HighLight News

      ၂၀၂၃ ခုနှစ်၊ ဖေဖော်ဝါရီလ ၉ ရက်နေ့ (၁၀း၀၀)အချိန်တွင် စားသုံးသူရေးရာဦးစီးဌာန၊ မိတ္ထီလာခရိုင်၊ ခရိုင်ဦးစီးမှူးရုံးမှ သာစည်မြို့နယ်တာဝန်ခံနှင့်ဝန်ထမ်းများသည် သာစည်မြို့၊ ဘုရားငါးဆူ အ-ထ-က(ခွဲ)တွင်  စားသုံးသူကာကွယ်ရေးဥပဒေအကြောင်း အသိပညာပေးဟောပြောဆွေးနွေးခဲ့ ပါသည်။

       အဆိုပါဟောပြောပွဲတွင် စားသုံးသူရေးရာဌာနခွဲတာဝန်ခံ ဒေါ်သိမ့်သူဇာမောင်က စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာကွယ် ရေးအသိပညာပေးဟောပြောပွဲလုပ်ငန်းများဆောင်ရွက်ခြင်းနှင့် စားသုံးသူများဘေးအန္တရာယ်ကင်းရှင်းစေရေးနှင့် ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းလုပ်ငန်းများလုပ်ဆောင်လျက်ရှိကြောင်း ရှင်းလင်းပြောကြားပြီး စားသုံးသူပြည်သူများအနေဖြင့် နေ့စဉ်ဝယ်ယူသုံးစွဲနေသော ကုန်စည်များနှင့်ပတ်သက်၍ သတင်းအချက်အလက်များကို မှန်ကန်စွာသိရှိစေရေး၊ လုပ်ငန်းရှင်များအနေဖြင့် ကုန်အညွှန်းအမှတ်အသားများကိုဖော်ပြရာတွင် ၂၀၁၉ စားသုံးသူကာကွယ်ပေးရေးဥပ‌‌ဒေပြဋ္ဌာန်းချက်များကို လိုက်နာပြီးထုတ်ကုန် လုံခြုံစိတ်ချရမှုရှိသောကုန်ပစ္စည်းများကို ထုတ်လုပ်အသုံးပြုနိုင်ရေးနှင့် စားသုံးသူအခွင့်အ‌ရေးများ နစ်နာဆုံးရှုံးမှုမရှိစေရေးတို့အတွက်ရည်ရွယ်၍ အသိပညာပေးဟောပြောဆွေးနွေးခဲ့ပါသည်။

   ကုန်စည်များထုတ်လုပ်ရောင်းချရာ၌ ကုန်အညွှန်းအမှတ်အသားများကို ပြည့်စုံစွာဖော်ပြရန်နှင့် ကုန်အညွှန်းအမှတ်အသားသည် ၂၀၂၀ ခုနှစ်၊ မတ်လ(၁၆)ရက်နေ့မှစ၍ စတင်အာဏာသက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသားပြည့်စုံစွာမပါရှိပါက မည်သည့်စီးပွားရေးလုပ်ငန်းရှင်မဆို စားသုံးသူကာကွယ်ရေးဥပဒေပုဒ်မ(၇၃)အရ (၂)နှစ်ထက်မပိုသောထောင်ဒဏ်ဖြစ်စေ၊ ကျပ်သိန်း (၂၀၀) ထက်မပိုသောငွေဒဏ်ဖြစ်စေ၊ ဒဏ်(၂)ရပ်လုံးဖြစ်စေ အရေးယူမှုများပြုလုပ်နိုင်ကြောင်း အသိပညာပေးဆွေးနွေးပြောကြားခဲ့ပါသည်။ ဆက်လက်၍  ကုန်အညွှန်းအမှတ်အသားတပ်ဆင်ရန် အခက်အခဲရှိပါက စားသုံးသူရေးရာဦးစီးဌာနသို့ လာရောက်တိုင်ပင်ဆွေးနွေးနိုင်ပါကြောင်း၊ လုပ်ငန်းရှင်များအနေဖြင့်လည်း မိမိတို့ကိုယ်တိုင်စားသုံးသူများဖြစ်သည့်အတွက် စာသုံးသူအခွင့်အရေးဆုံးရှုံးနစ်နာမှုများရှိခဲ့လျှင် DOCA Myanmar Application နှင့်စားသုံးသူရေးရာဦးစီးဌာန၏ Website www.doca.gov.mm တွင် ဝင်ရောက်တိုင်ကြားနိုင်သည်ကိုလည်း ဆွေးနွေးပြောကြားကာ လက်ကမ်းစာစောင်များလည်း ဖြန့်ဝေခဲ့ပြီးဟောပြောပွဲကို နံနက် (၁၁း၁၅)နာရီအချိန်တွင် ရုပ်သိမ်းခဲ့ပါသည်။

