ပြည်တွင်းကုန်သွယ်မှုသတင်း

ငါးချဉ်၊ ငါးခြောက်ဟုဆိုလိုက်သည်နှင့် ပဲခူးဒေသထွက်ကုန်များဟု ပြေးမြင်မိသလို ပဲခူးနှင့် ငါးချဉ်၊ ငါးခြောက်ဆိုသည်မှာလဲ တွဲလျက်ပင်ဖြစ်ပါသည်။ ပဲခူးတွင် ငါးချဉ်၊ ငါးခြောက်ဆိုင်အများကြီးရှိသလို ငါးချဉ်ကို အကောင်ချဉ်၊ ပုဇွန်ချဉ်၊ ငါးဖယ်ချဉ်၊ ငါးကြင်းချဉ် စသည်ဖြင့် အမျိုးမျိုးလုပ်ရောင်းလေ့ရှိကြသည်။ ငါးချဉ်ဈေးကွက် တွင်ကျယ်လာသည်နှင့်အမျှ ရောင်းချသူများလည်း ပိုမိုများပြားလာသည်။ ဈေးနှုန်းသင့်တင်ပြီး စား၍ကောင်းသော ငါးချဉ်များထဲမှ ငွေငါးငါးချဉ်သည်လဲ တစ်ခုအပါအဝင်ဖြစ်သည်။ ငွေငါးငါးချဉ်အနေဖြင် ကုန်ကြမ်းကို ပဲခူးမြို့ ငါးဈေးမှဝယ်ယူကြောင်းနှင့် ယခင်နှစ်ကထက် ရောင်းအားပိုကောင်း၍ ထုတ်လုပ်မှုအနေဖြင့် ပိဿာချိန် ၂၀၀ ခန့် ပိုမိုထုတ်လုပ်လာနိုင်ကြောင်းသိရှိရပြီး ထုတ်လုပ်မှု ကုန်ကျစရိတ်သည်လည်း ပိုမိုမြင့်မားလာသည့်အတွက် အမြတ်အစွန်းအနေဖြင့် ယခင်နှစ်ကထက် များပြားခြင်းမရှိကြောင်း သိရှိရသည်။ ငါးဖယ်ချဉ်၊ ပုဇွန်ချဉ် ၁၀ ဆယ်သား တစ်ထုပ်လျှင် ၁၈၀၀ ကျပ်ဖြင့် ရောင်းချလျက်ရှိပြီး မြို့တွင်းမှလက်ဆောင်ပေးရန် ဝယ်ယူမှုများမှာလည်းများပြားကြောင်း၊ တင်ပို့မှုအနေဖြင့် ရန်ကုန်သို့အဓိကတင်ပို့ရောင်းချကြောင်း သိရှိရပြီး နေပြည်တော်၊ မန္တလေး၊ ကျောက်ဆည်မြို့တို့မှတဆင့် ပြန်လည်ရောင်းချရန်နှင့် လက်ဆောင်ပေးပို့ရန်အတွက်မှာယူကြောင်း သိရှိရပါသည်။
DOCA(ပဲခူး)

          မကွေးတိုင်းဒေသကြီး၊ မကွေးမြို့နယ်ရှိ ကျေးရွာများတွင် နှမ်း၊ မြေပဲ၊ နေကြာ၊ ဝါ၊ ဆန်စပါး၊ ကြက်သွန်နီနှင့် ပဲမျိုးစုံသီးနှံတို့ကို နှစ်စဉ်စိုက်ပျိုးလျက်ရှိရာ ရွာတော်ကျေးရွာတွင် နေကြာသီးနှံစိုက်ဧက  ၁၅ဧကခန့်စိုက်ပျိုးထားရှိကြောင်းသိရသည်။

