ထိုင်းနိုင်ငံသည် ဥရောပသမဂ္ဂ (EU) နှင့် လွတ်လပ်သောကုန်သွယ်ရေးသဘောတူစာချုပ် (FTA) ညှိနှိုင်းမှုများကို ယခုနှစ်ကုန်မတိုင်မီအပြီးသတ်နိုင်ရေး ရည်မှန်းဆောင်ရွက်လျက် ရှိကြောင်း သိရပါသည်။ သို့သော် စိုက်ပျိုးရေးထွက်ကုန်များနှင့် ကုန်ကြမ်းဆိုင်ရာ ကိစ္စရပ်များတွင် နှစ်ဖက်သဘောထားကွဲလွဲမှုများ ကျန်ရှိနေသေးကြောင်း သိရပါသည်။ ဝန်ကြီးချုပ် Anutin Charnvirakul က ဇူလိုင် ၁၇ ရက်တွင် အစိုးရအိမ်တော်၌ ဥရောပစီးပွားရေးအဖွဲ့အစည်းများ၏ အကြီးတန်းကိုယ်စားလှယ်များနှင့် ဥရောပကုမ္ပဏီ ၄၀ ကျော်မှ ကိုယ်စားလှယ်များကို တွေ့ဆုံပြီးနောက် ထိုသို့ပြောကြားခဲ့ကြောင်း သိရပါသည်။ အစိုးရပြောရေးဆိုခွင့်ရှိသူ Rachada Dhnadirek ၏ ပြောကြားချက်အရ ဝန်ကြီးချုပ်သည် EU–ASEAN Business Council (EU-ABC)၊ European Association for Business and Commerce (EABC) နှင့် အဓိကစက်မှုကဏ္ဍ ကိုးခုမှ ကုမ္ပဏီများ၏ ကိုယ်စားလှယ်များကိုကြိုဆိုတွေ့ဆုံခဲ့ပြီး ကုန်သွယ်ရေး၊ ရင်းနှီးမြှုပ်နှံမှုနှင့် စီးပွားရေးပူးပေါင်းဆောင်ရွက်မှုများကို ဆွေးနွေးခဲ့ကြောင်း သိရပါသည်။ ဝန်ကြီးချုပ်က ဥရောပ စီးပွားရေးလုပ်ငန်းများသည် ထိုင်းနိုင်ငံတွင် ရင်းနှီးမြှုပ်နှံမှုများတိုးချဲ့ရန် စိတ်ဝင်စားမှုကို ထပ်မံ အတည်ပြုခဲ့ကြပြီး ပုဂ္ဂလိကကဏ္ဍနှင့် အစိုးရအကြား ဆက်လက်ဆွေးနွေးညှိနှိုင်းနိုင်ရန် အစိုးရ၏ ကြိုးပမ်းမှုများကိုလည်း ချီးကျူးခဲ့ကြောင်း၊ ထိုင်းနိုင်ငံအနေဖြင့် ရင်းနှီးမြှုပ်နှံမှုများကို ဆွဲဆောင် ရန်၊ ခရီးသွားလုပ်ငန်းကိုမြှင့်တင်ရန်နှင့် ဒေသတွင်းထုတ်လုပ်မှုအခြေစိုက်စခန်းအဖြစ် အခန်းကဏ္ဍ ပိုမိုခိုင်မာစေရန် အသင့်ရှိကြောင်းနှင့် ထိုင်း–EU FTA ညှိနှိုင်းမှုများကို ယခုနှစ်မကုန်မီ အပြီးသတ်နိုင်ရေးအတွက် ဥရောပဘက်မှအားပေးထောက်ခံမှုကို မျှော်လင့်ကြောင်း ပြောကြားခဲ့ပါသည်။ ဝန်ကြီးချုပ်က ဆွေးနွေးမှုများသည် နောက်ဆုံးအဆင့်သို့ရောက်ရှိချိန်တွင် အရေးကြီးသည့် ကိစ္စရပ်များအပေါ် နှစ်ဖက်ညှိနှိုင်းဖြေရှင်းနေသည့်အတွက် နှေးကွေးသွားကြောင်း ဝန်ခံ ပြောကြားခဲ့ပါသည်။ ထိုသဘောတူစာချုပ်ကို