ပြည်တွင်းကုန်သွယ်မှုသတင်း

  ငါးသလဲထိုးငါးသည် ရေချိုငါးစိတ်မျိုးများဖြစ်ကြသည်။ အရောင်မှာ ရွှေဝါရောင်ရှိပြီး အမဲရောင် အစက်အပျောက်များပါရှိသည်။ ငါးသလဲထိုးမှာ အသားနုပြီး အာဟာရဓါတ်အလွန်ပြည့်ဝ သော ရေထွက်ကုန်ဖြစ်၍ ရေထဲက ဂျင်စင်းဟု တင်စားခေါ်ဆိုကြသည်။ ကျန်းမာရေးနှင့်ညီညွတ်ပြီး အရိုးပါမကျန် စားသုံးနိုင်သော ငါးဖြစ်ပါသည်။

    ငါးသလဲထိုးငါးကို ငါးလေးအိုးအပ်ဟင်းအဖြစ် ရှေးယခင်က တောသူတောင်သား အစားအစား အဖြစ်လည်းကောင်း၊ ယခုအချိန်တွင် ရိုးရာအစားအစာအဖြစ် ဟိုတယ်ကြီးများ၊ စားသောက်ဆိုင်ကြီး များတွင် တခမ်းတနား ရောင်းချနေသည်ကို တွေ့ရသည်။

          ပြည်ဈေးကွက်တွင် ငါးသလဲထိုးငါးများ ရောင်းချနေသည်ကို တွေ့ရှိရပါသည်။ ပြည်မြို့၊ မှော်ဇာဘက်မှလာရောက်ရောင်းချကြောင်းသိရသည်။ငါးသလဲထိုးငါးဈေးနှုန်းများမှာ (၁၀)ကျပ်သား လျှင် (၄၀၀၀)ကျပ်ဖြင့် ရောင်းချပြီး (၁)ပိဿာဈေးနှုန်းမျာ (၃၈၀၀၀)ကျပ်ဖြစ်ကြောင်း သိရသည်။

DOCA(ပဲခူး)

          ဧရာဝတီတိုင်းဒေသကြီးအတွင်း ပင်လယ်ကမ်းခြေတလျှောက်နှင့် မြစ်ဝကျွန်းပေါ်ဒေသများတွင် လက်ညှိုးထိုးမလွှဲသော အပင်အများစုမှာ အုန်းပင်ဖြစ်ပြီး ရေငံပိုင်းနှင့် ရေချိုရေငံစပ် ဒေသများတွင် အုန်းပင်ဖြစ်ထွန်းမှုအားကောင်းပြီး ရေချိုပိုင်းတွင် ရေငံပိုင်းလောက်အုန်းပင် ဖြစ်ထွန်းမှုနည်းပါးသော်လည်း မြို့နယ်တိုင်းတွင် အုန်းပင်စိုက်ပျိုးလျက်ရာ အုန်းပင်မှအုန်းသီး၊ အုန်းဆီ၊ အုန်းသားခြောက်၊ အုန်းခွံမီးသွေး၊ အုန်းသီးလက်မှုပစ္စည်းများ အုန်းတံမြက်စည်း၊ အုန်းဆံကြိုး၊ ခြေသုတ်ခုံများ ပြုလုပ်သုံးစွဲလျက်ရှိသည့်အတွက် အုန်းတစ်ပင်လုံးအသုံးဝင်ပြီး မြန်မာ့ရိုးရာအစားအစာများတွင် မပါမဖြစ်ပါဝင်နေသော အုန်းပင်များမှာတိုင်းအတွင်းစိုက်ဧက ၁၆၅၀၀၀ ကျော်ကြောင်းသိရသည်။

