အယ်လ်နီညိုရာသီဥတုဖြစ်စဉ်ကြောင့် စားနပ်ရိက္ခာထုတ်လုပ်မှုနှင့် ဖြန့်ဖြူးရောင်းချမှုများ အပေါ် သက်ရောက်မှုရှိနိုင်သော်လည်း အင်ဒိုနီးရှားနိုင်ငံ၏ အစားအစာဖူလုံမှုမှာ အာမခံချက်ရှိနေ ကြောင်း အစားအစာရေးရာပူးပေါင်းညှိနှိုင်းရေးဝန်ကြီး Zulkifli Hasan က စက်တင်ဘာလ ၃ ရက်နေ့တွင် ပြောကြားခဲ့ပါသည်။ Hasan က ဆန်၊ ငါး၊ ကြက်ဥနှင့် ကြက်သားများ လုံလောက်စွာ ရရှိနေခြင်းကိုအခြေခံ၍ အမျိုးသားအဆင့်အစားအစာဖူလုံမှုအခြေအနေ ကောင်းမွန်နေကြောင်း နှင့် ကုန်စည်များလုံလောက်စွာရရှိနိုင်မှုသည် နိုင်ငံ၏အစားအစာဖူလုံမှုကို တိုင်းတာရာတွင် အဓိကညွှန်ကိန်းတစ်ရပ်ဖြစ်ကြောင်း ပြောကြားခဲ့ပါသည်။ အစိုးရ၏အချက်အလက်များအရ ၂၀၂၆ ခုနှစ် ဩဂုတ်လအထိ အင်ဒိုနီးရှားနိုင်ငံ၏ အမျိုးသားဆန်အရန်လက်ကျန်မှာ တန်ချိန် ၅.၂၅ သန်းခန့်ရှိပြီး ပြည်တွင်းစားသုံးမှုအတွက် လုံလောက်သောအရန်အင်အားတစ်ရပ်အဖြစ် ထားရှိနိုင်ကြောင်း သိရပါသည်။ ၂၀၂၆ ခုနှစ်အတွင်းဆန်ထုတ်လုပ်မှုမှာ တန်ချိန် ၃၄.၇၇ သန်းမှ ၃၈.၆ သန်း အထိရှိနိုင်ပြီး ပြည်တွင်းဆန်လိုအပ်ချက်မှာ တန်ချိန် ၃၁.၁၀ သန်းခန့်ရှိမည်ဟု ခန့်မှန်းထား ကြောင်း သိရပါသည်။ အဆိုပါခန့်မှန်းချက်များအရ ၂၀၂၆ ခုနှစ်တွင် အင်ဒိုနီးရှားနိုင်ငံ၌ ဆန်ပိုလျှံမှု တန်ချိန် ၃.၆၇ သန်းမှ ၇.၅၀ သန်းအထိရှိနိုင်ကြောင်း သိရပါသည်။ စားနပ်ရိက္ခာရရှိနိုင်မှုနှင့် ဈေးနှုန်းတည်ငြိမ်မှုရှိစေရန် အစိုးရသည် ၂၀၂၆ ခုနှစ်အတွင်း အစိုးရဆန်အရန် (CBP) မှ ဆန် တန်ချိန် ၁.၉ သန်းနီးပါးကိုဖြန့်ဝေပေးခဲ့ကြောင်း သိရပါသည်။ ထို့ပြင် စားနပ်ရိက္ခာရရှိနိုင်မှုနှင့် ဈေးနှုန်းတည်ငြိမ်ရေးအစီအစဉ် (SPHP) ကိုလည်း ဆက်လက်အကောင်အထည်ဖော်လျက်ရှိပြီး အဆိုပါအစီအစဉ်မှတစ်ဆင့် ဆန်တန်ချိန် ၇၃၁,၀၀၀ မှ ၉၅၂,၀၀၀ အထိ ဖြန့်ဝေပေးနိုင်ခဲ့ကြောင်း သိရပါသည်။ Hasan က အစားအစာဖူလုံမှုအပေါ် အန္တရာယ်ဖြစ်စေနိုင်သည့် ရာသီဥတုပြောင်းလဲ မှုနှင့် ကမ္ဘာ့ပထဝီနိုင်ငံရေးအခြေအနေများအပါအဝင် ဖြစ်ပေါ်လာနိုင်သည့်အန္တရာယ်များကို ကြိုတင်ကာကွယ်ရေးအစီအမံများ ချမှတ်ဆောင်ရွက်လျက်ရှိကြောင်း၊ ပြည်တွင်းစားသုံးမှု လိုအပ်ချက်များပြည့်မီစေရန် အစိုးရအနေဖြင့် စားနပ်ရိက္ခာများထုတ်လုပ်မှု၊ သိုလှောင်မှုနှင့် ဖြန့်ဖြူးမှုလုပ်ငန်းများကို ဆက်လက်ကာကွယ်ထိန်းသိမ်း ဆောင်ရွက်သွားမည်ဖြစ်ကြောင်းနှင့်ရာသီဥတုနှင့် ကမ္ဘာ့အခြေအနေများကြောင့် အနှောင့်အယှက်များဖြစ်ပေါ်လာနိုင်သော်လည်း အင်ဒိုနီးရှားနိုင်ငံ၏စားနပ်ရိက္ခာရရှိနိုင်မှုမှာ ဆက်လက်လုံလောက်ပြီး အစားအစာဖူလုံမှုကို ထိန်းသိမ်းထားနိုင်မည်ဟုယုံကြည်ကြောင်း ပြောကြားခဲ့ပါသည်။
DOCA (ရန်ကုန်)