သတင်းနှင့် လှုပ်ရှားမှုများ

   မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့တွင် (၁၀.၁၂.၂၀၂၄) ရက်နေ့၊ နံနက် ၀၉:၀၀ နာရီအချိန်တွင် စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ မြို့ပေါ်ရှိ လျှပ်စစ်ပစ္စည်း အရောင်းဆိုင်များအား ဈေးကွက်စောင့်ကြည့်စစ်ဆေးမှုများ ဆောင်ရွက်ခဲ့ကြောင်း သိရသည်။

   အဆိုပါဈေးကွက်စောင့်ကြည့်စစ်ဆေးခြင်း ကွင်းဆင်းဆောင်ရွက်ရာ၌ မြို့ပေါ်ရှိ ကုန်ပဒေသာလျှပ်စစ်ပစ္စည်းအမျိုးမျိုး အရောင်းဆိုင်နှင့် Royal လျှပ်စစ်ပစ္စည်းအမျိုးမျိုး အရောင်းဆိုင်များသို့ ဈေးကွက်စောင့်ကြည့်စစ်ဆေးရာတွင် စားသုံးသူကာကွယ်ရေးဥပဒေပါ အခန်း(၁၈)ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များသည် ကုန်စည်အမျိုးအစားအလိုက် ကုန်စည်၏ အမှတ်တံဆိပ်၊ အမျိုးအမည်၊ အရွယ်အစား၊ အရေအတွက်နှင့်အသားတင် ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့်သက်တမ်း ကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကျန်းမာရေး ဆိုင်ရာဘေးထွက်ဆိုးကျိုး(သို့) ဓာတ်မတည့်ကြောင်းဖော်ပြချက်၊ ကြိုတင်သတိပေးချက်များ စသည့် ဥပဒေပါပြဌာန်းချက်များနှင့်ကိုက်ညီသော ကုန်စည်များရောင်းချမှုရှိ/မရှိအား စစ်ဆေး ခဲ့ကြပြီး၊ စီးပွားရေးလုပ်ငန်းရှင်များအား စားသုံးသူကာကွယ်ရေးဥပဒေပါ  ပြဌာန်းချက်များ ဖြစ်သည့် စီးပွားရေးလုပ်ငန်းရှင်များ၏ တာဝန်များ၊ စီးပွားရေးကျင့်ဝတ်စည်းကမ်းများနှင့်အညီ ဆောင်ရွက်စေရေး၊ မိမိရောင်းချလျက်ရှိသည့် ကုန်ပစ္စည်းများနှင့်စပ်လျဉ်း၍ အာမခံချက်၊ သတ်မှတ်ချက်များနှင့်ပြည့်စုံမှန်ကန်သော သတင်းအချက်အလက်များကို အချိန်နှင့်တပြေးညီ ထုတ်ပြန်စေရေး၊ သက်ဆိုင်ရာဌာနများမှဖော်ပြရန် သတ်မှတ်ထားသောအချက်များ ဖော်ပြရ မည်ဖြစ်သလို ဖြန့်ဖြူးရောင်းချသူများမှလည်း အဆိုပါအချက်များနှင့်ကိုက်ညီမှုရှိသော ကုန်စည်များသာ ရောင်းချရန်၊ ဥပဒေ၊ လုပ်ထုံးလုပ်နည်း၊ အမိန့်၊ ညွှန်ကြားချက်များနှင့် အညီရောင်းဝယ်မှုပြုလုပ်ကြရန် ဆွေးနွေးပြောကြားခဲ့ပြီး နံနက်(၁၀:၃၀)နာရီ အချိန်တွင် ကွင်းဆင်းဆောင်ရွက်မှု ပြီးစီးခဲ့ကြောင်း သိရသည်။

DOCA(မန္တလေး)

