ဗီယက်နမ်နိုင်ငံ Buon Ma Thuot Coffee Association သည် တရုတ်နိုင်ငံ၏ Shanghai Maiji Information Technology ကုမ္ပဏီနှင့် ပူးပေါင်းကာ Vietnam Amazing Cup 2026 ပြိုင်ပွဲမှ Top 10 Arabica နှင့် Top 10 Robusta ကော်ဖီများကို နိုင်ငံတကာဝယ်လက်များထံ မိတ်ဆက်ပေးရန် တရုတ်နိုင်ငံ၌ Roadshow အစီအစဉ်တစ်ရပ် ကျင်းပသွားမည်ဖြစ်ကြောင်း သိရပါသည်။ အသင်းဥက္ကဋ္ဌ Trinh Duc Minh က ၎င်းအစီအစဉ်သည် ဗီယက်နမ်၏ အထူးအရည် အသွေးမြင့် (Specialty) ကော်ဖီများကို ကမ္ဘာ့ဈေးကွက်တွင် ပိုမိုလူသိများလာစေရန်၊ စီးပွားရေး မိတ်ဖက်ချိတ်ဆက်မှုများ တိုးမြှင့်ရန်နှင့် တရုတ်ဈေးကွက်အတွင်း ပူးပေါင်းဆောင်ရွက်ရေးနှင့် ပို့ကုန်အခွင့်အလမ်းများတိုးချဲ့ရန်ရည်ရွယ်သည့် အရေးပါသော ကုန်သွယ်မှုမြှင့်တင်ရေးအစီအစဉ်ဖြစ်ကြောင်း ပြောကြားခဲ့ပါသည်။ အစီအစဉ်အရ ဇူလိုင်လအတွင်း ရှန်ဟိုင်းမြို့၌ ရှေ့ပြေး (Pilot) ပွဲတစ်ရပ် ကျင်းပကာ ဗီယက်နမ်၏ Specialty Coffee များကို ကော်ဖီလုပ်ငန်းရှင်များနှင့် ကျွမ်းကျင်သူများထံ မိတ်ဆက်ပေးမည်ဖြစ်ပြီး ဈေးကွက်စိတ်ဝင်စားမှုကို လေ့လာကာ အနာဂတ် ကုန်သွယ်ရေးမြှင့်တင်မှုများအတွက် အခြေခံအုတ်မြစ်ချမှတ်သွားမည်ဖြစ်ကြောင်း သိရပါသည်။ ထို့နောက် ဩဂုတ်လတွင် ကွမ်ကျိုးမြို့၌ ပိုမိုကျယ်ပြန့်သည့် ကုန်သွယ်မှုမြှင့်တင်ရေးအစီအစဉ်ကို ကျင်းပမည်ဖြစ်ပြီး Buon Ma Thuot Coffee Association၊ ကော်ဖီလုပ်ငန်းများ၊ လုပ်ငန်းကျွမ်းကျင်သူများနှင့် Vietnam Amazing Cup 2026 ပြိုင်ပွဲ၏ Top 10 Arabica နှင့် Top 10 Robusta စာရင်းဝင် ကော်ဖီထုတ်လုပ်သူများ တက်ရောက်မည်ဖြစ်ကြောင်း သိရပါသည်။ ၎င်းအစီအစဉ်တွင် ဆုရရှိထားသော Top 10 ကော်ဖီများကို ပြသမိတ်ဆက်ခြင်းနှင့် ဗီယက်နမ် Specialty Coffee များကို မြည်းစမ်းအကဲဖြတ်နိုင်သည့် Cupping Session များလည်း ထည့်သွင်း ကျင်းပသွားမည်ဖြစ်ကြောင်း သိရပါသည်။ ထို့ပြင် ပါဝင်သည့်လုပ်ငန်းများက ၎င်းတို့၏ ကော်ဖီစိုက်ပျိုးရာဒေသများ၊ ထုတ်လုပ်မှုလုပ်ငန်းစဉ်များနှင့် ဗီယက်နမ် Specialty Coffee ၏ ထူးခြားသောအရည်အသွေးများကို မျှဝေတင်ပြသွားမည်ဖြစ်ကြောင်း သိရပါသည်။ ကွမ်ကျိုးအစီအစဉ်အတွင်း စီးပွားရေးလုပ်ငန်းချင်းချိတ်ဆက်ဆွေးနွေးပွဲ (B2B) များကိုလည်း ကျင်းပမည်ဖြစ်ပြီး ဗီယက်နမ်ကုမ္ပဏီများအနေဖြင့် တရုတ်နိုင်ငံမှ ကော်ဖီတင်သွင်းသူများ၊ ကော်ဖီလှော်လုပ်ငန်းများ၊ ကော်ဖီဆိုင်ကွင်းဆက်များ၊ ဖြန့်ချိရေးလုပ်ငန်းများနှင့် ကော်ဖီဆိုင်ရာ အဖွဲ့အစည်းများနှင့် တိုက်ရိုက်တွေ့ဆုံကာ စီးပွားရေးပူးပေါင်းဆောင်ရွက်နိုင်မည့် အခွင့်အလမ်းများ ရရှိမည်ဖြစ်ကြောင်း သိရပါသည်။ အသင်းဥက္ကဋ္ဌ Trinh Duc Minh က အဆိုပါ Roadshow အစီအစဉ်မှ တစ်ဆင့် Vietnam Amazing Cup ၏ ဂုဏ်သတင်းနှင့် အသိအမှတ်ပြုမှုကို မြှင့်တင်နိုင်မည် ဖြစ်သကဲ့သို့ ဗီယက်နမ်၏ အရည်အသွေးမြင့် Specialty Coffee များကို တရုတ်စားသုံးသူများနှင့် ပိုမိုနီးကပ်စေပြီး နိုင်ငံတကာစီးပွားရေးမိတ်ဖက်ကွန်ရက်ကိုတိုးချဲ့ကာ ဗီယက်နမ်ကော်ဖီလုပ်ငန်း၏ ရေရှည်ဖွံ့ဖြိုးတိုးတက်ရေးအတွက် ပိုမိုကျယ်ပြန့်သည့် ပူးပေါင်းဆောင်ရွက်မှုအခွင့်အလမ်းများ ဖန်တီးပေးနိုင်မည်ဟု မျှော်လင့်ကြောင်း ပြောကြားခဲ့သည်ဟု သိရှိရပါသည်။
Vietnam Plus
DOCA (ရန်ကုန်)