စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးမှ စစ်ဆေးရေးအရာရှိ ဦးစန်းအောင်နှင့် ဝန်ထမ်းတစ်ဦးတို့သည် (၁၂-၁-၂၀၂၄) ရက်နေ့၊ နေ့လယ် (၁၅း၀၀) နာရီအချိန်တွင် ပျော်ဘွယ်မြို့နယ်၊ ကျီးနီကျေးရွာ၊ သာယာကုန်း၊ မန်ကျည်းပင်ခွ၊ သီးကုန်းကျေးရွာများတွင် မိသားစုတစ်နိုင်တစ်ပိုင် ဆံပင်လုပ်ငန်းလုပ်ကိုင်သူများနှင့် သွားရောက်တွေ့ဆုံခဲ့ ပါသည်။
ပျော်ဘွယ်မြို့နယ်အတွင်းရှိ တောင်သူများသည် စိုက်ပျိုးရေး၊ မွေးမြူရေးလုပ်ငန်းအပြင် မိသားစုအပိုဝင်ငွေရရှိသော ဆံပင်လုပ်ငန်းကိုလည်း လုပ်ကိုင်လျက်ရှိသည်ကိုတွေ့ရပါသည်။ ဆံပင်လုပ်ငန်းကို ၁၉၉၇ခုနှစ်ဝန်းကျင်ကတည်းက ပျော်ဘွယ်၊ သာစည်နယ်တစ်ဝိုက်တွင် စတင်ခဲ့သည်ဟု ဒေသခံများထံမှသိရှိရသည်။ သို့သော် လုပ်ငန်းမှာ ဖွံ့ဖြိုုးမလာဘဲ ပေါ်လာလိုက်၊ ပျောက်သွားလိုက်ပုံစံမျိုးရှိခဲ့ရာမှ ၂၀၀၇ခုနှစ်လောက်တွင်စတင်၍ ဆံပင်ရုံများ၊ ဆံပင်ဒိုင်များပေါ်ပေါက်လာပြီး ဖွံ့ဖြိုးလာရာ ယနေ့အထိပင်ဖြစ်သည်ဟုသိရှိရပါသည်။ ယခုအချိန်တွင် ဆံပင်လုပ်ငန်းမှာ ပျော်ဘွယ်မြို့နယ်အပြင် ရမည်းသင်း၊ မိတ္ထီလာ၊ သာစည်မြို့နယ်များအထိပါ တဟုန်ထိုးများလာပြီး တွင်ကျယ်စွာလုပ်ကိုင်ကြသည်ကိုတွေ့ရှိရပါသည်။ ပျော်ဘွယ်မြို့နယ်မှ လုပ်ငန်းရှင်တစ်ဦး၏ အဆိုအရ ဆံပင်လုပ်ငန်းနှင့် ပျော်ဘွယ်သည် ခွဲခြား၍မရအောင် အတူရှိနေသည်ဟုဆိုရလောက်အောင် အထိပင်ဖြစ်ကြောင်းသိရပါသည်။
ကျေးရွာများရှိ ဆံပင်လုပ်ငန်းလုပ်ကိုင်သူများသည် ကုန်ကြမ်းကို ပျော်ဘွယ်မြို့နှင့် ကျီးနီကျေးရွာရှိ ဆံပင်ဒိုင်များမှ တစ်ပိဿာလျှင် ကျပ်လေးသိန်းခွဲဈေးနှုန်းဖြင့်ဝယ်ယူရပြီး ရရှိလာသော ကုန်ကြမ်းများကို အဆင့်ငါးဆင့်ဖြင့် လုပ်ကိုင်ဆောင်ရွက်ရပါသည်။ (၁) ဆံရှင်းခြင်း၊ (၂) ခုံဆွဲခြင်း၊ (၃) အတိုအရှည်ရွေးထုတ်ခြင်း၊ (၄) ခေါင်းညှိခြင်း၊ (၅) ခုံအချောဆွဲခြင်း စသည်ဖြင့် အဆင့်ဆင့်ဆောင်ရွက်ပြီးမှသာ ကုန်ချောထွက်ရှိလာပါသည်။
