(၁၈.၇.၂၀၂၆) ရက်နေ့ နံနက် (၀၉:၃၀) နာရီအချိန်တွင် မအူပင်ခရိုင် စားသုံးသူရေးရာ ဦးစီးဌာနမှ ခရိုင်ဦးစီးမှူးနှင့် ဝန်ထမ်းများသည် မူပိုင်ခွင့်ဦးစီးဌာန ညွှန်ကြားရေးမှူးချုပ်နှင့် အဖွဲ့နှင့်အတူ မအူပင်ခရိုင် ဝန်ကြီးဌာနပိုင် ငါးကန်လုပ်ငန်းများသို့ ကွင်းဆင်း၍ လုပ်ငန်းဆောင်ရွက်မှုများကို ကြည့်ရှုစစ်ဆေးခဲ့ကြောင်း သိရသည်။
ကွင်းဆင်းစစ်ဆေးရာတွင် ငါးမွေးမြူရေးလုပ်ငန်း၏ ဆောင်ရွက်နေမှုအခြေအနေများ၊ ထုတ်လုပ်မှုလုပ်ငန်းစဉ်များ၊ လုပ်ငန်းလည်ပတ်မှုအခြေအနေများနှင့် သက်ဆိုင်ရာလုပ်ငန်းများတွင် မူပိုင်ခွင့်ဆိုင်ရာ အသိပညာမြှင့်တင်ရေးနှင့် ဉာဏပစ္စည်းမူပိုင်ခွင့်များကို စနစ်တကျအသုံးချဆောင်ရွက်နိုင်ရေးဆိုင်ရာ ကိစ္စရပ်များကို လေ့လာဆွေးနွေးခဲ့ကြောင်း သိရသည်။
ထို့ပြင် တာဝန်ရှိသူများက လုပ်ငန်းရှင်များနှင့် တွေ့ဆုံ၍ မူပိုင်ခွင့်ဆိုင်ရာ ဥပဒေ၊ လုပ်ထုံးလုပ်နည်းများ၊ ကုန်အမှတ်တံဆိပ် (Trademark) မှတ်ပုံတင်ခြင်း၏ အကျိုးကျေးဇူးများနှင့် မိမိတို့၏ ဉာဏပစ္စည်းမူပိုင်ခွင့်များကို ဥပဒေနှင့်အညီ ကာကွယ်ဆောင်ရွက်ရန် လိုအပ်ချက်များကို ရှင်းလင်းဆွေးနွေးခဲ့ကြောင်း သိရသည်။
အဆိုပါ ကွင်းဆင်းဆောင်ရွက်မှုသည် ဒေသတွင်း စီးပွားရေးလုပ်ငန်းများအနေဖြင့် မူပိုင်ခွင့်ဆိုင်ရာ အသိပညာများ တိုးပွားလာစေရေး၊ ဉာဏပစ္စည်းမူပိုင်ခွင့်များကို စနစ်တကျ မှတ်ပုံတင်အသုံးချနိုင်ရေးနှင့် သက်ဆိုင်ရာဌာနများအကြား ပူးပေါင်းဆောင်ရွက်မှုများ မြှင့်တင်နိုင်ရေးအတွက် ဆောင်ရွက်ခဲ့ကြောင်း သိရှိရပါသည်။
DOCA(ဧရာဝတီ)