ထိုင်းနိုင်ငံ၏ ပို့ကုန်များသည် အောက်တိုဘာလတွင် ၁၆ လဆက်တိုက် တိုးတက်ခဲ့ပြီး အီလက်ထရွန်းနစ်နှင့် မော်တော်ယာဥ် ထုတ်ကုန်များအတွက် ဝယ်လိုအားကောင်းနေမှုက တွန်းအားပေးခဲ့ပါသည်။ ယင်းသည် ကမ္ဘာလုံးဆိုင်ရာ ကုန်ထုတ်လုပ်မှု လုပ်ငန်းများ ဆက်လက်တိုးချဲ့နေမှုနှင့် ကိုက်ညီကြောင်း တရားဝင်အချက်အလက်များက နိုဝင်ဘာလ ၂၅ ရက်နေ့တွင် ဖော်ပြခဲ့ပါသည်။ ထိုင်းနိုင်ငံ၏ စီးပွားရေးတိုးတက်မှုအတွက် အဓိကမောင်းနှင်အားဖြစ်သော ပို့ကုန်များသည် ပြီးခဲ့သည့်လတွင် တစ်နှစ်ထက်တစ်နှစ် ၅.၇ ရာခိုင်နှုန်းတိုးချဲ့ခဲ့ပြီး အမေရိကန်ဒေါ်လာ ၂၈.၈၄ ဘီလီယံအထိ ရောက်ရှိခဲ့ပါသည်။ စက်တင်ဘာလက ၁၉ ရာခိုင်နှုန်း ခုန်တက်ခဲ့ရာမှ အရှိန်လျော့ကျသွားပြီး ပြီးခဲ့သည့် စက်တင်ဘာလနောက်ပိုင်း အနှေးဆုံးနှုန်းသို့ ရောက်ရှိခဲ့ကြောင်း သိရှိရပါသည်။ စီးပွားရေးဝန်ကြီးဌာန၏ အဆိုအရ စက်မှုပို့ကုန်များသည် ၈.၈ ရာခိုင်နှုန်း တိုးလာခဲ့ပြီး ကွန်ပျူတာများ၊ လျှပ်စစ်ခလုတ်ဘုတ်များ၊ ကျောက်မျက်ရတနာများနှင့် လက်ဝတ်ရတနာများ ရောင်းချမှုတွင် အားကောင်းသော တိုးချဲ့မှုကြောင့် ၁၉ လဆက်တိုက် တိုးတက်မှုကို ပြသခဲ့သည်။ တစ်ချိန်တည်းတွင် စိုက်ပျိုးရေးထွက်ကုန်များ၏ ပို့ကုန်သည် ၁၄.၆ ရာခိုင်နှုန်း ကျဆင်းခဲ့ပြီး စိုက်ပျိုးရေးစက်မှုပို့ကုန်များသည် ၆.၂ ရာခိုင်နှုန်း တိုးလာခဲ့ပါသည်။ အချက်အလက်များအရ အောက်တိုဘာလတွင် သွင်းကုန်များသည် တစ်နှစ်တာကာလအတွင်း ၁၆.၃ ရာခိုင်နှုန်း မြင့်တက်ခဲ့ပြီး ဒေါ်လာ ၃၂.၂၇ ဘီလီယံအထိ ရောက်ရှိခဲ့ရာ ကုန်သွယ်မှုလိုငွေ ဒေါ်လာ ၃.၄၄ ဘီလီယံ သို့ရောက်ရှိခဲ့ပါသည်။ ၂၀၂၅ ခုနှစ်၏ ပထမ ၁၀ လတာကာလအတွင်း ပို့ကုန်များသည် ၁၃ ရာခိုင်နှုန်း တက်လာပြီး ဒေါ်လာ ၂၈၂.၉၈ ဘီလီယံအထိ ရောက်ရှိခဲ့ကာ သွင်းကုန်များသည် ၁၂.၄ ရာခိုင်နှုန်း တက်လာပြီး ဒေါ်လာ ၂၈၆.၈၅ ဘီလီယံအထိ ရောက်ရှိခဲ့ရာ ကုန်သွယ်မှုလိုငွေ ဒေါ်လာ ၃.၈၇ ဘီလီယံ ဖြစ်ပေါ်ခဲ့ပါသည်။ ကျန်ရှိသောလများတွင် ထိုင်းနိုင်ငံ၏ ပို့ကုန်များသည် ဒီဂျစ်တယ်နည်းပညာထုတ်ကုန်များအတွက် ခိုင်မာသောကမ္ဘာ လုံးဆိုင်ရာဝယ်လိုအားနှင့် ပြုပြင်ပြီးစိုက်ပျိုးရေးနှင့် စားသောက်ကုန်များအတွက် ရေရှည်ဝယ်လို အားတို့၏ အထောက်အပံ့ဖြင့် အရှိန်အဟုန်နှေးကွေးစွာဖြင့် ဆက်လက်ကောင်းမွန်နေမည်ဟု မျှော်လင့်ရကြောင်း ဝန်ကြီးဌာနက ထုတ်ပြန်ချက်တွင် ဖော်ပြထားပါသည်။ ဝန်ကြီးဌာနက နှစ်ကုန်ပိုင်းတွင် ဘတ်ငွေကြေး တန်ဖိုးမြင့်တက်လာနိုင်ခြေနှင့် ရေကြီးမှုကြောင့် ပြည်တွင်းလယ်ယာထွက်ကုန်များ ကျဆင်းနိုင်ခြေအပါအဝင် ဖြစ်နိုင်ခြေရှိသော ကိစ္စရပ်များကို ဆက်လက်စောင့်ကြည့်သွားမည်ဖြစ်ကြောင်း မှတ်ချက်ပြုခဲ့သည်ဟုသိရှိရပါသည်။
Source : Xinhua
DOCA (ရန်ကုန်)