စစ်ကိုင်းတိုင်းဒေသကြီး၊ ကန့်ဘလူမြို့နယ်အတွင်းရှိ ဒေသခံစိုက်ပျိုးတောင်သူများ စိုက်ပျိုး ထုတ်လုပ်ထားသော ဒေသထွက်နဂါးမောက်သီးများ စတင်ခူးဆွတ်ကာ ဈေးကွက်အတွင်းသို့ တင်ပို့ရောင်းချလျက်ရှိရာ ပေါ်ဦးပေါ်ဖျားဖြစ်သောကြောင့် အရောင်းအဝယ်သွက်လျက်ရှိကြောင်း သိရသည်။
နဂါးမောက်ပင်များသည် နွေရာသီကုန်ဆုံး၍ မိုးဦးကျကာလ မေလနှင့် ဇွန်လတို့တွင် စတင်အဖူး အပွင့်များ ပွင့်ကြပြီး ဇွန်လနှောင်းပိုင်းနှင့် ဇူလိုင်လဆန်းပိုင်းတို့တွင် အသီးများ စတင်ရင့်မှည့်ကာ ခူးဆွတ်ကြရသည်။ နဂါးမောက်သီးကို တစ်နှစ်လျှင် မေလမှ အောက်တိုဘာလအထိ (၆) လနီးပါးခန့် အသီးများ ခူးဆွတ်နိုင်ပြီး ယခုအခါ ပထမအသုတ်အဖြစ် ပေါ်ဦးပေါ်ဖျား စတင် ခူးဆွတ်နေခြင်း ဖြစ် သည်။
နဂါးမောက်ပင်သည် မြေမရွေး၊ ရာသီဥတုမရွေး စိုက်ပျိုးဖြစ်ထွန်းလွယ်ပြီး အပင်သက်တမ်း ရက်ပေါင်း ၃၀ မှ ၃၅ ရက်ဝန်းကျင်တွင် အသီးများရင့်မှည့်ကာ ဆွတ်ခူးနိုင်ပြီ ဖြစ်သည်။ ယခုနှစ်တွင် ရာသီဥတုမျှတပြီး ပြုစုပျိုးထောင်မှု ကောင်းမွန်ခြင်းကြောင့် အထွက်နှုန်း ကောင်းမွန်လျက်ရှိ ကြောင်း၊ စိုက်ပျိုးပြီး ဒုတိယနှစ်မှစ၍ အသီးပိုမိုထွက်ရှိကာ နှစ်ကြာလာသည်နှင့်အမျှ အထွက်နှုန်း ပိုမိုတိုးတက်လာကြောင်း စိုက်ပျိုးတောင်သူတစ်ဦးက ပြောကြားသည်။ လက်ရှိအချိန်တွင် ဒေသတွင်း၌ နဂါးမောက်သီးများ စတင်ပေါ်ထွက်နေပြီး အသီးအရွယ်အစားနှင့် အရည်အသွေးအပေါ် မူတည်၍ ဈေးနှုန်းများ ခွဲခြားရောင်းချလျက်ရှိသည်။ ဈေးကွက်အတွင်း အရောင်းအဝယ်ဖြစ်နေသော ဈေးနှုန်းများမှာ အသီးကြီး(တစ်လုံး)လျှင် ၁၀၀၀ ကျပ်၊ အသီးသေး(တစ်လုံး)လျှင် ၅၀၀ ကျပ်နှင့် အလုံးကြီး (၆ လုံး)လျှင် ၅၀၀၀ ကျပ်ဖြင့် အရောင်းအဝယ်ဖြစ်လျက်ရှိသည်။
"အခုအချိန်တွင် နဂါးမောက်သီးများ ပေါ်ဦးပေါ်ဖျားဖြစ်၍ စားသုံးသူများ အဝယ်လိုက်ကာ အရောင်းသွက်လျက်ရှိကြောင်း၊ အသီးများကလည်း လတ်ဆတ်ပြီး ဆေးဘက်ဝင်သည့်အတွက် မိသားစု အာဟာရအဖြစ်အစားအစာ၊ လက်ဆောင်ပေးရန် ဝယ်ယူကြသည့်အတွက် အရောင်းအဝယ် သွက်နေကြောင်း သိရသည်။
ကန့်ဘလူမြို့နယ်ထွက် နဂါးမောက်သီးများသည် အသားထူ၊ အရသာချိုမြိန်ပြီး သဘာဝအတိုင်း လတ်ဆတ်မှုရှိခြင်းကြောင့် ဒေသတွင်း သုံးစွဲသူများအပြင် အနီးအနားမြို့နယ်များရှိ သစ်သီးပွဲစားများ နှင့် စားသုံးသူများကပါ လာရောက်ဝယ်ယူလျက်ရှိသဖြင့် စိုက်ပျိုးတောင်သူများနှင့် မိသားစုဝင်များ အပိုဝင်ငွေရရှိကာ အဆင်ပြေလျက်ရှိကြောင်း သိရသည်။
DOCA(စစ်ကိုင်း)