ပြည်တွင်းကုန်သွယ်မှုသတင်း

          မိတ္ထီလာမြို့ဈေးကွက်တွင် ဒေသတွင်းထွက်ရှိသော ဗမာခရမ်းချဉ်သီး၊ ထိုင်ဝမ်သီး ခရမ်းချဉ်သီးနှင့် ရှမ်းပြည်နယ်အောင်ပန်းဘက်မှလာသော ရှမ်းသီးများ ရောင်းဝယ်ဖောက်ကား လျက်ရှိပါသည်။ မိတ္ထီလာမြို့နယ်တွင် ခရမ်းချဉ်သီးကို ရွာကန်၊ဂွေ့အိုင်၊ရွာသစ်၊မကျီးကုန်း၊ ကျောက်ဖူး၊ မယ်ဇလီကုန်း၊ ကံတောင်၊ကျေးရွာများတွင် မိသားစုအပိုဝင်ငွေ ရရှိအောင် တစ်နိုင်တစ်ပိုင် စိုက်ပျိုး ရောင်းချကြရာ ယခုအခါ ဈေးကွက်အတွင်း ခရမ်းချဉ် သီးဈေးကောင်းရ၍ ခရမ်းချဉ်သီး (ပြည်ပ) မျိုးများကို တစ်နှစ်သုံးကြိမ် စိုက်ပျိုး ကြောင်းသိ ရပါသည်။ မိုးရာသီ ဇွန်လတွင် စိုက်ပျိုးကြပြီး သြဂုတ်လ နှင့်အောက်တိုဘာ၊ နိုဝင်ဘာလ များတွင်လည်း စိုက်ပျိုးကြကြောင်း၊ ခရမ်းချဉ်သီးစိုက်ပျိုးရာ တွင် ဧကလိုက် စိုက်ပျိုးခြင်းနည်းပြီး တစ်ပိုင်တစ်နိုင်ပျိုးထုတ် အလိုက်စိုက်ပျိုးကြကြောင်း၊ ခရမ်းချဉ် သီးမျိုးများမှ Sungenta ကုမ္ပဏီမှ (111) တံဆိပ်နှင့် ချီရာထိုင်းကုမ္ပဏီမှ (100) တံဆိပ်၊ (909)တံဆိပ်မျိုးများကို အများဆုံးစိုက်ပျိုးကြကြောင်း၊ (111) တံဆိပ်မျိုးစေ့ (5kg) တစ်ထုပ်လျှင် (၃၆၀၀၀) ကျပ် နှင့် (100) တံဆိပ်မျိုးစေ့ (5 kg) တစ်ထုပ်လျှင် (၂၈၀၀၀) ကျပ်၊ (909)တံဆိပ်(5 kg) တစ်ထုပ်လျှင် (၃၃၀၀၀) ကျပ်ဈေးရှိပြီးအပင်ပေါက်နှုန်း(၈၀%)ခန့်ရှိကြောင်းသိရပါသည်။