DOCA(မန္တလေး)

    မန္တလေးတိုင်းဒေသကြီး၊ ညောင်ဦးမြို့နယ်ရှိ တောင်ဘကျေးရွာနှင့် လက်ပံတဲကျေးရွာတို့ရှိ အခြေခံပညာအထက်တန်းကျောင်းခွဲများ၌ (၆-၂-၂၀၂၃)ရက်နေ့တွင် ခရိုင်စားသုံးသူရေးရာဦးစီးဌာနနှင့် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ အသိပညာပေးဟောပြောပွဲအား ကျင်းပပြုလုပ်ခဲ့ပါသည်။

        ဟောပြောဆွေးနွေးမှုများအနေဖြင့် တောင်ဘ အခြေခံပညာအထက်တန်းကျောင်းခွဲ၌ နံနက်ပိုင်း ၉:၀၀ နာရီအချိန်တွင်လည်းကောင်း၊ လက်ပံတဲ အခြေခံပညာအထက်တန်းကျောင်းခွဲ၌ နေ့လယ်ပိုင်း ၁၃:၀၀ နာရီအချိန်တွင်လည်းကောင်း ကျောင်းသား/ကျောင်းသူများနှင့် ဆရာ/ဆရာမများအား အသိပညာပေးဟောပြောဆွေးနွေးခဲ့ပါသည်။ ဟောပြောဆွေးနွေးမှုများတွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူး ဦးသန်းစိုးက စားသုံးသူကာကွယ်ရေးနှင့်ပတ်သက်၍ စားသုံးသူကာကွယ်ရေး၏အဓိပ္ပါယ်၊ စားသုံးသူ၏အဓိပ္ပါယ်၊ ကုန်စည်နှင့်ဝန်ဆောင်မှု၏အဓိပ္ပါယ်များ၊ နစ်နာဆုံးရှုံးမှု၏အဓိပ္ပါယ်နှင့် ကုန်အညွှန်းအမှတ်အသားများအကြောင်း၊ စားသုံးသူ၏အခွင့်အရေးနှင့်တာဝန်များအားလည်းကောင်း၊ ကျောင်းသား/ကျောင်းသူများအနေဖြင့် အစားအသောက်များဝယ်ယူစားသောက်ရာတွင် ကုန်အညွှန်းအမှတ်အသားများ ပြည်စုံမှန်ကန်စွာထည့်သွင်းဖော်ပြထားသော ကုန်စည်နှင့်အစားအသောက်များကိုသာ ရွေးချယ်ဝယ်ယူသုံးစွဲစားသောက်ကြရန်နှင့် ရွေးချယ်ဝယ်ယူသုံးစွဲတတ်စေရန် ဥပမာပေး၍လည်းကောင်း စားသုံးသူကာကွယ်ရေးနှင့်ပတ်သက်ပြီး အသိပညာပေးဟောပြောဆွေးနွေးရာ ကျောင်းသားကျောင်းသူများ၏ မေးမြန်းမှုများအပေါ် ပြန်လည်ရှင်းလင်း၍ ဖြေကြားဆွေးနွေးမှုများပြုလုပ်ခဲ့ပါသည်။ ဆက်လက်၍ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူး ဒေါ်စန်းယုမော်က ပြည်ထောင်စုနေ့အကြောင်းနှင့် စာကြည့်တိုက်အကြောင်းတို့ကို ရှင်းလင်းဟောပြောခဲ့ရာ တောင်ဘ အခြေခံပညာအထက်တန်း ကျောင်းခွဲတွင် ဆရာ/ဆရာမများနှင့်နှင့် ကျောင်းသား/ကျောင်းသူ စုစုပေါင်း(၁၃၅)ဦး၊ လက်ပံတဲ အခြေခံပညာအထက်တန်းကျောင်းခွဲတွင် ဆရာ/ဆရာမများနှင့် ကျောင်းသား/ကျောင်းသူ စုစုပေါင်း( ၁၁၇ )ဦး စသည်ဖြင့် အသီးသီးတက်ရောက်ခဲ့ကြပါသည်။

