မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံ တစ်နှစ်ပတ်လုံးစိုက်ပျိုးကြပါသည်။ မိသားစု တစ်နိုင်တစ်ပိုင်မှသည် စီးပွားဖြစ်ဝင်ငွေတိုးသောပဲမြစ်သီးနှံကိုလည်း တောင်သူကြီးများတိုးချဲ့စိုက်ပျိုးလာကြပါသည်။ သီးနှံများဖြိုင်ဖြိုင်ထွက်ပေါ်လျက်ရှိရာ ပဲစောင်းလျားသီးများလည်းထွက်ပေါ်လျက်ရှိပါသည်။ ပဲမြစ်ညွန့်လည်းစျေးကောင်းရရှိခဲ့သလို ပဲစောင်းလျားသီး(ခ)ပဲမြစ်သီးစျေးမှာလည်း ယခင်နှစ် တွင်(၂၅)ကျပ်သားလျှင်(၅၀၀/-)ကျပ်ဖြင့်ရောင်းဝယ်ခဲ့ပြီး ယခုအချိန်တွင် (၂၅)ကျပ်သားလျှင် (၁၀၀၀/-)ကျပ်စျေးနှုန်းဖြင့်ရောင်းဝယ်လျက်ရှိပါသည်။ ပဲစောင်းလျားသီးကို အခင်းထဲအရောက်လာရောက်၍ အခင်းပြတ်ဝယ်ယူသူများရှိသလို ကိုယ်တိုင်းခူး၍ မြို့ပေါ်ရှိ ကုန်စိမ်းဒိုင်များသို့သွားရောက်ရောင်းချကြကြောင်း၊ ပဲစောင်းလျားသီးကို အိမ်ရှင်မများမှ ပြုတ်၍ သုပ်စားကြသလို ငပိရည်နှင့်တွဲဖက်၍ အတို့အမြုပ်အဖြင့်လည်း စားသုံးကြပါသည်။ အချို့မှာ ငါးကလေးများဖြင့်ရော၍ အိုးကပ်ချက်စားကြသလို အချဉ်ရည်ဟင်းများထဲတွင်လည်းထည့်၍ ချက်ပြုတ်စားသောက်ကြကြောင်း၊ ယခုအချိန်တွင် ပဲစောင်းလျားသီးများပိုမိုအရောင်းသွက်နေကြောင်း ကုန်စိမ်းရောင်းချသူတစ်ဦး၏ ပြောကြားချက်အရ သိရှိရပါသည်။
DOCA(မန္တလေး)