             ခရမ်းချဉ်သီးစိုက်ပျိုးရာတွင်  မျိုးစေ့တစ်ထုပ်လျှင်မြေ(၀.၁၅)ဧက ပေါ်တွင် ပျိုးပင် (၁၂၀၀) ခန့် စိုက်ပျိုးနိုင်ပြီး ပျိုးပင်(၂၀) ရက်သားခန့်တွင် ပြောင်းရွေ့ စိုက်ပျိုးရပါကြောင်း၊ ပျိုးအိတ် တစ်ပေါင်ခွဲ တစ်ထုပ်လျှင်(၆၃၀၀) ကျပ်ရှိကြောင်း၊ ပြောင်းရွေ့စိုက်ပျိုးရန် ထွန်ယက်ခြင်း၊ မြေပြု ပြင်ခြင်း၊ တန်းဆွဲခြင်း၊ ရေတင်ခြင်း၊ ဘောင်တင်စိုက်ပျိုးခြင်းတို့အတွက် လုပ်သားခ  (၂၂၀၀၀၀)ကျပ်၊ သွင်းအားစု မြေဩဇာကို သုံးကြိမ်ကျွေးရပြီး သွင်းအားစုနှင့် ပိုးသတ်ဆေး၊ မှိုရောဂါကာကွယ်ဆေး၊ အပင်၊ အသီး၊ အပွင့်အားဆေးများ အသုံးပြုခြင်းအတွက် (၂၅၀၀၀၀) ကျပ်၊ ခရမ်းချဉ်သီး တိုင်ထောင် ခြင်းအတွက် တိုင်(၄၅၀)လုံးအသုံးပြုရပြီး တိုင်နှင့်ကြိုးတန်ဖိုး(၁၅၀၀၀၀)ကျပ်၊ ခူးဆွတ်သည့် လုပ်အား ခအနေဖြင့် (၁၀၀၀၀၀) ကျပ်ခန့်ကုန်ကျပြီး စုစုပေါင်း (111) တံဆိပ်မျိုးစေ့ထုပ်တစ်ထုပ်စိုက်ပျိုးလျှင် (၇၆၂၃၀၀) ကျပ် ကုန်ကျစရိတ်ရှိကြောင်းသိရပါသည်။ မျိုးစေ့တစ်ထုပ်လျှင် အပင်ဖြစ်ထွန်းမှု (၁၂၀၀) ပင်ရှိပြီး၊ စတင်စိုက်ပျိုးပြီးရက်ပေါင်း(၇၅)ရက်တွင်စတင်ခူးဆွတ်ရပြီး ခူးဆွတ်ကာလမှ (၂)လခန့်ထိ ခူးဆွတ်နိုင်သဖြင့် မျိုးစေ့တစ်ထုပ် စိုက်လျှင် ခရမ်းချဉ်သီး (၂၀၀၀) ပိဿာထွက်ရှိပါသည်။

           မိတ္ထီလာမြို့ရှိ ခရမ်းချဉ်သီးပွဲရုံများသို့ တင်ပို့ရောင်းချကြပြီး၊ ယခုလက်ရှိတွင် ဒေသတွင်း အောက်တိုဘာလမှ စိုက်ပျိုးသော ခရမ်းချဉ်သီးများဈေးကွက်ဝင်ရောက်လာသဖြင့် ရှမ်းပြည်နယ်ဘက်မှ အဝင်နည်းလာကြောင်း၊ ဒေသထွက် ခရမ်းချဉ်သီးများကို မိတ္ထီလာခရိုင်အတွင်း မြို့နယ်များသို့ ရောင်းချကြပြီး  ပွဲရုံသွင်းဈေး တစ်ပိဿာလျှင် (၁၅၀၀) ကျပ်ခန့်၊ လက်လီဈေးကွက်တွင် ဗမာခရမ်းချဉ်သီးတစ်ပိဿာလျှင် (၂၅၀၀-၃၀၀၀)ကျပ်၊ ထိုင်ဝမ်းသီး တစ်ပိဿာလျှင် (၃၀၀၀-၃၅၀၀) ကျပ်ဈေးခန့်ရှိသဖြင့် ခရမ်းချဉ်စိုက်တောင်သူများလည်း အကျိုးအမြတ်များစွာရရှိကြောင်း ခရမ်းချဉ်စိုက်တောင်သူများထံမှ သိရှိရပါသည်။

DOCA(မန္တလေး)

           မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်တွင် မြေပဲ၊ နှမ်း၊ ပဲတီစိမ်း၊ ပဲစင်းငုံနှင့် ဝါသီးနှံများကို စိုက်ပျိုးလျက်ရှိရာ ပန်းတော်ပြင်၊ မယ်ဇလီတော၊ ကုန်းကြီး၊ ဂျင်ရဲမြောင်(စံပြ)၊ ဇီးတော၊ ဘွဲ့ စသည့်ကျေးရွာများတွင် ဝါသီးနှံများကို အဓိကစိုက်ပျိုးလျက်ရှိပြီး  ဇီးတော ကျေးရွာ၌ ၂၀၂၄ခုနှစ်၊ ဩဂုတ်လတွင် ဝါစိုက်ဧက(၁၀)ဧကခန့် စိုက်ပျိုးခဲ့ပြီး ယခု၂၀၂၅ခုနှစ်၊ ဇန်နဝါရီလတွင် စတင်ထွက်ပေါ်နေပြီဖြစ်ကြောင်း သိရသည်။

