၂၀၂၆ ခုနှစ်၊ ဇူလိုင်လ ၁၄ ရက်နေ့၊ နေ့လယ် (၁၁:၀၀) နာရီအချိန်တွင် ဓနုဖြူမြို့နယ်၊ အမှတ်(၂) အခြေခံပညာအထက်တန်းကျောင်း(ရွှေကူ)၌ မြို့နယ်စားသုံးသူရေးရာဦးစီးဌာနနှင့် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ စားသုံးသူကာကွယ်ရေးဆိုင်ရာ အသိပညာပေးဟောပြောပွဲကို ကျင်းပပြုလုပ်ခဲ့ကြောင်း သိရသည်။
ဟောပြောပွဲတွင် စားသုံးသူရေးရာဦးစီးဌာနမှ တာဝန်ရှိသူ ဦးဝင်းမင်းစိုးက စားသုံးသူများ၏ အခြေခံအခွင့်အရေး (၈) ရပ်၊ စားသုံးသူများ၏ တာဝန်ဝတ္တရားများ၊ ကုန်ပစ္စည်းများ ဝယ်ယူစားသုံးရာတွင် ကုန်အညွှန်းအမှတ်အသားများကို စိစစ်ဖတ်ရှု၍ ဘေးအန္တရာယ်ကင်းရှင်းပြီး အရည်အသွေးပြည့်မီသော အစားအသောက်များကို ရွေးချယ်ဝယ်ယူစားသုံးရန် လိုအပ်ချက်များအား အသိပညာပေး ဟောပြောခဲ့သည်။
ထို့နောက် တာဝန်ရှိသူများသည် ကျောင်းအတွင်းရှိ မုန့်ဈေးတန်းများသို့ ကွင်းဆင်းစစ်ဆေးခဲ့ရာ ရောင်းချလျက်ရှိသော အစားအသောက်နှင့် မုန့်ပစ္စည်းများ၏ ကုန်အညွှန်းအမှတ်အသား၊ ထုတ်လုပ်သည့်ရက်စွဲ၊ သက်တမ်းကုန်ဆုံးရက်၊ ထုတ်လုပ်ဖြန့်ဖြူးသူအမည်နှင့် လိပ်စာဖော်ပြထားမှု၊ စားသုံးရန်သင့်လျော်မှုတို့ကို စိစစ်စစ်ဆေးခဲ့ပြီး ဆိုင်ရှင်များအား စားသုံးသူကာကွယ်ရေးဥပဒေနှင့်အညီ ဘေးကင်းလုံခြုံ၍ အရည်အသွေးပြည့်မီသော ကုန်ပစ္စည်းများကိုသာရောင်းချရန်နှင့် သက်တမ်းလွန်ကုန်ပစ္စည်းများ ရောင်းချခြင်းမပြုရန် အသိပညာပေး ဆွေးနွေး မှာကြားခဲ့ကြောင်း သိရှိရပါသည်။
အဆိုပါ အသိပညာပေးဟောပြောပွဲသို့ ကျောင်းသား၊ ကျောင်းသူ (၂၂၀)ဦး၊ ဆရာ/ဆရာမ (၅)ဦး တက်ရောက်ခဲ့ကြပြီး ကျောင်းမုန့်ဈေးတန်းရှိ ရောင်းချဆိုင်ရှင် (၁၁)ဦးအား ကွင်းဆင်းစစ်ဆေး၍ လိုအပ်သည်များကို အသိပညာပေး လမ်းညွှန်ဆောင်ရွက်ခဲ့ကြောင်း သိရှိရပါသည်။
DOCA(ဧရာဝတီ)