ပြည်တွင်းကုန်သွယ်မှုသတင်း

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးနှင့် အသီးမျိုးစုံရောင်းချနေသည့်ဆိုင်များတွင် စတော်ဘယ်ရီသီးများကို လှိုင်လှိုင်ရောင်းချနေကြောင်း သိရသည်။ ရာသီပေါ် စတော်ဘယ်ရီများကို  မန္တလေးတိုင်းဒေသကြီး၊ ပြင်ဦးလွင်မြို့မှ  ဝယ်ယူရောင်းချ လျက်ရှိ‌ကြောင်း သိရသည်။

             စတော်ဘယ်ရီကို သရေစာအဖြစ်လည်းကောင်း၊ ဖျော်ရည်အဖြစ်ပြုလုပ်၍လည်းကောင်း အများဆုံးစားသုံးကြကြောင်း၊ ၂၀၂၅ ခုနှစ်၊ ဇန်နဝါရီလ ဒုတိယပတ်အတွင်း ရောင်းချနေသော စတော်ဘယ်ရီသီးဈေးနှုန်းများမှာ စတော်ဘယ်ရီသီး(၂၅)ကျပ်သားလျှင် (၈၀၀၀)ကျပ်နှင့် စတော်ဘယ်ရီသီး (၁)ပိဿာလျှင် (၃၂၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ လူကြီးလူငယ်မရွေး ကြိုက်နှစ်သက်သောကြောင့် ရောင်းအားကောင်းကြောင်း ကန့်ဘလူမြို့တွင် ရောင်းချလျက်ရှိသော သစ်သီးဆိုင်များမှ သတင်းရရှိပါသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးနှင့် အသီးမျိုးစုံရောင်း ချနေသည့်ဆိုင်များတွင် နှင်းသီး(ခေါ်)လောင်ကန်သီများကို လှိုင်လှိုင်ရောင်းချနေကြောင်း သိရသည်။ နှင်းသီး(ခေါ်)လောင်ကန်သီးများကို  စစ်ကိုင်းတိုင်းဒေသကြီး၊ စစ်ကိုင်းမြို့မှဝယ်ယူ ရောင်းချလျက်ရှိ‌ကြောင်း သိရသည်။

         နှင်းသီး(ခေါ်)လောင်ကန်သီးသည် အရည်ရွှမ်း၍ ချိုပြီးအရသာရှိသော အသီးဖြစ်သောကြောင့် သရေစာအဖြစ် စားသုံးကြကြောင်း၊ ၂၀၂၅ခုနှစ်၊ ဇန်နဝါရီလ ဒုတိယပတ်အတွင်း ရောင်းချနေသော နှင်းသီး(ခေါ်)လောင်ကန်သီးဈေးနှုန်းမှာ နှင်းသီး(ခေါ်)လောင်ကန်သီး (၂၅) ကျပ်သားလျှင် (၅၀၀၀)ကျပ်နှင့် နှင်းသီး(ခေါ်)လောင်ကန်သီး (၁)ပိဿာလျှင် (၂၀၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ လူကြီးလူငယ်မရွေး ကြိုက်နှစ်သက်သောကြောင့် ရောင်းအားကောင်းကြောင်း ကန့်ဘလူမြို့တွင် ရောင်းချလျက်ရှိသော သစ်သီးဆိုင်များမှ သတင်း ရရှိပါသည်။

DOCA(စစ်ကိုင်း)       

          ထားဝယ်မြို့တွင် စားဖိုးဆောင်သီးနှံဖြစ်သော ငရုတ်သီးကို ဒေသတွင်း လက်လီ/ လက်ကား သမား များဖြင့်သာ အ‌ရောင်းအဝယ်ပုံမှန်ဖြစ်လျက်ရှိပါသည်။ ငရုတ်သီးခြောက်ကို ထားဝယ်မြို့ရှိ ပွဲရုံများမှ တစ်ဆင့် စျေးများ၊ ကုန်စုံဆိုင်များ၊ ကျေးရွာများသို့ လက်လီ/လက်ကားရောင်းချကြောင်း သိရှိရပါသည်။ စားဖိုဆောင်သီးနှံဖြစ်သည့် ငရုတ်သီးခြောက်ကို ရန်ကုန်ပွဲရုံများမှ တစ်ဆင့်သယ်  ယူရောင်းချလျက်ရှိပါသည်။

လက်ရှိစည်ပင်သာယာစျေးအတွင်း ဖြစ်ပေါ်နေသော ငရုတ်သီးခြောက် စျေးနှုန်းမှာ ယခု ဇန်နဝါရီလ ဒုတိယအပတ်အတွင်း ငရုပ်သီး(အပုခြောက်)တစ်ပိဿာလျှင် (၁၈၀၀၀)ကျပ်၊ ငရုတ်သီး (အရှည်ခြောက်) တစ်ပိဿာလျှင် (၁၈၀၀၀)ကျပ်တို့ရှိကြောင်း သိရှိရပါသည်။