          ဝါသီးနှံများ စိုက်ပျိုးရာတွင် သီးညှပ်စိုက်ပျိုးခြင်းနှင့် သီးသန့်စိုက်ပျိုးခြင်းဟူ၍ စိုက်ပျိုးကြပြီး  သီးသန့်စိုက်ပျိုးခြင်းကို အများဆုံးစိုက်ပျိုးကြကြောင်း၊ စိုက်ပျိုးမှုအနေဖြင့် ဩဂုတ်လတွင် စတင်စိုက်ပျိုးကြပြီး မျိုးများအနေဖြင့် ဒေသမျိုး ငွေချည်-၉၊ ငွေချည်-၆နှင့် ၆၆၆ စသည့်မျိုးများကို စိုက်ပျိုးကြကြောင်း၊ ဝါသီးနှံ တစ်ဧကလျှင် မျိုးစေ့ ၉ ပိဿာခန့် စိုက်ပျိုးရပြီး စိုက်ပျိုးမှုကုန်ကျစရိတ်အနေဖြင့် ထွန်ယက်ခ၊ မျိုးစေ့၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်းငွေကျပ် ၅ သိန်းခန့် ကုန်ကျကြောင်း၊ ယခင်နှစ် အထွက်နှုန်းအနေဖြင့် တစ်ဧကတွင် ပိဿာချိန် ၃၅၀ ခန့် ထွက်ရှိပြီး ယခုနှစ်တွင်မူ (၁)ဧကလျှင် ပိဿာချိန်(၅၀၀)ခန့်ထွက်ရှိကြောင်း၊ ဈေးနှုန်းအနေဖြင့် ဝါသီးနှံပေါ်စအချိန်တွင် တစ်ပိဿာလျှင် ငွေကျပ် ၅၀၀၀ ခန့်ဖြင့် အရောင်းအဝယ်ဖြစ်ခဲ့ပြီး ယခု ၂၀၂၅ခုနှစ်၊ ဇန်နဝါရီလ (ဒုတိယပတ်)တွင် ဝါတစ်ပိဿာလျှင် ကျပ်(၄၅၀၀)ဖြင့် အရောင်းအဝယ်ဖြစ်ခဲ့ရာ အကျိုးအမြတ်အနေဖြင့် ငွေကျပ်(၁၇)သိန်းခန့် ရရှိကြောင်း သိရသည်။

          ဈေးကွက်အနေဖြင့် ဝါသီးနှံများကို မင်းလှမြို့ပေါ်ရှိ ဝါသီးနှံပွဲရုံများသို့ တင်ပို့ရောင်းချကြောင်း၊  ဝါသီးနှံသည် စိုက်ပျိုးရန်လွယ်ကူပြီး မိုးသီးနှံဖြစ်သည့်အတွက် မိုးတွင်းကာလမှာ စိုက်ပျိုးကာ မိုးကောင်းသောနှစ်များတွင် အထွက်နှုန်းပိုမိုထွက်ရှိကြောင်း၊ ယခုနှစ်တွင်မူ ယခင်နှစ်ကထက် ဝါအထွက်နှုန်းကောင်းမွန်ပြီး ဈေးကောင်းလည်းရရှိသောကြောင့် ဝါစိုက်တောင်သူများအနေဖြင့် ထိုက်သင့်သည့် အကျိုးအမြတ်များရရှိလျက်ရှိကြောင်း သိရှိရပါသည်။

DOCA(မကွေး)

