ပြည်ခရိုင်၊ ပြည်မြို့ရှိ စည်ပင်သာယာဈေးများနှင့် ရပ်ကွက်ဈေးများတွင် ခရိုင်အတွင်းရှိ မြို့နယ်အသီးသီးမှ ကန်စွန်းဥစိုက်တောင်သူများ လာရောက်ရောင်းချလျက်ရှိသည်။ ပြည်ဈေးကွက်ရှိ ကန်စွန်းဥများကို ပေါက်ခေါင်း၊ ပန်းတောင်း၊ ရွှေတောင်၊ ပေါင်းတလည်ဘက်မှ အများဆုံးဝင်ရောက် လျက်ရှိပြီး ပြည်မြို့နယ်အနီးတစ်ဝိုက်ရှိ ကျေးရွာများဖြစ်သော မှော်ဇာကျေးရွာ၊ တောင်လုံးညို ကျေးရွာများမှ လာရောက်ရောင်းချလျက်ရှိသည်။ ဈေးကွက်အတွင်း ရောင်းချလျက်ရှိသော ကန်စွန်းဥအမျိုးအစားပေါင်း များစွာရှိပြီး အသားမာမျိုးနှင့် အသားပျော့မျိုးဟူ၍ ခွဲခြားနိုင်သည်။ ကန်စွန်းဥ၏ အရောင်ပေါ်မူတည်၍ အမျိုးအစားခွဲခြားခြင်းဖြစ်သည်။ ကန်စွန်းဥသည် နွေ၊ မိုး၊ ဆောင်း ရာသီအသီးသီးတွင် မြေအခြေအနေပေါ်မူတည်၍ စိုက်ပျိုးကြပြီး ဥများရင့်ပြီး (၅) ပတ်၊ (၆) ပတ်အတွင်း ရိတ်သိမ်းနိုင်သည်။ ပြည်ဈေးကွက်တွင် မြန်မာကန်စွန်းဥ၊ ရွှေကန်စွန်းဥနှင့် ငချိတ် ကန်စွန်းဥများဟူ၍ အမျိုးအစား အမျိုးမျိုးဖြင့် ရောင်းချလျက်ရှိပြီး မြန်မာကန်စွန်းဥနှင့် ရွှေကန်စွန်းဥ တစ်ပိဿာလျှင် ကျပ် (၃၅၀၀ - ၄၀၀၀) အတွင်းရှိပြီး ငချိတ်ကန်စွန်းဥတစ်ပိဿာလျှင် ကျပ် (၄၀၀၀ - ၄၅၀၀) အတွင်း ရောင်းချလျက်ရှိကြောင်း သိရှိရပါသည်။
DOCA(ပဲခူး)