DOCA(မန္တလေး)

       ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ်၏လမ်းညွှန်မှုဖြင့် စိုက်ပျိုးရေး၊ မွေးမြူရေးနှင့် ကုန်ထုတ်လုပ်မှုလုပ်ငန်းများ ဖွံ့ဖြိုးတိုးတက်ရေးအတွက် ပဲခူးတိုင်းဒေသကြီး၊ စားသုံးသူရေးရာ ဦးစီးဌာနအနေဖြင့် ဇန်နဝါရီလအတွင်း ကဏ္ဍအလိုက် သက်ဆိုင်ရာဌာနများနှင့်ပူးပေါင်း၍ ခရိုင်၊ မြို့နယ်နှင့် ကျေးရွာများရှိ တောင်သူလယ်သမားများထံသို့ သွားရောက်ကွင်းဆင်း၍ အသိပညာပေးလျက်ရှိပါသည်။

      သက်ဆိုင်ရာဌာနများနှင့်ပူးပေါင်း၍ စိုက်ပျိုးထုတ်လုပ်သူများ၊ စီးပွားရေးလုပ်ငန်းရှင်များ၊ မွေးမြူရေးလုပ်ငန်းရှင်များအား စားသုံးသူကာကွယ်ရေးဆိုင်ရာ အသိပညာပေးခြင်းများ၊ ပြည်တွင်းကုန်သွယ်မှုဖွံ့ဖြိုးတိုးတက်မှုဆိုင်ရာကဏ္ဍများနှင့် စားသုံးဆီများကို လျော့ချသုံးစွဲသွားရန်နှင့် စားသုံးဆီသုံးစွဲမှုကြောင့် ဖြစ်ပေါ်လာမည့်ဘေးထွက်ဆိုးကျိုးများနှင့်စပ်လျဉ်း၍ အသိပညာပေးခြင်းနှင့် သီးနှံအစုအဖွဲ့များ၊ အသင်းအဖွဲ့များနှင့်ဆောင်ရွက်ရန်နှင့် တစ်ရာသီ၌ သုံးသီးစိုက်ပျိုးခြင်းဖြင့် အကျိုးအမြတ်ရရှိမှုအခြေအနေများအား အသိပညာပေးဟောပြောဆွေးနွေးကြောင်းသိရှိရပါသည်။ ၂၀၂၃ ခုနှစ်၊ ဇန်နဝါရီလအတွင်း ပဲခူးတိုင်းဒေသကြီးရှိ မြို့နယ်(၅)မြို့နယ်၊ ကျေးရွာ(၂၀)ရွာ၊ တောင်သူနှင့် လုပ်ငန်းရှင်(၉၁၃)ဦးထံသို့ သွားရောက်ကွင်းဆင်း၍ ဟောပြောဆွေးနွေးခဲ့ပါသည်။

DOCA(ပဲခူး)

ပဲခူးတိုင်းဒေသကြီးဦးစီးမှူးရုံး၌  ၉-၂-၂၀၂၃ ရက်နေ့ ၊ နေ့လယ် ၁ : ၀၀ နာရီအချိန်တွင် Zoom Application ကို အသုံးပြု၍ Online Virtual စနစ်ဖြင့် နှစ်ပတ်လျှင်တစ်ကြိမ် Thursday Talk အား ကျင်းပပြုလုပ်ခဲ့ပါသည်။

