ဘင်္ဂလားဒေ့ရှ်နိုင်ငံ၏ အစိုးရဂိုဒေါင်များတွင် လက်ရှိ၌ ဆန်တန်ချိန် ၁၅.၇၉ သိန်းတန်နှင့် ဂျုံတန်ချိန် ၃.၃၉ သိန်းတန် အပါအဝင် စုစုပေါင်း စားနပ်ရိက္ခာ တန်ချိန် ၁၉.၂ သိန်းတန်ခန့်ရှိကြောင်း အစားအသောက်ဆိုင်ရာ ပြည်နယ်ဝန်ကြီး Md Abdul Bari က မတ်လ ၆ ရက်နေ့တွင် လွှတ်တော်၌ ပြောကြားခဲ့ကြောင်း သိရပါသည်။
ပြည်နယ်ဝန်ကြီးက ရိက္ခာပြတ်လပ်မှုမရှိစေရန်အတွက် အစိုးရသည် ဆန်နှင့် ဂျုံတို့ကို အစိုးရအချင်းချင်း (G-to-G) သဘောတူညီချက်များဖြင့်လည်းကောင်း၊ တင်ဒါခေါ်ယူမှုများဖြင့်လည်းကောင်း တင်သွင်းလျက်ရှိကြောင်း ပြောကြားခဲ့ပါသည်။ ပြည်နယ်ဝန်ကြီး၏ အဆိုအရ ယခု ၂၀၂၅-၂၆ ဘဏ္ဍာရေးနှစ်အတွင်း နိုင်ငံတကာတင်ဒါမှ ဆန်တန်ချိန် ၅ သိန်းနှင့် G-to-G စနစ်ဖြင့် တန်ချိန် ၁ သိန်းတန်၊ စုစုပေါင်း တန်ချိန် ၆ သိန်းတန်ခန့် တင်သွင်းရန် စာချုပ်ချုပ်ဆိုထားရာတွင် လက်ရှိ၌ ဆန်တန်ချိန် ၃ သိန်း လက်ခံရရှိပြီးဖြစ်ကြောင်း သိရပါသည်။ ကျန်ရှိသော တန်ချိန် ၃ သိန်းတန်မှာ ပေးပို့ရန် စောင့်ဆိုင်းဆဲဖြစ်ကြောင်း သိရပါသည်။
ဂျုံတင်သွင်းမှုနှင့် ပတ်သက်၍ အမေရိကန်ပြည်ထောင်စုထံမှ တန်ချိန် ၇.၁၀ သိန်း တန်တင်သွင်းရန် စာချုပ်ချုပ်ဆိုထားရာတွင် တန်ချိန် ၅.၃၅ သိန်းတန် ရရှိထားပြီးဖြစ်ကာ၊ ကျန်ရှိသော တန်ချိန် ၁.၇၅ သိန်းတန်ကို သတ်မှတ်ကာလအတွင်း ရရှိရန်မျှော်မှန်းထားကြောင်း သိရပါသည်။ အစားအသောက်ဝန်ကြီးဌာန လက်အောက်ရှိ အစားအသောက်စီမံကိန်းနှင့် စောင့်ကြည့်ရေးကော်မတီ (FPMC) သည် ပြည်တွင်းဝယ်ယူရေးမူဝါဒများကို ကြီးကြပ်လျက်ရှိပြီး ၂၀၂၆ခုနှစ် မေလမှ သြဂုတ်လအထိ ကျရောက်မည့် လာမည့် Boro စပါးရာသီတွင် စပါးတန်ချိန် ၅ သိန်းတန်နှင့် ဆန်တန်ချိန် ၁၂.၁၃ သိန်း ဝယ်ယူရန် စီစဉ်ထားကြောင်း Abdul Bari က ဆက်လက်ပြောကြားခဲ့ပါသည်။ ထို့ပြင် လာမည့် ၂၀၂၆-၂၇ ဘဏ္ဍာရေးနှစ်တွင်လည်း လိုအပ်ချက်အရ ဆန်နှင့် ဂျုံတို့ကို ပြည်တွင်း၊ ပြည်ပ နှစ်ရပ်လုံးမှ ဆက်လက်ဝယ်ယူသွားမည်ဖြစ်ကြောင်း ၎င်းက ထပ်လောင်းပြောဆိုခဲ့ကြောင်း သိရှိရပါသည်။
Source: The Daily Star
DOCA (ရန်ကုန်)