ပြည်တွင်းကုန်သွယ်မှုသတင်း

        မိတ္ထီလာဈေးကွက်တွင် အောက်တိုဘာလ တတိယပတ်၌ ကြက်သွန်နီမှာ ဒေသတွင်းလက်ကျန် နည်းလာသည့်အတွက် ဈေးမြင့်လာကြောင်း သိရသည်။ မိတ္ထီလာဈေးကွက်၌ အောက်တိုဘာလလယ်ထိ လက်ကားဈေးတစ်ပိဿာလျှင်(၂၀၀၀-၂၁၀၀)ကျပ်ရှိခဲ့ရာမှ ယခုရက်ပိုင်း (၂၅၀၀-၃၀၀၀)ကျပ် ကြားရှိ သဖြင့် နယ်တင်ပို့မှာလည်း နည်းလာကြောင်း သိရသည်။ နယ်ဝယ်လက်အနေနှင့် ပြည်တွင်းစားသုံးရန် ပဲခူး၊ ရန်ကုန်၊ တာချီလိတ်သို့လည်းကောင်း၊ ပြည်ပဝယ်လက်များဖြစ်သည့် ရန်ကုန်၊ တာချီလိတ်၊ မော်လမြိုင်မြို့များသို့ တင်ပို့ရာ ယခုရက်ပိုင်းဝယ်ရင်းဈေးမြင့်လာခြင်း ရာသီဥတုအခြေအနေအရ မိုးများနေခြင်းတို့ကြောင့် တင်ပို့မှုနည်းနေကြောင်းသိရသည်။ ယခုတစ်ပတ်အတွင်း ပြည်တွင်းဝယ်လက် အနည်းငယ်နှင့် ပြည်ပဝယ်လက်များသို့ ယခင်ဝယ်ယူပြီး ကုန်များနှင့်သာတင်ပို့နေရာ တင်ပို့မှု့နည်းသည့်အတွက် ကုန်တင်ခများမှာ ဈေးငြိမ်နေကြောင်း သိရသည်။ ကြက်သွန်နီမှာ လက်ရှိအချိန်တွင် ယခင်နှစ်ဆောင်းကြက်သွန်နီလက်ကျန်အဟောင်းဖြစ်၍ လက်ကျန်နည်းလာရာ လာမည့်မိုးကြက်သွန်နီပေါ်မည့် ဒီဇင်ဘာလအထိ ဈေးမြင့်လာနိုင်သေးကြောင်း ဈေးကွက်မှသိရသည်။

DOCA(မန္တလေး)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် စိုက်ပျိုးရေးကို အဓိကလုပ်ကိုင်ပြီး သီးနှံမျိုးစုံကို ရာသီအလိုက် စိုက်ပျိုးရာတွင် ကြက်သွန်နီသီးနှံကို ဒေသစီးပွားဖြစ် တောင်သူအများ စိုက်ပျိုးကြောင်း၊ စားဖိုဆောင်သီးနှံတစ်မျိုးဖြစ်သော ကြက်သွန်နီသီးနှံကို မိုးစိုက်၊ (ဥ)စိုက်နှင့် ဆောင်းစိုက် (ပင်)စိုက်ဟူ၍ နှစ်ရာသီစိုက်ပျိုးလျက်ရှိရာ ၂၀၂၄ ခုနှစ်၊ အောက်တိုဘာလ ဒုတိယပတ်မှစ၍ မိုးကြက် သွန်နီ(ဥ)စိုက်များ စတင်စိုက်ပျိုးကြောင်း၊ ဧရာဝတီမြစ်ရိုးတလျှောက်ရှိ ကိုင်းကျွန်းမြေများနှင့် ကုန်း တွင်းပိုင်း လယ်ကွင်းမြေများတွင် အများဆုံးစိုက်ပျိုးကြောင်း၊ ကြက်သွန်နီဈေးကွက်အပေါ်မူတည်၍ စိုက်ဧက အနည်းအများကွာခြားကြောင်း၊ ယခုနှစ် စိုက်ပျိုးရာသီချိန် အောက်တိုဘာလတွင် ဒေသတွင်း ကြက်သွန်နီဈေးကွက်၌ ဈေးနှုန်းမြင့်တက်လာ၍ ကြက်သွန်နီ(ဥ)စိုက်တောင်သူများ စိုက်ပျိုးမှုများလာကြောင်း၊ ယခင်နှစ်တွင် စိုက်ဧက (၉၀၀)ခန့် စိုက်ပျိုးပြီး ယခုနှစ်တွင် စိုက်ဧက (၁၀၀၀)ခန့်ထိ တိုးချဲ့ စိုက်ပျိုးကြမည်ဖြစ်ကြောင်း ဒေသခံတောင်သူများထံမှ သိရသည်။