အဆိုပါ Thursday Talk တွင် တိုင်းဒေသကြီးဦးစီးမှူးရုံးရှိ ဝန်ထမ်းများ ၊ ခရိုင်ဦးစီးမှူးရုံးများရှိ ဝန်ထမ်းများနှင့် မြို့နယ်တာဝန်ခံစုစုပေါင်း (၈၉) ဦးတက်‌ရောက်ခဲ့ပြီး တိုင်းဒေသကြီးဦးစီးမှူးရုံးမှ ဒေါ်နှင်းယုယုလှိုင် အငယ်တန်းစာရေးက စာရေးဝန်ထမ်း အခြေခံသင်တန်းအမှတ်စဉ် (၂၀၂) နိုင်ငံ့ဝန်ထမ်းတက္ကသိုလ် (အောက်မြန်မာပြည်) တွင် တက်ရောက်သင်ကြားခဲ့သော ဘာသာရပ် (၈) ခုနှင့်စပ်လျဉ်း၍  ရှင်းလင်းဆွေးနွေးခဲ့ပြီး တိုင်းဒေသကြီးဦးစီးမှူးရုံးမှ ဒေါ်ကေသွယ်စိုး ဦးစီးမှူးက ဆုငွေနှင့် ပင်စင်လစာတွက်ချက်နည်းများနှင့် စပ်လျဉ်း၍လည်းကောင်း၊ ပင်စင်နှင့် လုပ်သက် ဆုငွေတွက်ချက်နည်းများနှင့်စပ်လျဉ်း၍လည်းကောင်း၊ လုပ်သက်ရမှတ် အချိုးကျတွက်ချက်နည်းများကို  Power Point ဖြင့် ရှင်းလင်းဆွေးနွေးခဲ့ပါကြောင်းသိရှိရပါသည်။

DOCA(ပဲခူး)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြန်အောင်ခရိုင်၊ ကြံခင်းမြို့နယ် တာဝန်ခံသည် ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ အားကစားနှင့်ကာယပညာဦးစီးဌာနတို့နှင့်ပူးပေါင်း၍ ၂၀၂၃ ခုနှစ် ဖော်ဖော်ဝါရီလ (၁၀)ရက်နေ့ နံနက်(၁၀:၃၀)နာရီအချိန်တွင်  ရှောက်ခုံကျေးရွာ အုပ်စု၊ အ-လ-က ကျောင်း၌ ကျောင်းသား/ကျောင်းသူများနှင့် ဆရာ/ဆရာမများအား စားသုံးသူကာကွယ်ရေးအသိပညာပေးဟောပြောမှုများဆောင်ရွက်ခဲ့ပါသည်။

     ဟောပြောပွဲတွင် မြို့နယ်တာဝန်ခံ ဦးကျော်နိုင်ဝင်းက စားသုံးသူရေးရာဦးစီးဌာနပေါ်ပေါက်လာပုံ၊ ဌာန၏မျှော်မှန်းချက်၊ ရည်မှန်းချက်၊ စားသုံးသူကာကွယ်ရေးဥပဒေများအကြောင်း၊  စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်း၊ ဝန်ဆောင်မှုနှင့်စပ်လျဉ်း၍ အာမခံချက်ပေးခြင်းများအကြောင်း၊ ပြစ်မှုပြစ်ဒဏ်များအကြောင်းနှင့် ကျောင်းသား/ကျောင်းသူများအား အသင့်စားမုန့်အမျိုးမျိုးတို့ကို ဝယ်ယူစားသုံးရာတွင် ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကို အဓိကထား၍ ဖတ်ရှုရမည်ဖြစ်ကြောင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ နစ်နာဆုံးရှုံးမှုများရှိလာပါက စားသုံးသူရေးရာဦးစီးဌာနသို့ တိုင်ကြားနိုင်ခြင်းဖြစ်ကြောင်း၊ စားသုံးသူရေးရာဦးစီးဌာနက လက်ရှိဆောင်ရွက်နေသည့် လုပ်ငန်းဆောင်ရွက်ချက်များအကြောင်းကို သိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း စသည့်တို့ကို အသိပညာပေးဟောပြောခဲ့ပြီး တက်ရောက်လာသူများကလည်း သိလိုသည်များကိုမေးမြန်း၍ စားသုံးသူကာကွယ်ရေးဥပဒေစာအုပ်နှင့် လက်ကမ်းစာစောင်များကို ဖြန့်ဝေပေးခဲ့ကြပါသည်။

DOCA(ဧရာဝတီ)