ပြည်ပကုန်သွယ်မှုသတင်းများ
ဖိလစ်ပိုင်အစိုးရအနေဖြင့် သိုလှောင်ထားသည့် ဆန်အဟောင်းအချို့ကို အထူးသက်သာသော ဈေးနှုန်းဖြင့် နှစ်ဝက်ရွေးကောက်ပွဲကျင်းပမည့် မေလတွင် ရောင်းချရန် စီစဉ်လျက်ရှိကြောင်း သိရှိရပါသည်။
အမျိုးသား စားနပ်ရိက္ခာအာဏာပိုင်အဖွဲ့အနေဖြင့် ၎င်း၏ သိုလှောင်ရုံများမှ ဆန်အဟောင်း တန်ချိန်အနည်းဆုံး ၃၇၀၀၀၀ ကို လက်ရှိဈေးကွက်ဈေးနှုန်း၏ ထက်ဝက်နှုန်းခန့်ရှိသော ၁ ကီလို ဂရမ်လျှင် ပီဆို ၂၀ နှုန်းဖြင့် ရောင်းချပေးလိမ့်မည်ဟု ဧပြီ ၂၉ ရက်နေ့၌ ပြုလုပ်သည့် သတင်းစာ ရှင်းလင်းပွဲတစ်ရပ်တွင် စိုက်ပျိုးရေးအတွင်းဝန် Francisco Tiu Laurel Jr. က ပြောကြားခဲ့ပါသည်။
မလေးရှားနိုင်ငံ၊ ဆာဘားပြည်နယ်မှ တင်ပို့ခဲ့သော စားအုန်းဆီ တန်ချိန် ၈၀၀၀ သည် ဗြိတိန်နိုင်ငံ၊ လီဗာပူးလ်ဆိပ်ကမ်းရှိ သိုလှောင်ရုံသို့ ဧပြီ ၅ ရက်နေ့၌ ဝင်ရောက်ခဲ့သည်ဟု ဗြိတိန်နှင့် မြောက်အိုင်ယာလန် နိုင်ငံဆိုင်ရာ မလေးရှား သံအမတ်ကြီး Mr. Datuk Zakri Jaafar က ပြောကြားခဲ့ကြောင်း The Edge Malaysia သတင်းဌာနက ဖော်ပြထားသည်။
အိန္ဒိယနိုင်ငံ၌ ၂၀၂၃-၂၄ ဘဏ္ဍာနှစ်တွင် မတ်ပဲတင်သွင်းမှုမှာ တန်ချိန် ၆.၂၄ သိန်းရှိခဲ့ရာမှ ၂၀၂၄-၂၅ ခုနှစ်အတွင်း ၃၂ ရာခိုင်နှုန်းမြင့်တက်လျက် တန်ချိန် ၈.၂၃ သိန်းကျော် တင်သွင်းခဲ့ရာ ပြည်တွင်း၌ ဝယ်လိုအားနည်းပါးနေမှုအရ မတ်ပဲဈေးနှုန်းသည် ဆက်လက်နိမ့်ကျနေဖွယ်ရှိသည်ဟု Hindu Business Line သတင်းဌာနက ဖော်ပြပါသည်။
စားနပ်ရိက္ခာလိုအပ်ချက်အရ နိုင်ငံတကာမှ အကူအညီတောင်းခံလာပါက ပြည်တွင်း၌ ဆန်ပိုလျှံမှု အပေါ်မူတည်၍ လူသားချင်းစာနာထောက်ထားမှုအဖြစ် အကျိုးအမြတ်များစွာ ရယူ ခြင်းမရှိပဲ အခြေခံထုတ်လုပ်မှုစရိတ်၊ သယ်ယူပို့ဆောင်မှုစရိတ်နှင့် ကိုင်တွယ်ထိန်းသိမ်းမှုစရိတ်များ ကာမိသည့်နှုန်းထားဖြင့် ဆန်တင်ပို့ခြင်းကို ခွင့်ပြုမည်ဟု အင်ဒိုနီးရှားသမ္မတ Prabowo Subianto က ဆူမားတြားတောင်ပိုင်းဒေသသို့ သွားရောက်သည့် ခရီးစဉ်အတွင်း ဧပြီ ၂၃ ရက်နေ့တွင် ပြောကြားခဲ့သည်။
ထိုင်းဆန်တင်ပို့သူများအသင်း၏ ထုတ်ပြန်ချက်အရ ၂၀၂၅ ခုနှစ် ပထမ သုံးလပတ်အတွင်း ထိုင်းနိုင်ငံ၏ ဆန်တင်ပို့မှုမှာ တန်ချိန် ၂.၁ သန်းသာရှိပြီး ယခင်နှစ်ကာလတူ တင်ပို့နိုင်မှုအောက် ၃၀ ရာခိုင်နှုန်းအထိ လျော့နည်းခဲ့သည်ဟု Bangkok Post သတင်းဌာနက ဖော်ပြပါသည်။
အိန္ဒိယနိုင်ငံအနေဖြင့် စားအုန်းဆီကို ၅ လကြာမျှ တင်သွင်းမှု လျှော့ချခဲ့ရာမှ ယခုအခါ စားအုန်းဆီဈေးနှုန်းများသည် ပြိုင်ဖက်ပဲပုပ်ဆီ၏ ဈေးနှုန်းအောက်သို့ ကျဆင်းလျက်ရှိရာ စားသုံး ဆီ ပြန်လည်သန့်စင်ပြုပြင်သည့် လုပ်ငန်းများ၏ ကုန်စည်သိုလှောင်ဖြည့်တင်းရန် အဝယ်အမှာစာ များ ပေးပို့မှုကို တွန်းအားဖြစ်ပေါ်စေပြီး စားအုန်းဆီဝယ်ယူမှုမှာ စတင်၍ မြင့်တက်လာသည်ဟု ကုန်သည်လုပ်ငန်းရှင် ၄ ဦးက ရိုက်တာသတင်းဌာနသို့ ပြောကြားခဲ့သည်။