      ယခုနှစ်တွင် ဆိပ်ဖြူမြို့၊ ရွာသစ်ရပ်ကွက်ရှိ စိုက်တောင်သူ ဦးမိုးအောင်သည် မိုးကြက်သွန်နီ စိုက်ဧက(၃)ဧကခန့် စိုက်ပျိုးထားရှိကြောင်း၊ အောက်တိုဘာလတွင် စတင်စိုက်ပျိုးပြီး ရက်ပေါင်း(၈၀-၉၀)အကြာ ဇန်နဝါရီလဆန်းပိုင်းတွင် စတင်တူးဖော်မည်ဖြစ်ကြောင်း၊ မျိုးဥအနေဖြင့် (ဇော်မွှားဥ)ကို စိုက်ပျိုးကြောင်း၊ မျိုးဥအရွယ်အစားသေးငယ်၍ တစ်ဧကလျှင် ပိဿာ(၃၀၀)ခန့် ဝင်ဆံ့စိုက်ပျိုးကြောင်း၊ တစ်ပိဿာလျှင် ကျပ်(၅၀၀၀)၊ ပိဿာ (၁၀၀)လျှင် ကျပ်(၅)သိန်းဈေးဖြင့် ဝယ်ယူစိုက်ပျိုးရကြောင်း၊ ယခုနှစ်စိုက်ပျိုးချိန်တွင် မျိုးဥဈေး သွင်းအားစုအမျိုးမျိုးနှင့် အလုပ်သမားငှားရမ်းခ ကြီးမြင့်၍ တစ်ဧက ကျပ် သိန်း(၄၀)ခန့် ကုန်ကျမည်ဖြစ်ကြောင်း၊ ယခင်နှစ် စိုက်ပျိုးချိန်တွင် တစ်ဧကလျှင် ကျပ်(၃၀-၃၅) သိန်းခန့်ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ပိဿာချိန် (၃၀၀၀- ၅၀၀၀) ခန့်ထွက်ရှိပြီး ဒေသတွင်းသီးနှံပေါ်ချိန်ဈေးကွက်တွင် ကြက်သွန်နီ(ဥ)စိုက် တစ်ပိဿာလျှင် ငွေကျပ်(၁၈၅၀-၂၀၀၀-၃၀၀၀) ဈေးအသီးသီးဖြင့် အရောင်းအဝယ်ဖြစ်ခဲ့ရာ အကျိုးအမြတ်အနေဖြင့် ငွေကျပ် သိန်း(၇၀)ခန့် ရရှိခဲ့ကြောင်း သိရသည်။

     ဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ဒေသတွင်းဖြန့်ဖြူမှုအပြင် ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များနှင့် ပြည်ပပို့ကုန်အဖြစ် မြဝတီ၊ မော်လမြိုင်၊ မူဆယ်မြို့များမှတဆင့် ထိုင်း၊ ဗီယမ်နမ် နိုင်ငံများသို့ တင်ပို့ရောင်းချ ဖြန့်ဖြူးကြောင်း သိရှိရသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်၌ ၂၀၂၄ခုနှစ်၊ အောက်တိုဘာလ (တတိယပတ်)တွင် ကြက်သွန်နီဈေးနှုန်းများမြင့်တက်၍ အရောင်းအဝယ်ဖြစ်လျက်ရှိပါသည်။ ဈေးကွက်သို့ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးမှုများသော ကံတွင်း၊ အနောက်ကမ်းဖြူ၊ ဆင်နီတောင်၊ ဒေါသာ၊ ကစွယ်၊ ဇီးတော်ပင်၊ တပေါင်း၊ ရွာမကျေးရွာများနှင့် အခြားမြို့နယ်များဖြစ်သည့် ပခုက္ကူ၊ ချောက်၊ ဆင်ဖြူကျွန်း၊ စလင်းမြို့နယ်ဒေသထွက် ကြက်သွန်နီများလည်း ဝင်ရောက် အရောင်းအဝယ်ဖြစ်လျက်ရှိပြီး တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ(၅)သောင်း၊ တစ်ပတ် အတွင်း ပိဿာ(၄)သိန်းခန့် ဆိပ်ဖြူ ကြက်သွန်နီပွဲရုံ ဈေးကွက်တွင် အရောင်းအဝယ်ဖြစ်လျက်ရှိကြောင်း သိရသည်။

