၂၀၂၆ ခုနှစ် နှစ်ဆန်းပိုင်းတွင် ထိုင်းနိုင်ငံသို့ ဗီယက်နမ်၏ ကော်ဖီတင်ပို့မှုမှာ တစ်ဟုန်ထိုး မြင့်တက်လာခဲ့ပါသည်။ အကြောင်းရင်းမှာ ကမ္ဘာ့ကော်ဖီစျေးနှုန်းများသည် ၂၀၂၆ ခုနှစ်၊ ဧပြီလ လယ်တွင် ကျဆင်းသွားသော်လည်း လှော်ထားပြီး ပြုပြင်ထုတ်လုပ်ထားသော ကော်ဖီထုတ်ကုန် များအပေါ် ဝယ်လိုအား မြင့်တက်လာမှုကြောင့် ဖြစ်ပါသည်။
ဗီယက်နမ်အကောက်ခွန်ဌာန၏ ထုတ်ပြန်ချက်အရ ဗီယက်နမ်နိုင်ငံသည် ယခုနှစ် ပထမ သုံးလပတ် အတွင်း ထိုင်းနိုင်ငံသို့ အမေရိကန်ဒေါ်လာ ၈၀.၆ သန်း တန်ဖိုးရှိ ကော်ဖီတန်ချိန် ၉,၉၀၀ ခန့် တင်ပို့ခဲ့ပြီး ၎င်းပမာဏသည် ယခင်နှစ်ထက် တင်ပို့မှုပမာဏအားဖြင့် ၂၂.၅ ရာခိုင်နှုန်းနှင့် တင်ပို့မှုတန်ဖိုးအနေဖြင့် ၂၈.၇ ရာခိုင်နှုန်းထိ မြင့်တက်လာကြောင်း သိရှိရသည်။
ကော်ဖီတင်ပို့မှုပမာဏထက် တင်ပို့မှုတန်ဖိုးမှာ ပိုမိုလျင်မြန်စွာ မြင့်တက်လာခြင်းသည် တန်ဖိုးမြင့် ပြုပြင်ထုတ်လုပ်ထားသော ကော်ဖီသို့ ပြောင်းလဲဦးတည်လာခြင်းကို ညွှန်ပြနေခြင်း ဖြစ်သည်။ ယခုနှစ် ပထမနှစ်လတွင် ထိုင်းနိုင်ငံသို့ တင်ပို့သော ဗီယက်နမ်နိုင်ငံ ကော်ဖီပို့ကုန် ဝင်ငွေ၏ ၈၃.၆ ရာခိုင်နှုန်းကို ပြုပြင်ထုတ်လုပ်ထားသော ထုတ်ကုန်များမှ ရရှိပါသည်။
ဧပြီလထုတ်သတင်းလွှာတွင် စက်မှုနှင့်ကုန်သွယ်ရေးဝန်ကြီးဌာန၏ ပြောကြားချက်အရ အထူးသဖြင့် ထိုင်းနိုင်ငံ မြို့ကြီးများရှိ စားသုံးသူများသည် အသင့်ဖျော်ကော်ဖီ သောက်သုံးမှုမှ လှော်ပြီးကြိတ်ထားသော ကော်ဖီ၊ ကော်ဖီကြမ်းခါးသောက်သုံးမှုများနှင့် အထူးအဆင့်မီ ကော်ဖီ အမျိုးအစားများဆီသို့ ပိုမိုပြောင်းလဲသောက်သုံးလာကြကြောင်း သိရှိရပါသည်။
ဘန်ကောက်၊ ချင်းမိုင်နှင့် ထိုင်းနိုင်ငံရှိ ကမ္ဘာလှည့်ခရီးသွားများ သွားလာမှုများသော ဒေသများတွင် ခေတ်မီကော်ဖီဆိုင်ခွဲများ တိုးချဲ့ဖွင့်လှစ်လာမှုသည် အရည်အသွေး မြင့်မားပြီး မူရင်း ထုတ်လုပ်သည့်နေရာကို ခြေရာခံစစ်ဆေးနိုင်သော ကော်ဖီထုတ်ကုန်များအပေါ် ဝယ်လိုအားကို မြင့်တက်စေခဲ့သည်။
ဗီယက်နမ်၏ ထိုင်းနိုင်ငံသို့ ကော်ဖီတင်သွင်းမှုဝေစုမှာ ပြီးခဲ့သော တစ်နှစ်အတွင်း ၂၄.၂ ရာခိုင်နှုန်းမှ ၃၅.၇ ရာခိုင်နှုန်းသို့ တိုးတက်လာခဲ့ပြီး ယင်းအချက်မှာ ကုန်သွယ်ရေးဆိုင်ရာ အချက် အလက်အရ ဗီယက်နမ်နိုင်ငံသည် ထိုင်းနိုင်ငံ၏ အဓိကဦးဆောင်ပေးသွင်းသူနိုင်ငံများအနက် တစ်နိုင်ငံဖြစ်ကြောင်း သိရှိရပါသည်။
