အင်ဒိုနီးရှားနိုင်ငံ၏ အမျိုးသားသကြားထုတ်လုပ်မှု တိုးတက်လာမည်ဟု အကောင်းမြင် ကြောင်း စိုက်ပျိုးရေးဝန်ကြီး Andi Amran Sulaiman က ပြောကြားခဲ့ပြီး အစိုးရ၏ မဟာဗျူဟာ မြောက်ပံ့ပိုးကူညီမှုများကြောင့် ပြည်တွင်းကြံအထွက်နှုန်းတိုးမြင့်လာကာ သကြားဖြူတင်သွင်းမှု အပေါ်မှီခိုနေရမှု လျှော့ချနိုင်မည်ဟု ဆိုပါသည်။ သကြားဖြူကို ပြည်ပမှ တင်သွင်းမှုမပြုလုပ်ရရန် မျှော်လင့်ကြောင်း Amran က Lampung ပြည်နယ် Tulang Bawang ခရိုင်ရှိ Sugar Group Companies (SGC) ၏ ကြံစိုက်ခင်းသို့ လုပ်ငန်းခရီးစဉ်အတွင်း ပြောကြားခဲ့ပါသည်။ စက်တင်ဘာ ၁ ရက် အင်္ဂါနေ့တွင် ထုတ်ပြန်သည့်ကြေညာချက်၌ Amran က အသေးစားတောင်သူများ ပိုင်ဆိုင်စိုက်ပျိုးသည့် ကြံစိုက်ခင်းများအနက် ၈၆ ရာခိုင်နှုန်းခန့်မှာ သီးနှံအစားထိုးစိုက်ပျိုးရန် လိုအပ်နေပြီး အကောင်းဆုံးအထွက်နှုန်းပြန်လည်ရရှိစေရန် ပြန်လည်စိုက်ပျိုးရေးလုပ်ငန်းများ ဆောင်ရွက်ရန်လိုအပ်ကြောင်း ပြောကြားခဲ့ပါသည်။ ယင်းပြဿနာကိုဖြေရှင်းရန်အတွက် သမ္မတ Prabowo Subianto က တောင်သူများအား မြေယာရှင်းလင်းခြင်းနှင့် သီးနှံပြန်လည်စိုက်ပျိုးခြင်း လုပ်ငန်းများဆောင်ရွက်နိုင်ရန် အစိုးရဘဏ္ဍာငွေခွဲဝေပေးရန် ညွှန်ကြားထားကြောင်း သိရပါသည်။
အမျိုးသားသကြားထုတ်လုပ်မှု တန်ချိန် ၃ သန်း ရရှိရန် ရည်မှန်းထားသည့်အတွက် စိုက်ပျိုးရေး ဝန်ကြီးဌာနသည် မြေယာများကို ထိရောက်စွာအသုံးချခြင်းနှင့် စိုက်ပျိုးရေးနည်းပညာပိုင်းဆိုင်ရာ တိုးတက်ကောင်းမွန်ရန် ဆောင်ရွက်ခြင်းတို့ကို အရှိန်မြှင့်တင်နေကြောင်း သိရပါသည်။ ထို့ပြင် တစ်ဟက်တာလျှင် ကြံတန်ချိန် ၁၀၀ ထုတ်လုပ်နိုင်ရန် ရည်မှန်းထားကြောင်း သိရပါသည်။ SGC ၏ လုပ်ငန်းခွင်များသို့သွားရောက်စဉ် Amran က ကျေးလက်ဒေသဖွံ့ဖြိုးတိုးတက်ရေးနှင့် စီးပွားရေးတည်ငြိမ်မှုအတွက် အကြီးစားစိုက်ပျိုးရေးလုပ်ငန်းများမှတစ်ဆင့် ပုဂ္ဂလိကကဏ္ဍက ပါဝင်ပံ့ပိုးပေးနေမှုကို ချီးကျူးပြောကြားခဲ့ကြောင်း သိရပါသည်။ SGC ကဲ့သို့သောကုမ္ပဏီများသည် အရေးပါသောအခန်းကဏ္ဍမှပါဝင်နေပြီး အလုပ်သမား ၄၀,၀၀၀ ခန့်ကို အလုပ်အကိုင်ပေးထား သကဲ့သို့ နိုင်ငံ၏စိုက်ပျိုးရေးဖွံ့ဖြိုးတိုးတက်မှုအတွက်လည်း တိုက်ရိုက်အထောက်အကူပြု နေကြောင်း Amran က ပြောကြားခဲ့ပါသည်။ ပြည်တွင်းသကြားထောက်ပံ့ရေးကွင်းဆက်ကို ခိုင်မာစေရန်နှင့် အမျိုးသားသကြားဖူလုံရေးရရှိရန်အတွက် ဗဟိုအစိုးရ၊ ပုဂ္ဂလိကသကြားကုမ္ပဏီ များနှင့် အသေးစားတောင်သူများအကြား အနီးကပ်ပူးပေါင်းဆောင်ရွက်မှုသည် မရှိမဖြစ်လိုအပ် ကြောင်း Amran က အလေးပေးပြောကြားခဲ့ပါသည်။
DOCA (ရန်ကုန်)