     စားသုံးသူရေးရာဦးစီးဌာနသည် မိမိတို့ဌာနမှဦးဆောင်၍သော်လည်းကောင်း၊ အခြားဌာနဆိုင်ရာများမှ ဖိတ်ကြားမှု၊ ပူးပေါင်းဆောင်ရွက်စေလိုမှုများတွင်လည်းကောင်း ကဏ္ဍများအလိုက် သက်ဆိုင်ရာမိတ်ဖက်ဌာနများနှင့်ပူးပေါင်း၍ အများပြည်သူအကျိုးအတွက် ဆောင်ရွက်လျက်ရှိရာ(၁၂.၁၂.၂၀၂၄)ရက်နေ့၊ နေ့လည်(၁၃:၀၀)နာရီအချိန်တွင် မြင်းခြံမြို့ရှိ အခြေခံပညာ အထက်တန်းကျောင်း(အ.ထ.က.၃)တွင် စားသုံးသူကာကွယ်ရေးနှင့်ပတ်သက်၍ ကျောင်းရှိ ဆရာ/ဆရာမများနှင့် ကျောင်းသား/ကျောင်းသူများ၊  ကေျာင်းမုန့်ဈေးတန်းရောင်းချသူများအား အသိပညာပေး ဟောပြောဆွေးနွေးပွဲဆောင်ရွက်ခဲ့ပါသည်။

      အဆိုပါဟောပြောဆွေးနွေးပွဲတွင် ရှေးဦးစွာ ကျောင်းအုပ်ဆရာမကြီးက အဖွင့်အမှာစကားနှင့် ကျေးဇူးတင်စကားပြောကြား၍ စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူး ဦးသန်းစိုး(လက်ထောက်ညွှန်ကြားရေးမှူး)မှ ကျောင်းသား/ကျောင်းသူများအနေဖြင့် ကျောင်း သင်ခန်းစာများ သင်ယူမှုအပြင် အခြားအထွေထွေဗဟုသုတများကိုလည်း လေ့လာဆည်းပူး သိရှိရန်လိုအပ်ပါကြောင်း၊ သို့ဖြစ်ပါ၍  လူမှုဘဝတွင်သိရှိအပ်သော အသိပညာများ လိုအပ်သည့် အတွက် သက်ဆိုင်ရာဌာနများအလိုက် ယခုလိုလာရောက်ဟောပြောဆွေးနွေးရခြင်းဖြစ်ပါ ကြောင်း၊  စားသုံးသူကာကွယ်ရေးနှင့်ပတ်သက်၍ ဟောပြောရာတွင် စားသုံးသူ၏အဓိပ္ပာယ်၊ စီးပွားရေးလုပ်ငန်းရှင်၏အဓိပ္ပာယ်၊ စားသုံးသူအခွင့်အရေးနှင့်တာဝန်များအကြောင်း၊ စားသုံးသူ နစ်နာဆုံးရှုံးမှုရှိလျှင် တိုင်ကြားနိုင်သည့်နေရာများ၊ နည်းလမ်းများ၊ ဖုန်းနံပါတ်များနှင့် ကုန်အညွှန်းအမှတ်အသားများကို ကြည့်ရှုဝယ်ယူတတ်စေရန် ကုန်စည်နမူနာများဖြင့်ပြသရှင်းလင်းပြီး ကျောင်းသား/ကျောင်းသူများ မှတ်သားမိစေရေး အမေးအဖြေများပြုလုပ်၍ အပြန်အလှန် ဟောပြောဆွေးနွေးခဲ့ပါသည်။ ဟောပြောပွဲသို့ ကျောင်းအုပ်ဆရာမကြီးနှင့်အတူ ဆရာ/ဆရာမ ပေါင်း(၉)ဦး၊ ကျောင်းသား/ကျောင်းသူ(၁၉၀)ဦး၊ ကျောင်းမုန့်ဆိုင်ရောင်းချသူ(၇)ဦး၊ စုစုပေါင်း (၂၀၆)ဦး တက်ရောက်ခဲ့ပြီး၊ ဟောပြောဆွေးနွေးမှုအပြီးတွင် ကျောင်းကျန်းမာရေးအဖွဲ့နှင့်အတူ ကျောင်းမုန့်ဈေးတန်းအရောင်းဆိုင်များအား ကွင်းဆင်းစစ်ဆေးခဲ့ကြောင်း သိရသည်။

DOCA(မန္တလေး)

          စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၄ ခုနှစ် ၊ ဒီဇင်ဘာ လ(၄) ရက်နေ့ နံနက်( ၀၉ : ၀၀ ) အချိန်တွင်  လွိုင်ကော်မြို့၊သီရိမင်္ဂလာဈေးအတွင်းရှိ ကုန်စုံဆိုင်များ၌ ကုန်အညွှန်းအမှတ်အသားဖော်ပြခြင်းနှင့်စပ်လျဉ်၍ မြန်မာနိုင်ငံစားသုံး ရေးရာကော်မရှင် ညွှန်ကြားချက်အမှတ် ၂/ ၂၀၁၉ ပါ သတ်မှတ်ချက်နှင့်ကိုက်ညီမှုရှိ / မရှိ  မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့ဖြင့် ပူးပေါင်း၍ ဈေးကွက်စောင့်ကြည့်စစ်ဆေးခဲ့ကြောင်းသိရှိရပါသည်။

       ထိုသို့ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ရာ ကုန်စုံဆိုင်များ၌ မုန့် များရောင်းချရာတွင် စားသုံးသူပြည်သူများ ဘေးကင်းလုံခြုံစိတ်ချစွာ ဝယ်ယူသုံးစွဲနိုင် ရေးအတွက် စားသောက်ကုန်များ ကုန်အညွှန်းအမှတ်အသားအပြည့်စုံပါရှိသော ကုန် ပစ္စည်းများသာ ဝယ်ယူတင်သွင်းရောင်းချသွားကြရန်နှင့် ကုန်ဆုံးရက်စွဲများကို စနစ်တကျ စစ်ဆေးရောင်းချသွားကြရန်အသိပညာပေးပြောကြားခဲ့ပြီး မီမိုဆာလာ ယိုပေါင်မုန့် ၊ CARTOON ကိတ်ခြောက်၊ Dinywang စနိုးကွတ်ကီး၊ CARTOON MOON Cake ပဲလမုန့်၊ I Cake ကိတ်မုန့်၊ ချိုကိုစတော်၊ BAYIN နို့ပြောင်းကွတ်ကီး ၊ I Like Spicy ကြွပ်ကြွပ်မွှေးကြော် အသား‌ချောင်း၊ CARTOON  လျှာပေါ်ဆိမ့်၊ လပ်ကီး ထောပတ်မရွေး၊ ဆိမ့်ဆိမ့်လေး (အာလူးဘီစကစ်) ၊ CARTOON နာနတ်လျှာပေါ် ဆိမ့် ၊ Chicken muffin ကြက်မျှင်  ကွတ်ကီး၊ Lucky Fruit Flavoured Jelly မုန့်အမျိုးမျိုးနှင့် ဂျယ်လီတို့သည် ညွှန်ကြားချက်  ၂/ ၂၀၁၉ ပါ ကုန်အညွှန်းအမှတ်အသား သတ်မှတ်ချက်နှင့်ကိုက်ညီမှုရှိကြောင်း စစ်ဆေး တွေ့ရှိရပါသည်။

DOCA(ကယား)

   စားသုံးသူရေးရာဦးစီးဌာနသည် စားသုံးသူများဘေးအန္တရာယ်ကင်းရှင်းစေရန် စျေးကွက်အတွင်းရှိ ကုန်စည်များ၊ စျေးကွက်မရောက်မီကုန်စည်များကို စျေးကွက်စောင့်ကြည့်စစ် ဆေးခြင်းများ စဉ်ဆက်မပြတ် ဆောင်ရွက်လျက်ရှိရာ (၂၆.၁၁.၂၀၂၄)ရက်နေ့တွင် အဖွဲ့စုံဖြင့် မကွေးမြို့၊ မင်္ဂလာစျေး (အခွန်လွတ်စျေး)၌ ကုန်စည် (၁၈)မျိုးအား နမူနာဝယ်ယူ၍ Mobile Lab Van ဖြင့် စစ်ဆေးခဲ့ရာ ပိတ်ဆွယ်တွင် အစားအစာများ၌ သုံးစွဲရန်မသင့်သော Sulfiting Agent ချွတ်ဆေးပါဝင်ကြောင်း စစ်ဆေးတွေ့ရှိရပါသည်။

