မြိတ်ခရိုင်အတွင်း ကုန်စိမ်းသီးနှံများအား ယခင်က ရန်ကုန်မြို့မှ ကားလမ်း၊ ရေလမ်းတို့ဖြင့် သယ်ယူရောင်းချခဲ့ကြပြီး ယခုအခါဒေသတွင် ကုန်စိမ်းသီးနှံများဖြစ်သော ဘူးသီး၊ ရုံးပတီသီး၊ ခရမ်းသီး၊ မုန်လာဥနီ၊ မုန်လာဥဖြူ၊ ကျောက်ဖရုံသီး၊ ဗုံလုံသီး၊ ငရုတ်သီးနှင့် ကိုက်လန်ရွက်၊ ကန်စွန်းရွက်၊ ချဥ်ပေါင်ရွက်၊ ပဲတောင့်ရှည်နှင့် အစရှိသည့် သီးနှံတို့ကို စိုက်ပျိုး၍ ဈေးကွက်အတွင်းသို့ ရောင်းချလာကြပါသည်။ ဒေသထွက်ကုန်စိမ်းသီးနှံသည် လတ်ဆက်မှုရှိခြင်း၊ ရန်ကုန်မှလာသော ကုန်စိမ်းသီးနှံများသည် လမ်းခရီးအခက်အခဲကြောင့် ဈေးနှုန်းကြီးမြင့်ခြင်းတို့ကြောင့် ဒေသထွက် ကုန်စိမ်းသီးနှံများကို ပိုမိုအရောင်းအဝယ်ဖြစ်လာကြပါသည်။ ကုန်စိမ်းသီးနှံများထဲမှ မုန်လာဥနီနှင့် မုန်လာဥဖြူသည် လူကြိုက်များလှပါသည်။ မုန်လာဥဖြူကို ကြော်လှော်၍ စားသုံးကြသလို အသားနှင့် ရော၍ ဟင်းရည်ချိုအဖြစ်လည်း စားသုံးကြကြောင်း သိရသည်။
၂၀၂၆ ခုနှစ်၊ သြဂုတ်လဒုတိယပတ်တွင် မုန်လာဥဖြူတစ်ပင်လျှင် (၁၀၀၀)ခန့်ရှိပြီး မုန်လာဥနီတစ်လုံးလျှင် (၁၅၀၀)ကျပ်နှင့် တစ်ပိဿာလျှင် (၈၀၀၀)ကျပ်ခန့် ရှိကြောင်း ကုန်စိမ်းရောင်းချသူများထံမှ သိရှိရပါသည်။
DOCA(တနင်္သာရီ)