၂၉.၁၁.၂၀၂၅ ရက်နေ့တွင် ကမ္ဘောဒီးယားနိုင်ငံ၊ ခရီးသွားလုပ်ငန်းဝန်ကြီးဌာန (MoT) သည် ဝန်ကြီးဌာန၏ ဒစ်ဂျစ်တယ်အသွင်ပြောင်းမှုကို အရှိန်မြှင့်တင်ရန် ရည်ရွယ်သည့် နားလည်မှုစာချွန်လွှာ လက်မှတ်ရေးထိုးပွဲအခမ်းအနားကျင်းပခဲ့ကြောင်း ၃၀.၁၁.၂၀၂၅ ရက်နေ့က ထုတ်ပြန်ခဲ့သည့် MoT ၏ ကြေညာချက်တွင် ဖော်ပြထားသည်။ အခမ်းအနားကို ကမ္ဘောဒီးယားနိုင်ငံ၊ ခရီးသွားလုပ်ငန်းဝန်ကြီး Huot Hak နှင့်အတူ ကမ္ဘောဒီးယား ကုန်သည်ကြီးများအသင်းဥက္ကဋ္ဌနှင့် Royal Group ၏ CEO ဖြစ်သူ Kith Meng နှင့် PRAVINYA ဘုတ်အဖွဲ့ဥက္ကဋ္ဌ Meas Sopheroth တို့မှ ဦးဆောင်ခဲ့ကြသည်။ နားလည်မှုစာချွန်လွှာ(MoU) ကို ခရီးသွားလုပ်ငန်းဝန်ကြီးဌာနကိုယ်စားပြု အတွင်းရေးမှူး Neang Mao၊ CAMG SM (Cellcard) ကိုယ်စားပြု Cellcard ၏ CEO Yap Kok Leong နှင့် PRAVINYA ဘုတ်အဖွဲ့ ဒုတိယ ဥက္ကဋ္ဌ Meas Sophearom တို့မှ လက်မှတ်ရေးထိုးခဲ့ကြသည်။ အခမ်းအနားတွင် ဝန်ကြီးဌာန အကြီးတန်းအရာရှိများ၊ ပြည်တွင်းနှင့် နိုင်ငံတကာဧည့်သည်များ၊ CAMG SM (Cellcard) နှင့် PRAVINYA မှ ကိုယ်စားလှယ်များအပါအဝင် ၂၀၀ ခန့် တက်ရောက်ခဲ့ကြသည်။ ဝန်ကြီး Huot Hak က မိန့်ခွန်းပြောကြားရာတွင် မိတ်ဖက်အဖွဲ့အစည်းသည် ခရီးသွားလုပ်ငန်းကဏ္ဍကို ခေတ်မီအောင်လုပ်ဆောင်ရန် ဝန်ကြီးဌာန၏ ကြိုးပမ်းအားထုတ်မှုများကို ပံ့ပိုးပေးမည်ဟု အလေးပေးပြောကြားခဲ့သည်။ ပူးပေါင်းဆောင်ရွက်မှု၏ တစ်စိတ်တစ်ပိုင်းအနေဖြင့် ဝန်ကြီးဌာနနှင့် PRAVINYA တို့သည် “Visit Cambodia” ဝက်ဘ်ဆိုက်နှင့် “Visit Cambodia App (Super App)” ကို မကြာမီကာလအတွင်း မိတ်ဆက် မည်ဖြစ်ကြောင်း ဆက်လက်ပြောကြားခဲ့သည်။ Cellcard နှင့် ပူးပေါင်းဆောင်ရွက်မှုဖြင့် မြှင့်တင်ထားသော PRAVINYA ၏ Super App မှတစ်ဆင့် ပိုမိုကောင်းမွန်သော ဒစ်ဂျစ်တယ်ဝန်ဆောင်မှုများကို ပေါင်းစပ်အသုံးပြုသွားမည်ဖြစ်ပြီး ကမ္ဘောဒီးယားနိုင်ငံသို့ လာရောက်လည်ပတ်သော နိုင်ငံတကာခရီးသွားများအတွက် ပိုမိုအဆင်ပြေစေပြီး တန်ဖိုးမြှင့်တင်ပေးမည်ဖြစ်ကြောင်း Hout Hak က မှတ်ချက်ပြုခဲ့ကြောင်း သိရှိရပါသည်။
Source: Khmertime
DOCA (ရန်ကုန်)