    ဈေးနှုန်းအနေဖြင့် အောက်တိုဘာလ(တတိယပတ်)တွင် ကြက်သွန်နီအရည်အသွေးနှင့် အရွယ်အစားလိုက်၍ ကြက်သွန်နီ တောဈေး(ဂျွန်) တစ်ပိဿာကျပ်(၂၆၀၀ - ၂၂၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ ပွဲရုံများမှ ပြန်လည်သန့်စင်ပြီး ဥအကြီးအရွယ်အစား၊ အရောင်အဆင်း လိုက်၍ ကြက်သွန်နီ တစ်ပိဿာလျှင် ကျပ်(၃၅၀၀ - ၃၀၀၀) ဈေးဖြင့် ဒေသတွင်း နေရာအနှံ့အပြား ရောင်းချလျက်ရှိကြောင်း၊ ပြည်တွင်းဈေးကွက်အပြင် ပြည်ပအဝယ်လိုက်၍ ဈေးနှုန်းမြင့်တက်လာကြောင်း၊  အရောင်းအဝယ်ဖြစ်မှုများပြီး ပြည်ပအဝယ်လိုက်လာ၍ ဈေးနှုန်းမြင့်တက်လာခြင်းဖြစ်ကြောင်း၊ ဈေးကွက်သို့ ကုန်ဝင်ရောက်မှုများကြောင်း၊ ယခင်အောက်တိုဘာ(ဒုတိယပတ်)နှင့် ဈေးနှုန်းနှိုင်းယှဉ်ပါက ယခု(တတိယပတ်)တွင် ကြက်သွန်နီ တစ်ပိဿာလျှင် ကျပ်(၆၀၀)ခန့် ဈေးနှုန်းမြင့်တက်လာ ကြောင်း၊ နေ့စဉ် ဆိပ်ဖြူမြို့မှ ကြက်သွန်နီတင်ပို့မှု ကားအစီးရေ(၁၂)စီး၊ တစ်ပတ်အတွင်း အစီး (၆၀)ခန့် ကုန်စည်စီးဆင်း လျက်ရှိကြောင်း သိရသည်။

    ဈေးကွက်အနေဖြင့် ဒေသတွင်းကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ အောက်တိုဘာလ(တတိယပတ်)တွင် ကြက်သွန်နီ ကုန်ချိန်ပိဿာ (၄)သိန်း၊ တန်ချိန်အားဖြင့် (၆၅၃)တန်ခန့် ကုန်စည်စီးဆင်းခဲ့ကြောင်း ဈေးကွက်မှ  သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ၂၀၂၃-၂၀၂၄ ဘဏ္ဍာနှစ်တွင် ဆီထွက်သီးနှံ မြေပဲစိုက်ဧက (၅၀၀၀)ခန့် စိုက်ပျိုးခဲ့ကြောင်း၊ ဆိပ်ဖြူမြို့နယ်အတွင်းရှိ ဒေသခံ တောင်သူများသည် စိုက်ပျိုးမြေကောင်းမွန်မှုတို့ကြောင့် စိုက်ပျိုးရေးလုပ်ငန်းကို အဓိကစီးပွားဖြစ် စိုက်ပျိုးလုပ်ကိုင်ကြသည်။ မိသားစုစားသုံးဆီဖူလုံမှုအပြင် ပြည်တွင်းစားသုံးဆီဖူလုံရေးတို့အတွက် မိုးဦးရာသီစိုက်ပျိုးချိန်တွင် မြေပဲသီးနှံကို အဓိကသီးနှံအဖြစ် နှစ်စဉ်စိုက်ပျိုးခဲ့ကြောင်း၊ (၃)လပဲပင်ထောင်မျိုးကို အများဆုံးစိုက်ပျိုးကြောင်း သိရှိရသည်။

