ကုန်သွယ်မှုသတင်းများ
စစ်ကိုင်းတိုင်းဒေသကြီး၊ မုံရွာမြို့ရှိ မုံရွာကုန်စည်ဒိုင်အဖွဲ့ဝင်များအနေဖြင့် Online စနစ်ဖြင့် အရောင်းဝယ်ဖြစ်နေကြောင်း သိရပါသည်။ မေလ ဒုတိယပတ်တွင် ဖြစ်ပေါ်နေသော ပဲဈေးနှုန်းများမှာ ပဲတီစိမ်း(ကြီး)တစ်တင်းကျပ် ၄၇၈၀၀၊ ပဲစဉ်းငုံ တစ်တင်းကျပ် ၄၂၃၀၀၊ မတ်ပဲ တစ်တင်းကျပ် ၄၅၅၀၀၊ ကုလားပဲ ထိုင်ဝမ် တစ်တင်းကျပ် ၄၁၃၀၀၊ ကုလားပဲ 929 တစ်တင်းကျပ် ၄၂၇၀၀၊ ကုလားပဲ V2(သစ်) တစ်တင်းကျပ် ၄၅၅၀၀၊ ကုလားပဲ V3,7 တစ်တင်းကျပ် ၄၆၈၀၀ ဈေးနှုန်းများဖြင့် အရောင်းအဝယ် ဖြစ်နေကြောင်း သိရပါသည်။
စစ်ကိုင်းတိုင်းဒေသကြီး၊ မုံရွာမြို့နယ်အတွင်း ချင်းတွင်းမြစ်ရိုးအရှေ့ဖက်တွင်တည်ရှိသော ညောင်ဖြူပင်၊ သစ်ဆိမ့်၊ ထနောင်းတော၊ နဂါးတွင်းကျေးရွာများသည် သပြေနှင့်ပန်းမာန်ဥယျာဉ် စိုက်ပျိုးခြင်းလုပ်ငန်းများကို အဓိကထားလုပ်ကိုင်ခြင်းဖြင့် ပုံမှန်ဝင်ငွေရရှိလျက်ရှိကြောင်း သိရသည်။
စစ်ကိုင်းတိုင်းဒေသကြီး၊ တမူးခရိုင်၊ ခမ်းပါတ်မြို့ရှိ ကျေးရွာအချို့တွင် ဒေသနှင့် ကိုက်ညီပြီး ဈေးကွက်ရရှိသည့် ပြောင်းဖူးများကို ရွေးချယ်စိုက်ပျိုးလျက်ရှိကြပြီး မိသားစု စီးပွားရေးအတွက် နေ့စဉ်ပုံမှန် ဝင်ငွေရရှိလျက်ရှိကြောင်း သိရှိရပါသည်။
ပြည်တွင်းဈေးကွက်အတွင်း စားအုန်းဆီဈေးနှုန်းနှင့်ပတ်သက်ပြီး ဈေးနှုန်းမြှင့်တင်ရောင်းချခြင်းနှင့် ဈေးကစားခြင်းများပြုလုပ်ပါက အရေးယူသွားမယ်လို့ စားသုံးဆီတင်သွင်း၊ သိုလှောင်၊ ဖြန့်ဖြူး ခြင်း လုပ်ငန်းကြီးကြပ်ရေးကော်မတီက ထုတ်ပြန်ကြောင်း သိရသည်။
စစ်ကိုင်းတိုင်းဒေသကြီးတွင် မေလ(ဒုတိယ)ပတ်၌ စပါး/ဆန်ဈေးနှုန်းများမှာ ဆန်ပိုဒေသများ ဖြစ်သော ရွှေဘိုခရိုင်၊ ကလေးခရိုင်တို့တွင် ဈေးတန့်နေပြီး၊ မုံရွာခရိုင်တွင် အနည်းငယ် မြင့်တက်ကာ ကသာခရိုင်တွင် ဈေးအနည်းငယ်ကျနေပါသည်။
