HighLight News

        စားသုံးသူရေးရာဦးစီးဌာန၊ ပဲခူးတိုင်းဒေသကြီးဦးစီးမှူး၏ လမ်းညွှန်မှုဖြင့် ၂၁-၁၁-၂၀၂၄ ရက်နေ့၊ နံနက် (၁၀:၀၀) နာရီအချိန်တွင် ပဲခူးမြို့ပေါ်ရှိကုန်စုံဆိုင်များအား ကုန်အညွှန်း အမှတ်အသားများပြည့်စုံစွာဖော်ပြထားခြင်းရှိ/ မရှိကို ပဲခူးမြို့နယ်တာဝန်ခံ ဦးစိုးဝင်း၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ ဦးကျော်ဆန်းဝင်းနှင့် တာဝန်ရှိဝန်ထမ်းများက ဈေးကွက်စောင့်ကြည့်စစ်ဆေးခဲ့ကြပါသည်။

          ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူများ တိကျမှန်ကန်ရှင်းလင်းသော သတင်းအချက်အလက်များသိရှိစေရန်၊ ကုန်စည်အမျိုးအစားအလိုက် သတ်မှတ်ချက်များနှင့်အညီ ပြည့်စုံစွာဖော်ပြထားခြင်းရှိ/မရှိတို့ကို ဈေးကွက်စောင့်ကြည့်စစ်ဆေးခဲ့ကာ စားသုံးသူများဘေးအန္တရာယ်ကင်းရှင်းစေရန်၊ စိတ်ကျေနပ်မှုရှိစေရန်အတွက် အာမခံချက်ပေးနိုင်သည့် အရည်အသွေးမြင့်မားသောကုန်စည်နှင့် ဝန်ဆောင်မှုများဖြည့်ဆည်းပေးနိုင်စေရေးနှင့် စီးပွားရေးလုပ်ငန်းရှင်များအနေဖြင့် စားသုံးသူကာကွယ်ရေးဥပ‌ဒေအား သိရှိလိုက်နာဆောင်ရွက်ရန် အသိပညာပေးခြင်းများပြုလုပ်ဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

       ပဲခူးတိုင်းဒေသကြီး ဆန်သိုလှောင်ဈေးနှုန်းမြှင့်တင်ရောင်းချမှုများစိစစ်ရေးလုပ်ငန်းအဖွဲ့အနေဖြင့် (၂၁-၁၁-၂၀၂၄)ရက်နေ့၊ နံနက်(၀၉:၀၀)နာရီအချိန်တွင် ပဲခူးမြို့အတွင်းရှိ လက်လီ/ လက်ကားရောင်းချနေသော ဆန်ဆိုင်များသို့သွားရောက်ကာ ကွင်းဆင်းစစ်ဆေးခြင်းဆောင်ရွက်ခဲ့ပါသည်။

         ထိုသို့ကွင်းဆင်းစစ်ဆေးရာ လက်လီ/ လက်ကားရောင်းချနေသောဆန်ဆိုင်များနှင့် ဆန်သိုလှောင်ရုံများအနေဖြင့် ဈေးကစားရန်ရည်ရွယ်ချက်ဖြင့် ဆန်များသိုလှောင်ထားခြင်းမပြုလုပ်ကြစေရန်၊ သတ်မှတ်ထားသည့် သင့်တင့်မျှတသောဈေးနှုန်းများဖြင့်ရောင်းချနိုင်ရန်နှင့် ဈေးနှုန်းများကို အများပြည်သူမြင်သာသောနေရာတွင် မြင်သာသည့်အရွယ်အစားနှင့်ရေးသားဖော်ပြ၍ရောင်းချရန်၊ အလေးချိန်ပြည့်ဝမှန်ကန်စွာရောင်းချခြင်းရှိ/ မရှိ၊ မြန်မာဆန်စပါးအွန်လိုင်း (Myanmar Rice Online) (MyRo) တွင် မှတ်ပုံတင်ထားခြင်းရှိ/မရှိနှင့် မှတ်ပုံတင်ထားခြင်းမရှိပါက သက်ဆိုင်ရာမြို့နယ်အလိုက် စားသုံးသူရေးရာဦးစီးဌာနရုံးများနှင့်ချိတ်ဆက်၍ မှတ်ပုံတင်ခြင်းဆောင်ရွက်နိုင်ရေးတို့ကို အသိပညာပေးဆွေးနွေးကာ ကွင်းဆင်းစစ်ဆေးခြင်း ဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