       ယခုလက်ရှိအချိန်တွင် ဆိပ်ဖြူမြို့နယ်အတွင်းရှိ ကျေးရွာများဖြစ်သည့် တပေါင်းအုပ်စု ကူရှည်၊ ရွာမအုပ်စု ကိုးတောင့်အုပ်စုအတွင်းရှိ ကျေးရွာများတွင် အောက်တိုဘာလဆန်းပိုင်းမှစ၍ မြေပဲသီးနှံ များ စတင်ထွက်ပေါ်လျက်ရှိပြီး မြေပဲတောင့်S₁ တစ်တင်းလျှင် ငွေကျပ်(၃၆၀၀၀-၃၄၄၀၀-၂၀၀၀၀)၊ မြေပဲလုံးဆံတစ်ပိဿာလျှင် ကျပ်(၈၀၀၀-၇၀၀၀)၊ မြေပဲဆီတစ်ပိဿာလျှင် ငွေကျပ်(၁၈၀၀၀) ဈေး အသီးသီးဖြင့် အရောင်းအဝယ်ဖြစ်ကြောင်း၊ စိုက်ပျိုးမှုကုန်ကျစရိတ်အနေဖြင့် တစ်ဧကလျှင် ငွေကျပ် (၈)သိန်းခန့် ကုန်ကျပြီး အထွက်တင်းအနေဖြင့် ပျမ်းမျှတင်း(၅၀)ခန့် ထွက်ရှိကြောင်း၊ ဈေးကွက်အနေဖြင့် ဆိပ်ဖြူမြို့နယ်အတွင်းရှိ တောင်သူအများစုသည် ဆီထွက်သီးနှံများကို ကြိတ်ခွဲ၍ မြို့ပေါ်ရှိ ဆီစက် များ၊ ဆားလှော်လုပ်ငန်းရှင်များ၊ ဒေသခံစားသုံးသူများနှင့် ချောက်မြို့ အေဝမ်းပွဲရုံသို့လည်း  ရောင်းချလျက်ရှိကြောင်း၊ စိုက်တောင်သူများအနေဖြင့်  ယခုနှစ် မြေပဲအထွက်ကောင်းပြီး ငွေကျပ် (၁၀)သိန်းခန့် အကျိုးအမြတ်ရရှိကြောင်း ဆိပ်ဖြူမြို့နယ်၊ ကူရှည်အလယ်စုကျေးရွာအတွင်းရှိ စိုက်တောင်သူတစ်ဦးထံမှ သိရှိရသည်။

DOCA(မကွေး)

       ခရမ်းမြို့နယ်၊ ကမာမတ်ကျေးရွာတွင် စားဖားအကောင်ဖောက်ရောင်းချခြင်းနှင့် မွေးမြူခြင်းလုပ်ငန်းများရှိပြီး ကမာမတ်ကျေးရွာမှ စားဖားသားပေါက်များအား ခရမ်းမြို့နယ်ကျေးရွာများဖြစ်သော ကျုံးကျုံးကျ၊ ကမာကလူ၊ ပေါက်ပင်၊ ကြူတော၊ ကမာစိန်ကျေးရွာများမှ ဝယ်ယူမွေးမြူခြင်းဖြင့် တစ်နိုင်တစ်ပိုင် မွေးမြူကြပါသည်။

