၂၀၂၅-၂၀၂၆၊ ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်တွင် ဒေသထွက်ပန်းဂေါ်ဖီထုပ်ကို ရာသီပေါ်သီးနှံအဖြစ် စပါးရိတ်သိမ်းပြီးချိန် မြေပြန့်လွင်ပြင်၊ ဥယျဉ်ခြံများတွင် နွေမိုးဆောင်း ရာသီမရွေးစိုက်ပျိုးနိုင်သော်လည်း ဆောင်းရာသီ၌သာအများဆုံး စိုက်ပျိုးကြပါသည်။ မြေပြန့် ဥယျာဉ်ခြံဒေသများဖြစ်သော ယန်းလော၊ လွယ်လုံ၊ ကတ်ထိုက်၊ မိုင်းလပ်၊ လွယ်မွေ၊ မိုင်းဇင်း ကျေးရွာအုပ်စုတို့တွင် တစ်ပိုင်တစ်နိုင် စိုက်ပျိုးသည့် တောင်သူကြီးများထံမှ မေးမြန်းခဲ့ပါသည်။
ပန်းဂေါ်ဖီထုပ်စတင်စိုက်ပျိုးသည့် စက်တင်ဘာ၊ အောက်တိုဘာလတွင် မြေကိုထွန်ယက်၍ ဘောင်စနစ်ဖြင့်စိုက်ပျိုးကာ ဒီဇင်ဘာလတွင်ထွက်ရှိကြောင်း သိရှိရပါသည်။ တစ်ဧက၏ စိုက်ပျိုးမှုအတွက် ပျိုးခင်း၊ မြေပြုပြင်ခြင်း၊ စိုက်ခင်း၊ မြေပြုပြင်ခြင်း၊ စိုက်ပျိုးခြင်း၊ အပင်ပြုစုခြင်း၊ ရိတ်သိမ်းခြင်း၊ မျိုးစေ့၊ သွင်းအားစု များ၊ ကွန်ပေါင်း၊ ယူရီးယား၊ ပိုးသတ်ဆေး၊ မှိုသတ်ဆေး၊ မြေဆွေး၊ နွားချေး၊ ပျိုးပင်၊ လုပ်အားခစသည်တို့သည် ယခုနှစ်တွင် တစ်ဧကလျှင် သွင်းအားစု စုစုပေါင်း (၂၃) သိန်းခန့် ကုန်ကျကြောင်း တောင်သူကြီးများထံမှ သိရှိရပါသည်။
၂၀၂၅-၂၀၂၆ ခုနှစ်၊ ဒီဇင်ဘာလတွင် ထွက်ရှိသော ပန်းဂေါ်ဖီထုပ်များသည် တစ်ဧကလျှင် အထုပ်အပွင့်ပေါင်း ၅၀၀၀-၆၀၀၀ခန့် ထွက်ရှိကြောင်း သိရှိရပါသည်။ ထွက်ရှိသော ပန်းဂေါ်ဖီထုပ် များကို ကျိုင်းတုံ၊ မြို့မဈေး၊ နောင်ကွမ်ဈေး၊ အာခါဈေး၊ ယန်းခမ်းဈေးတို့၌ အရွယ်အစားပေါ် မူတည်၍ လက်ကားဈေးနှုန်း တစ်ထုပ်လျှင် (၁၀၀၀-၁၅၀၀)ကျပ်ခန့်ဖြင့် ဖြန့်ဖြူးရောင်း ချကြောင်းသိရပါသည်။ ပန်းဂေါ်ဖီထုပ် ရောင်းရငွေမှာ လက်ကား အနိမ့်ဆုံးဈေးဖြင့်တွက်လျှင် (၅၀) သိန်းခန့်ရရှိ၍ တစ်ဧက၏ အထွေထွေကုန်ကျစရိတ် (၂၃) သိန်းနှုတ်လျှင် ပန်းဂေါ်ဖီထုပ် စိုက်တောင်သူကြီးများအနေဖြင့် တစ်ဧကကို အကျိုးအမြတ်မှာ (၂၇)သိန်းခန့် ရရှိနေကြောင်း သိရှိရပါသည်။
DOCA(ရှမ်း)