             မကွေးတိုင်းဒေသကြီး၊ မြို့သစ်မြို့နယ်၊ စစ်တလင်းအုပ်စုရှိ ကွင်းကျေးရွာသည် နှမ်း၊ မြေပဲ၊ ပြောင်း၊ ကြက်သွန်နီနှင့် ပဲမျိုးစုံစသည့် သီးနှံများကို ရာသီအလိုက် စိုက်ပျိုးလျက်ရှိသည်။ စားဖိုဆောင် သီးနှံတစ်မျိုးဖြစ်သော ကြက်သွန်နီကို ဥစိုက်နှင့် ပင်စိုက်ဟူ၍ စိုက်ပျိုးကြပြီး ၂၀၂၄ ခုနှစ်၊ နိုဝင်ဘာလ (ပထမပတ်)တွင်  ကြက်သွန်နီ(ဥစိုက်) စိုက်ဧက (၁၀၀)ခန့် စိုက်ပျိုးထားကြောင်း သိရသည်။

            ကြက်သွန်နီကို စက်တင်ဘာလကုန်-နိုဝင်ဘာလဆန်းတွင် စတင်စိုက်ပျိုးပြီး ဇန်နဝါရီလတွင် တူးဖော်ရကြောင်း၊ မျိုးအနေဖြင့် ဇော်မွှားဥစိုက်နှင့် ကြမ်းကျွံဥစိုက် (ယခင်နှစ်ကကျန်သောဥသေး) တို့ဖြစ်ပြီး (ဇော်မွှားဥစိုက်)မျိုးကို အများဆုံးစိုက်ပျိုးကြောင်း၊ မျိုးဥအရွယ်အစား ပေါ်မူတည်၍ တစ်ဧကလျှင် ပိဿာချိန် ၃၅၀-၄၅၀ ခန့် စိုက်ပျိုးရကြောင်း၊ စိုက်ပျိုးရာတွင် ဘောင်လယ်ကွက်ကို ရေသွင်းစနစ်ဖြင့် အများဆုံးစိုက်ပျိုးကြကြောင်း၊ စိုက်ပျိုးမှုကုန်ကျစရိတ်အတွက် (မျိုး၊ သွင်းအားစု၊ လုပ်သားခ၊ မြေပြုပြင်ထွန်ယက်ခ) အပါအဝင် ငွေကျပ် ၃၂ သိန်းခန့် ကုန်ကျကြောင်း၊ အထွက်နှုန်း အနေဖြင့် တစ်ဧကလျှင် ပိဿာချိန် ၂၃၀၀-၂၈၀၀ ခန့် ထွက်ရှိပြီး ကြက်သွန်နီပေါ်စတွင် တစ်ပိဿာ လျှင် ကျပ် ၃၀၀၀-၃၃၀၀ ဈေးနှုန်းဖြင့် အရောင်းအဝယ်ဖြစ်ခဲ့ရာ ငွေကျပ် ၃၇ သိန်း ခန့် အကျိုးအမြတ်ရရှိကြောင်း သိရသည်။

          ဈေးကွက်အနေဖြင့် မကွေးမြို့နှင့် တောင်တွင်းကြီးမြို့များရှိ ကြက်သွန်နီပွဲရုံများသို့ တင်ပို့‌ရောင်းချကြောင်းနှင့်  ပြည်မြို့သို့လည်း သွားရောက်ရောင်းချကြောင်း၊ ထိုပွဲရုံများမှ တဆင့် ရန်ကုန်၊ ဘုရင်နောင်ပွဲရုံသို့တင်ပို့ကြောင်း၊ ယခင်နှစ်ထက် အထွက်နှုန်း အနည်းငယ် လျော့နည်းသော်လည်း ဈေးကောင်းရသောကြောင့် တောင်သူများအဆင်ပြေလျက်ရှိကြောင်း သိရှိရပါသည်။

DOCA(မကွေး)

