ပြည်တွင်းကုန်သွယ်မှုသတင်း

                ပြည်မြို့ရှိ လိမ္မော်သီးဈေးကွက်မှာ ဈေးနှုန်းများကျဆင်းခြင်းမရှိဘဲ ပုံမှန်ဈေးအတိုင်း အရောင်းအဝယ်ဖြစ်လျက်ရှိပါသည်။ လိမ္မော်ပင်များသည် ဒေသတစ်ခုနှင့် တစ်ခုစိုက်ပျိုးချိန်၊ မြေအနေအထား၊ ရာသီဥတုအခြေအနေ၊ ဒေသအနေအထားအရ အသီးသီးကွဲပြားပါသည်။ မတ်လနှင့် ဧပြီလတွင် စတင်အသီးသီးပြီး အောက်တိုဘာလတွင်အသီးများလှိုင်လှိုင်ထွက်ရှိပါသည်။ လိမ္မော်သီးအား တောင်ကြီးနှင့်လားရှိုးမြို့တို့တွင်စိုက်ပျိုးပြီး ဧရာဝတီတိုင်းဒေသကြီး၊ ဟင်္သာတမြို့နယ်များတွင်လည်း စီးပွားဖြစ်စိုက်ပျိုးကြပါသည်။ ပြည်မြို့နယ်အတွင်း ဝင်ရောက်လာသောလိမ္မော်သီးများမှာ တောင်ကြီး၊ အောင်ပန်းဒေသများမှဝင်ရောက်ပြီး၊ ဟင်္သာတမြို့နယ်များမှ ဝင်ရောက်သောအသီးများမှာ ပိဿာချိန်ဖြင့်ရောင်းချရသောအသီးများဖြစ်ပြီး ပြည်မြို့မှတစ်ဆင့် အခြားမြို့နယ်များသို့ပြန်လည်၍ လက်လီ/ လက်ကားရောင်းချကြောင်းသိရပါသည်။ ဈေးကွက်အတွင်း ရောင်းချလျက်ရှိသောလိမ္မော်သီးဈေးနှုန်းများမှာ အလုံးချောတစ်လုံးလျှင် (၁၅၀၀-၂၀၀၀)ကျပ်နှင့် အချိန်နှင့်ရောင်းချသော လိမ္မော်သီးဈေးနှုန်းများမှာ တစ်ပိဿာလျှင် (၁၅၀၀၀)ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

              ပြည်ဒေသရှိဈေးကွက်များတွင် ဝါးဥနှင့်ပီလောပီနံဥ(ခ)ကလောဥများ ရောင်းချလျက်ရှိပါသည်။ ဝါးဥကို ပုတီးကုန်း၊ သဲကုန်းဘက်မှဝင်ရောက်မှုရှိသလို ကလောဥကို ပန်းတောင်းမြို့နယ်နှင့်အခြားမြို့နယ်များမှ ဝင်ရောက်လျက်ရှိပါသည်။ ဝါးဥပင်ကို မိုးဦးကျကာလတွင်စိုက်ပျိုးပြီး ယခုလိုဆောင်းဦးရာသီဖြစ်သော နိုဝင်ဘာလဆန်းတွင် တူးယူ၍ရောင်းချကြပါသည်။ ယခုအချိန်တွင် ဝါးဥပေါ်စအချိန်ဖြစ်၍ ရောင်းချသောဈေးနှုန်းများမှာ တစ်ပိဿာလျှင် ၄၀၀၀ကျပ်ဖြင့်ရောင်းချပြီး နေ့စဉ် ပိဿာချိန် (၁၀)ပိဿာကျော်ဝင်ရောက်လျက်ရှိပြီး အရောင်းအဝယ်ဖြစ်လျက်ရှိပါသည်။ ပီလောပီနံဥ (ခ)ကလောဥကို ပန်းတောင်းမြို့နယ်၊ တည်ပင်ကျိုးကျေးရွာတွင် စီးပွားဖြစ်စိုက်ပျိုးပြီး စိုက်ပျိုးချိန်မှာ ကဆုန်လတွင်စိုက်ပျိုးပြီး စိုက်ပျိုးပြီး (၇)လအကြာတွင်ဖြစ်သော တန်ဆောင်မုန်းလတွင် စတင်တူးဖော်၍ရောင်းချကြပါသည်။ ပြည်ဈေးကွက်တွင်ရောင်ချသော ပီလောပီနံဥ(ခ)ကလောဥဈေးနှုန်းမှာ တစ်ပိဿာလျှင် ၂၀၀၀ကျပ်ဖြင့်ရောင်းချကြောင်းသိရှိရပါသည်။

