ပထဝီနိုင်ငံရေးတင်းမာမှုများသည် နိုင်ငံတကာကုန်သွယ်ရေးကို ပုံစံပြောင်းလဲစေနိုင်သောကြောင့် ကမ္ဘာလုံးဆိုင်ရာ ထောက်ပံ့ရေးကွင်းဆက်များ အနှောင့်အယှက်ဖြစ်နေချိန်တွင် အင်ဒိုနီးရှားနိုင်ငံအနေဖြင့် ပို့ကုန်အခွင့်အလမ်းအသစ်များကို အသုံးချနိုင်ကြောင်း ကုန်သွယ်ရေး ဝန်ကြီး Budi Santoso က မတ်လ ၅ ရက်နေ့တွင် ပြောကြားခဲ့ပါသည်။ ဝန်ကြီးက အရှေ့အလယ်ပိုင်းဒေသတွင် မတည်ငြိမ်မှုများကြောင့် အချို့နိုင်ငံများ၏ ကုန်ပစ္စည်းပို့ဆောင်မှုများ ထိခိုက်နိုင်ပြီး ကမ္ဘာ့ဈေးကွက်များတွင် ကုန်ပစ္စည်းထောက်ပံ့မှုနေရာလွတ်များ ပေါ်ပေါက်လာနိုင်ကြောင်း၊ ပထဝီနိုင်ငံရေး အကျပ်အတည်းများ ဖြစ်ပေါ်လာသောအခါ ကုန်သွယ်ရေးမြေပုံကလည်း ပြောင်းလဲသွားတတ်ကြောင်း၊ ထောက်ပံ့ရေးကွင်းဆက်များပြတ်တောက်လာသည့် အခါထောက်ပံ့သူများ အကန့်အသတ်ရှိသဖြင့် ဈေးကွက်များမှာ နေရာလွတ်များ ဖြစ်ပေါ်လာတတ်ကြောင်း၊ ထိုကဲ့သို့သော အခြေအနေများကြောင့် အင်ဒိုနီးရှားနိုင်ငံအနေဖြင့် ပို့ကုန်ဈေးကွက်အချို့တွင် ဖြစ်ပေါ်လာသည့် လိုအပ်ချက်နေရာလွတ်များကို ဖြည့်ဆည်းနိုင်မည်ဖြစ်ကြောင်း ပြောကြားခဲ့ပါသည်။ ထို့အပြင် အစိုးရအနေဖြင့် ပထဝီနိုင်ငံရေး ပဋိပက္ခများ သက်ရောက်မှုနည်းပါးသော နိုင်ငံများကို ပို့ကုန်ဈေးကွက်အသစ်များအဖြစ် သတ်မှတ်ရန် လေ့လာဆန်းစစ်နေကြောင်း သိရပါသည်။ ၎င်းသည် ကမ္ဘာလုံးဆိုင်ရာ ကုန်သွယ်ရေးအတားအဆီးအနှောင့် အယှက်များ ရှိနေသော်လည်း ပြည်တွင်းစီးပွားရေးလုပ်ငန်းများ တိုးချဲ့နိုင်စေရန် ရည်ရွယ်ခြင်းဖြစ်ကြောင်း သိရပါသည်။ Santoso က ကုန်သွယ်ရေးဝန်ကြီးဌာနအနေဖြင့် ပို့ကုန်လုပ်ငန်းရှင်များနှင့် ပူးပေါင်းညှိနှိုင်းကာ ၎င်းတို့ ရင်ဆိုင်နေရသည့် နည်းပညာပိုင်းဆိုင်ရာ စိန်ခေါ်မှုများနှင့် ပြဿနာများ မည်သည့်နေရာတွင် တည်ရှိနေသည်ကို သိရှိရန် ကြိုးပမ်းသွားမည်ဖြစ်ကြောင်း ပြောကြားခဲ့ပါသည်။ ထို့အပြင် အရှေ့တောင်အာရှဒေသနှင့် အာဖရိကနိုင်ငံများကို အခြားရွေးချယ်စရာ တင်ပို့ရာဈေးကွက်များအဖြစ် ရှုမြင်ထားကြောင်းနှင့် အင်ဒိုနီးရှားပို့ကုန်လုပ်ငန်းရှင်များကို ထိုဒေသများရှိ ဝယ်ယူသူများနှင့် ချိတ်ဆက်ပေးနိုင်ရန်အတွက် business-matching အစီအစဉ်များကိုလည်း အစိုးရက ပိုမိုတိုးမြှင့် ဆောင်ရွက်သွားမည်ဖြစ်ကြောင်း သိရှိရပါသည်။
Antara News
DOCA (ရန်ကုန်)