ပဲခူးတိုင်းဒေသကြီးရွှေတောင်မြို့နယ်၊ မီးလောင်အုပ်စု အင်္ဂလှိုင်ဂန်ကျေးရွာရှိတောင်သူ ဦးကျော်နိုင်ဦး၏ တိုင်ထောင်ပဲ (ပဲတောင့်ရှည်) စိုက်ခင်းသို့ (၁၉.၆.၂၀၂၅)ရက်နေ့ နံနက်(၁၀) နာရီအချိန်တွင် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် သွားရောက်ကွင်း ဆင်းလေ့လာခဲ့ပါသည်။
ပဲတောင့်ရှည်ကို မြေအမျိုးမျိုးတွင်စိုက်ပျိုး၍ရသည်။ တိုတောင်းသောရာသီဥတု၌ အချိန်တိုအတွင်း စိုက်ပျိုးပါက သဲဆန်သောမြေတွင်စိုက်ပျိုးကြသည်။ မြေကောင်းလျှင်အထွက် ပိုကောင်း သည်။ အလွန်ချဥ်သောမြေတွင် ကောင်းစွာမဖြစ်ထွန်းပါ။ တိုင်ထောင်ပဲကို အများအားဖြင့် တစ်တန်းနှင့် တစ်တန်း (၃)ပေခြားပြီး တစ်ပင်နှင့်တစ်ပင်တန်း(၉-၁၂)လက်မခွာ၍ စိုက်ပျိုးကြသည်။ စိုက်ပျိုးပြီးအပင်များရှည်လာသောအခါ အနည်းဆုံး(၇)ပေခန့်ရှည်သော ဝါးတိုင်(သို့) သစ်သားတိုင်များကို အပင်တိုင်း၏ခြေရင်းတွင်ထောင်ပေးသည်။ အချို့တိုင်များမြဲစေရန် တစ်တန်းထဲရှိ နီးကပ်သောအပင်များ၏ တိုင်ကိုကြက်ခြေခတ်ပေးပြီး တိုင်များဆုံရာ၌ စုချည်ပေးသည်။ စိုက်ပျိုးသော မျိုးမှာ မြှားနီမျိုးဖြစ်သော တိုင်ထောင်ပဲများကို တခူးလပြည့်ကျော်တွင် စတင်စိုက်ပျိုးပြီး ၁လခွဲကြာပြီဖြစ်သော နယုန်လတွင် စတင်ခူးဆွတ်ရပါသည်။ စိုက်ဧကမှာ (၂)ယောက်စိုက်ရှိပြီး တိုင်အရေအတွက်မှာ (၇၀၀၀)ရှိပါသည်။ တစ်ခါခူးဆွတ်လျှင် အတောင့် (၅၀၀၀)မှ အတောင့် (၈၀၀၀)အထိ ခူးဆွတ်ရရှိပြီး တစ်ရက်ခြားတစ်ခါ ခူးဆွတ်ရပြီး (၃)လကြာမြင့် သည်အထိ ခူးဆွတ်ရောင်းချရပါသည်။ ရွှေတောင်မြို့နယ်ရှိ ကုန်စိမ်းပွဲစားများမှ တစ်တောင့်လျှင် (၂၅)ကျပ် နှုန်းဖြင့် လာရောက်ဝယ်ယူပြီး ရန်ကုန်မြို့နှင့် ပြည်မြို့များသို့ ပြန်လည် တင်ပို့ ရောင်းချကြပါသည်။ စတင်စိုက်ပျိုးချိန်မှ ခူးဆွတ်ချိန်ထိ စုစုပေါင်းကုန်ကျစရိတ်မှာ (၃)သိန်း ကျော်ရှိပြီး အကျိုးအမြတ်မှာ ခန့်မှန်း (၁၂)သိန်းမျှရရှိနိုင်ကြောင်း သိရှိရပါသည်။
DOCA(ပဲခူး)