          မကွေးတိုင်းဒေသကြီး၊ ဆိပ်ဖြူမြို့နယ်အတွင်းရှိ ဒေသခံတောင်သူများသည် နှစ်စဉ် ကိုင်းကျွန်း မြေနှင့် ကုန်းတွင်းပိုင်းမြေမာများတွင် မိုးကြက်သွန်နီ(ဥစိုက်) ဧက(၉၀၀)ခန့်ဒေသစီးပွားဖြစ် နှစ်စဉ် စိုက်ပျိုးကြကြောင်း၊ ယခင်နှစ်က ကြက်သွန်နီဈေးကွက်ခိုင်မာပြီး ဈေးကောင်းရရှိခြင်းကြောင့် ယခု နှစ်တွင် စိုက်ဧက(၁၀၀၀)ခန့်ထိ တိုးချဲ့စိုက်ပျိုးကြောင်း၊ စိုက်ပျိုးမှုအနေဖြင့် အောက်တိုဘာလဆန်းမှ နိုဝင်ဘာလကုန်ထိ စိုက်ပျိုးကြပြီး ဒီဇင်ဘာလလယ်မှ ဇန်နဝါရီလကုန်ထိ တူးဖော်ရိတ်သိမ်းရကြောင်း၊ ယခုနှစ်တွင် ဈေးနှုန်းအနေဖြင့် သီးနှံပေါ်ချိန် ၂၀၂၄ခုနှစ်၊ ဒီဇင်ဘာလအစောပိုင်းတွင် အရောင်းအဝယ် ဖြစ်သော ကြက်သွန်နီဈေးနှုန်းမှာ သီးနှံအရည်အသွေးလိုက်၍ မိုးကြက်သွန်နီ(အသစ်)တစ်ပိဿာလျှင် ပွဲရုံပြတ်ဈေး ကျပ်(၂၅၀၀-၂၆၅၀-၂၈၀၀)ဈေးအသီးသီးဖြင့် အရောင်းအဝယ်ဖြစ်ခဲ့ပြီး ၂၀၂၅ခုနှစ်၊ ဇန်နဝါရီလ(ပထမပတ်)တွင် တစ်ပိဿာလျှင် ကျပ်(၃၁၅၀)ထိဈေးတက်ပြီး အရောင်းအဝယ်ဖြစ် ကြောင်း၊ ယခင်နှစ်က သီးနှံပေါ်ချိန် ဈေးကွက်တွင် တစ်ပိဿာလျှင် ကျပ်(၂၂၀၀-၂၅၀၀)ဈေးဖြင့် အရောင်းအဝယ်ဖြစ်ကြောင်း၊ ယခုနှစ်တွင် ပြည်တွင်းဈေးကွက်အပြင် ပြည်ပဝယ်လိုအားကောင်း၍ ဈေးနှုန်းတရိပ်ရိပ်မြင့်တက်လျက်ရှိကြောင်း ဈေးကွက်မှ သိရသည်။

          ယခုနှစ် မိုးကြက်သွန်နီ(ဥစိုက်)တစ်ဧကစိုက်ပျိုးရာတွင် စိုက်ပျိုးချိန်မှ သီးနှံရိတ်သိမ်းချိန်ထိ ရာသီ ဥတုအနေအထားကောင်းမွန်ခြင်းကြောင့် သီးနှံပျက်စီးမှုနည်း၍ ကြက်သွန်နီအထွက်ကောင်း ကြောင်း၊ တစ်ဧကလျှင် ပျမ်းမျှပိဿာ(၄၀၀၀-၄၅၀၀)ခန့် ထွက်ရှိကြောင်း၊ ကုန်ကျစရိတ်အနေဖြင့် သွင်းအားစု အမျိုးမျိုးဝယ်ယူခ၊ အလုပ်သမားငှားရမ်းခ ကြီးမြင့်ခြင်းကြောင့် ကျပ်(၃၈-၄၀)သိန်းခန့် ကုန်ကျကြောင်း၊ မိုးကြက်သွန်နီတစ်ပိဿာလျှင် ကျပ်(၂၆၅၀)ဈေးဖြင့် ရောင်းချရပါကတစ်ဧကလျှင် ကျပ်(၁၀၆)သိန်းခန့် ဝင်ငွေရရှိ၍ အကျိုးအမြတ်အနေဖြင့် (၆၆)သိန်းခန့် ရရှိကြောင်း၊ မိုးကြက်သွန်နီ (ဥစိုက်)တောင်သူများ ကြက်သွန်နီဥတူးဖော်ရောင်းချချိန်တွင် ဝယ်လိုအားဈေးကွက်အပေါ် မူတည်ပြီး နေ့စဉ်နှင့်အမျှ ဈေးနှုန်း ပြောင်းလဲမှုရှိသည့်အတွက် တောင်သူတစ်ဦးချင်းစီ၌ အကျိုးအမြတ်ရရှိပုံမတူညီကြောင်း ဒေသခံ တောင်သူတစ်ဦးထံမှ သိရသည်။

