ဦးဘောမ်ဇုန်း(ရုံးအုပ်)က စီးပွားရေးလုပ်ငန်းရှင်များအနေဖြင့် စားသုံးသူများသည် ဘေးအန္တရာယ်ကင်းရှင်းသည့်စာသောက်ကုန်များဝယ်ယူသုံးစွဲနိုင်ရန်အတွက် ကုန်စည်များပေါ်တွင် ကုန်အညွှန်းအမှတ်အသားဖော်ပြပါရှိရမည့်သတ်မှတ်ချက်များကို မဖြစ်မနေရေးသားဖော်ပြရမည်ဖြစ်ပြီး စားသုံးသူများအနေဖြင့် လွယ်ကူစွာကြိုတင်သိရှိစေနိုင်ရန် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ကုန်စည်များကိုရောင်းချရာတွင် ကုန်အညွှန်းအမှတ်အသားများပြည့်စုံမှန်ကန်မှုရှိ/မရှိတို့အား စိစစ်ပြီးမှ ဈေးကွက်အတွင်းသို့ ရောင်းချရန်ဖြစ်ကြောင်းတို့အား ဆွေးနွေးခဲ့ပါသည်။

DOCA(ကချင်)

စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူး ဦးသန်းဦး၊ ပြည်တွင်းဌာနခွဲတာဝန်ခံ ဦးမျိုးဝင်းနိူင် (ဦးစီးအရာရှိ)သည် (၅-၅-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံး၌  ကရင်ပြည်နယ် ဆန်စက်လုပ်ငန်းရှင်များအသင်းဥက္ကဋ္ဌ ဦးအောင်ဇော်ထက်နှင့်တွေ့ဆုံ၍ ဆန်ဖြန့်ဖြူးရောင်းချနိုင်ရေး အခြေအနေများကို ဆွေးနွေးခဲ့ကြကြောင်း သိရပါသည်။

       ထိုသို့ဆွေးနွေးရာတွင် ကရင်ပြည်နယ်ဆန်ကုန်သည်များနှင့် ဆန်စက်လုပ်ငန်းရှင်များအသင်း အသင်းအနေဖြင့် စားသုံးသူရေးရာဦးစီးဌာနနှင့်ပေါင်းစပ်၍ ကရင်းပြည်နယ်အတွင်း ဆန်များဖြန့် ဖြူးရောင်းချနေမှုအခြေအနေများ၊ ဒေသတွင်းဆန်ဖူလုံပိုလျှံစေရေးနှင့် ပြည်ပသို့တင်ပို့နိုင်ရေး အတွက် အသင်းနှင့်ဌာနတို့ပေါင်းစပ်၍ ဆောင်ရွက်နေမှုအခြေအနေကိုလည်းကောင်း၊ အသင်းအဖွဲ့ များခိုင်မာအားကောင်းလာစေရေးနှင့် အသင်းဖွဲ့စည်းမျဉ်းရေးဆွဲဆောင်ရွက်နေမှုအခြေအနေ ကိုလည်းကောင်း၊ ကရင်ပြည်နယ်ဒေသထွက် ဆန်/စပါးများကို အနီးအနားရှိဒေသများက သိုလှောင် ရန်ရည်ရွယ်၍ အဓိကလာရောက်ဝယ်ယူကြသောကြောင့် ဈေးကွက်အတွင်း ပစ္စည်းပြတ်လပ်သည့် အထိဖြစ်နေကြောင်းနှင့် ယင်းတို့ကို့ဖြေရှင်းနိုင်ရေးနည်းလမ်းများကို ဆွေး‌နွေးခဲ့ကြောင်းသိရပါသည်။