DOCA(ပဲခူး)

               ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်း မြို့နယ်များနှင့် အခြားတိုင်းဒေသကြီးပြည်နယ်များရှိ ကိုယ်စားလှယ်များသို့ စားအုန်းဆီနေ့စဉ်ထုတ်ပေးလျက်ရှိပါသည်။ စားအုန်းဆီအား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည်ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေး ဈေးနှုန်းအဆမတန်မြှင့်တင်ရောင်းချခြင်းများ မပြုလုပ်စေရေးတို့အတွက်လည်း ဝန်ထမ်းများမှကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၄.၁၁.၂၀၂၄)ရက်နေ့မှ (၉.၁၁.၂၀၂၄) ရက်နေ့အထိ ဆီကုမ္ပဏီ(၁၁)ခုနှင့် စားအုန်းဆီတန်ချိန် (၆၀၉၅.၁၈၇)တန်ကို ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)

             ဧရာဝတီတိုင်း‌ဒေသကြီး၊ ဟင်္သာတခရိုင်၊ ဇလွန်မြို့နယ်တွင် ဒေသထုတ်ကုန်ဖြစ်သော ပဲကြွပ်ကြော်လုပ်ငန်းအား မိသားစုတစ်နိုင်တစ်ပိုင်လုပ်ငန်းအဖြစ် ထုတ်လုပ်ရောင်းချလျက်ရှိရာ မိမိတို့ဒေသဈေးကွက်အပြင် ခရိုင်အတွင်း၊ တိုင်းအတွင်း မြို့နယ်များသို့  ဖြန့်ဖြူးရောင်းချလျက်ရှိပြီး၊  ဒေသလက်ဆောင်အဖြစ်လည်းရောင်းချရကြောင်း  ဇလွန်မြို့နယ်ဦးစီးမှူးရုံးမှ စစ်ဆေးရေးအရာရှိ ဒေါ်စိမ်းမြသီတာမှ (၇.၁၁.၂၀၂၄)ရက်နေ့ နံနက် (၁၀:၀၀)နာရီအချိန်တွင် ကွင်းဆင်းလေ့လာခဲ့ပါသည်။

