ပြည်တွင်းကုန်သွယ်မှုသတင်း

ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်သည် ဒေသန္တရအရတောင်ကျချောင်းကြီး(၃)ခုစီးဝင်လျက်ရှိပြီး ကျေးရွာအုပ်စု(၅၄)အုပ်စုတွင် စိုက်ပျိုးရေးသည် အဓိကအသက်မွေးလုပ်ငန်း ဖြစ်ပါသည်။ ရာသီအလိုက်စိုက်ပျိုးနိုင်သော ဧကပေါင်း(၆၆၅၉)ဧကခန့်ရှိပြီး ငရုတ်၊ ဂေါ်ဖီ၊ သခွား၊ ချဉ်ပေါင်၊ ရုံးပတီတို့ကို အဓိကထား၍စိုက်ပျိုးကြပြီး ဒေသတွင်းစားသုံးရန်သာမက အခြားမြို့နယ်များသို့ တင်ပို့ရောင်းချကြကြောင်းသိရှိရပါသည်။ အုတ်ဖိုမြို့နယ်အတွင်း ထယ်ကြောရွာ၊ လေးတဲရွာ၊ ရှမ်းရွာ၊ သရက်ပင်ဆိပ်၊ သမန်းကုန်းရွာ၊ ကျပ်ချောင်းရွာ စသောကျေးရွာအုပ်စုများသည် ပန်းဂေါ်ဖီ၊ ဂေါ်ဖီ အများဆုံးစိုက်ပျိုးသော ဒေသများဖြစ်သည်။ စိုက်ပျိုးထုတ်လုပ်မှုကုန်ကျစရိတ်အနေဖြင့် တစ်ဧကလျှင် အိုးရှင်းမျိုးစ့(၁၂)ထုတ်ခန့်စိုက်ပျိုးရပြီး၊ထွန်ယက်ခ၊ ဆေးဖြန်းခ၊ ရေသွင်းခအပါအဝင် (၁၂၀၀၀၀၀)ကျပ်ခန့်ကုန်ကျကြောင်း၊ ယခုနှစ်တွင် မိုးအနည်းငယ်ပိုများသဖြင့် အချိန်(၁)လခန့်နောက်ကျစိုက်ပျိုးရပြီး ပိုးသတ်ဆေး၊ အပင်အား ဆေးပိုသုံးရ၍ ဈေးကောင်းရရန်လိုအပ်နေကြောင်း၊ စိုက်ပျိုးထွက်ရှိမှုအနေဖြင့် ပန်းဂေါ်ဖီအပွင့် (၁၃၀၀၀)ပွင့်ခန့်ထွက်ရှိပြီး ပန်းပွင့်အကြီး/ အသေး ရောရာတစ်ပွင့်လျှင် (၄၀၀)ကျပ်ခန့်ရောင်းချရကြောင်း၊ တစ်ဧကဝင်ငွေ (၅၂၀၀၀၀၀)ခန့်ရရှိသဖြင့် တစ်ဧကအကျိုးအမြတ်အနေဖြင့် (၄၀၀၀၀၀၀)ကျပ်ရရှိနိုင်ပါကြောင်း စိုက်ပျိုးထုတ်လုပ်သူတောင်သူတစ်ဦးထံမှသိရှိရပါသည်။ DOCA(ပဲခူး)

တောင်ငူမြို့ အနီးဝန်းကျင်ကျေးရွာများတွင် မိုးရာသီသီးနှံများကို တစ်နိုင်တစ်ပိုင်စိုက်ပျိုးလျက်ရှိရာ ထွက်ရှိလာသောအသီးအနှံများကို ကုန်စိမ်းဈေးဖြစ်သော ညောင်ပင်ဈေးသို့ လာရောက်ရောင်းချလျက်ရှိကြပါသည်။ ယခုအခါတွင် ရုံးပတီသီးများပေါ်နေပြီဖြစ်ရာ ရုံးပတီသီး ၃တောင့်ပါ အစည်းသေး ၁၀စည်းလျှင် အစည်းကြီးတစ်စည်းစည်းပြီးလျှင် ၈၅၀၀ကျပ်ဖြင့် ဈေးကွက်အတွင်း ရောင်းချလျက်ရှိပါသည်။ ပဲဇောင်းလျားသီးများလည်းပေါ်နေပြီဖြစ်ရာ ၂၅ကျပ်သားလျှင် ၈၀၀ကျပ်၊ တစ်ပိဿာလျှင် ၃၀၀၀ကျပ်ဖြင့် ဈေးကွက်အတွင်း ရောင်းချလျက်ရှိပါသည်။ ရုံးပတီသီးနှင့် ပဲဇောင်းလျားသီးများမှာ ပေါ်ခါစဖြစ်၍ ဈေးနှုန်းအနည်းငယ်မြင့်သော်လည်း လှိုင်လှိုင်ပေါ်လာပါက ဈေးနှုန်းကျဆင်းနိုင်ကြောင်း ညောင်ပင်ဈေးရှိ ဟင်းသီးဟင်းရွက်ဆိုင်များမှသိရှိရပါသည်။ DOCA(ပဲခူး)

