ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းများသည် တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့်အညီ စားသုံးသူကာကွယ်ရေး အသိပညာပေးခြင်းများကို ဆောင်ရွက်လျှက်ရှိရာ အောက်တိုဘာလ (၂) ရက်နေ့၊ နံနက်(၁၀:၀၀)နာရီအချိန်တွင် ကွမ်းခြံကုန်းမြို့နယ် မရမ်းကျေးရွာ၊ အခြေခံပညာမူလတန်းကျောင်းတွင် ဆက်စပ်ဌာနများနှင့် ပူးပေါင်း၍ အသိပညာပေးဟောပြောပွဲ ဆောင်ရွက်ခဲ့ကြောင်း သိရှိရသည်။
ထိုသို့ အသိပညာပေးဟောပြောပွဲဆောင်ရွက်ရာတွင် မြို့နယ်ပညာရေးဌာန၊ ပြန်ဆက်ဦးစီးဌာန၊ စားသုံးသူရေးရာဦးစီးဌာနတို့ ပူးပေါင်း၍ ပြန်ဆက်ဦးစီးဌာနမှ ဦးဆောင်ပြုလုပ်သော နယ်လှည့်စာကြည့်တိုက် နံရံကပ်စာစောင်၊ အသိပညာပေးဟောပြောပွဲတွင် ပြန်ဆက်ဦးစီးဌာနမှ ဦးစီးအရာရှိ ဒေါ်နန့်ဆွေနွယ်ဦးက စာအုပ်၊ စာစောင်များဖတ်ရှု့ရခြင်း အကျိုးကျေးဇူးများ၊ စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက စားသုံးသူကာကွယ်ရေးဥပဒေပါ စားသုံးသူ၏အဓိပ္ပါယ်၊ ကုန်စည်နှင့် ဝန်ဆောင်မှုအဓိပ္ပါယ်နှင့် စားသုံးသူအခွင့်အရေးနှင့်တာဝန်များ ကုန်စည်များတွင် ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့် ဖော်ပြရမည့်အချက်များနှင့် စားသုံးသူနစ်နာဆုံးရှုံးမှုများရှိပါက တိုင်ကြားနိုင်သည့် နည်းလမ်းများအကြောင်းတို့အား အသိပညာဟောပြောခဲ့ကြောင်း သိရသည်။
ထို့နောက် စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက တိုင်ကြားရမည့်နည်းလမ်းများတွင် Call Center 1535 သို့ ဖုန်းခေါ်ဆို၍ ၁,၂,၃ နံပါတ်များသို့ ဖုန်းခေါ်၍ တိုင်ကြားနိုင်ကြောင်း ဟောပြောခဲ့ရာ မရမ်းကျေးရွာ အ.မ.က ကျောင်းအုပ်ဆရာမကြီး ဒေါ်နန့်သဲမူမှ ၁၅၃၅ ဖုန်းနံပါတ်(၁)သို့ စမ်းသပ်ခေါ်ဆိုခဲ့သည်။ ထိုအသိပညာပေးဟောပြောပွဲသို့ ကျောင်းသား/ ကျောင်းသူ၊ ဆရာ/ ဆရာမ (၁၀၀)ဦးခန့် တက်ရောက်ခဲ့ကြောင်း သိရှိရပါသည်။
DOCA(ရန်ကုန်)