          တိုင်းဒေသကြီးအတွင်း စိုက်ပျိုးမြေများစွာရှိပြီး ရေခံမြေခံကောင်းမွန်သည့်အတွက် ဓနုဖြူမြို့နယ် ယင်းဒကစ်ကျေးရွာရှိ ရေနက်ကွင်းတွင် လွန်ခဲ့သော၅နှစ်ခန့်မှစတင်၍ ALLOY Co,.Ltd မှအမယ် သစ်ယိုးဒယားမျိုး(အုန်းချိုမွေး)အုန်းသီးအနုအုန်းစိမ်းရည် အရည်သောက် အုန်းပင်များစတင်စမ်းသပ်စိုက်ပျိုးခဲ့ရာ ရေမြေရာသီဥတုနှင့် ကိုက်ညီမှုရှိပြီး အောင်မြင်ဖြစ်ထွန်းမှုရှိသည့်အတွက် ယခင်က အသုံးမပြုသော ရေနက်ကွင်းမြေကိုစနစ်တကျပြုပြင်၍ ရေတစ်ဘောင်ကုန်း တစ်ဘောင်စိုက်ပျိုး နည်းစနစ်ဖြင့် အုန်းချိုမွေးစိုက်ဧက ၁၈၀ စိုက်ပျိုး ခဲ့ပါသည်။ အုန်းချိုမွေး ၁ဧကအတွက် အပင်ရေ ၉၀စိုက်ပျိုး၍ ၁ပင်ကို၁နှစ် ၁၈ခိုင်ထွက်ရှိပြီး ပျှမ်းမျှ အလုံးရေ ၁၂၆လုံးခန့်သီးကြောင်း ၁ ဧကကို ၁နှစ်အုန်းသီး ၁၁၃၄၀ ဝန်းကျင် ရရှိမှာဖြစ်သလို အုန်းစိုက် ဧက၁၈၀ အုန်းပင် ၁၆၀၀၀ အတွက် ၁နှစ် လျှင်ပျမ်းမျှအုန်းသီး အလုံးရေ သိန်း၂၀ ဝန်းကျင်ရရှိမှာဖြစ်ကြောင်း သိရှိရပါသည်။

DOCA(ဧရာဝတီ)

   တနင်္သာရီတိုင်းဒေသကြီး၊ ထားဝယ်မြို့၊ စည်ပင်သာယာဈေးအတွင်းတွင်  အာလူးများရောင်း ချလျက်ရှိပါသည်။ ဈေးကွက်အတွင်းရောင်းချနေသော အာလူးများကို ရှမ်းပြည်နယ်ဘက်မှ ကုန်း လမ်းခရီးဖြင့် အများဆုံးတင်ပို့လျက်ရှိပြီး ယခု အောက်တိုဘာလအတွင်း ဖြစ်ပေါ်နေသော အာလူး ဈေးနှုန်းမှာ အာလူး အလုံး အကြီး/အသေး အရွယ်အစားအပေါ်မူတည်၍ (၁) ပိဿာလျှင် (၇၀၀၀) ကျပ်မှ (၈၅၀၀)ကျပ်ဖြင့် ရောင်းဝယ်လျက်ရှိပြီး အရောင်းသွက်လျက်ရှိကြောင်း အာလူးရောင်းချသူ များထံမှ သိရှိရပါသည်။

DOCA (တနင်္သာရီ)

    ရွှေဖရုံသီး၏အရောင်သည် ရွှေရောင်ကဲ့သို့ ဝင်းဝါနေပြီး အရသာအနည်းငယ်ချိုသည်။ မချက် ပြုတ်မီ အသားမာကျောသော်လည်း အပူပေးချက်ပြုတ်ပြီးနောက် အလွန်နူးညံ့သည်။ အသီး သာမက အပင်၏ အရွက်၊ အညွန့်၊ အပွင့်နှင့်အစေ့တို့ကိုလည်း စားသုံးနိုင်သည်။ ထားဝယ်မြို့ ပတ်ဝန်းကျင် ကျေးရွာများရှိ လယ်ကွင်း၊ စိုက်ပျိုးခြံများတွင် စိုက်ပျိုး၍ထွက်ရှိလာသော အသီးများကို ကုန်စိမ်းသည်များသို့ ဖောက်သည်ပေးကာ ထိုမှတဆင့်အနီးအနားရှိဈေးများတွင် ပြန်လည်ရောင်းချကြပြီး တစ် စိတ်လျှင်(၁၀၀၀)ကျပ်၊ တစ်လုံးလျှင်(၅၀၀၀/၆၀၀၀)ကျပ် အသီးသီးရှိကြောင်း ကုန်စိမ်းသည် များထံမှ သိရှိရပါသည်။

DOCA (တနင်္သာရီ)

