ဧရာဝတီတိုင်းဒေသကြီး ၊ ကျိုက်လတ်မြို့နယ်သည် စိုက်ပျိုးရေး ၊ မွေးမြူရေးနှင့် စက်မှု လက်မှုလုပ်ငန်းများ အဓိကလုပ်ကိုင်လျက်ရှိပြီး မြစ်၊ ချောင်း အင်းအိုင်ပေါ်များ၍ သဘာဝအလျောက် ဖမ်းဆီးရမိသော ဒေသထွက်ငါးရံများကို ငါးရံခြောက်ပြုလုပ်ကာ ပွင့်လင်းရာသီမက မိုးတွင်းအတွက် ပါကုန်ကြမ်းများ သိုလှောင်ထားရှိပြီး တစ်နှစ်လုံးဈေးကွက်တွင် ရောင်းချလျက်ရှိကြောင်း သိရသည်။
ကျိုက်လတ်မြို့ပေါ်တွင် အသင့်စားငါးရံခြောက်လုပ်ငန်းရှင် (၁၀) ဦး ခန့်ရှိပြီး ငါးရံခြောက် ပြုလုပ်ရန်အတွက် ငါးရံအစို (၁၅) ကျပ်သား ၊ (၂၀) ကျပ်သား ရှိသော ငါးအကောင်များကို ရွှေးချယ် ဝယ်ယူရပါသည်။ ဝယ်ယူထားသော ငါးရံများအား ခေါင်းဖြတ် ၊ အူထုတ် ၊ ကျောခွဲ ၊ ဗိုက်ခွဲ၍ အလယ်ရိုးထုတ်ကာ အပေါ်အရေခွံခွာ၍ မြောင်းခွဲကာ ဆားနှင့်နယ်ပြီး ၄/၅ ရက်ခန့် နေလှမ်းပြီးပါက ငါးရံခြောက်အဖြစ် ရရှိပါသည်။ အသင့်စားငါးရံခြောက်ကုန်ချောရရှိရန် ငါးရံခြောက်အား သုံးမိနစ်ခန့် ရေစိမ်ပြီးရေစစ်၍ မီးဖိုတွင်မွလာအောင်ထုရပါသည်။ ထုမွပြီးသော ငါးရံခြောက်များကို နောက်တစ်ခါ မီးသွေးမီးဖိုဖြင့် သံဇကာခံ၍ မီးကင်ရပါသည်။ မီးကင်ပြီး ကြွပ်ရွလာသော ငါးခြောက် များအား ဇလုံထဲသို့ ဆီထည့်၍ မွေပေးရပါသည်။ ပြီးလျှင် ဇလုံမှဆယ်ယူကာ ဆီစစ်ထားသော ငါးရံခြောက်များကို ချိန်တွယ်၍ (၁၀) ကျပ်သား တစ်ထုတ် (၂၆၀၀၀) ကျပ် ၊ (၅) ကျပ်သား တစ်ဘူး (၁၄၀၀၀) ကျပ်နှင့် (၂.၅) ကျပ်သား တစ်ဘူး (၇၀၀၀) ကျပ်ဈေးဖြင့် ဒေသတွင်းနှင့်ရန်ကုန်မြို့သို့ ကားနှင့်တင်ပို့ရောင်းချလျက်ရှိပြီး မြန်မာနိုင်ငံအတွင်း အမြန်ချောပို့စနစ်ဖြင့် ရောင်းချလျက်ရှိကြောင်း သိရသည်။ ပြည်တွင်းစားသုံးမှုရှိသည့်အပြင် ပြည်ပနိုင်ငံများသို့ သွားရောက်အလုပ်လုပ်နေသူများနှင့် အလည်အပတ်သွားရောက်သူများမှလည်း ဝယ်ယူစားသုံးလျက်ရှိကြောင်း ဈေးကွက်မှသိရသည်။
ကျိုက်လတ်မြို့နယ်ဒေသထွက်ကုန်ငါးရံခြောက်များကို တိုင်းအတွင်းနှင့်နေပြည်တော်တွင် ကျင်းပပြုလုပ်သော ပြပွဲများတွင် ဒေသထွက်ကုန်ပြခန်းများအဖြစ် ပါဝင်ပြသရောင်းချလျက်ရှိသလို မြန်မာ လူမျိုးတို့နှစ်ခြိုက်စွာ စားသုံးနေသော ငါးရံခြောက်စားသောက်ကုန်လုပ်ငန်းမှာ MSMEs ထုတ်ကုန် အနေဖြင့် ပြည်တွင်းပြည်ပတွင် ဈေးကွက်ဝေစုရရှိရန် အလားအလာကောင်းများ ရှိနေကြောင်း ငါးရံခြောက်လုပ်ငန်းရှင်များထံမှ သိရသည်။
DOCA(ဧရာဝတီ)