      ကမာမတ်ကျေးရွာတွင်နေထိုင်သော ဦးနန်းဝေသည် စားဖားမွေးမြူခြင်းလုပ်ငန်းအား ၂၀၀၇ခုနှစ်မှစတင်၍မွေးမြူခဲ့ရာ မုဒုံမြို့နယ်မှစားဖားပေါက်များအား (၁)ကောင်လျှင် (၃၅၀)ကျပ်ဖြင့် ဖားအကောင်ရေ (၁၀၀၀)ဝယ်ယူခဲ့ရာ ကမာမတ်ကျေးရွာရောက်ရှိချိန်တွင် ဖားများမှခရီးဝေး၍ အများအားဖြင့် သေကုန်ပြီး အနည်းငယ်သာကျန်ရှိသော ဖားများအား မွေးမြူ၍ သားဖောက်ခြင်း၊ မွေးမြူခြင်းများလုပ်ကိုင်လျက်ရှိပါသည်။ စားဖားအမျိုးအစား(၂)မျိုးရှိရာတွင် ထိုင်းမျိုးနှင့် ကွင်းဖား(ဒေသဖား)ဟူ၍ရှိပြီး ထိုင်းမျိုးမှာ အဝါဖျော့ရောင်ရှိပြီး ကွင်းမျိုးဒေသဖားမှာ အမဲရောင်ရှိ၍ လူကြိုက်နည်းကြောင်းသိရပြီး အများအားဖြင့် ထိုင်းမျိုးများသာ အမွေးများကြောင်းနှင့် သားပေါက်ဝယ်ယူမွေးမြူရာတွင် ရက်(၄၀)မှစတင်၍ မွေးမြူကြပြီး သားပေါက်(၁)ကောင်လျှင် (၂၅၀-၃၀၀)ကျပ်ဈေးရှိပြီး ဖားသားပေါက် ရက်(၄၀)သားမှစတင်၍မွေးမြူခဲ့ရာ သက်တမ်းကာလ ရက်ပေါင်း(၁၀၀)၊ (၃)လခွဲအချိန်လောက်တွင် (၁)တစ်ကောင်လျှင် (၁၃)ကျပ်သားမှ (၁၅)ကျပ်သားထိအချိန်ရှိလာလျှင် ထုတ်ရောင်း၍ရပြီး စားဖား(၁)ပိဿာလျှင် လက်ရှိပေါက်ဈေး (၁၂၀၀၀မှ ၁၄၀၀၀)ကျပ်ထိရှိကြောင်း၊ စားဖားများအား ရန်ကုန်ကြည်မြင်တိုင်ငါးဈေး၊ လှိုင်မြို့နယ် ရွှေပိတောက်ငါးဈေးများတွင်ရောင်းချခြင်း၊ ပွဲစားများဖြင့် ရောင်းချခြင်းများရှိပါသည်။

            ဖားသားဖောက်ရာတွင် ဖားမ(၅)ကောင်လျှင် သားပေါက် (၅၀၀၀မှ ၁၀၀၀၀)ထိသာပေါက်နိုင်ပြီး သားပေါက်များ အမှီးပြတ်ချိန်တွင် တစ်ကောင်နှင့်တစ်ကောင်ကိုက်၍သေခြင်းများရှိ၍ ကောင်ရေ (၃၀၀၀)ခန့်သာကျန်ရှိတတ်ပြီး ဖားထီးနှင့်ဖားမများအားလည်းဆေးထိုး၍ အကောင်ဖောက်ခြင်းမျိုးဖားမ(၁)ကောင်အား တစ်နှစ်လျှင် (၁)ကြိမ်၊ (၂)နှစ်သား ဖောက်နိုင်ကြောင်းသိရပါသည်။

          စားဖားမွေးမြူရာတွင် (၁)နှစ်လျှင် (၄)ကြိမ်မွေးမြူနိုင်ပြီး အကောင်ရေ (၁၀၀၀)လျှင် မိသားစုလုပ်အားခမပါ၊ ခြံဖိုး၊ အစာဖိုးချန်ပြီး (၅)သိန်းခန့်အမြတ်ရရှိနိုင်ကြောင်းသိရပါသည်။

         စားဖားများအစာကျွေးရာတွင် (ငါး)စာဖြစ်သော ALLER AQUA၊ ဒီဟိုက်တံဆိပ်ပါ အစာအိတ် 25kg/ 30kg အိတ်များကျွေးရပြီး ဖားအကောင်(၁၀၀၀)အား အစာ 25kg၊ (၁)လလျှင် (၃)အိတ်နှုန်းကုန်ကျပြီး 25kg (၁)အိတ်လျှင် (၉၅၀၀၀/-) ဈေးဖြင့်ဝယ်ယူရပါသည်။

          စားဖားအကောင်(၁၀၀၀)မွေးမြူရန် ခြံဆောက်ခအနေဖြင့် တာပေါ်လင်၊ အမိုးဇာပိုက်၊ ဝါးဝယ်ယူကုန်ကျစရိတ်နှင့် ခြံဖိုးစုစုပေါင်း (၂၃၀၀၀၀)ကျပ်ခန့်ကုန်ကျ၍ ခြံမပျက်စီးမချင်း ဖားထည့်၍ မွေးမြူရပါသည်။

         ယခင်နှစ်များတွင် ဖားဈေးကောင်းရသော်လည်း ယခုနှစ်တွင် ဖားဝယ်ယူမှုလျော့နည်းလာခြင်း၊ အစာဈေးများမြင့်တက်လာခြင်းများကြောင့် ဖားမွေးမြူသူများမှာ ယခင်နှစ်များထက် လျော့နည်းခဲ့ကြောင်းသိရှိရပါသည်။

DOCA(ရန်ကုန်)