      ကရင်ပြည်နယ်အတွင်း ဆန်ဖူလုံပိုလျှံစေရေး၊ ဆန်/စပါးနှင့်ဆန်စက်ကဏ္ဍဖွံ့ဖြိုးတိုးတက်စေရေး အတွက် ကရင်ပြည်နယ်ဆန်ကုန်သည်များနှင့် ဆန်စက်လုပ်ငန်းရှင်များအသင်းကို (  ၁-၆-၂၀၂၃  ) ရက်နေ့တွင် အသင်းဖွဲ့ဦးရေ(၂၇)ဦးတို့ဖြင့် ဖွဲ့စည်းဆောင်ရွက်မည်ဖြစ်ပြီး ကရင်ပြည်နယ်ဒေသထွက် စပါးများကို အနီးအနားရှိဒေသများက သိုလှောင်ရန်ရည်ရွယ်၍ အဓိကလာရောက် ဝယ်ယူကြသောကြောင့် ဈေးကွက်အတွင်းပစ္စည်းပြတ်လပ်သည်အထိဖြစ်နေကြောင်း ဆန်ကုန်သည်များနှင့်ဆန်စက်လုပ်ငန်းရှင်များအသင်းအနေဖြင့် နိုင်ငံတော်ကသတ်မှတ်ထားသည် ဈေးနှုန်းနှင့် လက်ရှိမြင့်တက်နေသောဈေးနှုန်း/ဈေးကွက်အခြေအနေ၊ ပြည်ပတို့တင်ပို့မှုအခြေအနေနှင့် လမ်းခရီးအခြေအနေများကိုဆွေးနွေးခဲ့ကြောင်း သိရှိရပါသည်။

DOCA(ကရင်)

   (၅-၅-၂၀၂၃)ရက်နေ့၊ နံနက်(၁၀:၀၀)နာရီအချိန်၌ ရှမ်းပြည်နယ်တောင်ကြီးမြို့၊ ပြည်နယ်လေ့ကျင့်ရေးအားကစားရုံတွင် မြန်မာနိုင်ငံလူငယ်ရေးရာဗဟိုကော်မတီနှင့် ရှမ်းပြည်နယ်လူငယ်ရေးရာကော်မတီတို့ပူးပေါင်း၍ လူငယ်ရေးရေးရာအသိပညာပေးဟောပြောပွဲပြုလုပ်ကျင်းပခဲ့ပါ သည်။

   အဆိုပါဟောပြောပွဲတွင် မြန်မာနိုင်ငံလူငယ်ရေးရာဗဟိုကော်မတီအတွင်းရေးမှူး ဒေါက်တာစိုးဝင်းက အဖွင့်အမှာစကားပြောကြားခဲ့ခြင်း၊ လူငယ်များအသိပညာရရှိစေရန်ရည်ရွယ်၍ အားကစားနှင့်ကာယပညာဦးစီးဌာနက အားကစားဆိုင်ရာအသိပညာပေးကိစ္စရပ်များဟောပြောခြင်း၊  ပြန်ကြားရေးနှင့်ပြည်သူ့ဆက်ဆံရေးဦးစီးဌာနက လူငယ်နှင့်စာရိတ္တခေါင်းစဉ်ဖြင့် အသိပညာပေးဟောပြောခြင်း၊ ပညာရေးဝန်ကြီးဌာနက လူငယ်နှင့်ကျင့်ဝတ်ခေါင်းစဉ်ဖြင့် အသိပညာပေးဟောပြောခြင်း၊ စားသုံးသူရေးရာဦးစီးဌာနက စားသုံးသူအခွင့်အရေးနှင့်တာဝန်များ၊ ထိခိုက်နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နည်းလမ်းများနှင့်ကုန်အညွှန်းအမှတ်အသားအကြောင်း သိကောင်းစရာများကို အသီးသီးဟောပြောဆွေးနွေးခဲ့ခြင်းတို့ကို ဆောင်ရွက်ခဲ့ကြပါသည်။

     ဆက်လက်၍ ရှမ်းပြည်နယ်၊ အားကစားနှင့်ကာယပညာဦးစီးဌာနမှ အားကစားမောင်/မယ်များက တိုက်ကွမ်ဒို၊ ဝူရှူးနှင့် မြန်မာ့သိုင်းပညာများကို သရုပ်ပြတင်ဆက်ခဲ့ရာ မြန်မာနိုင်ငံလူငယ်ရေးရာဗဟိုကော်မတီအတွင်းရေးမှူး ဒေါက်တာစိုးဝင်းက အားကစားဆပ်ကော်မတီအသီးသီးသို့ အားကစားပစ္စည်းများနှင့် ဆုကြေးငွေများပေးအပ်ချီးမြှင့်ခဲ့ပြီး စုပေါင်းမှတ်တမ်းတင်ဓာတ်ပုံများရိုက်ကူးခဲ့ကြပါသည်။ အခမ်းအနားသို့ တက်ရောက်သူ(၄၂၀)ဦးခန့်ရှိပြီး နေ့လယ်(၁၂:၃၀) နာရီအချိန်ခန့်တွင် အခမ်းအနားရုပ်သိမ်းခဲ့ကြောင်း သတင်းရရှိပါသည်။

DOCA(ရှမ်း)