   ပိတ်ဆွယ်ထုတ်လုပ်သည့် ပင်ရင်းဒိုင်များသည် မကွေးမြို့နယ်၊ ‌လျောင်းတော်ဦးကျေးရွာမှ ဖြစ်ကြောင်း စုံစမ်းသိရှိရ၍ (၁၃.၁၂.၂၀၂၄)ရက်နေ့တွင် စားသုံးသူရေးရာဦးစီးဌာန၊ မကွေးခရိုင်ဦးစီးမှူးသည် အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျေးရွာအုပ်ချုပ်ရေးမှူးတို့နှင့်အတူ ပိတ်ဆွယ်ပင်ရင်း ထုတ်လုပ်သည့် လုပ်ငန်းရှင်များအား အသိပညာပေးဆွေးနွေးခြင်း၊ နောက်နောင်တွင် အစားအစာများ၌ သုံးစွဲရန်မသင့်သော Sulfiting Agent ချွတ်ဆေးများ မသုံးစွဲရန် ပထမဆုံးအကြိမ်သတိပေးခြင်းနှင့် ဆက်လက်သုံးစွဲကြောင်း စစ်ဆေးတွေ့ရှိပါက အမျိုးသားအစား အသောက်ဥပဒေအရ အရေးယူခံရမည်ဖြစ်ကြောင်း ဝန်ခံကတိပြုလက်မှတ်ရေးထိုးစေခဲ့ကြောင်း သိရှိရပါသည်။

DOCA(မကွေး)

   ယခုလက်ရှိစားသုံးသူများ၏ အဓိကလိုအပ်ချက်သည် အစားအသောက်ကုန်စည်နှင့် ဝန်ဆောင်မှုများကို သင့်တင့်မျှတသောဈေးနှုန်းနှင့်အဆင်ပြေစွာဝယ်ယူရရှိရန်ဖြစ် ပါသည်။ငွေကြေး ဈေးကွက်၏လှုပ်ခတ်မှုဒဏ်ကြောင့် ကုန်စည်နှင့်ဝန်ဆောင်မှု့ဈေးနှုန်းဈေးကွက်မြင့်တက်ခဲ့ရပါသည်။ လက်ရှိဈေးနှုန်းဈေးကွက်၏ ရိုက်ခက်မှုကို စားသုံးသူများအခြေခံစားသုံးသူများကိုတိုက်ရိုက် ခံစားနေ ရပါသည်။

          တောင်ကြီးမြို့တွင် ဝက်သားတစ်ပိဿာ ၃၀၀၀၀ိကျပ် ၊အမဲသား ၂၄၀၀၀ကျပ်၊ကြက်သား(CP) ၂၀၀၀၀ိဈေးရှိသော်လည်း အခြေခံစားသုံးသူများနှင့်တိုက်ရိုက်ပတ်သက်မှု နည်းပါးပါသည်။ ကြက်ဥ တစ်လုံး ၄၀၀ိ-၄၅၀ိကျပ်၊ဆီတစ်ပိဿာ ပဲဆီ ၁၈၀၀၀ိကျပ်၊စားအုန်းဆီ၁၂၀၀၀ိ၊ဆန်တစ်ပြည် ၃၇၀၀ိ ကျပ်တို့ဖြင့် ရောင်းဝယ်နေကြရ ဈေးနှုန်းအသီးသီးတို့သည် စားသုံးသူနှင့်တိုက်ရိုက်ပတ်သက်နေ ပါသည်။ကုန်စိမ်းသီးနှံများတွင်လည်း အာလူးတစ်ပိဿာ ၉၀၀၀ိ၊ ပန်းဂေါ်ဖီ၃၅၀၀ိ ၊ပန်းမုံလာ ၃၂၀၀ိ ကျပ်ဖြင့် ဈေးကွက်ပေါက်နေသဖြင့် စားသုံးသူများ၏ နေ့စဉ်အိမ်စရိတ်အတွက်ခက်ခဲကျပ် တည်း နေရပေသည်။

          စားသုံးသူများ၏ခက်ခဲကျပ်တည်းမှုများကို ခွဲဝေဖြေသောအားဖြင့် ရှမ်းပြည်နယ် ကုန်ဈေးနှုန်း တည်ငြိမ်ရေးအဖွဲ့သည် သက်ဆိုင်ရာအစုအဖွဲ့အသင်းအဖွဲ့များနှင့်ပေါင်းစပ်ညှိနှိုင်းဆောင်ရွက်လျက် ရှိပါသည်။ကြက်ဥထုတ်လုပ်ရောင်းချသူများနှင့်ပေါင်းစပ်ညှိနှိုင်း၍ တစ်ပတ်လျှင် (၃)ကြိမ် တနင်္လာ၊ ဗုဒ္ဓဟူးနှင့်သောကြာရက်များတွင် တောင်ကြီးမြို့၊ မြို့မဈေး၊စပ်စံထွန်းဈေး၊အမှတ်(၅)ဈေး ၊အဝေရာ ကွင်းဈေး၊ရွှေညောင်ဈေး၊အေားသာယာမြို့သစ် အေးသီရိဈေးတို့တွင့် ကြက်ဥအရောင်းဒိုင် ၆ခုမှာ တစ်ခုလျှင် ကြက်ဥ ၉၀၀၀လုံးကို တစ်လုံး၃၈၀ ကျပ်ဖြင့် လိုက်လံရောင်းချ‌ပေးခဲ့ပါသည်။