             ၁၉.၁၁.၂၀၂၄ ရက်နေ့ နံနက် (၀၉:၃၀)နာရီအချိန်တွင် အင်းစိန်မြို့နယ်၊ အင်းစိန်ဈေးအတွင်း အခြေခံစားသောက်ကုန်ရောင်းချနေသော ကုန်မျိုးစုံဆိုင်သို့သွားရောက်၍ စားသုံးသူရေးရာဦးစီးဌာန၊ မြောက်ပိုင်းခရိုင်ဦးစီးမှူးရုံးမှ ဝန်ထမ်းများသည် အင်းစိန်ဈေးအတွင်းရှိ အခြေခံစားသောက်ကုန်ဈေးနှုန်းများ ရောင်းချနေမှုအခြေအနေများကိုသိရှိရန် အင်းစိန်မြို့နယ်ဈေးစည်ပင်သာယာအဖွဲ့နှင့်အတူ ကွင်းဆင်းစစ်ဆေးဆောင်ရွက်ခဲ့ပါသည်။

            ကွင်းဆင်းစစ်ဆေးရာတွင် အခြေခံစားသောက်ကုန်များဖြစ်သည့် ဆန်၊ ဆီ၊ ဆား၊ ငရုတ်၊ ကြက်သွန်ဈေးနှုန်းများ ငါး၊ ကြက်သား၊ ဝက်သား၊ ဆိတ်သား၊ အမဲသားဈေးနှုန်းများ၊ ဟင်းသီးဟင်းရွက်ဈေးနှုန်းများကို ဈေးနှုန်းအတက်/ အကျရှိ/ မရှိကိုကွင်းဆင်းမေးမြန်း၍ ယခင်အပတ်တွင် အသား၊ ငါးဈေးအနည်းငယ်တက်ခဲ့ပြီး ယခုအပတ်တွင် ဈေးနှုန်းတည်ငြိမ်နေပြီး ကုန်မျိုးစုံဆိုင်များရှိ ဈေးရောင်းချသူများကို ဈေးနှုန်းအဆမတန်မြှင့်တင်ရောင်းချခြင်း မပြုလုပ်ရန် အသိပညာပေးပြောကြားခဲ့ပြီး ဈေးနှုန်းကောက်ယူကွင်းဆင်းမေးမြန်းခဲ့ကြောင်း သိရှိရပါသည်။

DOCA(ရန်ကုန်)

              စားသုံးသူရေးရာဦးစီးဌာန၊ မှော်ဘီမြို့နယ်ခွဲရုံးမှ ဝန်ထမ်းများသည် ၁၉.၁၁.၂၀၂၄ ရက်နေ့ နံနက်(၀၉:၃၀)နာရီအချိန်တွင် မှော်ဘီမြို့နယ်၊ မြို့မ(၄)ရပ်ကွက်၊ ကွက်သစ် အ.မ.က (မူလွန်) ကျောင်းရှိ ကျောင်းသား/ ကျောင်းသူများအား စားသုံးသူအသိပညာပေး ဟောပြောဆွေးနွေးခဲ့ပါသည်။

            အဆိုပါ ဟောပြောပွဲတွင် ဒေါ်ဖြူဖြူမြင့်၊ ဒုကြီးကြပ်ရေးမှူးက စားသုံးသူအခွင့်အရေးနှင့် တာဝန်များ၊ ကုန်စည်များဝယ်ယူရာတွင် ကုန်အညွှန်းအမှတ်အသားများ ပြည့်စုံစွာဖော်ပြထားသော ကုန်စည်များကိုသာဝယ်ယူသုံးစွဲရန်၊ ကုန်စည်ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများရှိခဲ့လျှင် အရေးဆိုတိုင်ကြားနိုင်ကြောင်း၊ စားသုံးသူကိစ္စရပ်များ စုံစမ်းမေးမြန်းရန်အတွက် Call Center 1535 အား ဖွင့်လှစ်ထားရှိကြောင်း အသိပညာပေးဆွေးနွေးဟောပြောခဲ့ပြီး ဟောပြောပွဲတွင် ဆရာ/ ဆရာမ (၁၇)ဦး၊ ကျောင်းသား/ ကျောင်းသူ (၁၃၀)ဦး စုစုပေါင်း (၁၄၇)ဦး တက်ရောက်ခဲ့ကြောင်း သိရှိရပါသည်။

