မြန်မာနိုင်ငံမှ ပြည်ပသို့ ရေထွက်ကုန်ပစ္စည်းများ တင်ပို့လျက်ရှိရာ ယခုဘဏ္ဍာနှစ် ငါးလတာကာလအတွင်း ပြည်ပသို့ ရေထွက်ကုန်ငါးတင်ပို့မှုအနေဖြင့် မက်ထရစ်တန် တစ်သိန်း ကျော် တင်ပို့နိုင်ခဲ့ကြောင်း ငါးလုပ်ငန်းဦးစီးဌာနမှ တာဝန်ရှိသူတစ်ဦး၏ ပြောပြချက် အရ သိရသည်။
"ယခုဘဏ္ဍာနှစ် ဧပြီလ ၁ ရက်ကနေသြဂုတ်လ ၃၁ ရက်အထိ ငါးလတာကာလအတွင်း ပြည်ပကို ငါးတင်ပို့မှုအနေနဲ့ မက်ထရစ်တန် ၁၀၈၇၃၃.၂၇၄ တန်တင်ပို့နိုင်ပြီး အမေရိကန် ဒေါ်လာ ၁၂၇ . ၈၅၉ သန်းရရှိခဲ့ပါတယ်" ဟု၎င်းကပြောသည်။
အဆိုပါ ငါးလတာကာလအတွင်း ပြည်ပသို့ ပုံမှန်ကုန်သွယ်မှုမှ ငါးမက်ထရစ်တန် ၅၇၈၁၉.၁၇၉ တန်တင်ပို့ပြီး အမေရိကန်ဒေါ်လာ ၈၅.၅၄၉ သန်း၊ နယ်စပ်ကုန်သွယ်မှုမှ ငါး မက်ထရစ်တန် ၅၀၉၁၄.ဝ၉၅ တန်တင်ပို့ပြီး အမေရိကန်ဒေါ်လာ ၄၂.၃၁ သန်း ရရှိသည့်အတွက် စုစုပေါင်းငါးမက်ထရစ်တန် ၁၀၈၇၃၃.၂၇၄ တန်တင်ပို့မှုမှ အမေရိကန်ဒေါ်လာ ၁၂၇ .၈၅၉ သန်း ရရှိခဲ့ကြောင်း သိရသည်။
မြန်မာနိုင်ငံမှ ပြည်ပသို့ ငါးအပါအဝင်တခြားရေထွက်ကုန်ပစ္စည်းများကို တင်ပို့လျက် ရှိရာ ယခုဘဏ္ဍာနှစ် ငါးလတာကာလအတွင်း ရေထွက်ကုန်တင်ပို့မှုအနေဖြင့် မက်ထရစ်တန် ၁၅၃၉၂၆ ဒသမ၃၃၉ တန်တင်ပို့နိုင်ခဲ့သည်။ မြန်မာနိုင်ငံမှ ပုစွန်အပါအဝင်ငါးစသည့် ရေထွက် ကုန်များကို တရုတ်၊ထိုင်း၊ ဘင်္ဂလားဒေ့ရှ်၊ ဂျပန် စသည့်နိုင်ငံပေါင်း ၄၀ကျော်သို့ တင်ပို့လျက်ရှိပြီး ရန်ကုန်မြို့မှတစ်ဆင့် ပုံမှန်တင်ပို့သည့်အပြင် နယ်စပ် ကုန်သွယ်ရေးမှလည်း တိုက်ရိုက်တင်ပို့မှု ရှိကြောင်း သိရသည်။
DOCA(ဧရာဝတီ)