   လေးဆူဓာတ်ပျော် ရွှေဆံတော်စေတီတော်မြတ်ကြီးသည် မြတ်စွာဘုရားသက်တော်ထင်ရှား ရှိစဉ်ကပင် တည်ထားကိုးကွယ်ခဲ့သော စေတီတော်မြတ်ကြီးဖြစ်သည်။ ပဲခူးတိုင်းဒေသကြီး၊ ပြည်မြို့၏ အရှေ့ပိုင်း ဆင်စုရပ်မြောက်ဘက်၊ ဆံတော်ရပ်၌ “သုဒဿန”မည်သော တောင်ကုန်းငယ်တွင် တည်ရှိ သည့် ရွှေဆံတော်ဘုရားကို မြသိတင် (မြသီးတင်) ဘုရားဟုလည်း ရှေးက ခေါ်တွင်ခဲ့သည်။ ပဲခူးတိုင်း ဒေသကြီး ပြည်မြို့ကျက်သရေဆောင် သမိုင်းဝင်လေးဆူဓာတ်ပျော် ရွှေဆံတော်စေတီတော်မြတ်ကြီး (၂၆၁၄) နှစ်ပြည့် ဗုဒ္ဓပူဇနိယပွဲတော်နှင့် (၁၂၆)ကြိမ်မြောက် ဗုဒ္ဓမြတ်စွယ်တော် ဖွင့်လှစ်အပူဇော်ခံပွဲကို ၁၃၈၇ခုနှစ် တန်ဆောင်မုန်းလဆန်း (၈)ရက် ၂၀၂၅ ခုနှစ် အောက်တိုဘာ ၂၈ရက်မှစ၍ တန်ဆောင်မုန်း လပြည့်ကျော် (၂) ရက်၊ နိုဝင်ဘာ ၆ ရက်အထိ ၁၀ ရက်တိုင် အစဉ်အလာမပျက် စည်ကားသိုက်မြိုက်စွာ ကျင်းပမည်ဖြစ်ပါသည်။

