ထိုင်းနိုင်ငံအစိုးရက ဆွမ်ခရန်ပွဲတော်ကာလအတွင်း ငွေသုံးစွဲမှုနှင့် ခရီးသွားကဏ္ဍ ဆက်လက်မြင့်တက်နိုင်ပြီး ဖြစ်ပွားခဲ့သည့်ငလျင်သည် ထိုအခြေအနေအပေါ်သက်ရောက်မှုမရှိ နိုင်ကြောင်း ယုံကြည်ချက်ရှိနေသည်ဟု သိရပါသည်။ ထိုင်းနိုင်ငံဒုတိယအစိုးရပြောခွင့်ရပုဂ္ဂိုလ် Ankul Prueksanusak က ထိုင်းနိုင်ငံကုန်သည်များအသင်းတက္ကသိုလ်က လတ်တလော ကောက်ခံခဲ့သည့် စစ်တမ်းအရ ဆွမ်ခရန်ပွဲတော်အတွင်း ငွေသုံးစွဲမှုသည် ဘတ် ၁၃၄ ဘီလီယံဖြင့် လွန်ခဲ့သည့်နှစ်ကထက် ၄.၅ ရာခိုင်နှုန်းမြင့်တက်ရန်ခန့်မှန်းရကြောင်း ပြောကြားခဲ့ပါသည်။ ထို စစ်တမ်းအရ ဖြေဆိုသူ ၅ ရာခိုင်နှုန်းသည် ဆွမ်ခရန်ပွဲတော်တွင် အသုံးစရိတ်လျှော့ချမည်ဟု ဖြေဆိုခဲ့ပြီး ၇၂.၁ ရာခိုင်နှုန်းသည် ခရီးသွားလာရန်စီစဉ်ထားကြောင်း သိရပါသည်။ ငလျင်ဖြစ်ပေါ် ပြီးနောက် ခရီးသွားများ၏ငွေသုံးစွဲမှုပြောင်းလဲနိုင်မှုနှင့်ပတ်သတ်၍ Mr Ankul က ဖြေဆိုသူ ၇၁.၇ ရာခိုင်နှုန်းသည်ငွေသုံးစွဲမှုမပြောင်းလဲပြီး ၁၇.၁ ရာခိုင်နှုန်းသည်ငွေသုံးစွဲမှုတိုးမြှင့်ရန်စီစဉ်ထားကာ ၁၁.၂ ရာခိုင်နှုန်းသာငွေသုံးစွဲမှုလျှော့ချမည်ဟု ပြောကြားခဲ့ပါသည်။ ဖြေဆိုသူအများစုက ၎င်းတို့ သည်ဆွမ်ခရန်ပွဲတော်အတွင်း ပုံမှန်လည်ပတ်မှုများပြုလုပ်သွားမည်ဖြစ်သော်လည်း မြင့်မားသည့် အဆောက်အဦးများရှိ Indoor ပွဲများကိုသွားလာမည်မဟုတ်ကြောင်း ပြောကြားခဲ့သည်ဟု သိရ ပါသည်။ Mr Ankul က လူထုသည် ပွဲတော်ကာလအတွင်း ယုံကြည်ချက်အပြည့်နှင့် ခရီးသွားလာ နိုင်ပြီး အစိုးရသည်လည်း သက်ဆိုင်ရာအေဂျင်စီများအား ဟိုတယ်များ၊ အဓိကခရီးသွားဆွဲဆောင် ရာနေရာများနှင့် အန္တရာယ်များသည့်အဆောက်အအုံများ၏ဖွဲ့စည်ပုံများ၏ လုံခြုံရေးနှင့် ပတ်သတ်၍ အမြန်စစ်ဆေးရန် ညွှန်ကြားထားကြောင်း ပြောကြားခဲ့ပါသည်။ သက်ဆိုင်ရာ အေဂျင်စီများသည်လည်း ခရီးသွားများအဆင်ပြေစေရေးနှင့် နိုင်ငံတစ်ဝှမ်းခရီးသွားဆွဲဆောင်ရာ နေရာများ လုံခြုံစိတ်ချရရေးအတွက် အာဏာပိုင်များနှင့်ပူးပေါင်းလုပ်ကိုင်နေကြောင်း သိရ ပါသည်။
Bangkok Post
DOCA(ရန်ကုန်)