          ဆီလုပ်ငန်းရှင်များအသင်းနှင့်စားသုံးသူရေးရာဦးစီးဌာနတို့ကြီးကြပ်၍ ပင်စင်စားဝန်ထမ်းများ အား သတ်မှတ်ရည်ညွှန်းဈေးဖြင့် တစ်ဦးလျှင် ၁ ပိဿာနှုန်းဖြင့် ပိဿာ၁၅၀၀မှ ၁၇၀၀ခန့် နှင့် ဝန်ထမ်းမိသားစုများအား သတ်မှတ်ရည်ညွှန်းဈေးဖြင့် တလလျှင်ပိဿာ ၂၁၀၀၀ခန့်နှင့်အသေးစား၊ အငယ်စားစီးပွားရေးလုပ်ငန်းရှင်များကိုလည်းလုပ်ငန်း အလိုက်လျှောက်ထားကို စိစစ်၍‌ ရောင်းချ ပေးလျက်ရှိကြောင်းသိရပါသည်။ထို့အပြင် ရပ်ကွက်အတွင်းရှိ စားသုံးသူမိသားစုများကိုလည်း ဆီလုပ်ငန်းရှင်များနှင့်စားသုံးသူရေးရာဦးစီးဌာနမှ  ကြီးကြပ်၍ အထောက်အထားစာအုပ်များ ပြုလုပ် စေပြီး မိသားစုတစ်စုလျှင် တစ်လ(၂)ကြိမ် ၊တစ်ကြိမ် တစ်ပိဿာနှုန်းဖြင့် သတ်မှတ်ရည်ညွှန်းဈေးဖြင့် ရောင်းချပေးလျှက်ရှိပါကြောင်းသိရပါသည်။

          ထို့အပြင် ပြည်ပမှတရားမဝင်ကုန်စည်များကြောင့် ပြည်တွင်းထုတ်ကုန်များဈေးကွက်နှင့် အရည်အသွေးများထိခိုက်လျှက်ရှိရာ ထိုးအားနည်းချက်များနှင့်စားသုံးသူတို့၏အကျိုးစီးပွားကို ထိမ်းသိမ်း ကာကွယ်ရန်အတွက် တရားမဝင်ကုန်သွယ်မှုတိုက်ဖျက်ရေးအဖွဲ့များဖွဲ့စည်း၍ ကုန်စည် သိုလှောင်ရုံများတွင် တရားမဝင်ကုန်စည်သိုလှောင်ထားခြင်းရှိမရှိကို တောင်ကြီးမြို့နယ်အတွင်း ရှောင်တခင်စစ်ဆေးရေးစီမံချက်များဖြင့်ကြီးကြပ်ဆောင်ရွက်လျှက်ရှိကြောင်းသိရပါသည်။

          ဝန်ထမ်း/ပင်စင်စားနှင့်စားသုံးသူပြည်သူများ၏ ခက်ခဲကျပ်တည်းမှုကို ခွဲဝေဖြေရှင်းပေးနေ သော ရှမ်းပြည်နယ်ကုန်ဈေးနှုန်းတည်ငြိမ်ရေးအဖွဲ့နှင့်သက်ဆိုင်ရာအစုအဖွဲ့များ၏ ကောင်းမွန်သော ညှိနှိုင်းပေါင်းစပ်ဆောင်ရွက်မှုသည် စားသုံးသူများအတွက် ဝမ်းမြောက်အစီအမံများ ဖြစ်ကြောင်း ဂုဏ်ပြုရေးသားတင်ပြရပေမည်။

DOCA(ရှမ်း)