မကွေးတိုင်းဒေသကြီး၊ ပခုက္ကူခရိုင်အတွင်းရှိ မြိုင်မြို့နယ်၊ ရေစကြိုမြို့နယ်နှင့် ပခုက္ကူမြို့နယ်အတွင်း ကျေးရွာများတွင် စိုက်ပျိုးခဲ့သည့် ပဲတီစိမ်းသီးနှံများ ပခုက္ကူမြို့ရှိ ပွဲရုံများသို့ လှိုင်လှိုင်ဝင် ရောက်လျက်ရှိကြောင်း ပခုက္ကူမြို့၊အမှတ် (၅)ရပ်ကွက်ရှိ “အာကာ” ပွဲရုံပိုင်ရှင်၏ ပြောပြချက်အရ သိရှိရပါသည်။
ပဲတီစိမ်းသီးနှံကို ရေစကြိုမြို့နယ်တွင် ရေသွင်းစိုက်ပျိုးသော ပဲတီစိမ်းကြီးနှင့် မိုးဦးကာလတွင် ပခုက္ကူ၊ မြိုင်၊ ရေစကြိုမြို့နယ်တို့တွင် စိုက်ပျိုးသည့် ပဲနှောက်စိမ်းသီးနှံ ဇွန်လမှ ယနေ့အချိန်ထိ လှိုင်လှိုင်ဝင်ရောက်လျက်ရှိပြီး ကုန်ဝင်အနေဖြင့် မိမိပွဲရုံကို တစ်နေ့လျှင် အိတ် (၅၀) မှ (၁၀၀) ခန့် ဝင်ရောက်လျက်ရှိပါသည်။ ပခုက္ကူမြို့ပေါ်ရှိ ပွဲရုံများ အားလုံးပေါင်း တစ်နေ့လျှင် (၁၅၀၀) ခန့် ဝင် ရောက်လျက်ရှိကြောင်း သိရှိရပါသည်။
ဈေးနှုန်းများအနေဖြင့်၂၀၂၆ခုနှစ်၊ ဇူလိုင်လ(စတုတ္ထပတ်)တွင် စိမ်းကြီး (ကျွန်း) (၁) တင်းလျှင် ကျပ် (၇၇၀၀၀ မှ ၈၃၀၀၀)၊ စိမ်းကြီး(ကုန်း) (၁)တင်းလျှင် ကျပ် (၉၀၀၀၀) နှင့် ပဲနှောက်စိမ်း(သေး) (၁)တင်းလျှင်ကျပ် (၉၅၅၀၀)ဈေးများဖြင့် အရောင်းအဝယ်ဖြစ်လျက်ရှိကြောင်း၊ ဇူလိုင်လ(ပထမ ပတ်)တွင် စိမ်းကြီး (ကျွန်း) (၁) တင်းလျှင် ကျပ် (၇၃၀၀၀ မှ ၇၉၀၀၀)၊ စိမ်းကြီး (ကုန်း) (၁)တင်းလျှင် ကျပ် (၈၅၀၀၀) နှင့် ပဲနှောက်စိမ်း (သေး) (၁) တင်းလျှင်ကျပ် (၉၃၀၀၀) ဖြင့် အရောင်းအဝယ်ဖြစ်ခဲ့ပြီး ဈေးနှုန်းနှိုင်းယှဉ်ပါက ယခုအချိန်တွင် ဈေးကွက်ဝယ်လိုအားရှိသောကြောင့် ဈေးအနည်းငယ်မြင့် တက်လျက်ရှိကြောင်း၊ မန္တလေးဒေသကြီးသို့ အများဆုံးတင်ပို့လျက်ရှိပြီး မန္တလေးမှ တရုတ်သို့ တင်ပို့ကြောင်း ပွဲရုံပိုင်ရှင်၏ ပြောပြချက်အရ သိရှိရပါသည်။
DOCA(မကွေး)