ဗီယက်နမ်နိုင်ငံ၏ အထည်အလိပ်နှင့် အထည်ချုပ်လုပ်ငန်း ပို့ကုန်တန်ဖိုးသည် ၂၀၂၆ ခုနှစ် ပထမခြောက်လအတွင်း အမေရိကန်ဒေါ်လာ ၂၂.၂ ဘီလီယံရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၁.၇ ရာခိုင်နှုန်း တိုးတက်ခဲ့ကြောင်း ဗီယက်နမ်အထည်အလိပ်နှင့် အထည်ချုပ် အသင်း (VITAS) က ထုတ်ပြန်ခဲ့ပါသည်။ အသင်း၏ ထုတ်ပြန်ချက်အရ ချည်မျှင်၊ အထည်၊ အထောက်အကူပြုပစ္စည်းများနှင့် Nonwoven Material များ၏ ပို့ကုန်သည် ၅.၆ ရာခိုင်နှုန်းမှ ၁၀.၆ ရာခိုင်နှုန်းအထိ တိုးတက်ခဲ့သော်လည်း အဓိကဈေးကွက်များတွင် စားသုံးသူဝယ်လိုအား အားနည်းနေသဖြင့် အထည်ချုပ်ပို့ကုန်မှာ ၀.၄ ရာခိုင်နှုန်း ကျဆင်းခဲ့ကြောင်း သိရပါသည်။ ယခုနှစ် ပထမငါးလအတွင်း စာရင်းအင်းများအရ အမေရိကန်နိုင်ငံသည် ဗီယက်နမ်၏ အကြီးဆုံးပို့ကုန် ဈေးကွက်အဖြစ် ဆက်လက်ရပ်တည်နေပြီး တင်ပို့မှုတန်ဖိုး အမေရိကန်ဒေါ်လာ ၆.၈၁ ဘီလီယံ ရှိကာ ယခင်နှစ်ထက် ၁.၃ ရာခိုင်နှုန်း တိုးတက်ခဲ့ပြီး စုစုပေါင်းတင်ပို့မှု၏ ၄၅ ရာခိုင်နှုန်းခန့် ရှိကြောင်း သိရပါသည်။ ဥရောပသမဂ္ဂ (EU) သို့ တင်ပို့မှုမှာ ၈.၈ ရာခိုင်နှုန်း တိုးတက်ကာ အမေရိကန်ဒေါ်လာ ၁.၉၄ ဘီလီယံရှိခဲ့ပြီး အတောက်ပဆုံးဈေးကွက်ဖြစ်ခဲ့ကြောင်း သိရပါသည်။ သို့သော် ဂျပန်နှင့် တောင်ကိုရီးယားနိုင်ငံများသို့ တင်ပို့မှုမှာ ၆.၂ ရာခိုင်နှုန်းနှင့် ၈.၉ ရာခိုင်နှုန်း အသီးသီးကျဆင်းခဲ့ကြောင်း သိရပါသည်။ အဆိုပါကာလအတွင်း အထည်အလိပ်နှင့် အထည်ချုပ်လုပ်ငန်း၏ ကုန်သွယ်ရေးပိုငွေမှာ အမေရိကန်ဒေါ်လာ ၁၀ ဘီလီယံနီးပါးရှိခဲ့ကြောင်း သိရပါ သည်။ သို့သော် လုပ်ငန်းကဏ္ဍအနေဖြင့် အဓိကဈေးကွက်များတွင် ဝယ်လိုအားနှေးကွေးနေခြင်း၊ ဈေးနှုန်းယှဉ်ပြိုင်မှု ပြင်းထန်လာခြင်း၊ ကုန်ကြမ်းတင်သွင်းမှုအပေါ်မှီခိုနေရခြင်း၊ ပတ်ဝန်းကျင်၊ လူမှုရေးနှင့် ကော်ပိုရိတ်အုပ်ချုပ်မှု (ESG) စံနှုန်းများနှင့် ကုန်ပစ္စည်းခြေရာခံစနစ်တို့ကြောင့် ကုန်ကျစရိတ်မြင့်တက်လာခြင်း၊ ကမ္ဘာလုံးဆိုင်ရာ ကုန်သွယ်ရေးမူဝါဒများ မရေရာမှု မြင့်တက်လာခြင်း စသည့်စိန်ခေါ်မှုများကို ဆက်လက်ရင်ဆိုင်နေရကြောင်း VITAS က ပြောကြားခဲ့ပါသည်။