ပဲခူးတိုင်းဒေသကြီးသည် စိုက်ပျိုးရေးကို အဓိကထားသော တိုင်းတစ်တိုင်းဖြစ်သည်နှင့်အညီ မြစ်ချောင်း၊ အင်းအိုင်ပေါများသောကြောင့် ရေထွက်ပစ္စည်းများဖြစ်သော ငါးပိ၊ ငါးချဉ်၊ ငါးခြောက်များလည်းထွက်သည့်အပြင် ပဲခူးဒေသထွက် ငါးရံ့ခြောက်သည်လည်း ဆားပေါ့၍ အပေါ့ခြောက်ဖြစ်သည့်အတွက် လူကြီး၊ လူငယ်၊ ကလေး၊ သွေးတိုး၊ ဆီးချိုသမားပါမကျန် စားသုံးနိုင်သောကြောင့် လက်ဆောင်ပေးခြင်းအတွက်ကြောင့်သော်လည်းကောင်း၊ ကိုယ်တိုင်စားသုံးရန်အတွက်သော်လည်းကောင်း ဝယ်ယူလျက်ရှိကြသည်။ ငါးရံ့ခြောက်ပြုလုပ်ရာတွင် ငါးရံ့များကို ပဲခူးမြို့နယ်၊ ဒိုက်ဦးမြို့နယ်၊ ဝေါမြို့နယ်၊ သနပ်ပင်မြို့နယ်များရှိ ရေချိုအင်း၊ အိုင်များမှ အများဆုံးရရှိလျက်ရှိပြီး ရရှိလာသောငါးရံ့များကို အကြေးထိုး၊ ခေါင်းဖြတ်၊ ဗိုက်ခွဲအူထုတ်ပြီး ခွဲသည့်အခါ ပုံကျအောင် စနစ်တကျခွဲရသည်။ ခွဲပြီးသောငါးရံ့များကို ငါးရံ့အစိမ်း ပိဿာ၁၀၀လျှင် ဆား ၃ပိဿာ ၅၀ကျပ်သားနှုန်းဖြင့်နှပ်ပြီး တစ်ညစိမ်ရကာ နံနက်ရောက်လျှင် ရေစင်အောင်လေးထပ်ခန့်ဆေးပြီး နေလှန်းရသည်။ နေလှန်းသည့်အခါ နွေဆိုလျှင် နှစ်ရက်ခန့်ခြောက်ပြီး ဆောင်းနှင့်မိုးရာသီရောက်လျှင် မီးအပူဖြင့် ကြပ်တင်၍ ခြောက်အောင်လှန်းရသည်။ ငါးရံ့ခြောက်ပြုလုပ်ရာတွင် ငါးရံ့အစိုတစ်ပိဿာလျှင် ၁၈၀၀၀ကျပ်မှ ၂၀၀၀၀ကျပ်အထိ အကောင်အကြီး၊ အသေးပေါ်မူတည်၍ ဝယ်ယူရပြီး အဆိုပါ ငါးအစိုတစ်ပိဿာအား ခွဲခြမ်းပြီး နေလှန်းရာတွင် ငါးခြောက်အဖြစ် ၂၅ကျပ်သား၊ ၃၀ ကျပ်သားခန့်ထွက်ရှိသည်။ ငါးရံ့ခြောက်ထုတ်လုပ်သူများအနေဖြင့် ငါးအစိုတစ်ပိဿာကို အခြောက်ပြုလုပ်ရာတွင် ခန့်မှန်းကုန်ကျငွေ ၄၀၀၀၀ကျပ်ဖြစ်ပြီး ငါးရံ့ခြောက်တစ်ပိဿာကို ကျပ် ၇၅၀၀၀မှ ၈၀၀၀၀ကျပ်ဈေးအထိရောင်းချလျက်ရှိသည်။ ဒေသထွက်ငါးရံ့ခြောက်များကို နယ်ဘက်များအပြင် မန္တလေး၊ နေပြည်တော် စသည့်ဒေသများအပြင် အခြားဒေသများသို့လည်း ဖြန့်ဖြူးရောင်းချလျက်ရှိကြောင်းသိရှိရပါသည်။ DOCA(ပဲခူး)