ထိုင်းနိုင်ငံအနေဖြင့် ပထဝီဒေသအညွှန်း (Geographical Indication - GI) အသိအမှတ်ပြု လက်မှတ်ရ သီးနှံအသစ် ၃ မျိုးဖြစ်သော Hom Thong Bua Daeng ငှက်ပျောသီး၊ Nam Dok Mai Si Thong Phitsanulok သရက်သီးနှင့် Phetchabun မန်ကျည်းအချိုသီးတို့ကို ဂျပန်နိုင်ငံ၌ ယခုနှစ် ဒုတိယ သုံးလပတ်အတွင်း မှတ်ပုံတင်နိုင်ရေး ကြိုးပမ်းမည်ဟု ထိုင်းမူပိုင်ခွင့်ဦးစီးဌာနမှ ညွှန်ကြားရေးမှူးချုပ် Nusara Kanjanakul က ပြောဆိုခဲ့ပါသည်။
အင်ဒိုနီးရှားနိုင်ငံသည် စျေးကွက်အတွင်း စားအုန်းဆီရောင်းလိုအား လျော့ကျစေပြီး ယခုနှစ် စားအုန်းဆီစျေးနှုန်းများကိုပါ မြင့်တက်စေနိုင်သော စားအုန်းဆီအချိုးကျရောစပ်အသုံးပြုသည့် ဇီဝဒီဇယ်ထုတ်လုပ်မှုအစီအစဉ်ကို ဆက်လက်ဖော်ဆောင်နိုင်ဖွယ်ရှိသည်ဟု RHB သုတေသနအဖွဲ့ က မတ် ၂၅ ရက်နေ့တွင်ပြောကြားခဲ့ကြောင်း The Edge Malaysia သတင်းဌာနကဖော်ပြသည်။
ထိုင်းနိုင်ငံအစိုးရသည် ဆန်တင်ပို့မှု မြှင့်တင်ဆောင်ရွက်ရန်အတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ဒုတိယဝန်ကြီး Worawong Ramangkura ဦးဆောင်လျက် ထိုင်းဆန် တင်ပို့သူများအသင်း၊ General Mill Corporation Ltd နှင့် Thai Granlux International Rice Ltd တို့မှ ကိုယ်စားလှယ်များ ပါဝင်သည့် ကိုယ်စားလှယ်အဖွဲ့ကို တောင်အာဖရိကသို့ စေလွှတ်ခဲ့သည်။
ပြည်တွင်းစပါးရိတ်သိမ်းမှု ဆက်လက်မြင့်မားလာခြင်းနှင့် ယခင်က ပမာဏအများအပြားဖြင့် တင်သွင်းသည့်ဈေးကွက်၏ အလေ့အထ ပြောင်းလဲလာခြင်းတို့ကြောင့် ဖိလစ်ပိုင်နိုင်ငံ၏ ယခုနှစ် ဆန်တင်သွင်းမှုမှာ သိသိသာသာကျဆင်းသွားကြောင်း ဖိလစ်ပိုင်စိုက်ပျိုးရေးဦးစီးဌာန၏ အစီရင်ခံစာတွင် ဖော်ပြထားပါသည်။
အဆိုပါဌာန၏ စာရင်းအင်းအချက်အလက်အရ မတ်လ ၁၃ ရက်နေ့အထိ ပြည်ပမှ ဆန်တင်သွင်းမှု တန်ချိန် ၆၄၀,၉၁၅ တန်ရှိခဲ့ပြီး၊ ယနှစ်ကစံချိန်တင်သွင်းခဲ့သည့် တန်ချိန် ၁.၁၉ သန်းနှင့် နှိုင်းယှဉ်ပါက သိသာစွာကျဆင်းခဲ့ခြင်းဖြစ်သည်။
အိန္ဒိယနိုင်ငံ၌ တောင်သူလယ်သမားများ၏ အကျိုးကိုရှေ့ရှုလျက် ပြည်ပသို့ ကြက်သွန်နီ တင်ပို့မှုအပေါ် ပို့ကုန်အခွန် ၂၀ ရာခိုင်နှုန်း အခွန်စည်းကြပ်ခြင်းကို ၂၀၂၅ ခုနှစ် ဧပြီလ ၁ ရက်နေ့ မှစတင်၍ ပြန်လည်ဖယ်ရှားပေးမည်ဟု အိန္ဒိယအခွန်ဦးစီးဌာနက မတ် ၂၂ ရက်နေ့၌ ကြေညာချက် ထုတ်ပြန်ခဲ့သည်။
အိန္ဒိယဝန်ကြီးချုပ် နာရင်ဒရာမိုဒီနှင့် နယူးဇီလန်ဝန်ကြီးချုပ် ခရစ်စ်တိုဖာလူဇွန်တို့သည် ပြီးခဲ့သည့် တနင်္လာနေ့က နှစ်နိုင်ငံ စီးပွားရေးဖွံ့ဖြိုးတိုးတက်မှုအတွက် အလွတ်သဘော ဆွေးနွေး ခဲ့ကြပြီး တစ်ရက်အကြာတွင် လွတ်လပ်သောကုန်သွယ်မှုဆိုင်ရာ သဘောတူစာချုပ် ချုပ်ဆိုခဲ့ကြကြောင်း ကြေညာခဲ့သည်။