          ဈေးကွက်အနေဖြင့် ဆိပ်ဖြူမြို့နယ်မှ ထွက်ရှိသည့် ကြက်သွန်နီများကို ရန်ကုန်ဘုရင့်နောင် ပွဲရုံသို့ အဓိကတင်ပို့ပြီး ထိုမှတစ်ဆင့် ပြည်တွင်းနေရာအနှံ့အပြားသို့ တင်ပို့လျက်ရှိကြောင်း၊ ပြည်ပပို့ကုန် အဖြစ် မြဝတီ၊ မော်လမြိုင်၊ မူဆယ်မြို့ ဝယ်လက်များမှတစ်ဆင့် ထိုင်း၊ ဗီယက်နမ်၊ တရုတ်၊ အိန္ဒိယ၊ ဘင်္ဂလားဒေရှ့် နိုင်ငံများသို့ တင်ပို့လျက်ရှိရာ ပြည်တွင်းပြည်ပ ဈေးကွက်ခိုင်မာမှုရရှိပြီး မိမိဒေသစီးပွား ဖွံ့ဖြိုးရေးနှင့် နိုင်ငံတော်၏အကျိုးစီးပွားကို အထောက်အပံ့ဖြစ်စေသည့် ပြည်ပပို့ကုန် ကြက်သွန်နီသီးနှံ ကို ဆိပ်ဖြူမြို့နယ်ရှိ စိုက်တောင်သူများမှ ဒေသစီးပွားဖြစ် နှစ်စဉ်စိုက်ပျိုးလျက်ရှိကြောင်း သိရှိရပါသည်။

DOCA(မကွေး)

          မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်၊ စားသုံးသူရေးရာဦးစီးဌာနမှ မြို့နယ် တာဝန်ခံသည် (၈.၁.၂၀၂၅)ရက်နေ့၊ နံနက်(၀၉:၀၀)နာရီအချိန်တွင် ချောက်မြို့ပေါ်ရှိ အိမ်ဆောက်ပစ္စည်း ရောင်းချသည့်ဆိုင်များတွင် ဘိလပ်မြေရောင်းချမှုအခြေအနေများအား ကွင်းဆင်းစစ်ဆေးခဲ့ကြောင်း သိရ သည်။

          ထိုသို့ ကွင်းဆင်းစစ်ဆေးရာတွင် ချောက်မြို့နယ်အတွင်းရောင်းချနေသော ဘိလပ်မြေအရောင်း ဆိုင်များတွင် ဘိလပ်မြေဝယ်ယူရရှိမှုအခြေအနေ၊ ဘိလပ်မြေအမျိုးအစားများ၊ တစ်အိတ်ချင်းစီ၏ တစ်အိတ်စျေးနှုန်း၊ ပစ္စည်းပြတ်လပ်မှုရှိ/မရှိ၊ ကုန်ပစ္စည်းလက်ကျန်အခြေအနေများကို မေးမြန်းစစ်ဆေး ခဲ့ပြီး ဘိလပ်မြေဈေးနှုန်းများအနေဖြင့် အပါချီနှင့် အယ်လဖာ ကျပ်(၁၅၀၀၀)ဖြင့် ရောင်းချလျက် ရှိကြောင်း၊ ချောက်မြို့ပေါ်တွင် အိမ်ဆောက်ပစ္စည်းရောင်းချသည့် ဆိုင်(၅)ဆိုင်ရှိပြီး လက်ရှိအခြေအနေ တွင် ဘိလပ်မြေမှာယူရာတွင်အခက်အခဲရှိခြင်း၊ ဘိလပ်မြေစျေးနှုန်း အတက်အကျမတည်ငြိမ်ခြင်းများရှိ ကြောင်း ရောင်းချသူများထံမှ သိရှိရပါသည်။

DOCA(မကွေး)