          အောက်တိုဘာ၂၈ရက်၊ နံနက်၅နာရီခွဲအချိန်တွင် ဗုဒ္ဓမြတ်စွာအမှူးပြုသော ဩဝါဒစရိယ ဆရာတော်ကြီး (၁၀)ပါးနှင့် သံဃာတော် (၁၀၈) ပါးတို့ကို အရုဏ်ဆွမ်းဆက်ကပ် လှူဒါန်းပြီး နောက်  စေတီတော်ရင်ပြင် အာရုံခံတန်ဆောင်း(၄)ခု၌ သံဃာတော် ၂၇ပါးစီဖြင့် ဗုဒ္ဓါဘိသေက ဘုရားအနေကဇာတင်ကာ စေတီတော်လေးထပ်ဓမ္မာရုံ၌  တရားတော်နာယူပွဲ ကျင်းပမည်ဖြစ်ပါသည်။ ဆက်လက်၍ စေတီတော် ရင်ပြင် လေးဆူဓာတ်ပျော် ရွှေဆံတော်စေတီတော်မြတ်ကြီး (၂၆၁၄)နှစ် ပြည့် ဗုဒ္ဓပူဇနိယပွဲတော်မုခ်ဦး ဆိုင်းဘုတ်ရှေ့၌ ပွဲတော်ကို တာဝန်ရှိသူများက ဖဲကြိုးဖြတ်ဖွင့်လှစ်‌ပေးပြီး ၎င်းနောက် မြတ်စွာဘုရားရှင်နှင့် သံဃာတော်(၁၀၈)ပါးတို့ကို ဆွမ်းဆန်စိမ်း လောင်းလှူပွဲ ကျင်းပမည် ဖြစ်သည်။ အောက်တိုဘာ ၂၉ရက်နေ့ နံနက်၉နာရီတွင်  ရင်ပြင်တော်မြတ်စွယ်တော်တိုက်ရှိ ဗုဒ္ဓမြတ်စွယ်တော်ကိန်းဝပ်စံပါယ်တော်မူသည့် စိန်စေတီတော်၊ ပတ္တမြားစေတီတော်၊ ရွှေကလပ်တော်၊ မူလကြေးစေတီတော်နှင့် စန္ဒကူးကြုတ်တော်တို့ကို ရောင်တော်ဖွင့်ပွဲ ကျင်းပမည်ဖြစ်သည်။ အောက်တိုဘာလ ၃၁ရက် ညနေ ၄နာရီခွဲတွင် ရင်ပြင်တော်ကျားပျံဓမ္မာရုံ၌ (၁၂၆) ကြိမ်မြောက် ဗုဒ္ဓမြတ်စွယ်တော် ဖွင့်လှစ်အပူဇော်ခံပွဲကျင်းပခြင်း၊ တန်ဆောင်မုန်းလဆန်း ၁၂ရက်၊ နိုဝင်ဘာ ၁ ရက် နံနက် (၆:၀၀) နာရီအချိန်တွင် မြတ်စွယ်တော်တိုက်အတွင်း၌ ဗုဒ္ဓမြတ်စွယ်တော်ကို ဗုဒ္ဓါဘိသေက အနေကဇာတင်လှူပွဲနှင့် နိုဝင်ဘာ ၂ရက် မွန်းလွဲ ၃နာရီတွင် ဗုဒ္ဓ မြတ်စွယ်တော်ကို ရင်ပြင်တော်ပေါ်တွင် ရွှေဆံတော်စေတီတော်မြတ်ကြီးအား လက်ျာရစ်သုံးကြိမ် လှည့်လည်အပူဇော်ခံပွဲတို့ ကျင်းပမည် ဖြစ်ပါသည်။ ဗုဒ္ဓမြတ်စွယ်တော်ကို  အများပြည်သူဖူးမြော် ကြည်ညိုနိုင်ရန် မြတ်စွယ်တော်တိုက် မှန်ကျောင်းဆောင်တော်၌ နိုဝင်ဘာ ၃ရက်မှ ၅ရက်အထိ နေ့စဉ်နံနက် ၅နာရီခွဲမှ ည၉နာရီအထိ အပူဇော်ခံမည်ဖြစ်ကာ နိုဝင်ဘာ ၆ ရက် နံနက် ၅နာရီခွဲတွင် ဗုဒ္ဓမြတ်စွယ်တော် ကို တစ်နှစ်တာ ကိန်းဝပ်စံပါယ်တော်မူမည့် မြတ်စွယ်တော်တိုက် ဂန္ဓကုဋီတိုက်အတွင်းသို့ ပြန်လည် ပင့်ဆောင်ပြီး (၂၆၁၄)နှစ်ပြည့် ဗုဒ္ဓပူဇနိယပွဲတော်နှင့် (၁၂၆)ကြိမ်မြောက် ဗုဒ္ဓမြတ်စွယ်တော် အပူဇော်ခံပွဲ အောင်ပွဲ/ပိတ်ပွဲအခမ်းအနားတို့ကို စည်ကားသိုက်မြိုက်စွာ ကျင်းပမည်ဖြစ်သည်။ အဆိုပါပွဲတော်တွင် နှစ်စဉ် လေးဆူဓာတ်ပျော်ရွှေဆံတော်စေတီတော်မြတ်ကြီး ဗုဒ္ဓပူဇနိယပွဲတော်နှင့် ဗုဒ္ဓမြတ်စွယ်တော် မြို့တွင်းလှည့်လည်အပူဇော်ခံပွဲ စည်ကားသိုက်မြိုက်စွာကျင်းပလေ့ရှိကြပါသည်။ ဗုဒ္ဓပူဇနိယပွဲတော် ၁၀ ရက်ကာလအတွင်း ဇာတ်သဘင်ပွဲနှင့် မြန်မာ့ရိုးရာခြင်းလုံးအလှခတ်ပွဲအပါအဝင် အခြားပျော်ပွဲရွှင်ပွဲ များနှင့် ပြည်ဒေသထွက် ရိုးရာအစားအစာများနှင့် အနယ်နယ်အရပ်ရပ်မှ ဒေသထွက်ကုန်ပစ္စည်းများ ရောင်းချသည့် ပွဲဈေးဆိုင်ခန်းများဖြင့် စည်ကားသိုက်မြိုက်စွာကျင်းပမည်ဖြစ်ကာ ရပ်ဝေးရပ်နီးမှ ဘုရား ဖူးလာပြည်သူများအနေဖြင့် ပြည်ရွှေဆံတော်စေတီတော်မြတ်ကြီးနှင့် ဗုဒ္ဓမြတ်စွယ်တော်အား အနီးကပ် ဖူးမြော်ကြည်ညို ကုသိုလ်သဒ္ဓါပွားများနိုင်ပြီး မည်သူမဆို ဗုဒ္ဓပူဇနိယပွဲတော်တွင် ပျော်ရွှင်စွာလာရောက် ပါဝင်ဆင်နွှဲနိုင်ကြောင်း သတင်းကောင်းပါးအပ်ပါသည်။

DOCA(ပဲခူး)