VITAS ဥက္ကဋ္ဌ Vu Duc Giang က လုပ်ငန်းကဏ္ဍအနေဖြင့် ထုတ်လုပ်မှုပမာဏ တိုးမြှင့်ခြင်း တစ်ခုတည်းဖြင့် ဆက်လက်တိုးတက်ရန် အခွင့်အလမ်းများစွာ မကျန်တော့ကြောင်း ပြောကြားခဲ့ပါသည်။ အနာဂတ်တိုးတက်မှုသည် ထုတ်လုပ်မှုစွမ်းရည် မြှင့်တင်ခြင်း၊ တန်ဖိုးမြင့်ထုတ်ကုန်များ ထုတ်လုပ်ခြင်း၊ ပြည်တွင်းကုန်ကြမ်းရင်းမြစ်များ ဖွံ့ဖြိုးတိုးတက်စေခြင်း၊ ပို့ကုန်ဈေးကွက်များ ကွဲပြားစေခြင်းနှင့် ဒစ်ဂျစ်တယ်နှင့် အစိမ်းရောင်အသွင်ကူးပြောင်းရေးကို အရှိန်မြှင့်ဆောင်ရွက် ခြင်းတို့အပေါ် မူတည်မည်ဖြစ်ကြောင်း ၎င်းက ပြောကြားခဲ့ပါသည်။ ထိုရည်မှန်းချက်များကို အကောင်အထည်ဖော်နိုင်ရန် VITAS သည် ၂၀၂၅-၂၀၃၀ သက်တမ်းအတွက် အထူးပြုကော်မတီလေးရပ်ကို ဖွဲ့စည်းရန် အတည်ပြုခဲ့ကြောင်း သိရပါသည်။ အဆိုပါကော်မတီများသည် ဖက်ရှင်နှင့် ပြည်တွင်းဈေးကွက်ဖွံ့ဖြိုးရေး၊ နိုင်ငံတကာစီးပွားရေးနှင့် ထောက်ပံ့ရေးကွင်းဆက်၊ ရေရှည်တည်တံ့သော ဖွံ့ဖြိုးတိုးတက်ရေး၊ နည်းပညာ၊ ဆန်းသစ်တီထွင်မှုနှင့် ဒစ်ဂျစ်တယ်အသွင် ကူးပြောင်းရေးကဏ္ဍများကို အဓိကတာဝန်ယူဆောင်ရွက်မည်ဖြစ်ကြောင်း သိရပါသည်။ အဆိုပါ ကော်မတီများသည် ၂၀၂၆ ခုနှစ် တတိယသုံးလပတ်တွင် စတင်စမ်းသပ်လည်ပတ်မည်ဖြစ်ကြောင်း သိရပါသည်။ ယခုနှစ် ပထမခြောက်လအတွင်း ပို့ကုန်တန်ဖိုး အမေရိကန်ဒေါ်လာ ၂၂.၂ ဘီလီယံ ရရှိထားသဖြင့် တစ်နှစ်တာပို့ကုန်ရည်မှန်းချက် အမေရိကန်ဒေါ်လာ ၄၈ ဘီလီယံခန့် ပြည့်မီစေရန် ကျန်ရှိသည့်လများတွင် လစဉ်ပို့ကုန်ဝင်ငွေ အမေရိကန်ဒေါ်လာ ၄ ဘီလီယံကျော် ဆက်လက်ရရှိရန် ရည်မှန်းထားကြောင်း သိရပါသည်။ ထို့ပြင် ကမ္ဘာ့အမှတ် တံဆိပ်ကုမ္ပဏီများ၏ ဝယ်ယူရေးမဟာဗျူဟာအပြောင်းအလဲများနှင့် လိုက်လျောညီထွေဖြစ်စေရေး၊ ပြည်တွင်းကုန်ကြမ်း ထောက်ပံ့မှုတိုးမြှင့်ရေး၊ ပို့ကုန်ဈေးကွက်နှင့် ထုတ်ကုန်အမျိုးအစားများကွဲပြားစေရေး၊ ဥပဒေရေးရာနှင့် ကုန်သွယ်ရေးဆိုင်ရာ အန္တရာယ်များအတွက် ကြိုတင်ပြင်ဆင်ရေး၊ နည်းပညာ၊ အလို အလျောက်စနစ်နှင့် ဒစ်ဂျစ်တယ်အသွင်ကူးပြောင်းရေးတွင် ရင်းနှီးမြှုပ်နှံမှုများ တိုးမြှင့်ရေးတို့ကို အဓိကဦးစားပေး ဆောင်ရွက်သွားမည်ဖြစ်ကြောင်း သိရှိရပါသည်။
Vietnam Plus
DOCA (ရန်ကုန်)