                ပဲကြွပ်ကြော်ပြုလုပ်ရာတွင် အဓိကကုန်ကြမ်းအဖြစ် ပဲနီပြား၊ ဆီ၊ ဆား တို့ကိုအသုံးပြုပါသည်။ အဓိကအသုံးပြုသောပဲနီပြားကို ဟင်္သာတခရိုင်နှင့် မြန်အောင်ခရိုင်မှဝယ်ယူပြီး တစ်ပတ် လျှင် (၆)တင်းခန့်ကြော်ရကြောင်း သိရှိရပါသည်။ ပဲနီပြားခြောက်တင်းလျှင် ဆီ၊ ဆား၊ ထင်းနှင့် လုပ်သားခ၊ ပလပ်စတစ်ထုတ်ပိုးမှုအပါအဝင် (၁၁၇၀၀၀၀/-)ခန့်ကုန်ကျကြောင်း၊ အထုပ်ကြီး၁ထုပ် လျှင် ၅၇၀၀ ကျပ်၊ အလတ်တစ်ထုပ်လျှင်   ၁၅၀၀ ကျပ်နှင့် အသေးတစ်ထုပ်လျှင် ၈၀၀ ကျပ်ရောင်း ချရပါသည်။   ပဲနီပြားခြောက်တင်းကုန်လျှင် ၁၂၅၀၀၀၀/- ဝန်းကျင်ရရှိပြီး၊ အကျိုးအမြတ်အနေဖြင့် (၈၀၀၀၀/-ကျပ်)ရရှိပါသည်။   ပဲကြွပ်ကြော်ပြုလုပ်ရာတွင် ပဲနီပြားကို ရေ၊ ဆော်တာနှင့် တစ်ရက်စိမ်ရပြီး၊ နောက်တစ်ရက်ပြန်ဖြန့်ကာ တတိယမြောက်နေ့တွင် ဆီ၊ ဆားနှင့် ကြော်ကာ အအေးခံ၍ထုတ်လုပ်ပါသည်။ မိုးတွင်းကာလများတွင် ရောင်းအားအနည်းငယ်သာရောင်းချရပြီး၊ နွေဦးကာလများတွင် ဘုရားဖူးလာသူများမှ အိမ်ပြန်လက်ဆောင်၊ ဒေသလက်ဆောင်အဖြစ်ဝယ်ယူခြင်းကြောင့် ရောင်းအားပိုမိုကောင်းမွန်ကြောင်းသိရှိရပါသည်။  မိသားစုလုပ်ငန်းဖြစ်သည့်အတွက် သင့်တင့်မျှတသောအကျိုးအမြတ်ရရှိပါသည်။ စားသုံးသူများကြိုက်နှစ်သက်သော ဒေသအစားအစာတစ်မျိုးဖြစ်ပြီး မြို့နယ်အတွင်း၊ ခရိုင်အတွင်းနှင့် အခြားတိုင်းဒေသကြီးများသို့ ဒေသလက်ဆောင်အဖြစ်  ဝယ်ယူစားသုံးမှုမြင့်တက်လျက်ရှိကြောင်းသိရှိပါသည်။

DOCA(ဧရာဝတီ)

    တနင်္သာရီတိုင်းဒေသကြီး၊ မြိတ်ခရိုင်တွင် ကြက်သွန်နီများကို စိုက်ပျိုးထွက်ရှိခြင်းမရှိသောကြောင့် ဒေသတွင်း စားသုံးရန်အတွက် ရန်ကုန်မြို့ရှိ ပွဲရုံများမှ အများဆုံးဝယ်ယူ၍ မြိတ်မြို့သို့ ကားလမ်းဖြင့် အများဆုံးသယ်ယူလျက်ရှိကြောင်း သိရှိရပါသည်။

    ယခင်လများတွင် ကြက်သွန်နီတစ်ပိဿာစျေးနှုန်း(၃၈၀၀)ကျပ်ခန့်ရှိရာမှ ယခုလတွင် သယ်ယူပို့ဆောင်စရိတ်မြင့်လာခြင်းနှင့် ကြက်သွန်(အဟောင်း) ရှားပါခြင်းများကြောင့် စျေးနှုန်းအနည်း ငယ်မြင့်တက်လာခဲ့ပြီး ကြက်သွန်နီတစ်ပိဿာစျေးနှုန်း(၅၀၀၀)ကျပ်ခန့်ရှိလာခဲ့ကြောင်း သိရှိရပါသည်။ (၁၂.၁၁.၂၀၂၄)ရက်နေ့တွင် ကြက်သွန်နီ(၁၀)ပိဿာဝင်(၁)အိတ်လျှင် လက်ကားစျေး (၄၉၀၀၀)ကျပ်၊ လက်လီဆိုင်များတွင် တစ်ပိဿာလျှင် (၅၅၀၀) ကျပ်ဖြင့်ရောင်းချနေကြောင်း သိရှိရပါသည်။

DOCA(တနင်္သာရီ)