DOCA(တနင်္သာရီ)

ထားဝယ်စျေးကွက်တွင် ယခုပတ်အတွင်း ကြက်သွန်နီစျေးနှုန်းမြင့်တက်နေကြောင်း ပွဲရုံနှင့် အိမ်ရှင်များထံမှ သိရှိရပါသည်။ ကြက်သွန်နီစျေးမှာ ပြီးခဲ့သည့်လပိုင်းက ၁၀ပိဿာဝင်တစ်အိတ် လျှင်အများဆုံးကျပ် ၂၉၀၀၀ကျော်အထိသာရှိသော်လည်း ယနေ့ထားဝယ်စျေးကွက်တွင် လေး သောင်းကျပ်အထိ ရောင်းချနေကြကြောင်း လောင်းလုံးမြို့နယ်မှ အိမ်ရှင်မတစ်ဦးထံမှ သိရှိရ ပါသည်။ ကြက်သွန်နီစျေးသည် ထားဝယ်မြို့တွင် တရိပ်ရိပ်တက်လာကြောင်း စားသုံး ကုန်စည်ရောင်းချသူ များထံမှ သိရှိရပါသည်။ ပြီးခဲ့သည့်နှစ် ကထိန်ရာသီဖြစ်သည့်အောက်တိုဘာလ တွင်ကြက်သွန်နီ တစ်ပိဿာလျှင် (၃၅၀၀)ကျပ်နှင့် နိုဝင်ဘာလတွင် (၄၀၀၀)ကျပ်၊ ကြက်သွန်နီ အဟောင်းပြတ်ချိန် ဒီဇင်ဘာလတွင် (၅၀၀၀)ကျပ်ထိ အမြင့်ဆုံးတက်သွားကြောင်း သိရှိရပါသည်။

 ထားဝယ်မြို့အတွင်းရှိ စည်ပင်သာယာစျေးနှင့် ရပ်ကွက်စျေးငယ်များတွင်ယခုနှစ်တွင် ကြက်သွန်နီစျေးနှုန်းမှာ တစ်ပိဿာလျှင် (၄၆၀၀)ကျပ်နှင့်(၅၀၀၀)ထိ ရှိကြောင်းသိရှိရပါသည်။  ထားဝယ်မြို့အတွင်းရှိ ကြက်သွန်နီဝယ်လိုအားမှာလည်း ယခင်နှစ်ထက် များလျက်ရှိကြောင်း စားသုံး ကုန်စည်ရောင်းချသူများမှ သိရှိရပါသည်။

DOCA(တနင်္သာရီ)

          ၂၀၂၅ ခုနှစ်၊ ဇန်နဝါရီလ၊ ၁၄ ရက်နေ့၊ နံနက်(၁၁း၃၀)နာရီအချိန်တွင် စားသုံးသူရေးရာဦးစီးဌာနမှ စစ်ဆေးရေးအရာရှိနှင့်ဝန်ထမ်းများသည် ထားဝယ်မြို့ပေါ်ရှိ အိမ်ဆောက်ပစ္စည်းအရောင်းဆိုင်များသို့ သွား ရောက်၍ ဘိလပ်မြေစျေးနှုန်း၊ စျေးကွက်အခြေအနေများအား စျေးကွက်စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

          ထိုသို့စစ်ဆေးရာတွင် ထားဝယ်မြို့ပေါ်တွင် ယခု ဇန်နဝါရှိလ ဒုတိယအပတ် စျေးနှုန်းများမှာ ကြံ့ နှစ်ကောင်(နီ)တစ်အိတ်လျှင် ၂၃၅၀၀ ကျပ်ဝန်းကျင်အထိ စျေးတက်လျက်ရှိပြီး စျေးနှုန်းတက်လာရခြင်း မှာ မန္တလေးတိုင်းဒေသကြီးမှ ဘိလပ်မြေများအား အ‌ရောင်းကိုယ်စားလှယ်များမှ တစ်ဆင့်ဝယ်ယူလျက် ရှိပြီး ယခုအခါ အရောင်းကိုယ်စားလှယ်များသည် ဘိလပ်မြေစက်ရုံများမှ ခွဲတမ်းရရှိမှု နည်းပါးလာခြင်း၊ ဘိလပ်မြေအား ရေကြောင်းမှ သင်္ဘောဖြင့် သယ်ယူရာတွင် သင်္ဘောဝင်ရောက်မှုနည်းပါးခြင်း၊ ဒေသ တွင်းဝယ်လိုအား မြင့်တက်လာပြီး ရောင်းအားနည်းလာသဖြင့် စျေးနှုန်းများ မြင့်တက်မှု ဖြစ်ပေါ်လာရ ခြင်းဖြစ်ကြောင်း သိရှိရပါသည်။  

DOCA(တနင်္သာရီ)