DOCA(ရန်ကုန်)

       စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည်   ၂၀-၁၁-၂၀၂၄ ရက်နေ့၊ နံနက် ၁၁း၀၀ နာရီအချိန်တွင် ပြည်နယ်ဦးစီးမှူးရုံးခန်း၌ “ရွှေကြက်ဖ” အမှတ်တံဆိပ် ဆန်ကြာဇံလုပ်ငန်းရှင်နှင့်တွေ့ဆုံဆွေးနွေးခဲ့သည်။

       ထိုသို့တွေ့ဆုံဆွေးနွေးရာတွင် ပြည်နယ်ဦးစီးမှူးက လုပ်ငန်းလည်ပတ်မှုအခြေအနေ၊ ကုန်ထုတ်လုပ်မှုအခြေအနေ၊ ကုန်ကြမ်းသုံးစွဲမှု၊ စက်လည်ပတ်သည့်ကာလ၊ လုပ်သားအင်အား၊ တစ်နေ့ထုတ်လုပ်မှု၊ ဈေးကွက်အခြေအနေ၊ အမြတ်ရရှိမှု၊ ကြုံတွေ့ရသောအခက်အခဲများအား ဆွေးနွေးမေးမြန်းရာ လုပ်ငန်းရှင်က “ရွှေကြက်ဖ” ဆန်ကြာဇံလုပ်ငန်းကို ၂၀၀၄ခုနှစ်မှ စတင်လုပ်ကိုင်ခဲ့ကြောင်း၊ တစ်နှစ်လျှင် စက်လည်ပတ်ချိန် (၅) လသာလည်ပတ်၍ ကျန်သည့်လများတွင် ရပ်နားထားရကြောင်း၊ တစ်နေ့လျှင် ဆန်ကြာဇံ (၅၀၀) ပိဿာထုတ်လုပ်ကြောင်း၊ ဆန်ကြာဇံထုတ်လုပ်ရန် ကုန်ကြမ်းအနေဖြင့် ဆန်ကို အဓိကထားကြောင်း၊ တစ်နေ့ထုတ်လုပ်မှုကုန်ကျစရိတ်မှာ (၂၅) သိန်းကုန်ကျကြောင်း၊ ကြာဇံ (၅) ပိဿာတစ်ထုပ်လျှင် (၃၀၀၀၀) ကျပ်ဖြင့်ရောင်းချရာ တစ်နေ့လျှင် ပျမ်းမျှအမြတ်ငွေ (၅) သိန်းခန့်ကျန်ရှိကြောင်း၊ ဈေးကွက်အနေဖြင့် မွန်ပြည်နယ်အတွင်းသာရောင်းချကြောင်း၊ လုပ်သားအင်အား (၂၅) ဦးအား အလုပ်အကိုင်ဖန်တီးပေးနိုင်ကြောင်း၊ အခက်အခဲအနေဖြင့် မတည်ရင်းနှီးငွေလိုအပ်လျက်ရှိကြောင်း ပြန်လည်ဆွေးနွေးခဲ့သည်။ ထို့နောက် ပြည်နယ်ဦးစီးမှူးက မတည်ရင်းနှီးငွေနှင့်စပ်လျဉ်း၍ နိုင်ငံ့စီးပွားမြှင့်တင်ရေးရန်ပုံငွေချေးငွေ၊ MSME ချေးငွေတို့ကို နိုင်ငံတော်မှ ထုတ်ချေးပေးလျက်ရှိကြောင်း ပြန်လည်ဆွေးနွေးခဲ့သည်။

DOCA(မွန်)