အောင်မြင်စွာလက်မှတ်ရေးထိုးနိုင်ပါက နှစ်ဖက် ကုန်သွယ်မှု တိုးမြင့်လာမည်ဖြစ်ပြီး ထိုင်းပို့ကုန်များအနေဖြင့် ဥရောပဈေးကွက်သို့ အကောက်ခွန်ကင်းလွတ်စွာ ဝင်ရောက်နိုင်မည်ဖြစ်ကြောင်း သိရပါသည်။ ကျန်ရှိနေသည့် အဓိကအခက်အခဲများနှင့်ပတ်သက်၍ မေးမြန်းရာတွင် ဝန်ကြီးချုပ်က ကုန်ကြမ်းနှင့် စိုက်ပျိုးရေးထွက်ကုန်ဆိုင်ရာ ကိစ္စရပ်များသည် အဓိကဖြစ်ကြောင်းနှင့် သက်ဆိုင်သူအားလုံး၏ အကျိုးစီးပွားကို ကာကွယ်နိုင်ရေးအတွက် သတိထားဆောင်ရွက်ရန်လိုအပ်ကြောင်း ပြောကြားခဲ့ပါသည်။ ညှိနှိုင်းမှုနှင့် နီးစပ်သူတစ်ဦး၏ အဆိုအရ EU သည် စိုက်ပျိုးရေးကုန်ကြမ်းများ၏ မူလရင်းမြစ်နှင့်ပတ်သက်၍ တင်းကျပ်သည့်သတ်မှတ်ချက်များချမှတ်ထားပြီး ၎င်းတို့တွင် ပတ်ဝန်းကျင်ထိန်းသိမ်းရေးစံနှုန်းများ၊ သစ်တောပြုန်းတီးမှုတားဆီးရေးအစီအမံများနှင့် ဓာတုပစ္စည်းအသုံးပြုမှုဆိုင်ရာ စည်းမျဉ်းများပါဝင်ကြောင်း သိရပါသည်။ ထို့ပြင် သုညရာခိုင်နှုန်း အကောက်ခွန်ခံစားခွင့်ရရှိရန်အတွက် ကုန်ပစ္စည်းများတွင် ပြည်တွင်း သို့မဟုတ် မိတ်ဖက်နိုင်ငံများမှထည့်သွင်းအသုံးပြုသည့် ကုန်ကြမ်း အချိုးအစားကို သတ်မှတ်ထားသည့် ကုန်ပစ္စည်းမူလရင်းမြစ် သတ်မှတ်ချက် (Rules of Origin) များလည်းရှိကြောင်း သိရပါသည်။ အစိုးရပြောရေးဆိုခွင့်ရှိသူက ဥရောပစီးပွားရေးကိုယ်စား လှယ်များသည် ထိုင်းနိုင်ငံ၏မဟာဗျူဟာကျသောတည်နေရာ၊ ထုတ်လုပ်မှုစွမ်းရည်နှင့် ကျွမ်းကျင် လုပ်သားအင်အားတို့ကြောင့် ထိုင်းနိုင်ငံကို ဆွဲဆောင်မှုရှိသည့် ရင်းနှီးမြှုပ်နှံမှုဦးတည်ရာအဖြစ် ထပ်မံအတည်ပြုခဲ့ကြောင်း ပြောကြားခဲ့ပါသည်။ ထို့ပြင် ထိုင်း–EU လွတ်လပ်သောကုန်သွယ်ရေး သဘောတူစာချုပ်ကို ထောက်ခံကြောင်းနှင့် ထိုင်းနိုင်ငံ၏ စီးပွားရေးပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးအဖွဲ့ (OECD) အဖွဲ့ဝင်ဖြစ်ရေးကြိုးပမ်းမှုကိုလည်း ထောက်ခံကြောင်း ဖော်ပြခဲ့ပြီး ထုတ်လုပ်မှု၊ အသက်သိပ္ပံ၊ အစားအစာ၊ ဘဏ္ဍာရေး၊ ဒစ်ဂျစ်တယ်စီးပွားရေးနှင့် ဉာဏ်ရည်တု (AI) ကဏ္ဍများတွင် ပိုမိုနီးကပ်စွာ ပူးပေါင်းဆောင်ရွက်ရန် အဆိုပြုခဲ့ကြကြောင်း သိရှိရပါသည်။
Bangkok Post
DOCA (ရန်ကုန်)