အိန္ဒိယလယ်ယာစိုက်ပျိုးရေးသုတေသနအဖွဲ့အစည်း (India Agriculture and Research Institute-IARI) မှ သုတေသီများနှင့် ကုန်သည်များက အိန္ဒိယနိုင်ငံ၏ ဘာစမာတီဆန်မျိုးကွဲများကို ပါကစ္စတန်နိုင်ငံ၌ တရားမဝင်စိုက်ပျိုးနေကြောင်း သတိပေးပြောကြားခဲ့ကြပါသည်။ ပါကစ္စတန်နိုင်ငံမှ မျိုးစေ့ကုမ္ပဏီများက အရောင်းမြှင့်တင်ရေးအတွက် ထုတ်လွှင့်ပြသသည့် YouTube ဗွီဒီယို များတွင် အထွက်နှုန်းကောင်းမွန်သည့် ဘာစမာတီဆန်မျိုးကွဲများကို ပါကစ္စတန်နိုင်ငံအတွင်းရှိ အချို့ဒေသများဖြစ်ကြသော မူလ်တန်၊ ဘဟာဝါလ်နာဂါနှင့် ဟာဖီဇာဘတ်တို့တွင် စိုက်ပျိုးနေကြပုံကို ပြသခဲ့ကြရာမှ အိန္ဒိယနိုင်ငံ၏ဘာစမာတီဆန်ပို့ကုန်ဈေးကွက်ကို ခြိမ်းခြောက်နိုင်သည့်အလားအလာရှိသဖြင့် ထိုသို့သတိပေးပြောကြားခဲ့ကြခြင်းဖြစ်ပါသည်။
အိန္ဒိယနိုင်ငံတွင် ကုန်စည်နှင့် လယ်ယာထွက်ကုန်တင်ပို့မှုမှာ ကျဆင်းခဲ့သော်လည်း ဘာစမာတီဆန်တင်ပို့မှုမှာမူ သိသာစွာမြင့်တက်ခဲ့ပြီး ယခုဘဏ္ဍာနှစ်တွင် စံချိန်ချိုးနိုင်ဖွယ်ပင် ဖြစ်နိုင်ကြောင်း ခန့်မှန်းပြောကြားခဲ့ကြပါသည်။ ဗွီဒီယိုတွင် ပြသချက်အရ ပါကစ္စတန်နိုင်ငံတွင် IARI မှအစပျိုးထုတ်လုပ်ခဲ့သည့် ဘာစမာတီဆန်မျိုးကွဲများကို တရားမဝင်အသုံးပြုနေခြင်းမှာ ကမ္ဘာ့ဘာစမာတီဆန်ဈေးကွက်တွင် သိသာထင်ရှားသောဈေးကွက်ဝေစုကို ပိုင်ဆိုင်ထားသော အိန္ဒိယနိုင်ငံ၏ ဘာစမာတီဆန်တင်ပို့မှုအလားအလာကို ခြိမ်းခြောက်လာနိုင်သဖြင့် IARI မှ သုတေသီများက စိုးရိမ်ပူပန်နေကြခြင်းဖြစ်ပါသည်။
ပါကစ္စတန်နိုင်ငံ၏ ဘာစမာတီဆန်တင်ပို့မှုမှာ ကျဆင်းခဲ့သော်လည်း ဥရောပနှင့်ဗြိတိန် ဈေးကွက်များတွင်မူ ခိုင်မာစွာရပ်တည်နေဆဲဖြစ်ကာ အဓိကအားဖြင့် ပါကစ္စတန်နိုင်ငံသည် စူပါ ဘာစမာတီဆန်မျိုးကွဲကို ရောင်းချလျက်ရှိပါသည်။ ပါကစ္စတန်နိုင်ငံသည် IARI ၏ဘာစမာတီဆန် မျိုးကွဲများကို အသုံးပြုလျက် ယှဉ်ပြိုင်နိုင်စွမ်းရှိသော ငွေကြေးအသာစီးရမှုနှင့် ပေါင်းဆန်ထုတ် လုပ်မှု နည်းပညာတို့ဖြင့် ပေါင်းစပ်ကာ အဓိကဈေးကွက်များတွင် နေရာရယူနိုင်မည်ဖြစ်သော ကြောင့် အိန္ဒိယနိုင်ငံ၏ လွှမ်းမိုးမှုကို စိန်ခေါ်မှုပြုလိုက်ခြင်းဖြစ်ပါသည်။ အဆိုပါအပြောင်းအလဲကြောင့် အဓိကအားဖြင့် ဘာစမာတီပေါင်းဆန်အပေါ် စားသုံးသူများ၏ နှစ်သက်မှုရှိသော အိန္ဒိယက ဦးဆောင်နေရာရယူထားသည့် အနောက်အာရှနိုင်ငံများတွင် ဈေးကွက်ကမောက်ကမ ဖြစ်စေနိုင်ပါသည်။
အိန္ဒိယနိုင်ငံ၏ အပင်မျိုးကွဲများနှင့် တောင်သူအခွင့်အရေး ကာကွယ်ရေးအက်ဥပဒေ ၂ဝဝ၁ သည် အိန္ဒိယတောင်သူများနှင့် အပင်စိုက်ပျိုးထုတ်လုပ်သူများ၏အကျိုးစီးပွားကို အကာအကွယ် ပေးအပ်ထားသော်လည်း ၎င်းဥပဒေ၏အကျိုးသက်ရောက်မှုမှာ နိုင်ငံဖြတ်ကျော်၍ မျိုးစေ့များအား မူပိုင်ခွင့်ချိုးဖောက် စိုက်ပျိုးသည့် စိန်ခေါ်မှုများနှင့် ရင်ဆိုင်ရလျက်ရှိနေပါသည်။ လက်ရှိ အခြေ အနေအရ အိန္ဒိယနိုင်ငံ၏ဘာစမာတီဆန်တင်ပို့မှုကို ကာကွယ်နိုင်ရန်နှင့် ပါကစ္စတန်နိုင်ငံတွင် အိန္ဒိယနိုင်ငံ၏ ဘာစမာတီဆန်မျိုးကွဲများကို ခွင့်ပြုချက်မရရှိဘဲ စိုက်ပျိုးနေမှုကို ဖြေရှင်း ဆောင်ရွက်သွားရန် လိုအပ်လျက်ရှိနေပါသည်။ အိန္ဒိယနိုင်ငံ၏ ဘာစမာတီဆန်ဈေးကွက်တွင် ပို့ကုန်တင်ပို့မှုကို ဆက်လက်လွှမ်းမိုးထားနိုင်ရန်မှာ ခိုင်မာသောဥပဒေအကာအကွယ်ပေးမှုများနှင့် အသိဉာဏ်ပစ္စည်းမူပိုင်ခွင့်ချိုးဖောက်မှုများအား စောင့်ကြည့်စစ်ဆေးဆောင်ရွက်မှုတို့ကို အဓိက ထားဆောင်ရွက်သွားရမည်ဖြစ်ကြောင်း BNN Breaking သတင်းဝက်ဘ်ဆိုက်က ဖော်ပြခဲ့ပါသည်။
Source: BNN Breaking News, 24 March, 2024