          ဩဂုတ်လတွင်စိုက်ပျိုးပြီး နိုဝင်ဘာလတွင် စတင်ရိတ်သိမ်းကြကြောင်း၊ မျိုးစေ့အနေဖြင့် ဆင်းရွှေကြာ(၁)နှင့် ဆင်းရွှေကြာ(၂)မျိုးများကိုစိုက်ပျိုးကြကြောင်း၊ တစ်ဧကလျှင် မျိုးစေ့ (၉) ပြည်ခန့်ကုန်ကျပြီး သီးသန့်နှင့် သီးညှပ်ဟူ၍ စိုက်ပျိုးကြကြောင်း၊ မျိုး၊ သွင်းအားစု၊ လုပ်သားခအပါအဝင် စိုက်ပျိုးကုန်ကျစရိတ်မှာ ငွေကျပ်၃၀၀၀၀၀ခန့်ကုန်ကျကြောင်း၊ ယခင်နှစ်အထွက်နှုန်းအနေဖြင့် တစ်ဧကလျှင် ၂၀-၂၅ တင်းခန့်ထွက်ရှိခဲ့ပြီး သီးနှံပေါ်စအချိန်တွင် နေကြာတစ်တင်းလျှင် ငွေကျပ် ၅၀၀၀၀-၆၀၀၀၀ ဖြင့်အရောင်းအဝယ်ဖြစ်ခဲ့ပြီး အကျိုးအမြတ်အနေဖြင့် ငွေကျပ်၁၂၀၀၀၀၀ခန့်ရရှိခဲ့ကြောင်းသိရသည်။

          ၂၀၂၄ခုနှစ်၊ အောက်တိုဘာလ (တတိယပတ်)တွင် နေကြာတစ်တင်းလျှင် ငွေကျပ် ၆၀၀၀၀-၆၅၀၀၀ ဖြင့်အရောင်းအဝယ်ဖြစ်ကြောင်း၊ ဈေးကွက်အနေဖြင့် မကွေးမြို့၊ ဆီစက်လုပ်ငန်းရှင်များက ဝယ်ယူကြကြောင်း၊ နေကြာသီးနှံသည် စိုက်ပျိုးကုန်ကျစရိတ်သက်သာပြီး အကျိုးအမြတ်ရရှိသော သီးနှံဖြစ်သောကြောင့် နှစ်စဉ်စိုက်ပျိုးလျက်ရှိကြောင်းသိရှိရပါသည်။

DOCA(မကွေး)

          မကွေးတိုင်းဒေသကြီး၊ မြို့သစ်မြို့နယ်၊ ကွင်းကျေးရွာတွင် နှမ်း၊ မြေပဲ၊ စပါး၊ ပဲကြီး၊ ကုလားပဲ၊ ပဲစင်းငုံ၊ ပဲတီစိမ်းနှင့် ကြက်သွန်နီတို့ကို အဓိကစိုက်ပျိုးထွက်ရှိပြီး စားဖိုဆောင်သီးနှံဖြစ်သည့် ခရမ်းချဉ်သီးနှံကိုလည်း တစ်နိုင်တစ်ပိုင်စိုက်ပျိုးကြကြောင်းသိရသည်။

          ၂၀၂၄ခုနှစ်၊  ဩဂုတ်လတွင်စိုက်ပျိုးပြီး အောက်တိုဘာလတွင် စတင်ထွက်ပေါ်ကြောင်း၊ မျိုးအနေဖြင့် ခရမ်းချဉ်သီး(ထိုင်ဝမ်)မျိုးကို စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြပြီး တစ်ဧကလျှင် မျိုးစေ့ (၆) ထုပ်ခန့်ကုန်ကျကြောင်း၊ စိုက်ပျိုးရာတွင် မျိုးစေ့ကို အိတ်ဖြင့်ပျိုးထောင်ကာ (၁၅)ရက်သားအရွယ်တွင် မြေချ၍ တိုင်ထောင်စနစ်ဖြင့်စိုက်ပျိုးကြောင်း၊  စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင်  တစ်ဧကလျှင် ငွေကျပ်၃၅၀၀၀၀၀ခန့်ကုန်ကျပြီး အထွက်နှုန်းအနေဖြင့် တစ်ဧကလျှင် ပိဿာချိန် ၂၀၀၀-၂၅၀၀ ခန့်ထွက်ရှိပြီး အကျိုးအမြတ်အနေဖြင့် ငွေကျပ် ၃၅၀၀၀၀၀ခန့်ရရှိကြောင်းသိရသည်။