ဆံပင်ရှင်ခြင်းအဆင့်တွင် အထွေးလိုက်ဖြစ်နေသည့် ဆံပင်များကို ဒေသအခေါ် ပေါင်းဆေး၊ ချွတ်ဆေးများနှင့် (၄၅) မိနစ်မှ (၁) နာရီခန့်အကြာစိမ်ထားပြီး အပ်များကိုအသုံးပြုကာ တစ်မျှင်ချင်းစီဆွဲ၍ ဖွရပါသည်။ ခုံဆွဲခြင်းအဆင့်တွင် ဖွရာမှရရှိလာသော ဆံပင်များကို သံချောင်းအပ်များကိုအသုံးပြု၍ ဆံပင်ဖြီးသည့် ဘီးကဲ့သို့ဖြစ်အောင် ထောင်၍ပြုလုပ်ထားသည့် “ခုံ” ဟုခေါ်သော စင်ပေါ်တွင် ခုံဆွဲခြင်းလုပ်ငန်းကိုပြုလုပ်ရသည်။ ခုံဆွဲ၍ရလာသည့် အတိုအရှည်မညီသော ဆံပင်စည်းများကို (၁၀) လက်မမှ (၃၀) လက်မအထိ (၂) လက်မစီခြား၍ အတိုအရှည်ခွဲခြားရပါသည်။ ခွဲခြားရရှိလာသော ဆံပင်များကို အရွယ်အစားအလိုက် ညီညာအောင် ခေါင်းညှိုခြင်းပြုလုပ်ရပါသည်။ ခေါင်းညှိုပြီးသော ဆံပင်များကို နောက်ဆုံးအဆင့် ခုံအချောဆွဲခြင်း ပြုလုပ်ပြီးလျှင် ကုန်ချောအဖြစ်ရောက်ရှိပြီး လုပ်ဆောင်မှုအဆင့်ပြီးဆုံးပြီဖြစ်ကြောင်းသိရှိရပါသည်။
ထွက်ရှိလာသော ကုန်ချောဆံပင်များကို ကုန်ကြမ်းဝယ်ယူခဲ့သည့် ဆံပင်ဒိုင်များထံတွင် ပြန်လည်ရောင်းချကြကြောင်း၊ လက်မ (၃၀) ရှိ ဆံပင်တစ်ပိဿာလျှင် (၂၇) သိန်းကျပ်၊ (၁၀) လက်မဆိုဒ်တစ်ပိဿာလျှင် (၁၄၀၀၀၀) ကျပ် စသည်ဖြင့် လက်မအတိုအရှည်ပေါ်မူတည်ပြီး ဈေးနှုန်းပြောင်းလဲသွားကြောင်းသိရှိရပါသည်။ အကျိုးအမြတ်အနေဖြင့် ကုန်ကြမ်းတစ်ပိဿာလျှင် (၄၀၀၀၀၀) ကျပ်ဖြင့်ဝယ်ယူရသော ဆံပင်တစ်ထုပ်ရှင်းလျှင် ပျှမ်းမျှအမြတ် ကျပ်(၆၀၀၀၀၀)အထိအမြတ်ရကြောင်း၊ ဆံပင်အရှည်ထွက်ရှိမှုပေါ်မူတည်ပြီး အကျိုးအမြတ်ရရှိမှုပြီး ဆံပင်ကောင်းလျှင် ကောင်းသလို အကျိုးအမြတ်များရရှိကြောင်းသိရှိရပါသည်။
ဆံပင်လုပ်ငန်းသည် လက်ရှိမိသားစုဘဝများ အဆင်ပြေနေရုံသာမက အနာဂတ်အတွက် မိသားစုများလုပ်နိုင်လျှင် လုပ်နိုင်သလောက် အကျိုးစီးပွားဖြစ်ထွန်းနိုင်သော လုပ်ငန်းတစ်ခုဖြစ်ကြောင်းသိရှိရပါသည်။
DOCA(မန္တလေး)