ဈေးကွက်သုတေသနလုပ်သူများ၏ ပြောကြားချက်အရ ထိုင်းနိုင်ငံတွင် ကော်ဖီသုံးစွဲမှုသည် ၂၀၃၂ ခုနှစ်အထိ နှစ်စဉ် ၇ မှ ၈ ရာခိုင်နှုန်းအထိ တိုးတက်မည်ဟု ခန့်မှန်းထားပြီး ခြောက်နှစ်တာ ကာလတွင် တန်ချိန် ၁၂၀၀၀၀ ကျော်နိုင်ဖွယ်ရှိကြောင်း သိရှိရပါသည်။ သို့သော်လည်း ဘရာဇီး၊ မလေးရှားနှင့် အင်ဒိုနီးရှားမှ ပေးသွင်းသူများသည် ၎င်းတို့၏ ဖြစ်တည်မှုအခြေအနေကို ချဲ့ထွင် နေရာယူလာခြင်းကြောင့် ပြိုင်ဆိုင်မှု ပိုမို ပြင်းထန်လာနေသည်။
အပြည်ပြည်ဆိုင်ရာ ကုန်သွယ်ရေးစင်တာမှ အချက်အလက်အရ ဗီယက်နမ်ကော်ဖီသည် ဒေသတွင်း ပြိုင်ဘက်နိုင်ငံများနှင့် နှိုင်းယှဉ်လျှင် စျေးနှုန်းပိုမို ယှဉ်ပြိုင်နိုင်စွမ်းရှိနေဆဲဖြစ်သည်။ ယင်းအချက်ကို ဒေသချင်း ကပ်လျက်တည်ရှိခြင်း၊ သယ်ယူပို့ဆောင်ရေး ကုန်ကျစရိတ်နည်းခြင်း နှင့် အာဆီယံ ကုန်သွယ်ရေးအုပ်စုအတွင်း အခွန်ဆိုင်ရာ အကျိုးအမြတ်များရှိခြင်း စသည့်တို့က ထောက်ပံ့ ပေးထားခြင်းဖြစ်ပါသည်။
ကော်ဖီလုပ်ငန်းနယ်ပယ်မှ အရာရှိများ၏ ပြောကြားချက်အရ လှော်ပြီးကြိတ်ထားသော ကော်ဖီ၊ အသင့်ဖျော်ကော်ဖီနှင့် ကိုယ်ပိုင်အမှတ်တံဆိပ်ထုတ်ကုန်များကဲ့သို့ တန်ဖိုးမြင့်ပိုင်း ဈေးကွက်များသည် ထိုင်းနိုင်ငံ၏လျင်မြန်စွာ တိုးတက်နေသော ဈေးကွက်တွင် မိမိတို့၏ အနေ အထားကို ပိုမိုခိုင်မာစေရန် ဗီယက်နမ် တင်ပို့သူများအတွက် အခွင့်အလမ်းများ ပေးစွမ်းနေ ကြောင်း သိရသည်။
ထိုင်းနိုင်ငံတွင် ကော်ဖီသုံးစွဲမှုသည် ကျယ်ပြန့်လာပြီး လူတစ်ဦးလျှင် နှစ်စဉ် ကော်ဖီခွက် ၃၄၀ ကျော်ခန့် ပျမ်းမျှသုံးစွဲလျက်ရှိသည်။ ပြည်တွင်းဈေးကွက်ကို ၂၀၂၅ ခုနှစ်တွင် ထိုင်းဘတ် ၆၅ ဘီလီယံ (အမေရိကန်ဒေါ်လာ ၂ ဘီလီယံ) ခန့်ရှိသည်ဟု ခန့်မှန်းထားပြီး ယခင်နှစ်ကထက် ၈.၃ ရာခိုင်နှုန်း တိုးတက်လာခဲ့ခြင်းဖြစ်သည်။
ထိုင်းနိုင်ငံသည် ကော်ဖီထုတ်လုပ်မှု ပမာဏမှာ နည်းပါးပြီး စိုက်ပျိုးမြေ ဧရိယာမှာ ခန့်မှန်း အားဖြင့် ဟက်တာ ၃၅,၀၀၀ ခန့် ရှိကာ နှစ်စဉ် ပဲစိမ် ထုတ်လုပ်မှုသည် တန်ချိန် ၄၀,၀၀၀ မှ ၅၀,၀၀၀ အထိရှိကြောင်း သိရှိရပါသည်။
Source: Viet Nam News, 1-5-2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)