         ဈေးနှုန်းအနေဖြင့် အောက်တိုဘာလ တတိယပတ်တွင် လက်ကားဈေးနှုန်းမှာ ခရမ်းချဉ်သီးတစ်ပိဿာလျှင် ငွေကျပ် ၄၀၀၀-၅၀၀၀ ဖြင့်ရောင်းချရကြောင်း၊ ဈေးကွက်အနေဖြင့် မကွေးမြို့သို့ တင်ပို့ရောင်းချကြောင်းနှင့် အနီးရှိကျေးရွာများသို့လည်း သွားရောက်ရောင်းချကြောင်း၊ မိုးရွာသွန်းမှုများပြားခြင်းကြောင့် အထွက်နှုန်းလျော့နည်းသော်လည်း ခရမ်းချဉ်သီးထွက်ပေါ်ချိန်တွင် ဈေးကောင်းရသောကြောင့် အကျိုးအမြတ်များရရှိကြောင်းသိရှိရပါသည်။

DOCA(မကွေး)

ပဲခူးတိုင်းဒေသကြီး ကဝမြို့နယ်၊ ကျားတက်ကျေးရွာရှိ ယက်ကန်းလုပ်ငန်းများအားသွားရောက်လေ့လာရာ၌ယခင်က ကျေးရွာတွင် ယက်ကန်းလုပ်ကိုင်သူ ၅၀ ဦးခန့်ရှိပြီး တစ်ဦးလျှင် ယက်ကန်းစင် ၇စင် မှ ၁၀ စင်အတွင်း လုပ်ကိုင်ကြသော်လည်း ယခုအခါတွင် ၅ဦးခန့်သာရှိပြီး လုပ်ငန်းရှင်တစ်ဦးလျှင် ယက်ကန်းစင် ၃ စင်ခန့်နှင့် လုပ်သား ၃ ဦးသာ လုပ်ကိုင်ဆောင်ရွက်လျက်ရှိကြောင်း၊ ကုန်ကြမ်းပစ္စည်းဖြစ်သော ချည်ထည် ၁၀ ပေါင်ထုပ်တစ်ထုပ်လျှင် ၉၇၀၀၀ ကျပ်ဖြင့် ရန်ကုန်သိမ်ကြီးဈေးမှဝယ်ယူရပြီး ကုန်ချောအထည် ၁၅ ထည်ခန့် ထုတ်လုပ်နိုင်ပါကြောင်း၊ အမျိုး သမီးဝတ် အထည်များသာ ထုတ်လုပ်ပြီး တစ်ထည်လျှင် ၁၂၅၀၀ မှ ၁၃၀၀၀ ကျပ်ခန့် ရရှိပါသည်။ လုပ်သားတစ်ဦးလျှင် တစ်နေ့အထည် ၃ ထည် ၄ ထည်ခန့်သာ ထုတ်လုပ်နိုင်ပါသည်။ လုပ်သားခမှာတစ်ထည်လျှင် ၂၂၀၀ ကျပ်မှ ၃၀၀၀ ကျပ်အတွင်း ရရှိပါသည်။ အထည်ကုန်ချောများကိုရန်ကုန်မြို့ ၊ သိမ်ကြီးဈေးသို့ တင်သွင်းဖြန့်ဖြူးပြီး အခြားနယ်များမှ မှာယူသည်များကိုလည်း ဖြန့်ဖြူးရောင်းချပေးလျက်ရှိကြောင်း သိရှိရပါသည်။
DOCA(ပဲခူး)

         ဝါးတန်းဆန်စပါးကုန်စည်ဒိုင်သို့ (၈-၁၀-၂၀၂၄) ရက်နေ့မှ (၁၄-၁၀-၂၀၂၄) ရက်နေ့အထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၂၇၂၇၁) အိတ်၊ ပေါ်ကျွဲ (၁၀၆၄၈) အိတ်၊ ဧည့်မထ (၈၂၀၄၃) အိတ်၊ ဆန်ကွဲ (၁၆၉၆၅) အိတ်ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၆၆၄၀) အိတ်နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၂၀၂၆၅)အိတ်၊ ငစိန် (၁၂၄၅) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံမြို့နယ်များမှ ဧည့်မထ (၁၇၄၁၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)