ပခုက္ကူဈေးကွက်တွင် ပြည်ပပို့ကုန် ပဲစင်းငုံနီများ ဈေးဆက်လက်မြင့်တက်လျက်ရှိ

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကုန်စည်ဒိုင်၌ ၂၀၂၆ ခုနှစ်၊ အောက်တိုဘာလ (ပထမပတ်)တွင်  ပဲစင်းငုံနီ ဈေးနှုန်းမှာ တစ်တင်း(၂၀ပိဿာ)လျှင် ကျပ်(၁၂၉၈၀၀)ဈေးဖြင့် နေ့စဉ်ပုံမှန် အရောင်းအဝယ်ဖြစ်နေပါသည်။ ယခင်လ(စက်တင်ဘာ)တွင် ပဲစင်းငုံနီတစ်တင်းလျှင် ကျပ်(၁၁၀၅၀၀) ဈေးပေါက်ခဲ့သဖြင့် ကာလတူဈေးနှုန်းနှိုင်းယှဉ်ပါက ကျပ်(၁၉၃၀၀)ဈေးနှုန်းမြင့်တက်လာကြောင်း တွေ့ရပြီး ယခင်နှစ် (၂၀၂၅ ခုနှစ်)တွင် ပဲစင်းငုံနီ တစ်တင်းလျှင် ကျပ်(၈၀၆၀၀)ဈေးသာ ပေါက်ခဲ့သဖြင့် ယခင်နှစ်နှင့် ဈေးနှုန်းနှိုင်းယှဉ်ပါက ကျပ်(၄၉၂၀၀)ဖြင့် သိသာစွာဈေးနှုန်းမြင့်တက်လာကြောင်း တွေ့ရပါသည်။

          သီးနှံအသစ်ပေါ်ရန် လအနည်းငယ်လိုသေးချိန်တွင် ကုန်သည်များနှင့် လှောင်လက်များထံ၌ ပဲလက်ကျန် နည်းပါးနေခြင်းကြောင့် ဈေးနှုန်းကျဆင်းခြင်းမရှိဘဲ ခိုင်မာနေခြင်း၊ ရန်ကုန်နှင့် မန္တလေး  ကုန်စည်ဒိုင်များတွင် ပဲစင်းငုံနီကို  အရည်အသွေးနှင့် သီးနှံအဟောင်း/ အသစ်အပေါ် မူတည်၍ ဈေးအမြင့်ဖြင့် အရောင်းအဝယ်ဖြစ်လျက်ရှိသည်။ လက်ရှိရရှိထားသော ပဲစင်းငုံနီဈေးနှုန်းများသည် တောင်သူများအတွက် စိုက်ပျိုးလိုစိတ်ကို မြှင့်တင်ပေးနိုင်သော်လည်း ရာသီသစ်ပဲများ ဈေးကွက်ထဲ အလုံးအရင်း မဝင်ရောက်မီအထိ ပဲစင်းငုံနီ ဈေးနှုန်းသည် လက်ကျန်နည်းပါးမှုအပေါ်မူတည်ကာ ဈေးအမြင့်တန်းတွင် ဆက်လက် တည်ငြိမ်နိုင်ကြောင်း သိရသည်။

          ပဲစင်းငုံဈေးကွက်သည် အိန္ဒိယနိုင်ငံ၏ ပဲဝယ်လိုအားကောင်းလာသည့်အချက်များကြောင့် ဈေး ဆက်လက်မြင့်တက်ခြင်း၊ လက်ရှိအချိန်သည် သီးနှံရာသီအကူးအပြောင်းဖြစ်သဖြင့် ကုန်သည်များနှင့် လှောင်လက်များထံတွင် ပဲလက်ကျန်နည်းပါးနေခြင်း၊ တောင်သူများနှင့် ကုန်သည်များက ဈေးလျှော့မရောင်းဘဲ တင်းခံထားခြင်းတို့ကြောင့် ဈေးနှုန်းများ ဆက်လက်မြင့်တက်နေခြင်းဖြစ်သည်။ လာမည့် ရာသီသစ် ပဲများ ဈေးကွက်ထဲသို့ အလုံးအရင်းနှင့် မဝင်ရောက်မီကာလအထိ (ဒီဇင်ဘာလ / ဇန်နဝါရီလ မတိုင်ခင်အထိ)ပဲစင်းငုံနီဈေးနှုန်းသည် လက်ရှိ ဈေးတန်းတစ်တင်းလျှင် (၁)သိန်းကျော် ဝန်းကျင်ထက် ဈေးမကျနိုင်ဘဲ အတက်ဘက်သို့ ဆက်လက်ဦးတည်နိုင်ကြောင်း ကုန်သည်များ၏ သုံးသပ်ချက်အရ သိရှိရပါသည်။

DOCA(မကွေး)