ဗီယက်နမ်သမ္မတ To Lam သည် ထိုင်းနိုင်ငံ၏ စျေးကွက်တန်ဖိုးအရ အကြီးဆုံးစွမ်းအင် ကုမ္ပဏီဖြစ်သော Gulf Development Plc အား ဗီယက်နမ်နိုင်ငံအတွင်း စွမ်းအင်လုပ်ငန်း ရင်းနှီးမြှုပ်နှံမှုများ တိုးချဲ့ဆောင်ရွက်ရန် ဖိတ်ခေါ်ခဲ့ကြောင်း သိရပါသည်။ ထိုင်းနိုင်ငံသို့ အလည်အပတ် ရောက်ရှိနေစဉ် သမ္မတ To Lam သည် စီးပွားရေးခေါင်းဆောင်များနှင့် တွေ့ဆုံခဲ့ပြီး ဗီယက်နမ်၏ ရေရှည်တည်တံ့သော ဖွံ့ဖြိုးတိုးတက်ရေးကို အထောက်အကူပြုမည့် မဟာဗျူဟာကဏ္ဍများတွင် အရည်အသွေးမြင့် ရင်းနှီးမြှုပ်နှံမှုများ တိုးမြှင့်လုပ်ဆောင်ရန် တိုက်တွန်းခဲ့ကြောင်း သိရပါသည်။ VietnamPlus သတင်းဌာန၏ ဖော်ပြချက်အရ သမ္မတ To Lam က Gulf အနေဖြင့် ပတ်ဝန်းကျင်နှင့် လူမှုရေးတာဝန်ယူမှုစံနှုန်းများနှင့် ကိုက်ညီသည့်စီမံကိန်းများကို အကောင်အထည်ဖော်သင့်ကြောင်း ထို့အပြင်နည်းပညာလွှဲပြောင်းမှုနှင့် ပြည်တွင်းလုပ်သားများ လေ့ကျင့်ပေးရေးဆိုင်ရာ ကတိကဝတ်များကိုလည်း ဖြည့်ဆည်းဆောင်ရွက်ရန်လိုအပ်ကြောင်း ပြောကြားခဲ့ပါသည်။ သမ္မတ To Lam က ရေရှည်အမြင်နှင့် အတွေ့အကြုံများပြည့်ဝသော ရင်းနှီးမြှုပ်နှံသူများအတွက် ဗီယက်နမ်က အပြည့်အဝပံ့ပိုးကူညီသွားမည်ဖြစ်ကြောင်း ပြောကြားခဲ့ပါသည်။ Gulf ၏ အမှုဆောင်အရာရှိချုပ် Sarath Ratanavadi က ကုမ္ပဏီအနေဖြင့် ဗီယက်နမ်၏ ရေရှည်မဟာ ဗျူဟာမိတ်ဖက်အဖြစ် ရပ်တည်လိုကြောင်းနှင့် Gulf သည် LNG နှင့် ပြန်လည်ပြည့်ဖြိုးမြဲစွမ်းအင် စီမံကိန်းများတွင် ရင်းနှီးမြှုပ်နှံခြင်းဖြင့် ဗီယက်နမ်၏ အမျိုးသားစွမ်းအင်လုံခြုံရေးကို အားဖြည့်ပေးရန် ရည်ရွယ်ထားကြောင်း ပြောကြားခဲ့ပါသည်။ Gulf သည် ထိုင်းနိုင်ငံတွင် LNG ကုန်သွယ်ရေးနှင့် ပြန်လည်ပြည့်ဖြိုးမြဲစွမ်းအင် ဖွံ့ဖြိုးတိုးတက်ရေးကဏ္ဍများတွင် အရေးပါသည့် ကုမ္ပဏီတစ်ခုဖြစ်ကြောင်း သိရပါသည်။ Sarath Ratanavadi က ယခင်ကလည်း ကမ္ဘာတစ်ဝန်း LNG ရှားပါးမှုနှင့် အရှေ့အလယ်ပိုင်းဒေသရှိ ပဋိပက္ခများကြောင့် စိုးရိမ်မှုများ မြင့်တက်နေသော်လည်း သဘာဝဓာတ်ငွေ့သည် ကမ္ဘာ့လျှပ်စစ်ဓာတ်အားထုတ်လုပ်ရေး၏ အဓိကအခြေခံ စွမ်းအင်ရင်းမြစ်အဖြစ် ဆက်လက်တည်ရှိနေကြောင်း ပြောကြားခဲ့ပါသည်။ ၎င်း၏ ပြောကြားချက်အရ ကမ္ဘာ့ LNG ထောက်ပံ့မှုမှာ တင်းကျပ်နေဆဲဖြစ်သော်လည်း မကြာသေးမီနှစ်များအတွင်း LNG အရင်းအမြစ်အသစ်များ ဈေးကွက်ထဲသို့ ဝင်ရောက်လာခဲ့သဖြင့် အကျိုးသက်ရောက်မှုကို လျော့နည်းစေခဲ့ကြောင်း သိရပါသည်။ Gulf အနေဖြင့် LNG ဝယ်ယူမှုများကို အရှေ့အလယ်ပိုင်း ဒေသအပြင် အခြားနိုင်ငံများ အထူးသဖြင့် နိုင်ဂျီးရီးယားနိုင်ငံထံမှ ကွဲပြားစွာဝယ်ယူထားသဖြင့် ထောက်ပံ့မှုပြတ်တောက်မှုများ၏ သက်ရောက်မှုကို အနည်းငယ်သာ ခံစားရကြောင်း သိရပါသည်။ Gulf သည် ထိုင်းနိုင်ငံတွင်ထုတ်ပေးထားသော LNG ကုန်သွယ်ရေးလိုင်စင် ခြောက်ခုအနက် တစ်ခုကိုကိုင်ဆောင်ထားပြီး နှစ်စဉ် LNG တန်ချိန် ၇.၈ သန်းအထိ တင်သွင်းခွင့်ရရှိထားပြီး ယမန်နှစ်က LNG တန်ချိန် ၃.၇ သန်း တင်သွင်းခဲ့ကြောင်း သိရပါသည်။ လက်ရှိတွင် Gulf သည် တပ်ဆင်ပြီး လျှပ်စစ်ထုတ်လုပ်နိုင်စွမ်း ၁၆,၀၀၀ မဂ္ဂါဝပ် (MW) ရှိပြီး နောက်ထပ် ၉,၀၀၀ မဂ္ဂါဝပ်ကို တည်ဆောက်သည့်အဆင့်အောက်တွင် တည်ရှိနေကြောင်း သိရပါသည်။ ထို့ပြင် ၂၀၃၃ ခုနှစ်အရောက်တွင် ၎င်း၏စွမ်းအင်လုပ်ငန်းစုစုပေါင်းအတွင်း ပြန်လည်ပြည့်ဖြိုးမြဲစွမ်းအင် အချိုးအစားကို လက်ရှိ ၁၇ ရာခိုင်နှုန်းမှ ၄၀ ရာခိုင်နှုန်းကျော်အထိ တိုးမြှင့်သွားရန် ရည်မှန်းထားကြောင်း သိရှိရပါသည်။
Bangkok Post
DOCA (ရန်ကုန်)